TITUS
Ulrich von Eschenbach, Alexander
Part No. 119
Previous part

Chapter: 141  
Alexanders Krönung und Hochzeit


Verse: 17067       Dô daʒ alleʒ was getân,
Verse: 17068    dô schiet Alexander dan

Verse: 17069    von dem gebirge Wolgen.
Verse: 17070    dem künge sach man volgen

Verse: 17071    vil fürsten, manigen werden man
Verse: 17072    und ouch vil frouwen ûf den plân,

Verse: 17073    den man heiʒet Zârâi,
Verse: 17074    der lac nâhen dâ bî.

Verse: 17075    bî sînen hulden und den goten
Verse: 17076    wart dô geschrîet und geboten

Verse: 17077    daʒ nieman von dannen kæme,
Verse: 17078    ê man sîn gebot vernæme.

Verse: 17079    daʒ hielten algelîche
Verse: 17080    arm unde rîche.

Verse: 17081    der edel Krieche unverzagt
Verse: 17082    der keiserîn, der schœnen magt

Verse: 17083    kurzet er die stunde
Verse: 17084    wâ mit der fürste kunde,

Verse: 17085    und bat sie ir clage lâʒen
Verse: 17086    und sich ir swære mâʒen.

Verse: 17087    waʒ in der werde trôstes bôt,
Verse: 17088    die süeʒen wâren doch in nôt.

Verse: 17089    waʒ half sie daʒ eʒ was geschehen?
Verse: 17090    wir wellen ander mære jehen,

Verse: 17091    die von jâmer vliehen
Verse: 17092    und sich ze fröiden ziehen.

Verse: 17093       Der frouwen man in wirde phlac.
Verse: 17094    dô nû was komen der ander tac,

Verse: 17095    in sînes gezeldes palas
Verse: 17096    der künic mit andern fürsten was,

Verse: 17097    die dem keiser wâren bî,
Verse: 17098    sprach der helt 'waʒ der hie sî,

Verse: 17099    die wil ich immer rîchen
Verse: 17100    und nihtes in geswîchen

Verse: 17101    helflich mit den gesellen,
Verse: 17102    die bî mir blîben wellen.

Verse: 17103    eʒ sol ein ieglich man
Verse: 17104    genzlich mîne hulde hân.

Verse: 17105    waʒ ir lêhen was biʒ her,
Verse: 17106    ze rehtem eigen ich sie des wer.'

Verse: 17107    vürbaʒ sprach der guote
Verse: 17108    'ist ieman in dem muote,

Verse: 17109    dem ich ze hêrren niht entuge,
Verse: 17110    der verbeʒʒers, swâ er muge:

Verse: 17111    des gib ich im vierzehen tage frist,
Verse: 17112    er kêre war im liep ist.'

Verse: 17113    dô sprâchen sie an der stunde
Verse: 17114    ûʒ gemeinem munde

Verse: 17115    sie wolden bî im blîben,
Verse: 17116    er wolde sie dann vertrîben.

Verse: 17117    des dancte vlîʒeclîche
Verse: 17118    der fürste tugende rîche.

Verse: 17119    'nû bite ich algelîche
Verse: 17120    arm unde rîche,

Verse: 17121    als sie hie gesamet sîn,
Verse: 17122    daʒ sie ze den fröiden mîn

Verse: 17123    komen vür die stat ze Bractân,
Verse: 17124    dâ wil ich mîn hôchzît hân.

Verse: 17125    er sî ritter oder kneht,
Verse: 17126    der sol nemen dâ sîn reht.'

Verse: 17127    über sehs wochen
Verse: 17128    wart der tac gesprochen.

Verse: 17129    heim gegen Kriechen lande
Verse: 17130    sîner muoter er boten sande

Verse: 17131    daʒ sie an dem selben tage
Verse: 17132    nâch hôher wirdikeit bejage

Verse: 17133    die hôchzît voltræhte,
Verse: 17134    daʒ man ir wol gedæhte.

