TITUS
Ulrich von Eschenbach, Alexander
Part No. 120
Previous part

Chapter: 184a  
Boten von Candacis


Verse: 17209       Candacis hieʒ ein künigin,
Verse: 17210    die ouch durch minniclich gewin

Verse: 17211    dem keiser boten sante,
Verse: 17212    die im friuntschaft mante.

Verse: 17213    die boten kâmen an der stunt
Verse: 17214    mit brieven, die im tâten kunt

Verse: 17215    der küniginne swære
Verse: 17216    und seltsæne mære,

Verse: 17217    der er niht sêre erkam,
Verse: 17218    wann er sie gerne vernam.

Verse: 17219    der helt von Macedône
Verse: 17220    enphienc die boten schône.

Verse: 17221    noch was die hôchzît niht voltân,
Verse: 17222    die brieve enphie der werde man

Verse: 17223    und ein unmâʒen rîch gewant,
Verse: 17224    daʒ het geworht mit ir hant

Verse: 17225    Candacis die küniginne,
Verse: 17226    der herze unde sinne

Verse: 17227    Alexander bî im truoc:
Verse: 17228    er was ir verre doch genuoc.

Verse: 17229    des selben Alexander jach,
Verse: 17230    wie er die künigîn nie gesach,

Verse: 17231    sie wær aller sîner sælden hort
Verse: 17232    und hæte ouch sîn herze dort.

Verse: 17233    selber er an den brieven las
Verse: 17234    als dar an geschriben was.

Verse: 17235    dô vant der edel Macedô
Verse: 17236    daʒ sîn herze machte frô.

Verse: 17237    'mir ist sô vil wirdikeit,
Verse: 17238    süeʒer künic, von dir geseit,

Verse: 17239    daʒ herze und mîn sinne
Verse: 17240    jâmert nâch dîner minne.

Verse: 17241    die lant, von den ich crône trage,
Verse: 17242    in dîn gnâde ich die sage,

Verse: 17243    vil rîcheit unde schœnen lîp.
Verse: 17244    ich bin âne man ein wîp.

Verse: 17245    nû sol daʒ niht verterben,
Verse: 17246    ich welle daʒ immer werben

Verse: 17247    wie ich mich dir genâhe
Verse: 17248    und von dir enphâhe

Verse: 17249    dîner werden minne teil.
Verse: 17250    geschiht daʒ, sô volget mir heil.'

Verse: 17251    der künic der frouwen sagte danc,
Verse: 17252    an sînen munt den brief er twanc.

Verse: 17253       Er schreip ir wider alsô
Verse: 17254    'an ganzen fröiden stîget hô

Verse: 17255    mîn seneclich gemüete
Verse: 17256    fröwet sich dîner güete.

Verse: 17257    solt mir iener daʒ geschehen,
Verse: 17258    daʒ ich dich, frouwe, müeste sehen,

Verse: 17259    sô gelebt ich nie sô lieben tac,
Verse: 17260    daʒ wurde mîner sorgen slac.

Verse: 17261    süeʒe minne, mîne sinne
Verse: 17262    jâmert sêre nâch dîner minne.

Verse: 17263    in dîn gnâde, sælic wîp,
Verse: 17264    gip ich mînen frîen lîp,

Verse: 17265    dir, süeʒeʒ wîp, vür eigen.
Verse: 17266    ich wil dir daʒ erzeigen

Verse: 17267    daʒ ich dir holdeʒ herze trage.
Verse: 17268    nû ist daʒ mîn meiste clage,

Verse: 17269    daʒ ich dir nû fremde bin.
Verse: 17270    daʒ gît an sorgen mir gewin

Verse: 17271    und verlust an hôhen fröuden.
Verse: 17272    die sorge tuot mich töuden.

Verse: 17273    du hâst mîn herze dort bî dir,
Verse: 17274    frouwe, des geloube mir.

Verse: 17275    frouwe, ich wil dîn ritter sîn.
Verse: 17276    die wîle ich hân daʒ leben mîn,

Verse: 17277    sô bin ich immer dir bereit
Verse: 17278    triuwen mit ganzer stætikeit.

Verse: 17279    vil sælic wîp, gehap dich wol,
Verse: 17280    schiere ich dich doch sehen sol,

Verse: 17281    wie ich daʒ mac gefüegen.
Verse: 17282    dar an lâ dich genüegen.'

Verse: 17283    wider heim ze lande
Verse: 17284    der frouwen boten er sande.

Verse: 17285    er gap in maniger marke wert,
Verse: 17286    golt, gewant, schœne phert.

Verse: 17287    die boten bat der hêre
Verse: 17288    der küngîn danken sêre.

Verse: 17289    die boten eineʒ hâlen:
Verse: 17290    die frowe hete heiʒen mâlen

Verse: 17291    den künic in ein samît,
Verse: 17292    als er eʒ selbe erfuor sît.

Verse: 17293       der mâler het in schône
Verse: 17294    gemâlet under crône

Verse: 17295    al sîn geschicke und sîn gestalt.
Verse: 17296    des der meister niht engalt,

Verse: 17297    von golde gar rîche
Verse: 17298    ein bilde im gelîche

Verse: 17299    het er nâch im gemeʒʒen
Verse: 17300    und nihtes dar an vergeʒʒen.

Verse: 17301    in al der wirde, als er in vant,
Verse: 17302    mâlet in wol des meisters hant.

Verse: 17303    eʒ geschach gar heimelîche.
Verse: 17304    die küniginne rîche,

Verse: 17305    dô ir die boten wâren komen
Verse: 17306    unde gar hete vernomen

Verse: 17307    alle die botschaft,
Verse: 17308    dô twanc sie grôʒer liebe craft,

Verse: 17309    den brief sie dicke kuste
Verse: 17310    und druct in ze der bruste.

Verse: 17311    waʒ tet die süeʒe mêre?
Verse: 17312    Candacis, die vil hêre,

Verse: 17313    behielt daʒ bilde rîche
Verse: 17314    in ir heimelîche

Verse: 17315    und bewart eʒ mit al ir sinnen,
Verse: 17316    daʒ des ieman wurde innen.

Verse: 17317    dicke sie ze dem bilde gienc
Verse: 17318    mit blanken armen sieʒ umbevienc,

Verse: 17319    ir mündel sie dem sînen bôt:
Verse: 17320    daʒ was nâch rôsen varwe rôt.

Verse: 17321    die krônike sagte mir vür wâr,
Verse: 17322    Candacis wære des lîbes clâr

Verse: 17323    und daʒ sie hæte schœnen lîp,
Verse: 17324    von rehten siten erwunscht ein wîp.

Verse: 17325    waʒ man reinem wîbe
Verse: 17326    und wunneclîchem lîbe

Verse: 17327    ze tugende sol meʒʒen,
Verse: 17328    des was dâ niht vergeʒʒen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.