TITUS
Ulrich von Eschenbach, Alexander
Part No. 124
Previous part

Chapter: 186  
Die Amazonen


Verse: 17399       Daʒ ahte buoch uns saget sô:
Verse: 17400    dô der werde Macedô

Verse: 17401    gegen Ircâniâ wolde varn
Verse: 17402    und daʒ deheine wîs niht sparn,

Verse: 17403    als er doch tet und dô betwanc
Verse: 17404    die lant, der ie nâch prîse ranc,

Verse: 17405    dô er noch in den landen lac
Verse: 17406    und dâ vil wirdikeite phlac;

Verse: 17407    nû kam in wunderlîchen siten
Verse: 17408    ein rîche künigîn geriten,

Verse: 17409    zweihundert junger frouwen
Verse: 17410    mohte man bî ir schouwen.

Verse: 17411    sie fuorten allesamt bogen
Verse: 17412    und wârn doch hübsch und wol gezogen.

Verse: 17413    die künigîn selbe fuorte
Verse: 17414    einen bogen, ein gezerf, daʒ ruorte

Verse: 17415    tiure kost gar rîche.
Verse: 17416    sie wârn gecleidet glîche.

Verse: 17417    von spæhem werke ir gewant,
Verse: 17418    daʒ an den frouwen was bekant,

Verse: 17419    eʒ wante in niuwan an die knie:
Verse: 17420    gar schœne phert riten sie.

Verse: 17421    die künigîn von Amâzôn
Verse: 17422    von dem waʒʒer Phâsidôn

Verse: 17423    unz an daʒ gebirge Kaucasas
Verse: 17424    al der lande frouwe was,

Verse: 17425    die sîn lanc unde wît.
Verse: 17426    dâ niht ze stæter zît

Verse: 17427    siht man wonen die man:
Verse: 17428    wann die die frouwen wellen hân,

Verse: 17429    sô senden sie in ander lant,
Verse: 17430    daʒ ist ouch Amâzôn genant

Verse: 17431    und ist doch underscheiden.
Verse: 17432    ich sage iu von in beiden.

Verse: 17433    dô sint niht frouwen inne:
Verse: 17434    die man durch liebe der minne

Verse: 17435    müeʒen über den Phâsidôn
Verse: 17436    in der frouwen lant Amâzôn.

Verse: 17437    wann sich daʒ gevüeget
Verse: 17438    daʒ des die frowen genüeget,

Verse: 17439    sô müeʒen alzehant die man
Verse: 17440    wider über daʒ waʒʒer dan.

Verse: 17441    ein site die lant ouch niht verbirt:
Verse: 17442    waʒ dâ kinder inne wirt,

Verse: 17443    welch under in wirt ein kneht,
Verse: 17444    dem haben funden sie ein reht:

Verse: 17445    wann sô komet der tac,
Verse: 17446    daʒ man eʒ entwenen mac,

Verse: 17447    daʒ sendet man dann alzehant
Verse: 17448    sînem vater in der manne lant;

Verse: 17449    ist aber eʒ ein meidelîn,
Verse: 17450    sô muoʒ eʒ bî der muoter sîn.

Verse: 17451    ich wil iu von den frouwen sagen:
Verse: 17452    niht wann ein brüstelîn sie tragen,

Verse: 17453    daʒ haben sie den kinden lân,
Verse: 17454    daʒ ander haben sie vertân,

Verse: 17455    des sint sie sleht als ein hant.
Verse: 17456    daʒ Alexander wol bevant.

Verse: 17457       Thalêstris die künigin
Verse: 17458    hete doch wîplîchen sin

Verse: 17459    und gar minniclîchen lîp.
Verse: 17460    sie was noch magt und niht wîp.

Verse: 17461    dô sie kam ûf daʒ velt
Verse: 17462    geriten vür des fürsten gezelt,

Verse: 17463    der keiser ir entgegen gienc,
Verse: 17464    wirdiclich er sie enphienc.

Verse: 17465    Thalêstris die rîche
Verse: 17466    im dancte flîʒeclîche.

Verse: 17467    ir kunft nam in wunder
Verse: 17468    und al die hêrren besunder.