Verse: 17135    daʒ enwart niht vermiten,
Verse: 17136    sie entæte daʒ nâch rîcheit siten,

Verse: 17137    die süeʒe tugentlîche,
Verse: 17138    und tet daʒ williclîche,

Verse: 17139    die ouch ir milde niht verbarc:
Verse: 17140    sie vergap dô goldes manic marc,

Verse: 17141    schœne ros und rîch gewant
Verse: 17142    enphie man von der frouwen hant.

Verse: 17143    unz an den gelegten tac
Verse: 17144    der künic kurzewîle phlac,

Verse: 17145    er bûwete gebirge und den walt,
Verse: 17146    des manic fremde tier engalt.

Verse: 17147       nû hœrt wer ze dem tage kam,
Verse: 17148    als ich eʒ rehte vernam.

Verse: 17149    dar kam der bâruch Ackerîn
Verse: 17150    mit vil fürsten, die wâren sîn,

Verse: 17151    die krône von im nâmen:
Verse: 17152    wirdiclich die dar kâmen.

Verse: 17153    der bâruch daʒ ampt hât,
Verse: 17154    daʒ al der heiden admirât

Verse: 17155    muoʒ rîche und crôn von im enphân.
Verse: 17156    der brâht dar manigen werden man.

Verse: 17157    er was ein fürste von hôher art,
Verse: 17158    schône er enphangen wart.

Verse: 17159    der crônte den fürsten wert
Verse: 17160    und die schœnen, als er gert,

Verse: 17161    und gap die zwei einander.
Verse: 17162    des fröut sich Alexander,

Verse: 17163    güetlich er an sie sach.
Verse: 17164    die magt ze dem fürsten sprach

Verse: 17165    'ê iht anders hie ergê,
Verse: 17166    vernemet mîne bete ê.'

Verse: 17167    er sprach 'süeʒer munt, nû sprich.
Verse: 17168    swaʒ du gebiutest, daʒ tuo ich.'

Verse: 17169    'sô suln die gevangen dîn
Verse: 17170    durch mînen willen ledic sîn.'

Verse: 17171    daʒ geschach, als sie bat,
Verse: 17172    sie wurden ledic an der stat.

Verse: 17173       dô lêch Alexanders hant
Verse: 17174    hin mit vanen manic lant

Verse: 17175    sîner wirdikeit ze stiure.
Verse: 17176    sô hieʒ der gehiure

Verse: 17177    vil junger fürsten crônen.
Verse: 17178    dâ mit wolde er in lônen

Verse: 17179    ir veter, der sie enbâren,
Verse: 17180    die bî Darîô erslagen wâren.

Verse: 17181    die nâmen an dem tage ir reht.
Verse: 17182    er machte ze ritter mangen kneht

Verse: 17183    er vergap an dem tage,
Verse: 17184    als ichʒ in dem muote trage,

Verse: 17185    manic tûsent marc wert,
Verse: 17186    gesteine, golt, silber, phert,

Verse: 17187    dar zuo manic rîch gewant,
Verse: 17188    den fürsten, grâven burge und lant.

Verse: 17189    ritter, knehte er wol beriet,
Verse: 17190    ân gâbe nieman dannen schiet:

Verse: 17191    er lieʒ sîn milde schouwen.
Verse: 17192    ouch fröut er sich sîner frouwen,

Verse: 17193    die nû worden was sîn wîp.
Verse: 17194    die hete sô wunneclîchen lîp,

Verse: 17195    daʒ ichs niht wol gesagen mac,
Verse: 17196    waʒ des wunsches an ir lac.

Verse: 17197    wem vor geviel ein solicheʒ spil,
Verse: 17198    ob ichʒ rehte merken wil,

Verse: 17199    er müeste sich besunder
Verse: 17200    durch solicher fröiden wunder

Verse: 17201    von senender swære ziehen
Verse: 17202    und ze fröiden vliehen.

Verse: 17203    ein liep von solichen sachen
Verse: 17204    möhte frœlich machen lachen,

Verse: 17205    der ie gewesen wære
Verse: 17206    ein rehter riusære,

Verse: 17207    wær im die sælde geschehen
Verse: 17208    daʒ er Roxam hæte gesehen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.