TITUS
Ulrich von Eschenbach, Alexander
Part No. 116
Previous part

Chapter: 138b  
Darius' Tod


Verse: 16705       Archâbatus der genas.
Verse: 16706    der werden noch dâ mêre was,

Verse: 16707    die man ûf ir triuwe lieʒ,
Verse: 16708    als der künic Alexander hieʒ.

Verse: 16709    dô gap Alexander hin
Verse: 16710    alleʒ daʒ die Sarracîn

Verse: 16711    heten brâht ûf daʒ velt,
Verse: 16712    golt, gesteine, rîch gezelt:

Verse: 16713    den werden milde nie verdrôʒ.
Verse: 16714    dâ bî ein lûter waʒʒer vlôʒ

Verse: 16715    niht grôʒ ûʒ eines velses want.
Verse: 16716    Polistrâtus was gerant

Verse: 16717    ûʒ dem her an den bach
Verse: 16718    durch hitze, ein gezelt er sach,

Verse: 16719    daʒ sîn rîcheit niht verbarc,
Verse: 16720    goldes kosteʒ manic marc.

Verse: 16721    dar îlte der ritter unverzagt,
Verse: 16722    er vant dâ, daʒ er sêre clagt,

Verse: 16723    des sîn ougen wurden naʒ.
Verse: 16724    der helt vor jâmer vergaʒ

Verse: 16725    ob er ie hôhen muot gewan,
Verse: 16726    dô er den werden süeʒen man

Verse: 16727    sô jæmerlîche ligen vant,
Verse: 16728    dem ê dienten alle lant.

Verse: 16729    des gewalt ê was sô grôʒ,
Verse: 16730    sêre verwunt unde blôʒ

Verse: 16731    vant er in jæmerlîchen ligen,
Verse: 16732    aller wæte im was verzigen

Verse: 16733    biʒ an hemde und an bruoch.
Verse: 16734    Polistrâtus reiʒ ein tuoch

Verse: 16735    einsît ûʒ des gezeldes want,
Verse: 16736    dar în er den keiser want

Verse: 16737    und dacte im sîne wunden.
Verse: 16738    der keiser an den stunden

Verse: 16739    ûf an den werden sach,
Verse: 16740    dise wort er zuo im sprach.

Verse: 16741       'sage mir, tugenthafter man,
Verse: 16742    bist du Krieche oder Persân?'

Verse: 16743    'ich bin ûʒ der Kriechen her.
Verse: 16744    hêrre, iuwer wunden sêr

Verse: 16745    füegent mînem herzen leit
Verse: 16746    und mînem hêrren kummer breit.'

Verse: 16747    der keiser sprach 'ist er iht nâ?'
Verse: 16748    Polistrâtus sprach 'hêrre, jâ.'

Verse: 16749    der keiser sprach 'dise nôt
Verse: 16750    und mînen unverdienten tôt

Verse: 16751    sol erbarmen unde clagen
Verse: 16752    alle die rehte triuwe tragen.'

Verse: 16753    Polistrâtus clagt in sêre.
Verse: 16754    dô bat der fürste hêre,

Verse: 16755    der nû gegen tôde was geselt,
Verse: 16756    er sprach 'ei ritter, werder helt,

Verse: 16757    daʒ ich sus iu kan riuwen,
Verse: 16758    des dank ich iuwern triuwen.

Verse: 16759    bringent Alexandrum mir,
Verse: 16760    daʒ ist al mînes herzen gir,

Verse: 16761    wie ich den werden gesehe,
Verse: 16762    daʒ daʒ schiere geschehe.

Verse: 16763    daʒ füeget, edel ritter wert.'
Verse: 16764    dô saʒ der ritter ûf sîn phert,

Verse: 16765    gegen dem künge er jagte,
Verse: 16766    dise mære er im sagte,

Verse: 16767    wie er den keiser wunden
Verse: 16768    jæmerlîche hæte funden.

Verse: 16769       dô sprach der junge fürste clâr
Verse: 16770    'Polistrâtus, wîse mich dar,

Verse: 16771    dâ ich den werden vinde.
Verse: 16772    'ei werlt, (sprach er) wie swinde

Verse: 16773    und wie sûr ist dîn lôn.
Verse: 16774    dîn süeʒe bringet jâmers dôn,

Verse: 16775    sô eʒ dem ende nâhet.'
Verse: 16776    der künic vaste gâhet,

Verse: 16777    dar in der ritter wîsete,
Verse: 16778    Polistrâtus der geprîsete.

Verse: 16779    dô der junge werde helt
Verse: 16780    komen was vür daʒ gezelt,

Verse: 16781    dô saʒ er ab und gienc dâ în.
Verse: 16782    dô er daʒ swærlîche pîn

Verse: 16783    an dem keiser gesach,
Verse: 16784    der werde ûʒ jâmers siten sprach

Verse: 16785    und umbevienc an den stunden
Verse: 16786    alle des keisers wunden

Verse: 16787    al weinende mit den armen.
Verse: 16788    'wen solt daʒ niht erbarmen,

Verse: 16789    daʒ jâmer daʒ dâ was getân,
Verse: 16790    der müeste sîn ein herte man.

