TITUS
Ulrich von Eschenbach, Alexander
Part No. 108
Previous part

Chapter: 128  
Eroberung von Persepolis


Verse: 15273       Des andern morgens vil fruo
Verse: 15274    bereite sich der fürste zuo:

Verse: 15275    eʒ was dannoch niht vollen tac,
Verse: 15276    dô er daʒ volc ze wecken phlac.

Verse: 15277    selber die hütten er zunte,
Verse: 15278    dâ mit dem her er kunte

Verse: 15279    daʒ dâ gnuoc was gelegen,
Verse: 15280    sie solden dannan kêrens phlegen.

Verse: 15281    ir genuoge wârn sô müede noch,
Verse: 15282    daʒ sie der slâf ze tale zôch:

Verse: 15283    wær eʒ gewesen des fürsten wille,
Verse: 15284    sie wærn gelegen stille,

Verse: 15285    doch muosten rûmen sie den plân,
Verse: 15286    über daʒ waʒʒer Adrax von dan.

Verse: 15287    grôʒ ein stat er aldâ vant,
Verse: 15288    Persepolis ist die genant.

Verse: 15289    waʒ er stete ie vor gesach,
Verse: 15290    des wîsen sin dô sô verjach

Verse: 15291    er hæte nie vester gesehen:
Verse: 15292    des hôrt man al die Kriechen jehen.

Verse: 15293    waʒ der rîche was in Asîâ
Verse: 15294    die nâmen ir reht alle dâ.

Verse: 15295    sie mohte haben liute vil.
Verse: 15296    hœrt waʒ ich sagen wil.

Verse: 15297    von den Trôjâ zerbrochen wart,
Verse: 15298    die suochten dar mit here vart.

Verse: 15299    vür die stat durch strîtlich vâr
Verse: 15300    ûf dem mer sie brâhten dar

Verse: 15301    fünfzehen hundert kiele grôʒ:
Verse: 15302    die dannen kêrten siges blôʒ,

Verse: 15303    vierzehen hundert was ir minner.
Verse: 15304    gegen den streit daʒ inner

Verse: 15305    volc und behielt den sic mit craft.
Verse: 15306    ouch hete sich mit der stat behaft

Verse: 15307    Xerses, der entwîchen
Verse: 15308    dannen muoste schedelîchen.

Verse: 15309    die burger wâren wol ze wer.
Verse: 15310    sie heten umb sich daʒ mer

Verse: 15311    durch manegen berc geleitet,
Verse: 15312    umb die stat gebreitet:

Verse: 15313    in gemûrten graben tief
Verse: 15314    daʒ waʒʒer manegen enden lief,

Verse: 15315    dar ûf sie ze maneger zît
Verse: 15316    hielten mit den vînden strît.

Verse: 15317    der fürste der stat fröute sich.
Verse: 15318    dô west er niht daʒ sîn gerich

Verse: 15319    an ir ergie mit zorne starc.
Verse: 15320       an dem sich manheit nie verbarc

Verse: 15321    Permêniô was ê dar komen.
Verse: 15322    der het schaden grôʒ genomen.

Verse: 15323    ich muoʒ iu swære mære sagen:
Verse: 15324    im wart dâ liute vil erslagen.

Verse: 15325    dô er mit in ze sturme gienc,
Verse: 15326    driu tûsent volkes man im vienc,

Verse: 15327    die die burgære
Verse: 15328    pînten mit scharpher swære.

Verse: 15329    sie besniten sie gar.
Verse: 15330    dirre wart der nasen bar,

Verse: 15331    daʒ enwart ouch niht vermiten
Verse: 15332    ir münde wurden in versniten,

Verse: 15333    disem der ôren gebrach,
Verse: 15334    dem volgte der dâ niht gesach,

Verse: 15335    dirre lief âne zunge,
Verse: 15336    alt unde junge

Verse: 15337    wârn nâch eigenlîchen siten
Verse: 15338    an der stirne versniten:

Verse: 15339    thau was dar an gebrant,
Verse: 15340    sô was der burger zeichen bekant.

Verse: 15341    daʒ erbuten sie dem hêrren
Verse: 15342    in der stat ze unêren

Verse: 15343    und santen sie im so wider.
Verse: 15344    Alexander zogte nider

Verse: 15345    ein lîten gegen einer ouwen,
Verse: 15346    dâ er jâmer muoste schouwen.

Verse: 15347    daʒ volc sich hete gesundert.
Verse: 15348    den fürsten sêre wundert

Verse: 15349    waʒ fremder tier daʒ mohte sîn.
Verse: 15350    dô der fürste zuo in

Verse: 15351    nâhe ze Permêniône kam
Verse: 15352    und der wîgant vernam

Verse: 15353    jâmer an dem volke sîn,
Verse: 15354    sîn herze dolte swære pîn.

Verse: 15355    sich erguʒʒen im die ougen
Verse: 15356    under huotes dache tougen,

Verse: 15357    dô er mit jæmerlîcher sage
Verse: 15358    hôrte sîn leit und ir clage.

Verse: 15359    doch hôrte man den gehêrten
Verse: 15360    trœsten die versêrten.

Verse: 15361    'ir habt schaden durch mich genomen.
Verse: 15362    wâ ich des mac ze gelte komen,

Verse: 15363    daʒ lâʒe ich niht verterben,
Verse: 15364    ich solʒ mit flîʒe werben.

Verse: 15365    alhie swer ich ir aller tôt,
Verse: 15366    die iu buten dise nôt.

