TITUS
Ulrich von Eschenbach, Alexander
Part No. 215
Previous part

Chapter: 259c  
Fledermäuse


Verse: 25607       Den alle zagheit ie vlôch
Verse: 25608    daʒ waʒʒer vürbaʒ ze berge zôch

Verse: 25609    eteliche tageweide.
Verse: 25610    wunneclîche ougelweide

Verse: 25611    wart dem fürsten dâ bekant.
Verse: 25612    ein schœne ouwe er dâ vant.

Verse: 25613    die sîne kunft vernâmen
Verse: 25614    von dem lande dar quâmen:

Verse: 25615    beide man fuorte unde truoc
Verse: 25616    in daʒ her in spîse genuoc

Verse: 25617    und trinkens, des sie mohte zemen.
Verse: 25618    sie mohten dâ ze koufe nemen

Verse: 25619    ûf dem markte waʒ sie wolden
Verse: 25620    und ze nœten haben solden.

Verse: 25621    einʒ fröute wol des povels muot:
Verse: 25622    daʒ waʒʒer was süeʒe unde guot,

Verse: 25623    als eʒ mit honege wær getworn
Verse: 25624    und gesoten: des heten sieʒ bevorn.

Verse: 25625    sien durften niht phenninge dar um geben.
Verse: 25626    man sach sie frechlîche leben

Verse: 25627    und stæte alsô trunken sîn,
Verse: 25628    als ob sie trunken guoten wîn,

Verse: 25629    dâ sie alse lâgen,
Verse: 25630    nâch unruowe ruowe phlâgen.

Verse: 25631    dô der âbent ane gienc,
Verse: 25632    ein ander phlâge sie bevienc.

Verse: 25633    eʒ vlugen ûʒ ir klûse
Verse: 25634    manic tûsent vledermûse

Verse: 25635    gelîch grôʒ den tûben,
Verse: 25636    die in ûʒ den hûben

Verse: 25637    die ôren abe riʒʒen
Verse: 25638    und die nasen abe biʒʒen.

Verse: 25639    erwern sie in des niht kunden.
Verse: 25640    waʒ sie blôʒes an in funden,

Verse: 25641    eʒ wære vinger oder hant,
Verse: 25642    in wurde versêrn dar an bekant:

Verse: 25643    die mûse eʒ von in zarten,
Verse: 25644    daʒ sie vürbaʒ bewarten.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.