TITUS
Ulrich von Eschenbach, Alexander
Part No. 219
Previous part

Chapter: 225  
Sonnen- und Mondbaum


Verse: 25887       ûf der ouwe, dâ er lac,
Verse: 25888    vernam er alsô süeʒen smac,

Verse: 25889    als ob alle würze dâ wærn zerriben,
Verse: 25890    von den man vindet geschriben.

Verse: 25891    gar süeʒe weide und guoteʒ gras
Verse: 25892    vil des dâ ze wege was.

Verse: 25893    der werde fürste junge
Verse: 25894    vant dâ guot wonunge.

Verse: 25895    waʒ sie ê kummers dolten,
Verse: 25896    wol sie sich des erholten.

Verse: 25897    die boten, die er het gesant,
Verse: 25898    die quâmen vür den wîgant.

Verse: 25899    sie jâhen daʒ sie niht vunden
Verse: 25900    und niht gemerken kunden,

Verse: 25901    daʒ in inder nâhen wære
Verse: 25902    gebûwet lant: daʒ was in swære.

Verse: 25903    dâ hieʒ im der künic wert
Verse: 25904    balde bringen sîn phert.

Verse: 25905    dar ûf saʒ er und reit von dan.
Verse: 25906    Tholomêus und manec ander man

Verse: 25907    die riten mit dem fürsten dô
Verse: 25908    ûf dem velde und wâren frô:

Verse: 25909    ir swære sie beclagten,
Verse: 25910    von irre nôt sie sagten,

Verse: 25911    der sie vil hâten erliten,
Verse: 25912    und tâten daʒ doch in vröuden siten.

Verse: 25913       Nû sach der künic einen man
Verse: 25914    verre ûf dem velde gân.

Verse: 25915    ze dem begunder gâhen.
Verse: 25916    dô er im was sô nâhen,

Verse: 25917    daʒ er alle sîne wort
Verse: 25918    moht vernemen und wol hôrt,

Verse: 25919    waʒ iu von cleider rîcheit
Verse: 25920    ist ûf dise zît geseit,

Verse: 25921    noch beʒʒer cleider truoc er an.
Verse: 25922    er was swarz und eislich getân.

Verse: 25923    sîn hâr gescheitelt unde lanc,
Verse: 25924    ein borte im daʒ zesamen twanc,

Verse: 25925    wol geworht und vollic spannenbreit,
Verse: 25926    manec tiure stein dar an geleit.

Verse: 25927    Alexander diz vür wunder jach,
Verse: 25928    daʒ er den sô ungestalten sach

Verse: 25929    und doch solich rîcheit an im vant.
Verse: 25930    zuo im sprach der wîgant

Verse: 25931    gar mit zühteclîchen siten
Verse: 25932    'hêrre guot, ich wolt iuch biten,

Verse: 25933    daʒ ir mir sagt die mære,
Verse: 25934    war iur geverte wære.

Verse: 25935    ist iu umb dise gegent iht kunt?'
Verse: 25936    der ungestalt sprach an der stunt

Verse: 25937    'morgen sô die sunne ûf gêt,
Verse: 25938    sô rîtent, dâ jener walt stêt.

Verse: 25939    zwêne boume dar inne stân,
Verse: 25940    die sollen iu etswaʒ wiʒʒen lân.

Verse: 25941    der eine boum der sunnen ist,
Verse: 25942    der ander des mânen, als man list.'

Verse: 25943    Alexander sîne wort
Verse: 25944    reht mercte unde hôrt.

Verse: 25945    er vaʒt sie eben in sînen muot.
Verse: 25946    des morgens fruo der helt guot,

Verse: 25947    als im jener het geseit,
Verse: 25948    fruo gegen dem walde reit.

Verse: 25949    ze den hêrren, die mit im riten,
Verse: 25950    der fürste sprach in vröuden siten

Verse: 25951       'Ich kam hînt in slâfes schouwe
Verse: 25952    ûf die allerschœnsten ouwe,

Verse: 25953    die mînen ougen ie wart kunt.
Verse: 25954    mitten ûf der ouwe stunt

Verse: 25955    ein boum, dem wunsche gelîche,
Verse: 25956    loubes unde este rîche,

Verse: 25957    der wint in âne mâʒen wegte,
Verse: 25958    daʒ er sich allenthalben regte.

