TITUS
Ulrich von Eschenbach, Alexander
Part No. 110
Previous part

Chapter: 133  
Beratung bei Darius


Verse: 15750       dar der gehiure

Verse: 15751    gegen Mêdâ dem lande kêrte,
Verse: 15752    dâ er brach fröide und jâmer rêrte

Verse: 15753    in süeʒer wîbe herzen,
Verse: 15754    die sît kummerlîchen smerzen

Verse: 15755    und immer werndeʒ herzeleit
Verse: 15756    mit sorgen ganz und kummer breit

Verse: 15757    umb ir amîsen dolten,
Verse: 15758    die in strît gegen im erholten

Verse: 15759    ein werlîcheʒ sterben
Verse: 15760    mit prîslîchem werben.

Verse: 15761    der edle volget dem keiser nâch.
Verse: 15762    als snelle man in jagen sach,

Verse: 15763    als die Parthî ze allen zîten
Verse: 15764    gar drâte phlegen ze rîten.

Verse: 15765       Darîus was in Bractanâ.
Verse: 15766    sîne leit im giengen nâ.

Verse: 15767    die wolt der Sisîcâmis suon
Verse: 15768    noch, ob er mohte, widertuon.

Verse: 15769    nû was dem keiser gesagt
Verse: 15770    daʒ Alexander nâch im jagt.

Verse: 15771    waʒ im ê liute bliben was,
Verse: 15772    ze den er ze houfe las

Verse: 15773    volkes waʒ er mohte.
Verse: 15774    er bereite sich als er tohte.

Verse: 15775    gegen Bractâ wolt er nâch helfe varn.
Verse: 15776    der werde muost die reise sparn.

Verse: 15777    der edle süeʒe Bêliur,
Verse: 15778    der reine valsches frî gehiur,

Verse: 15779    sprach: 'sît daʒ dirre man
Verse: 15780    mir haʒʒes niht wil abe stân

Verse: 15781    und er mir doch unrehte tuot,
Verse: 15782    wie mîn gelücke sî niht guot,

Verse: 15783    doch wil ich mich berihten
Verse: 15784    und strît gegen im phlihten.

Verse: 15785    ê ich alsô wolde leben,
Verse: 15786    ich wolde mich dem tôde ê geben.

Verse: 15787    in strît daʒ muoʒ an mir geschehen.
Verse: 15788    vertirb ich dâ, man sol daʒ sehen,

Verse: 15789    daʒ ich mit werlîcher hant
Verse: 15790    erwirbe mîner leide phant.'

Verse: 15791    manheit der fürste ûf sich luot.
Verse: 15792    er vaʒte ze strît so vesten muot,

Verse: 15793    aller zagheit er vergaʒ.
Verse: 15794    ob die ie sîn herze besaʒ,

Verse: 15795    die was dar ûʒ verjaget gar.
Verse: 15796    er nam nû rehter manheit war.

Verse: 15797    wann daʒ in guot gelücke lieʒ
Verse: 15798    und im niht helfe stiure stieʒ:

Verse: 15799    sîn herze iedoch nâch prîse ranc.
Verse: 15800    lôsheit was an dem hêrren kranc.

Verse: 15801    hübsch, guot, wol gezogen, wis,
Verse: 15802    getriwe, der tugent ein blüendeʒ rîs

Verse: 15803    was des süeʒen fürsten lîp.
Verse: 15804    er dolt et kummer umb sîn wîp.

Verse: 15805    waʒ er der werden vor im sach,
Verse: 15806    ze den der kummerhafte sprach

Verse: 15807    'ich muoʒ des zwâre jehen,
Verse: 15808    mir ist doch gar wol geschehen.

Verse: 15809    der gote gunst hât mir gegeben
Verse: 15810    daʒ mîn hêrren werdeʒ leben

Verse: 15811    in dirre werlde tragen,
Verse: 15812    sie wolden sich ê ze tôde sagen.'

Verse: 15813    aber sprach der sorgen rîche
Verse: 15814    'ir hêrren ellens rîche,

Verse: 15815    man sach iuch ie sô werben,
Verse: 15816    noch sol daʒ niht verterben,

Verse: 15817    ir kiesent ê tœtlich ungemach,
Verse: 15818    dann alhie ein leben swach.

Verse: 15819    hæt ich die wârheit niht gesehen,
Verse: 15820    nimmer hôrt ir mich des jehen.

Verse: 15821    in ungelückes stunden
Verse: 15822    hân ich vil triuwen funden,

Verse: 15823    die gar volleclîchen ir
Verse: 15824    mit vollem habt erzeiget mir

Verse: 15825    durch mîn ungelücke grôʒ,
Verse: 15826    wie ir mich sâht sælden blôʒ,

Verse: 15827    und durch sic verliesen
Verse: 15828    wolt ir mich niht verkiesen.