Verse: 17469    ir gevertes und ir cleider
Verse: 17470    sie wundert sêre beider.

Verse: 17471    als schiere als sie den fürsten sach,
Verse: 17472    ir herze ir minne an in verjach.

Verse: 17473    an guot gemach die geste wert
Verse: 17474    wurden gefuort und ouch ir phert,

Verse: 17475    so daʒ in nihtes gebrach.
Verse: 17476    Thalêstris wider sich selbe sprach

Verse: 17477    'sît daʒ man dirre werden jugent
Verse: 17478    giht sô volleclîcher tugent,

Verse: 17479    die dem werden sint gemeine,
Verse: 17480    und ist doch ein mensche sô cleine;

Verse: 17481    zwâre diz ist ein wunder grôʒ,
Verse: 17482    daʒ noch nie wart sîn genôʒ,

Verse: 17483    der sô vil prîses kunde bejagen.
Verse: 17484    diz hœr ich alle liute sagen

Verse: 17485    und daʒ manic grôʒer man
Verse: 17486    solcher wirde ist erlân,

Verse: 17487    als sîn menlich herze hât
Verse: 17488    erworben mit ellenthafter tât.

Verse: 17489    daʒ komet von sîme herzen guot,
Verse: 17490    daʒ vor zagheit ist behuot,

Verse: 17491    daʒ ze wirde ist erkorn,
Verse: 17492    als im von art ist angeborn.'

Verse: 17493    eʒ jach die küniginne
Verse: 17494    daʒ der künc ir sinne

Verse: 17495    und ir herze hete bevangen
Verse: 17496    mit liebe craft. der kam gegangen

Verse: 17497    in der gezelde palas,
Verse: 17498    dâ Thalêstris inne was.

Verse: 17499    der werde Alexander,
Verse: 17500    ein werde rote dâ vander.

Verse: 17501    der nie wirdikeit vergaʒ
Verse: 17502    mit zuht er ze der maget saʒ.

Verse: 17503    er bat im sagen mære
Verse: 17504    durch waʒ sie komen wære:

Verse: 17505    ob sie wolden nemen solt,
Verse: 17506    gerne er in den geben wolt;

Verse: 17507    oder ob er iht hæte
Verse: 17508    des die frouwe bæte

Verse: 17509    in allem sînen rîche,
Verse: 17510    dar über frîlîche

Verse: 17511    solde sie gebieten,
Verse: 17512    irs willen sich dar an nieten.

Verse: 17513       Dô sprach Thalêstris, die küniginne:
Verse: 17514    'herze, lîp und sinne

Verse: 17515    habent mich her ze iu gejagt.
Verse: 17516    ich bin des willen unverzagt,

Verse: 17517    hêrre, ich sage iu mînen muot.
Verse: 17518    lant, liute, lîp und guot

Verse: 17519    sol ze iuwerm gebote sîn.'
Verse: 17520    er sprach 'gnâde, frouwe mîn.

Verse: 17521    waʒ ir lande muget hân,
Verse: 17522    die suln von mir sîn erlân

Verse: 17523    strîtes und twingens wesen frî.
Verse: 17524    ich wil iu sîn mit helfe bî.

Verse: 17525    ist iht anders daʒ ir welt,
Verse: 17526    des muotet' sprach der werde helt.

Verse: 17527    dô sprach die küniginne
Verse: 17528    'ich bite iuch umbe minne.

Verse: 17529    wirde ich der von iu gewert
Verse: 17530    und eins kindes, als mîn herze gert,

Verse: 17531    hêrre, so ist verborgen
Verse: 17532    mîn vîntlîcheʒ sorgen

Verse: 17533    und stîget mîn gemüete hô,
Verse: 17534    ob daʒ die gote flüegent sô.'

Verse: 17535    güetlich er an die frouwen sach.
Verse: 17536    ir schœne sîme herzen jach

Verse: 17537    daʒ er der lieben mære
Verse: 17538    unmâʒen frô wære,

Verse: 17539    iedoch sprach er in schame rôt
Verse: 17540    'frowe mîn, ir solt durch got

Verse: 17541    mich der rede erlâʒen,
Verse: 17542    sie ist mir niht ze mâʒen.

