TITUS
Ulrich von Eschenbach, Alexander
Part No. 216
Previous part

Chapter: 251  
Entführt von nackten Frauen


Verse: 25645       Nû het sich der fürste werde
Verse: 25646    gelegt gegen eime werde,

Verse: 25647    dâ niht wann rôr inne was,
Verse: 25648    gelîch grôʒen boumen, als ichʒ las.

Verse: 25649    der wert was grôʒ unde breit.
Verse: 25650    dar inne vil vrowen (ist mir geseit)

Verse: 25651    wârn (als uns die crônike giht)
Verse: 25652    gar nact und doch ir lîbes lieht,

Verse: 25653    geschicket minneclîche
Verse: 25654    der minnen wunsche gelîche;

Verse: 25655    gar wîplîche bilde.
Verse: 25656    wie sie sô wâren wilde,

Verse: 25657    sie kunden doch die minne wenen,
Verse: 25658    daʒ sie sich nâch minne kunden senen.

Verse: 25659    dô die daʒ heten vernomen,
Verse: 25660    daʒ der fürste dar was komen,

Verse: 25661    den tac sie sich verhâlen,
Verse: 25662    in der naht sie sich stâlen

Verse: 25663    ûʒ dem werde in daʒ her.
Verse: 25664    swaʒ sie gar âne wer

Verse: 25665    slâfende vunden,
Verse: 25666    wen sô het überwunden

Verse: 25667    des waʒʒers süeʒe und ander tranc,
Verse: 25668    daʒ ir wer dâ was kranc,

Verse: 25669    (sie lâgen als ob sie wæren tôt,
Verse: 25670    man het sie sanfte brâht in nôt;

Verse: 25671    wær ieman des nahtes an sie komen,
Verse: 25672    er moht in habe dâ hân genomen)

Verse: 25673    nû hœrt, waʒ tâten die wîp:
Verse: 25674    manegen unversunnen lîp

Verse: 25675    und manegen trunkenen man
Verse: 25676    des nahtes fuorten sie von dan

Verse: 25677    in den wert an ir gemach,
Verse: 25678    der des morgens in dem her gebrach.

Verse: 25679    der kneht den hêrren het verlorn,
Verse: 25680    der hêrre den kneht, daʒ was in zorn.

Verse: 25681    dô dem fürsten daʒ vür kam,
Verse: 25682    grôʒ wunder in daʒ nam,

Verse: 25683    war sie komen wæren.
Verse: 25684    eʒ kunde in beswæren,

Verse: 25685    daʒ er an sînem volke kôs
Verse: 25686    solchen schaden und sie verlôs

Verse: 25687    âne werlîchen strît.
Verse: 25688    eʒ was nû wol ûf eʒʒens zît.

Verse: 25689    dô lieʒen sich die vrouwen
Verse: 25690    ûf dem waʒʒer schouwen.

Verse: 25691    dâ fuorten meide unde wîp
Verse: 25692    manegen wol geschicten lîp:

Verse: 25693    wie in der cleider gebrach,
Verse: 25694    liehter varwe man in doch jach.

Verse: 25695    der vrouwen was unmâʒen vil.
Verse: 25696    ieglîche het sunder irn kiel.

Verse: 25697    ze dem stade die Kriechen trâten,
Verse: 25698    die vrouwen sie des bâten

Verse: 25699    daʒ sie zuo in füeren.
Verse: 25700    dâ begunden sie dar rüeren.

Verse: 25701    genuoc ir zuo in sâʒen.
Verse: 25702    die vrowen sich nicht vergâʒen,

Verse: 25703    welche ie einen begriffen hete,
Verse: 25704    sie zôch wider an der stete

Verse: 25705    und fuortin gegen dem werde dan.
Verse: 25706    von dem lande quam ein man,

Verse: 25707    der in daʒ varn mit in verbôt.
Verse: 25708    der sagte in daʒ sie müesten nôt

Verse: 25709    von den vrouwen lîden,
Verse: 25710    die sie gerne möhten mîden.

Verse: 25711       Dô sprach der künic 'wie mac daʒ sîn?'
Verse: 25712    der wold ouch sîn geseʒʒen în.

Verse: 25713    der lantman ze dem fürsten sprach
Verse: 25714    'habt ir ie guot gemach

Verse: 25715    oder senfte zît gewunnen,
Verse: 25716    des müeʒt ir iuch verkunnen,

Verse: 25717    ob ir mit in über vart.
Verse: 25718    ich rât iu, hêrre, daʒ irʒ spart.'

Verse: 25719    der fürste sprach 'mahtu mir jehen,
Verse: 25720    waʒ leides möhte von in geschehen

Verse: 25721    mir oder einem andern man?
Verse: 25722    sie sint sô güetlich getân

Verse: 25723    und gestalt sô minneclîche,
Verse: 25724    sie müeʒen güete rîche

Verse: 25725    und gar ân allen wandel wesen.
Verse: 25726    ich hofte wol bî in genesen.'

Verse: 25727    der lantman sprach 'ich wil iu sagen
Verse: 25728    einen siten, den die vrouwen tragen:

Verse: 25729    wenn sie begrîfen einen man,
Verse: 25730    den wellen sie nimmer von in lân.

Verse: 25731    eine spîse sie im geben,
Verse: 25732    daʒ er immer gerne leben

Verse: 25733    bî den vrouwen wolde,
Verse: 25734    ob eʒ alsô wesen solde.

Verse: 25735    die kost der manne sinne
Verse: 25736    reiʒet gegen in sô ûf minne,

Verse: 25737    daʒ sie sich sô sêre nœten
Verse: 25738    an in, biʒ sie sich tœten.

Verse: 25739    hêrre, ich sage iu daʒ vür wâr:
Verse: 25740    waʒ iuwer liute ist komen dar,

Verse: 25741    irn nemet sie dannen in kurzer frist,
Verse: 25742    ir keiner ir nimmê genist.'

Verse: 25743       Dô hieʒ der künic balde
Verse: 25744    gâhen ze walde

Verse: 25745    und starke schif bereiten
Verse: 25746    und die ûf daʒ waʒʒer leiten.

Verse: 25747    dô man die schif dar brâhte,
Verse: 25748    in den wert der fürste gâhte.

Verse: 25749    dô die wîp heten vernomen
Verse: 25750    daʒ der fürste wolde komen,

Verse: 25751    ûf daʒ waʒʒer sie sich zugen,
Verse: 25752    vor vorhten sie den künic vlugen.

Verse: 25753    als er in den wert quam,
Verse: 25754    grôʒen jâmer er vernam,

Verse: 25755    er vant sîn volc wol halbeʒ tôt,
Verse: 25756    die andern sô in kranker nôt,

Verse: 25757    hæt er sie niht von dannen genomen,
Verse: 25758    sie wæren ouch von lîbe komen.

Verse: 25759    doch wurden im der vrouwen zwô,
Verse: 25760    die er ouch mit im fuorte dô

Verse: 25761    hinwider an die legerstat,
Verse: 25762    von dannen er sich erhaben hat.

Verse: 25763    er muoste dâ lenger wesen,
Verse: 25764    durch daʒ daʒ volc möhte genesen

Verse: 25765    und wider quæme an sîn craft.
Verse: 25766    guot gemach wart in geschaft.

Verse: 25767    als mir der meister vergiht,
Verse: 25768    sie jâmert mêr dar nâch minne niht.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.