TITUS
Ulrich von Eschenbach, Alexander
Part No. 114
Previous part

Chapter: 138  
Darius' Ermordung


Verse: 16273       Ich künde iu nâch des buoches sage.
Verse: 16274    an dem verlustbærn tage

Verse: 16275    ûf zôch die sunne irn schîn
Verse: 16276    durch den ungefuogen pîn,

Verse: 16277    durch die valscheit sô grôʒ;
Verse: 16278    den mâne schînes ouch verdrôʒ

Verse: 16279    durch die leitlich geschiht.
Verse: 16280    doch mohten sieʒ erwenden niht.

Verse: 16281    nû was eʒ an den âbent komen.
Verse: 16282    des tages (als ich hân vernomen)

Verse: 16283    den keiser swære grôʒ bevienc,
Verse: 16284    dem eʒ ouch an den âbent gienc

Verse: 16285    sînes lebens. ûf dem velde
Verse: 16286    was er in sîme gezelde.

Verse: 16287    daʒ volc er alleʒ von im treip,
Verse: 16288    niuwan ein kamerer bî im bleip.

Verse: 16289    dem frou Sælde was verspart,
Verse: 16290    von dem mangerhande wart

Verse: 16291    bî der naht betrahtet:
Verse: 16292    wes den frou Sælde niht ahtet

Verse: 16293    und wen sie âne helfe lât,
Verse: 16294    ich wæn vergebene sî des rât

Verse: 16295    und al sîn trahten wese kranc.
Verse: 16296    dô sprach der mit sorgen ranc

Verse: 16297    'ô Jupiter, mîn werder got,
Verse: 16298    ôwê war wil mich dîn gebot

Verse: 16299    mit swære kraft bereiten!
Verse: 16300    du wilt mîn unsælde breiten.

Verse: 16301    wa mit hân ich verdienet daʒ
Verse: 16302    dîn und aller gote haʒ

Verse: 16303    sich sô an mir mêret?
Verse: 16304    war mîn sin sich kêret,

Verse: 16305    sô vinde ich niuwan tôdes leit,
Verse: 16306    daʒ mir mit jâmer ist bereit.

Verse: 16307    ze den ich ie triuwen mich versan,
Verse: 16308    die wellen mich ân helfe lân;

Verse: 16309    bî den ich sicherlîche
Verse: 16310    solde haben daʒ rîche

Verse: 16311    und âne alle angest leben,
Verse: 16312    die wellen mich dem tôde geben.

Verse: 16313    der edle ritter unverzagt
Verse: 16314    Pâtrôn hât mir wâr gesagt.

Verse: 16315    sît ich daʒ rîche besaʒ,
Verse: 16316    ob ich ie wirdikeit vergaʒ,

Verse: 16317    daʒ ich der crône niht wirdic bin;
Verse: 16318    ob ie daʒ tumme herze mîn

Verse: 16319    unrehte hêrschaft hât getragen;
Verse: 16320    kan daʒ ieman von mir gesagen

Verse: 16321    daʒ ich gegen dem volke dîn
Verse: 16322    unrehte zuht tete schîn

Verse: 16323    oder durch gewalt, den ich truoc,
Verse: 16324    ie mîn sin des gewuoc;

Verse: 16325    spriht daʒ ritter oder kneht
Verse: 16326    daʒ ich die gemeinen reht

Verse: 16327    ie habe gekrenket;
Verse: 16328    hân ich dar an gewenket

Verse: 16329    daʒ man heiʒet der künege ê,
Verse: 16330    ichn wær der bî, als die gestê;

Verse: 16331    hab ich mîn burgære
Verse: 16332    mit unrehter swære

Verse: 16333    oder mîn volc betwungen;
Verse: 16334    hab ich ie dar nâch gerungen

Verse: 16335    daʒ ich rehtes vergæʒe;
Verse: 16336    wâ ich gerihte besæʒe,

Verse: 16337    gemachte mir ie kein guot veile
Verse: 16338    die rehten urteile;