Verse: 16791    ô Darîus, lieber hêrre mîn,
Verse: 16792    alle die lant, die wâren dîn,

Verse: 16793    waʒ mir nû der ist undertân,
Verse: 16794    waʒ ich der betwungen hân,

Verse: 16795    alhie ich dir der abe stê.
Verse: 16796    stant ûf, bis keiser aber als ê.

Verse: 16797    waʒ ich wider dich hân getân,
Verse: 16798    des wil ich ze buoʒe stân

Verse: 16799    wie du, hêrre, gebiutest mir.
Verse: 16800    immer wil ich dienen dir

Verse: 16801    und dîme gebote sîn bereit.
Verse: 16802    ô werder fürste, mir füeget leit

Verse: 16803    al dîner wunden smerze
Verse: 16804    gêt mir durch mîn herze.'

Verse: 16805    ouch hôrte man in der paulûn
Verse: 16806    manches werden wîbes sun

Verse: 16807    diz jâmer grôʒ beweinen
Verse: 16808    und clagende triuwe bescheinen,

Verse: 16809    dô nam der ellende
Verse: 16810    Alexanders hende,

Verse: 16811    weinende er die kuste
Verse: 16812    und druct in ze der bruste.

Verse: 16813       er sprach 'ei werder Macedô,
Verse: 16814    des muoʒ mîn sêle wesen frô,

Verse: 16815    daʒ mir die sælde ist geschehen
Verse: 16816    daʒ ich dich, hêrre, hân gesehen,

Verse: 16817    ê ich von dirre werlde var.
Verse: 16818    ô edler junger fürste clâr,

Verse: 16819    ich mac leider niht genesen,
Verse: 16820    du solt des rîches hêrre wesen.

Verse: 16821    dîner wirdikeit ze lône
Verse: 16822    ûf gib ich hiute die krône.

Verse: 16823    dise mortlîche geschiht
Verse: 16824    die lâʒ ungerochen niht.

Verse: 16825    ei süeʒer fürste guoter,
Verse: 16826    ich bevilhe dir mîn muoter,

Verse: 16827    die ist nû ellende ein wîp.
Verse: 16828    mîn tohter, die hât schœnen lîp,

Verse: 16829    die solt du haben ze einer konen,
Verse: 16830    sô muoʒ sælde bî dir wonen:

Verse: 16831    sie zimt dîner wirde wol,
Verse: 16832    dîn triwe sie mîn ergetzen sol

Verse: 16833    und dirre verlustbærn zît:
Verse: 16834    daʒ dîner wirde sælde gît.'

Verse: 16835    der ie nâch rehter wirde warp
Verse: 16836    dem künge under den henden starp,

Verse: 16837    daʒ im vil fröiden benam
Verse: 16838    und machte an hôhem muote zam.

Verse: 16839    dô sprach Alexander
Verse: 16840    'ei werder got Jupiter,

Verse: 16841    wes suln die werden sich versehen,
Verse: 16842    sît ditz an dem ist geschehen,

Verse: 16843    der über alle fürsten was erkorn,
Verse: 16844    daʒ der daʒ leben hât verlorn

Verse: 16845    von swacher hant und âne schult.
Verse: 16846    von mir sol werden erfult

Verse: 16847    daʒ mir der edel admirât
Verse: 16848    vor sîme tôde bevolhen hât,

Verse: 16849    der mir frumet herzensêr;
Verse: 16850    gegen dînen hulden ich des swer,

Verse: 16851    der eit wirt niht gebrochen.
Verse: 16852    sîn tôt wirt gerochen.'

Verse: 16853       zehant lieʒ der stolze
Verse: 16854    ûʒ lignô âloê dem holze

Verse: 16855    im ein truhe machen
Verse: 16856    von kostbæren sachen

Verse: 16857    und hieʒ in dar în bereiten dâ
Verse: 16858    mit balsmen und arômatâ

Verse: 16859    und mit andern wurzen tiure.
Verse: 16860    ouch hieʒ der gehiure

Verse: 16861    wercliute, die dâ wâren.
Verse: 16862    eine tiure bâren

Verse: 16863    bereiten, als er wolde,
Verse: 16864    gemâlet wol mit golde,

Verse: 16865    dar in gewinnen tiure phert,
Verse: 16866    die truogen den edlen keiser wert

Verse: 16867    in dem her, war er kêrte.
Verse: 16868    Alexander, der wol gehêrte,

Verse: 16869    kunde sus nâch êren
Verse: 16870    ie sîn lop wol mêren.

Verse: 16871    vil rehte nâch der krôniken sage
Verse: 16872    sust fuort er in wol vierzic tage,

Verse: 16873    unz im ein sarc wart bereit
Verse: 16874    von micheler rîcheit,

Verse: 16875    der muoste kosten goldes vil,
Verse: 16876    als ich her nâch iu sagen wil.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.