Verse: 25959    ich gesach nie sô wunneclîchen boum.
Verse: 25960    im was getreten ûf den soum

Verse: 25961    ein man, der nâch den esten kreic,
Verse: 25962    dar an er vaste ze berge steic.

Verse: 25963    dô er an daʒ hœste quam,
Verse: 25964    dô lieʒ der boum lustsam

Verse: 25965    die este vallen und den man,
Verse: 25966    daʒ er lac tôt ûf dem plân.

Verse: 25967    sagt mir, lieben liute,
Verse: 25968    waʒ dirre troum bediute.'

Verse: 25969    alle die dâ wâren
Verse: 25970    ir rede gar verbâren

Verse: 25971    sunder aleine Tullius.
Verse: 25972    der beschiet im den troum alsus.

Verse: 25973    'die wunneclîche ouwe breit
Verse: 25974    ist die werlt und ir üppikeit,

Verse: 25975    die wir alle haben liep,
Verse: 25976    die uns doch stilt als ein diep

Verse: 25977    mit ir süeʒe unser tage.
Verse: 25978    ze lest sô læt sie uns in clage

Verse: 25979    den boum, den ir sâhet,
Verse: 25980    dem ir sô vil schœne jâhet,

Verse: 25981    den alsô vuorte der wint,
Verse: 25982    rîchtuom unde êre sint

Verse: 25983    und dirre werlde unstæte.
Verse: 25984    dô die der man erkrigen hête

Verse: 25985    und wânte sitzen veste,
Verse: 25986    daʒ dô brâchen die este,

Verse: 25987    daʒ bewiset uns daʒ
Verse: 25988    nie dehein man sô veste saʒ,

Verse: 25989    in lâʒe der werlde êre.
Verse: 25990    edel fürste hêre,

Verse: 25991    merket iuch selben hie bî.
Verse: 25992    ich wæne iu ditz gelîche sî.

Verse: 25993    der werlde êre habt ir erstigen
Verse: 25994    und den hœsten zil erkrigen:

Verse: 25995    nû jagt dar nâch mit witzen,
Verse: 25996    daʒ ir künnet veste sitzen,

Verse: 25997    daʒ iu der werlde unstæte
Verse: 25998    iht tuo, als der boum jenem tæte.'

Verse: 25999       der künic sprach 'wes ich iuch vrêge,
Verse: 26000    daʒ bescheidet ir mir unwêge.

Verse: 26001    wer wolle bliben âne vâr,
Verse: 26002    der sage sînem hêrren wâr.'

Verse: 26003    'mich selber ich triuge,
Verse: 26004    hêrre, wâ ich iu liuge

Verse: 26005    und quæme des lîhte in grôʒe scham.'
Verse: 26006    mit der rede er vür den vorst quam.

Verse: 26007       In dûhte daʒ in bevienge
Verse: 26008    ein mûre und ummegienge

Verse: 26009    und daʒ die hæte ein vesteʒ tor.
Verse: 26010    dâ reit Alexander vor

Verse: 26011    und bat sich dâ în lân.
Verse: 26012    daʒ tor wart gâhes ûf getân

Verse: 26013    und wider zuo an der stat.
Verse: 26014    vür daʒ tor her ûʒ trat

Verse: 26015    ein man, der frâgt in mære,
Verse: 26016    durch waʒ er dar komen wære.

Verse: 26017    der was als engeslich getân,
Verse: 26018    daʒ er in sach durch wunder an.