Verse: 16339    ob ich ze des armen nôt
Verse: 16340    mîn ôre unwillic ie gebôt;

Verse: 16341    ob ich ie durch kein guot
Verse: 16342    gewan sô zwîvelîchen muot

Verse: 16343    daʒ ich ie gestalte
Verse: 16344    nâch unrehtem gewalte;

Verse: 16345    ist daʒ von mir worden kunt
Verse: 16346    daʒ ich mit dem schuldegen stunt

Verse: 16347    ûf den unschuldegen man;
Verse: 16348    hân ich die unfuoge getân

Verse: 16349    daʒ witwen und verweiste kint
Verse: 16350    von mir niht beschirmet sint,

Verse: 16351    wâ sie mich helfe haben gemant;
Verse: 16352    hât mîn gewaltige hant

Verse: 16353    nâch irm guote ie geworben,
Verse: 16354    daʒ sie was an erstorben;

Verse: 16355    ob ich ie unrehten wân
Verse: 16356    gegen den getragen hân,

Verse: 16357    ze den ich solde mich verlân:
Verse: 16358    ich habʒ genzlich getân,

Verse: 16359    sô hân ich dise grôʒe nôt
Verse: 16360    wol verdienet und den tôt

Verse: 16361    und muoʒ vor den goten jehen
Verse: 16362    daʒ billich sol an mir geschehen,

Verse: 16363    des Bessus gegen mir hât gedâht
Verse: 16364    und Narbâsones, daʒ werde volbrâht:

Verse: 16365    ist aber des niht, sô lâʒen wesen
Verse: 16366    die gote in hulde und mich genesen;

Verse: 16367    die unrehter dinge gern,
Verse: 16368    die sol man unrehtes tôdes wern.

Verse: 16369    sît Atropos mir niht engân
Verse: 16370    daʒ ich daʒ rîche sulle hân

Verse: 16371    und mir kein frist mêr wil geben,
Verse: 16372    daʒ ich blîbe bî leben,

Verse: 16373    und ich vor vînden ie genas,
Verse: 16374    bî den ich in strîtes herte was:

Verse: 16375    ê daʒ immer werde gehôrt
Verse: 16376    daʒ mich die mînen haben ermort,

Verse: 16377    sô wil ich von mîner hende
Verse: 16378    ê kiesen daʒ ende.

Verse: 16379    des sol ich schiere sîn gewert.'
Verse: 16380       der keiser ruct sîn eigen swert

Verse: 16381    und wolt sich selb erstochen hân.
Verse: 16382    dô was der kamerære sân,

Verse: 16383    der im daʒ swert underlief.
Verse: 16384    lûte der getriuwe rief,

Verse: 16385    daʒ eʒ ûf dem velde erhal
Verse: 16386    und in den gezelden überal.

Verse: 16387    ir was ûf dem velde gnuoc,
Verse: 16388    den jâmer fröide undersluoc,

Verse: 16389    dô daʒ geschrei wart vernomen:
Verse: 16390    sie wânden die valschen wæren komen

Verse: 16391    und daʒ sie den werden man
Verse: 16392    von dem lîbe hæten getân.

Verse: 16393    manec wert man was in swære,
Verse: 16394    ê er erfriesche die mære

Verse: 16395    wie eʒ umb den werden lac.
Verse: 16396    daʒ volc îlens aldar phlac.

Verse: 16397    sumelîcher blôʒ aldar kam,
Verse: 16398    etslîcher sîn harnasch an sich nam:

Verse: 16399    die wolden daʒ bewîsen dâ,
Verse: 16400    daʒ man iht spræche sît her nâ,

Verse: 16401    daʒ sie dem edlen werden man
Verse: 16402    ir triuwen wæren abe gestân.

Verse: 16403    dar nâch mit creftiger schar
Verse: 16404    dise zwêne ouch kâmen dar.