Verse: 17543    wær ich âne wîp ein man,
Verse: 17544    frowe, ditz wær von mir getân.

Verse: 17545    frowe, eʒ ist niht lange zît
Verse: 17546    daʒ ich nam, die mir vil fröiden gît,

Verse: 17547    ein vil minniclîcheʒ wîp,
Verse: 17548    die ich vür mîn selbes lîp

Verse: 17549    mit getriuwelîchem sinne
Verse: 17550    in mînem herzen minne.

Verse: 17551    ob daʒ von uns ergienge nuo,
Verse: 17552    frowe, waʒ spræche die dâ zuo?'

Verse: 17553    sie sprach 'ich kan der mâʒe gern,
Verse: 17554    dar umbe sult ir mich gewern.

Verse: 17555    wer solt lân verterben
Verse: 17556    sô minneclîcheʒ werben,

Verse: 17557    ob wirʒ lieʒen an reht,
Verse: 17558    weder ritter noch der kneht

Verse: 17559    kunden daʒ verteilen mir,
Verse: 17560    der rede müestet volgen ir.

Verse: 17561    vil künge haben geworben
Verse: 17562    an mich, daʒ ist vertorben.

Verse: 17563    hêrre, jâ wil ich alle man
Verse: 17564    durch iuch einen immer lân.'

Verse: 17565    der fürste sprach mit zühte siten
Verse: 17566    'hæt eʒ fuoge, ich solde iuch biten

Verse: 17567    des ir mich bitet, schœne meit.
Verse: 17568    nû spreht ir lîhte ich bin verzeit,

Verse: 17569    ob ich niht leiste iuwer bete.
Verse: 17570    niht wol ich dar an tete.'

Verse: 17571    der rede wart Thalêstris frô.
Verse: 17572    irn goten und Alexandrô

Verse: 17573    die küniginne rîche
Verse: 17574    dancte flîzeclîche.

Verse: 17575       der tac mit fröiden wart zuo brâht.
Verse: 17576    als nû komen was die naht,

Verse: 17577    Alexander sîn reise hal.
Verse: 17578    mit der meit er sich dannen stal

Verse: 17579    an ein heimelîche stat,
Verse: 17580    als er ir vor bescheiden hat

Verse: 17581    einem sînem kamerære,
Verse: 17582    der edel fürste mære.

Verse: 17583    Thalêstris minne wart gewert
Verse: 17584    aldâ, als ir herze gert.

Verse: 17585    der fürste kuste irn rôten munt
Verse: 17586    bî der naht wol drîʒec stunt,

Verse: 17587    mit minne er sie gruoʒte,
Verse: 17588    ir swære er ir dô buoʒte.

Verse: 17589    dô sie sich scheiden wolden
Verse: 17590    und von einander solden,

Verse: 17591    dô sprach die süeʒe Thalêstris
Verse: 17592    'hêrre, nû bin ich des gewis

Verse: 17593    daʒ ich hân fruht von dir genomen.
Verse: 17594    sol mir die ze sælden komen,

Verse: 17595    daʒ sie sol der werlde leben,
Verse: 17596    wirt eʒ ein meit, ich wil ir geben

Verse: 17597    al mîner lande rîche;
Verse: 17598    wirt aber eʒ dir gelîche,

Verse: 17599    so muoʒ ich dir eʒ senden,
Verse: 17600    daʒ mich sol an fröiden phenden.

Verse: 17601    alsô tuot von dir mîn scheiden.
Verse: 17602    die gote uns füegen beiden

Verse: 17603    daʒ wir schiere einander sehen,
Verse: 17604    sô wil ich mir aber fröiden jehen.'

Verse: 17605    der küne ir êren vil erbôt.
Verse: 17606    dô lieʒ sie in in senender nôt.

Verse: 17607    mit cleinôte manger hande
Verse: 17608    in anderm gewande

Verse: 17609    gesniten nâch der Kriechen siten
Verse: 17610    die gestinne dannen riten.

Verse: 17611    dô sie rûmten den plân,
Verse: 17612    waʒ in wart, sie fuortenʒ dan.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.