Verse: 15829    wie mich frou Sælde fliehe
Verse: 15830    und mit gunst von mir ziehe,

Verse: 15831    doch sît ir mir mit triuwen bi;
Verse: 15832    als ob ich noch gewaltic sî

Verse: 15833    künc und aller verlüste bar,
Verse: 15834    sô nemet ir mîn mit dienste war,

Verse: 15835    mit helfe sunder wanken.
Verse: 15836    ich mac iu niht vol danken:

Verse: 15837    der aller gote der hœhste sî,
Verse: 15838    des lônes werdet nimmer frî:

Verse: 15839    sîn kraft mac iu gedanken baʒ.
Verse: 15840    ir habt an mir verdienet daʒ,

Verse: 15841    sô iu hie lebens wirt verzigen,
Verse: 15842    iuwer wirde nimmer wirt geswigen,

Verse: 15843    iuwern namen immer leben
Verse: 15844    in dirre werlde wirt gegeben.

Verse: 15845    lât iuwer wirde wesen leit
Verse: 15846    und iuwer manheit sîn gecleit,

Verse: 15847    daʒ dirre lande ein fremde man,
Verse: 15848    der nie dehein reht dar zuo gewan,

Verse: 15849    mich dâ von wil vertrîben.
Verse: 15850    mîn ellendeclich belîben,

Verse: 15851    daʒ ir mich seht dar inne tragen,
Verse: 15852    daʒ sol mîn volc mit triuwen clagen.

Verse: 15853    ich getriwe des iuwer helfe wol,
Verse: 15854    daʒ mich die wider bringen sol

Verse: 15855    an mîn êrste wirdikeit.
Verse: 15856    iu allen sî daʒ vorgeseit:

Verse: 15857    sol ich der krône abe gestên
Verse: 15858    daʒ muoʒ alsô an mir ergên,

Verse: 15859    daʒ ich dar umbe werde erslagen
Verse: 15860    oder man siht mich die krône tragen.

Verse: 15861    ichn kom an mîne wirde wider,
Verse: 15862    sô müeʒen alle lant der nider

Verse: 15863    geligen und alleʒ daʒ ich hân
Verse: 15864    und waʒ noch alle mîne man

Verse: 15865    habent, daʒ muoʒ gewâget sin.
Verse: 15866    dirre schemelîche pîn

Verse: 15867    und der vînde überlast,
Verse: 15868    den wir tragen, und er doch gast

Verse: 15869    aller dirre lande sî;
Verse: 15870    daʒ im ist solich gelücke bî,

Verse: 15871    daʒ muoʒ mir füegen sorgen nôt:
Verse: 15872    doch hoffe ich des hin ze got,

Verse: 15873    unser sælde welle sich mêren,
Verse: 15874    unser ungelücke sich verkêren.'

Verse: 15875       Dô der fürste daʒ gesprach,
Verse: 15876    gegenrede im gar gebrach,

Verse: 15877    wann Archâbatus aleine
Verse: 15878    getriuwe und valsches eine

Verse: 15879    (der keiser sîn ze mâge jach),
Verse: 15880    der was der êrste der dô sprach,

Verse: 15881    der unverzagte werde helt.
Verse: 15882    'waʒ ir gebietet und war ir welt,

Verse: 15883    dar sol ich mit den mînen
Verse: 15884    in iuwerm dienste erschînen.

Verse: 15885    hêrre, alsô stunt ie mîn muot,
Verse: 15886    daʒ ich lîp, liute unde guot

Verse: 15887    füeren wolde in iur gebot.
Verse: 15888    wer solde zuo sô grôʒer nôt

Verse: 15889    ân helfe sînen hêrren lân,
Verse: 15890    der müeste sîn ein bœser man.'

Verse: 15891    dar nâch wart ir mêre,
Verse: 15892    die des twanc triuw und êre,

Verse: 15893    die wolden bî dem keiser wesen,
Verse: 15894    eʒ gienge an sterben oder genesen.

Verse: 15895    der hêrre ouch manegen vor im sach,
Verse: 15896    der im rât nâch helfe sprach.

Verse: 15897    ob in dar umbe zwîvel jaget,
Verse: 15898    wer im daʒ vür zagheit saget,

Verse: 15899    ich wæne im der unrehte tuo:
Verse: 15900    ungelücke twanc in dar zuo.

Verse: 15901    nû merkent reht: wie sî dem man,
Verse: 15902    der ûf dem mer sich muoʒ begân,

Verse: 15903    dem die winde schaden mêren,
Verse: 15904    von welchem orte sie sich kêren:

Verse: 15905    alsô was dem guoten,
Verse: 15906    dem werden reine gemuoten.

Verse: 15907    in welchen wec er eʒ kêrte,
Verse: 15908    sîn ungelücke sich mêrte.

Verse: 15909    gegen rehten vinden niht alein,
Verse: 15910    an den sînen eʒ ouch schein,

Verse: 15911    daʒ im fuor ungelücke mite.
Verse: 15912    die er in wirdikeit site

Verse: 15913    und ie helflîchen hielt,
Verse: 15914    gegen den sîn tugent triuwen wielt,

Verse: 15915    den er sich günstig ie erbôt;
Verse: 15916    die swuoren dô des fürsten tôt.

Verse: 15917    ei werlt, wie du lœnest
Verse: 15918    und dîn wirde hœnest

Verse: 15919    mit ungetriuwem gelde!
Verse: 15920    dîn valscheit ich hie melde.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.