Verse: 16405    sie ructen allesament ir swert
Verse: 16406    und drungen vür den fürsten wert.

Verse: 16407    dô was der edle reine
Verse: 16408    aller helfe eine.

Verse: 16409    sie wurfen umb in ir bant,
Verse: 16410    dâ mit der werde von swacher hant

Verse: 16411    an den selben stunden
Verse: 16412    veste wart gebunden.

Verse: 16413    dô wurden ritter ouch gnuoc erslagen,
Verse: 16414    die man den keiser hôrte clagen.

Verse: 16415    geduldiclich leit er die nôt.
Verse: 16416    eia, süeʒer werder got,

Verse: 16417    lâ dînen tugenden wesen leit
Verse: 16418    daʒ dirre werlde unstætikeit

Verse: 16419    und dise sûftbære zît
Verse: 16420    uns sô kranc ein ende gît.

Verse: 16421    dem man ê grôʒer wirde jach
Verse: 16422    der muost nû lîden kummer swach.

Verse: 16423       Des edlen süeʒe reine art
Verse: 16424    von den ungetriuwen wart

Verse: 16425    gefuort in grôʒer smæhe.
Verse: 16426    was sîn gereit ie wæhe,

Verse: 16427    daʒ man den keiser ê sach tragen,
Verse: 16428    des sol mîn munt alhie gedagen:

Verse: 16429    in bunden die argen lôsen
Verse: 16430    ûf einen wagen bôsen,

Verse: 16431    ouch bunden sie den süeʒen
Verse: 16432    ze den leitern mit den füeʒen.

Verse: 16433    sie buten im die êre doch,
Verse: 16434    aller sîner bande joch

Verse: 16435    wârn geworht von golde.
Verse: 16436    dâ bî man wiʒʒen solde

Verse: 16437    daʒ der hêrre ein künic was.
Verse: 16438    wunder ist daʒ er genas

Verse: 16439    ein stunde umb solich smâcheit,
Verse: 16440    als der fürste wart angeleit

Verse: 16441    und als sie im erbuten hie.
Verse: 16442    geduldiclîchen sprach er ie

Verse: 16443    'ei Jupiter, mîn werder got,
Verse: 16444    al dîn wille und dîn gebot,

Verse: 16445    wie daʒ an dînen gnâden sî,
Verse: 16446    des muoʒ ich nimmer werden frî.'

Verse: 16447    sît daʒ alsô ist geschehen,
Verse: 16448    wes mac man danne sich versehen,

Verse: 16449    eʒn müeʒe ein ietslich man
Verse: 16450    ûf den bœsen sorge hân?

Verse: 16451       Alexander was geseit
Verse: 16452    der keiser hæte sich geleit

Verse: 16453    in die stat ze Bractanâ.
Verse: 16454    der freche zogte vaste nâ.

Verse: 16455    eʒ hete der werde Macedô
Verse: 16456    mit den sînen geahtet alsô,

Verse: 16457    funder den keiser in der stat,
Verse: 16458    daʒ er dâ sîner krefte mat

Verse: 16459    wolde sagen alzemâl
Verse: 16460    mitsamt der stat sunder twâl.

Verse: 16461    dô er vür die stat kam,
Verse: 16462    alsô schiere er daʒ vernam

Verse: 16463    daʒ Darîus dâ niht wære.
Verse: 16464    daʒ was dem fürsten swære.

Verse: 16465    des die stat wol genôʒ,
Verse: 16466    wann sie bleip alles strîtes blôʒ,

Verse: 16467    als ê Alexander ûf sie sprach.
Verse: 16468    dem keiser jagt er vaste nâch.

Verse: 16469    nû sach er ouch dort her jagen
Verse: 16470    einen boten, der wolde im sagen

Verse: 16471    und im bringen die mære
Verse: 16472    daʒ der keiser gevangen wære.

