TITUS
Ulrich von Eschenbach, Alexander
Part No. 125
Previous part

Chapter: 196  
Verbrennung der Beute


Verse: 17613       dô gebôt der fürste sân
Verse: 17614    sîn reise gegen Bractân.

Verse: 17615    dar inne het Bessus einen man
Verse: 17616    getriuwen und biderben gelân,

Verse: 17617    der daʒ künicrîche
Verse: 17618    hielt gar werlîche.

Verse: 17619    ûf strît er sich berihtet het,
Verse: 17620    den Kriechen er grôʒen schaden tet.

Verse: 17621    Bessus het im sînen suon
Verse: 17622    bevolhen, dem wolt er triuwe tuon.

Verse: 17623    er wolde ouch dem selben knaben,
Verse: 17624    ob er möhte, die lant behaben,

Verse: 17625    der het doch schaden vil gekorn
Verse: 17626    an sînem vater, den er het verlorn.

Verse: 17627       Die hêrren algelîche
Verse: 17628    giengen vür den fürsten rîche.

Verse: 17629    sie jâhen daʒ in swære
Verse: 17630    die reise gegen Bractân wære,

Verse: 17631    eʒ wære ouch nû wol ze mâʒen
Verse: 17632    daʒ er wolde sîn strîten lâʒen,

Verse: 17633    daʒ er im etswenne næme
Verse: 17634    kurzewîle, die fürsten zæme.

Verse: 17635    alsô die rede vor im geschach.
Verse: 17636    die was dem künge ungemach.

Verse: 17637    er sprach 'es ist die rede niht.
Verse: 17638    daʒ man iuch nû sô træge siht,

Verse: 17639    ich weiʒ wol waʒ iuch wirret,
Verse: 17640    daʒ iuch der reise irret:

Verse: 17641    ir sît des guotes überladen,
Verse: 17642    daʒ wil iu an prîse schaden.

Verse: 17643    nû gebiut ich daʒ ein ieglich man,
Verse: 17644    waʒ er guotes mac gehân,

Verse: 17645    daʒ heiʒe er tragen ûf den plân.
Verse: 17646    von welchem daʒ niht wirt getân,

Verse: 17647    den wil ich haʒʒes immer wern
Verse: 17648    und muoʒ mîner hulde enbern.'

Verse: 17649    dô jâhen sie daʒ sie wolden
Verse: 17650    varn war sie solden.

Verse: 17651    er sprach 'wann sô daʒ geschiht,
Verse: 17652    guot zît man iuch varn siht.'

Verse: 17653    wie ungerne sie eʒ tâten,
Verse: 17654    alleʒ daʒ sie hâten,

Verse: 17655    daʒ lieʒen sie tragen ûf daʒ velt,
Verse: 17656    golt, gesteine, silber, gezelt,

Verse: 17657    cleinôte, manic rîch gewant
Verse: 17658    geworht mit meisterlîcher hant.

Verse: 17659    grôʒ vorhte sie des treip;
Verse: 17660    niuwan ros und harnasch in bleip:

Verse: 17661    des twanc sie triuwe und êre
Verse: 17662    daʒ sie in vorhten sêre.

Verse: 17663    dô hieʒ der künec ouch, hôrt ich sagen,
Verse: 17664    allen sînen hort dar tragen.

Verse: 17665    dô gebôt der Pelliur
Verse: 17666    daʒ man machte grôʒe viur

Verse: 17667    und al daʒ guot verbrente.
Verse: 17668    welcher daʒ erwente,

Verse: 17669    des des guotes iht wære gewesen,
Verse: 17670    der enmohte niht genesen:

Verse: 17671    koche, garzûne, schüllen
Verse: 17672    solden ir secke füllen,

Verse: 17673    waʒ armer liute wære
Verse: 17674    ringen dâ mit ir swære.

Verse: 17675    von den deheiner pheninc mohte hân,
Verse: 17676    ob man im solt sîn ros beslân,

Verse: 17677    ern wolde danne borgen:
Verse: 17678    umb ander guot sie sorgen

Verse: 17679    muosten und sich wâgen,
Verse: 17680    ob sie armuot wolde betrâgen,

Verse: 17681    und ob in tet ir kummer wê,
Verse: 17682    sie muosten sich erburn als ê.

Verse: 17683    er lieʒ sie guot zît verdonen
Verse: 17684    und alsô in kummer wonen.

Verse: 17685    er jach, als sie geruochten habe,
Verse: 17686    die müesten sie den vînden abe

Verse: 17687    herteclich gewinnen.
Verse: 17688    sie jâhen daʒ sie beginnen

Verse: 17689    waʒ er gebute wolden
Verse: 17690    und gerne varn solden,

Verse: 17691    wann in der lîp unmære
Verse: 17692    von rehter armuot wære.

Verse: 17693    dô sprach der unverzagte man
Verse: 17694    'daʒ wære beʒʒer ê getân.'

Verse: 17695    dô muosten sie gegen Bractâne
Verse: 17696    zogen irs guotes âne,

Verse: 17697    dâ vor sie grôʒen kummer liten,
Verse: 17698    ê sie die stat erstriten.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.