TITUS
Ulrich von Eschenbach, Alexander
Part No. 115
Previous part

Chapter: 138a  
Kampf mit Persern


Verse: 16608       noch wârn sehs tûsent dâ

Verse: 16609    sehsundsehzic und sehs hundert,
Verse: 16610    die sich heten ûʒ gesundert.

Verse: 16611    die wârn von disen beiden
Verse: 16612    durch den mort in zorne gescheiden

Verse: 16613    und wolden doch mit heldes hant
Verse: 16614    wern sich selber und ir lant.

Verse: 16615    sie kêrten gegen Alexandrô.
Verse: 16616    des wart sîn queckeʒ herze frô.

Verse: 16617    dô er sie gegen im criegen sach,
Verse: 16618    der fürste ze den sînen sprach

Verse: 16619    'gedenket, helde, an wirdikeit,
Verse: 16620    der iu hiute ist vil bereit.

Verse: 16621    seht, die sô gegen iu criegen her,
Verse: 16622    die sint der untriuwen wer,

Verse: 16623    die den keiser gevangen hân.
Verse: 16624    ei, werden helde, nû wol dan,

Verse: 16625    erwerbent prîs und êre.
Verse: 16626    ouch sol ich iu immer mêre

Verse: 16627    helfen unde rîchen,
Verse: 16628    nihtes iu geswîchen.'

Verse: 16629    dort Babilôn, hie Macedô:
Verse: 16630    ir beider krîe stunt alsô.

Verse: 16631       nû wart dô lenger niht gebiten.
Verse: 16632    âvoy, wie dâ wart gestriten

Verse: 16633    ûf lîbes zer von beiden scharn.
Verse: 16634    die helde sach man wênic sparn.

Verse: 16635    ûʒ beiden hern wart mit craft
Verse: 16636    enzwei gefrumet manic schaft,

Verse: 16637    dar nâch mit heldes henden
Verse: 16638    sach man die werden swenden

Verse: 16639    ir kostbære zimirde.
Verse: 16640    ir strît ergienc in wirde.

Verse: 16641    man sach die frechen heiden
Verse: 16642    vil der Kriechen scheiden

Verse: 16643    von lîbe mit ellenthafter wer:
Verse: 16644    sus werte sich daʒ verweiste her.

Verse: 16645    Archâbatus den Kriechen bôt
Verse: 16646    mit starken wunden den tôt.

Verse: 16647    er machte dô eben manege furch.
Verse: 16648    bîneben ûʒ und wider durch

Verse: 16649    sach man in rote durchbrechen,
Verse: 16650    kreftic sach man rechen

Verse: 16651    Archâbatum sîne leit.
Verse: 16652    manic wert heiden nâch im streit.

Verse: 16653    sus fuogten die Sarracîne
Verse: 16654    den Kriechen scharphe pîne,

Verse: 16655    sie sluogen ir tôt manigen nider.
Verse: 16656    'hie Babilôn' und immer wider

Verse: 16657    Archâbatus ûf die vînde hielt.
Verse: 16658    der ouch rehter manheit wielt,

Verse: 16659    der rief die sînen vaste an.
Verse: 16660    'edlen fürsten unde werde man,

Verse: 16661    wirt uns hiute hie der sic benomen,
Verse: 16662    des müeʒe wir von prîse komen.

Verse: 16663    nein, ditz wirt hie widerriten.
Verse: 16664    jâ ist hie noch vil ungestriten.'

Verse: 16665       alrêst sament sich der strît
Verse: 16666    waʒ die heiden unz ûf die zît

Verse: 16667    borgeten den Macedônen,
Verse: 16668    des sach man in sûre lônen.

Verse: 16669    die Kriechen âne verdrieʒen
Verse: 16670    ir swert dô snîden lieʒen.

Verse: 16671    hurtâ, wie Alexander streit
Verse: 16672    und Eufêstiô nâch prîse reit!

Verse: 16673    er hete noch wênic liute dâ,
Verse: 16674    sie zogten aber vaste nâ,

Verse: 16675    Permêniô und Clitus,
Verse: 16676    Cênôs und Antigonus,

Verse: 16677    Tholomêus und Perdicas.
Verse: 16678    noch mê der werden aldâ was,

Verse: 16679    die den Persânen fuogten nôt.
Verse: 16680    Filôtas sluoc dô manigen tôt.

Verse: 16681    die Kriechen al gelîche
Verse: 16682    striten dô werlîche.

Verse: 16683    ich enmac die heiden
Verse: 16684    von prîse niht gescheiden,

Verse: 16685    sie wolden alle prîs bejagen.
Verse: 16686    die werden wolden des niht verzagen,

Verse: 16687    sie buten strît mit herter vâr.
Verse: 16688    nû hœret wie der junge var.

Verse: 16689    er crieget dâ er den werden sach,
Verse: 16690    Archâbatum, dem er sîn ors stach,

Verse: 16691    daʒ er kam ûf die erden.
Verse: 16692    aldâ vienc er den werden

Verse: 16693    mit maniger swæren wunden:
Verse: 16694    eʒ ergie in kurzen stunden:

Verse: 16695    die Kriechen riefen 'slâhâ, slach;
Verse: 16696    vaste, hêrre, vâhâ, vâch,

Verse: 16697    daʒ ir immer iht kume hin.'
Verse: 16698    alsô ich berihtet bin

Verse: 16699    und daʒ der sic wære ir.
Verse: 16700    alsô seit die krônike mir,

Verse: 16701    sie muosten gar des tôdes wesen
Verse: 16702    man lieʒ ir wênic genesen,

Verse: 16703    dann die sich dem fürsten ergeben,
Verse: 16704    die lieʒ man alle leben.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.