Verse: 16473    als er den boten vernam,
Verse: 16474    Alexander sêre erkam.

Verse: 16475    er sprach ûʒ ganzer wirdikeit
Verse: 16476    'ûf mîn triwe, daʒ ist mir leit.'

Verse: 16477    er sprach 'hêrren und gesellen min,
Verse: 16478    nû tuot menlich ellen schîn.

Verse: 16479    lât iuch erbarmen dise tât.
Verse: 16480    den keiser sîn volc gevangen hât.

Verse: 16481    nû sol wir fristen im daʒ leben,
Verse: 16482    daʒ sie in niht dem tôde geben.

Verse: 16483    dar an wir prîses mê bejagen,
Verse: 16484    dann ob er von uns wære erslagen.

Verse: 16485    ei helde, lât iu wesen gâch!'
Verse: 16486    sie volgten im gemeine nâch.

Verse: 16487    sie jâhen daʒ sie ze keiner zît
Verse: 16488    nie sô gerne gehielten strît,

Verse: 16489    als den sie mit in wolden haben.
Verse: 16490    man sach schiuften unde draben,

Verse: 16491    heistieren unde rennen,
Verse: 16492    der acker furche tennen.

Verse: 16493    sus wâren sie in zornes siten.
Verse: 16494    in kâmen zwêne widerriten,

Verse: 16495    die von den bœsen kêrten.
Verse: 16496    eʒ enmohten die gehêrten

Verse: 16497    den grôʒen jâmer niht gesehen,
Verse: 16498    der an dem keiser was geschehen.

Verse: 16499    an Alexander sie erwurben daʒ
Verse: 16500    er sînes zornes ûf sie vergaʒ.

Verse: 16501    vaste eʒ ûf den âbent zôch,
Verse: 16502    dar umb den Kriechen fröide vlôch.

Verse: 16503       nû kam gerant her Bocubel,
Verse: 16504    ein ritter, ûf eime orse snel,

Verse: 16505    als man in sæhe die vînde jagen.
Verse: 16506    der begunde Alexandrô sagen

Verse: 16507    daʒ der keiser wær bî leben
Verse: 16508    und daʒ strît wolden geben

Verse: 16509    die vînde und daʒ die hæten craft
Verse: 16510    und gar werlich ritterschaft.

Verse: 16511    dem künge sagt er aldâ
Verse: 16512    daʒ sie wærn gar nâ

Verse: 16513    wol in einer mîle zil
Verse: 16514    und hæten volkes ze îser vil.

Verse: 16515    der hêrre sagte den scharn
Verse: 16516    sie solden siteclîchen varn

Verse: 16517    und sich zesamne halten
Verse: 16518    und strîtes witze walten,

Verse: 16519    oder sie möhten nemen schaden.
Verse: 16520    'die ros mit müede sint überladen,

Verse: 16521    beriht iuch niht wann ûf wîc.'
Verse: 16522    er sprach 'ich füer uns einen stîc,

Verse: 16523    an dem wir sie balde ergâhen.'
Verse: 16524    die frechen schar dâ jâhen

Verse: 16525    sie wolden immer mêre
Verse: 16526    im dar umbe erbieten êre.

Verse: 16527    Bocubel der geprîsete
Verse: 16528    die rehten vart sie wîsete.

Verse: 16529    in was beidersît gâ.
Verse: 16530    die Kriechen wârn in nû sô nâ,

Verse: 16531    daʒ sie an beiden orten
Verse: 16532    die huofslege wol hôrten.

Verse: 16533    beide der stoup und die naht
Verse: 16534    den werden grôʒe sorge brâht.

Verse: 16535       Alexander sprach daʒ man hieʒe
Verse: 16536    daʒ volc halten, unz sich zerlieʒe

Verse: 16537    beide die naht und der melm.
Verse: 16538    dô wart enstricket manic helm.