Verse: 26019    doch sprach der vürste geprîset
Verse: 26020    'gestern mich her wîset

Verse: 26021    ein man, dem ich widerreit.
Verse: 26022    von zwein boumen er mir seit

Verse: 26023    des mânen und der sunnen.
Verse: 26024    wolt ir mir des gunnen

Verse: 26025    daʒ ich ze den komen solde,
Verse: 26026    gerne ich daʒ dienen wolde,

Verse: 26027    wie ir, hêrre, gebietet mir.'
Verse: 26028    er sprach 'sît ir valscher gir

Verse: 26029    ledic und unkiusche frî?
Verse: 26030    wonet iu iht vingerlîn bî,

Verse: 26031    die tuot von iu und gêt her în
Verse: 26032    ir sult ouch ê entschuohet sîn.'

Verse: 26033       Der vürste tet von im zehant
Verse: 26034    die vingerlîn und sîn beingewant.

Verse: 26035    hin vuorte in der swarze man.
Verse: 26036    er bewîst im beide boume sân.

Verse: 26037    Alexander tet des êrsten goum
Verse: 26038    vil rehte an der sunnen boum,

Verse: 26039    ze dem er andæhteclîchen trat.
Verse: 26040    den boum er inneclîchen bat,

Verse: 26041    daʒ er in wolde wiʒʒen lân
Verse: 26042    wie lange er daʒ rîche solde hân.

Verse: 26043    ein stimme ûʒ dem boume sprach,
Verse: 26044    die im leider mære jach

Verse: 26045    'über sehs mânet und ein jâr
Verse: 26046    sô soltu sterben vür wâr.'

Verse: 26047    der künic wart der mære unfrô.
Verse: 26048    ze des mânen boume kniet er dô,

Verse: 26049    dâ er die selben rede vernam.
Verse: 26050    ze dem êrsten boume er wider quam.

Verse: 26051    'sît mîn tôt ist wiʒʒend dir,
Verse: 26052    ô heileger boum, sô sage mir,

Verse: 26053    welch sol wesen die nôt,
Verse: 26054    dâ von ich lîden sol den tôt?'

Verse: 26055    der boum sprach 'eʒ hât die schrift,
Verse: 26056    daʒ du solt sterben von vergift.'

Verse: 26057    ze dem andern boum er aber gienc,
Verse: 26058    den er mit bete dâ bevienc:

Verse: 26059    der sprach zuo im die selben wort,
Verse: 26060    als er sie het vernomen dort.

Verse: 26061    Der vürste sprach 'mahtu mir jehen,
Verse: 26062    von wem sol mir der tôt geschehen?

Verse: 26063    ist er mir fremde oder ist er mîn?'
Verse: 26064    der boum sprach 'des mac niht sîn.

Verse: 26065    ob ich dir tæt den menschen kunt,
Verse: 26066    den liestu tœten an der stunt,

Verse: 26067    ouch würt daʒ erfüllet niht,
Verse: 26068    daʒ der prophête von dir giht.'

Verse: 26069       dô gienc der vürste rîche
Verse: 26070    von den boumen trûreclîche.

Verse: 26071    er hôrte, daʒ manc sitech sprach
Verse: 26072    êbrêisch, der er vIl dâ sach.

Verse: 26073    ze den sînen gienc der guote
Verse: 26074    in trûrigem muote,

Verse: 26075    den er die mære sagte
Verse: 26076    und in die swære clagte.

Verse: 26077    trœsten sie in begunden,
Verse: 26078    als sie vil wol kunden.

Verse: 26079    trûreclîchen kêrter dan
Verse: 26080    ze sînem her ûf dem plân.

Verse: 26081    er wolde kêren ze lande.
Verse: 26082    er vrâgt ob ieman kande

Verse: 26083    ander wege gegen Indiâ.
Verse: 26084    nû was ein man under in dâ,

Verse: 26085    der sprach im wære wol bekant
Verse: 26086    beʒʒer geverte durch daʒ lant,

Verse: 26087    den daʒ ûf dem sie quâmen dar.
Verse: 26088    dô sprach der vürste offenbâr

Verse: 26089    'bringent ir uns wol ze lande hin,
Verse: 26090    daʒ sol wesen iur gewin.

Verse: 26091    ich rîche iuch immer mêre'
Verse: 26092    von dannen schiet der hêre.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.