Verse: 16539    Bocubel selbander
Verse: 16540    hieʒ rîten Alexander,

Verse: 16541    daʒ der helt besæhe
Verse: 16542    ob die vînde in deheiner næhe

Verse: 16543    iergen bî in wæren.
Verse: 16544    schiere er kam mit lieben mæren,

Verse: 16545    daʒ al ir kraft in nâhen lac.
Verse: 16546    under des gie ûf der tac.

Verse: 16547    dô sprach der künc 'wol mich wart.
Verse: 16548    wol ûf, helde, an die vart.

Verse: 16549    des wunnenclîchen tages lieht
Verse: 16550    uns hiute alles prîses giht.'

Verse: 16551       Nû was der ungetriuwe man
Verse: 16552    Bessus von sîme here dan

Verse: 16553    ûf einen berc gekêret.
Verse: 16554    dô kôs der geunêret

Verse: 16555    des küneges baniere.
Verse: 16556    die warte rûmte er schiere.

Verse: 16557    den sînen er mære brâhte,
Verse: 16558    daʒ Alexander nâch in gâhte.

Verse: 16559    ir untriuwe in zagheit jach:
Verse: 16560    den valschen man ie vorhtic sach.

Verse: 16561    swelch man untriuwe begât,
Verse: 16562    billich ist daʒ in verlât

Verse: 16563    aller werdeclîcher site
Verse: 16564    und im schande volge mite.

Verse: 16565    daʒ kôs man an disen beiden,
Verse: 16566    die von triuwen wârn gescheiden.

Verse: 16567    die ê truogen menlich ellen,
Verse: 16568    die sach man sich zegelich stellen

Verse: 16569    und vliehen prîs und êre.
Verse: 16570    hæten sie getân die kêre,

Verse: 16571    sie hæten in gesiget an:
Verse: 16572    als müede wârn ros und man;

Verse: 16573    waʒ er in leides hete getân,
Verse: 16574    daʒ möhten sie gerochen hân.

Verse: 16575    dô truoc der edel Pelliur
Verse: 16576    namen gevorht und sô tiur,

Verse: 16577    daʒ er den vînden vorhte
Verse: 16578    und sîn kunft ie worhte.

Verse: 16579    daʒ was ouch hie niht gespart:
Verse: 16580    sie rihten sich ûf vlühte vart.

Verse: 16581    gegen dem keiser Darîô
Verse: 16582    die unhêren muoten dô

Verse: 16583    daʒ er sich lieʒ binden ûf ein phert.
Verse: 16584    in antworte der gevangen wert

Verse: 16585    'swaʒ an mir sol geschehen,
Verse: 16586    des wil ich hie ein ende sehen.'

Verse: 16587    sîn herze tet sô lûten crach,
Verse: 16588    als ein durrer spache eʒ brach,

Verse: 16589    daʒ eʒ vil liute hôrten.
Verse: 16590    mit jæmerlîchen worten

Verse: 16591    brâht er sîne rede vür.
Verse: 16592    'ob ir willeclîchen kür

Verse: 16593    mir vürbaʒ des lîbes woldet geben,
Verse: 16594    jâ wolt ich doch niht lenger leben.

Verse: 16595    deheine wîs ich mit iu kêre.'
Verse: 16596    dô wart mit manegem gêre

Verse: 16597    sîn werder lîp durchschoʒʒen.
Verse: 16598    den nie tugende hât verdroʒʒen,

Verse: 16599    der enphienc an den stunden
Verse: 16600    von swerten tiefe wunden.

Verse: 16601    sus lieʒen sie ûf dem velde
Verse: 16602    vür tôt in dem gezelde

Verse: 16603    ligen disen werden man.
Verse: 16604    dâ mit fluhen sie von dan.

Verse: 16605    Bessus die rihte gegen Bractâ reit,
Verse: 16606    Narbâsones (ist mir geseit)

Verse: 16607    der kêrte gegen Irkâniâ.



Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.