Verse: 15367    ich wolt eʒ lieber vertragen,
Verse: 15368    ob sie iuch hæten gar erslagen'.

Verse: 15369       nû hieʒ er trucken ûfeʒ mer
Verse: 15370    gâhes zogen al sîn her

Verse: 15371    in kielen und tremunden,
Verse: 15372    der sie dâ vil funden:

Verse: 15373    die het ein fürste dâ gelân,
Verse: 15374    der hete dâ niuwes strît getân.

Verse: 15375    von ir übermuot unmâʒen
Verse: 15376    heten die burger gelâʒen

Verse: 15377    daʒ sie die lieʒen unverswendet:
Verse: 15378    des wurden sie siges gephendet.

Verse: 15379    von ir übermuote
Verse: 15380    die stat âne huote

Verse: 15381    lieʒen die burgære.
Verse: 15382    nû hieʒ der helt gewære

Verse: 15383    zuo der stat gâhen.
Verse: 15384    dô sie der wâren nâhen

Verse: 15385    von dem mer ûf einen anger komen
Verse: 15386    und daʒ die burger heten vernomen,

Verse: 15387    seht wie die dâ inne
Verse: 15388    nâch prîses gewinne

Verse: 15389    îlten ûʒ der veste
Verse: 15390    mit grimme an die geste.

Verse: 15391    ir enphâhen daʒ was sûre.
Verse: 15392    dô sie vür die mûre

Verse: 15393    kâmen, an allen sîten
Verse: 15394    huop sich dô grôʒ strîten.

Verse: 15395    hie die Kriechen 'Macedôn',
Verse: 15396    der burger krîe was 'Hâmôn',

Verse: 15397    der rote die Kriechen brâchen.
Verse: 15398    versêrteʒ volc sie râchen.

Verse: 15399    der strît was dâ herte.
Verse: 15400    der vogt die burger zerte,

Verse: 15401    mit ellenthaften henden
Verse: 15402    sach man sie in vaste swenden;

Verse: 15403    ouch tâten sie dem Macedôn
Verse: 15404    mit strîtes tât alsô gedon,

Verse: 15405    daʒ in daʒ müete sêre.
Verse: 15406    doch was ie der hêre

Verse: 15407    aller sîner vînde schûr.
Verse: 15408    waʒ ir dem menlîchen Grâjûr

Verse: 15409    in strîte widerriten kam,
Verse: 15410    an den er sic mit prîse nam.

Verse: 15411    er sach an allen sîten
Verse: 15412    die sînen mit kraft durchrîten

Verse: 15413    die burger. al unverzagt
Verse: 15414    hat nû Filôtas gejagt

Verse: 15415    ein teil der vînde in die stat,
Verse: 15416    des man in niht vergebens bat.

Verse: 15417    die innern an in kêrten,
Verse: 15418    mit strîte sich dise werten;

Verse: 15419    dort ûʒe Alexander
Verse: 15420    leit nôt, hie inne der ander:

Verse: 15421    doch gap er dâ strîtes vil,
Verse: 15422    er brâhte ir vil ûf tôdes zil.

Verse: 15423    vor dem manheit rîchen
Verse: 15424    hie ûʒe begunden wîchen

Verse: 15425    gegen der stat die burgære,
Verse: 15426    des twanc sie tôdes swære.

Verse: 15427    nû was Permêniô komen vor
Verse: 15428    die zogebrucke an dem tor

Verse: 15429    hieʒ der helt ûf ziehen.
Verse: 15430    waʒ tohte dô ir fliehen?

Verse: 15431    ich wil die rede mit kürze sagen:
Verse: 15432    sie wurden ertrenket und erslagen.

Verse: 15433    waʒ der stetære was,
Verse: 15434    ir deheiner genas.

Verse: 15435    die Kriechen al gemeine
Verse: 15436    grôʒ unde cleine

Verse: 15437    sluogen wîp unde man,
Verse: 15438    nieman genas wann der entran.

Verse: 15439    in der gote palas,
Verse: 15440    der dâ vil gehêret was,

Verse: 15441    nâmen sie sô kreftic guot:
Verse: 15442    des sol nieman haben muot

Verse: 15443    daʒ im daʒ ie geschæhe
Verse: 15444    daʒ er ie rîcher stat gesæhe.

Verse: 15445    die zerfuorter alsô gar
Verse: 15446    als sie nie wære gebûwet dar.

Verse: 15447    wir haben vür wâr alsô gehôrt,
Verse: 15448    der tempel het sô grôʒen hort,

Verse: 15449    waʒ dâ fürsten wâren
Verse: 15450    in Asîâ vor manegen jâren,

Verse: 15451    die heten allerjærlich dar
Verse: 15452    ir rôteʒ golt lieht gevar

Verse: 15453    gar milticlich gesant.
Verse: 15454    dâ hete manic künstic hant

Verse: 15455    irn flîʒ meisterlich ûf gelegt.
Verse: 15456    die bilde wurden geregt

Verse: 15457    von den Kriechen ungefuoge.
Verse: 15458    dô wart ûʒ manegem luoge

Verse: 15459    verborgen golt gerucket
Verse: 15460    und von dem wege gezucket

Verse: 15461    und ander habe tiure.
Verse: 15462    sich begunden die Grâiure

Verse: 15463    aldâ zweien umb die habe
Verse: 15464    und stên einander friuntschaft abe.

Verse: 15465    teilen sieʒ begunden
Verse: 15466    mit maneger swæren wunden.

Verse: 15467    manic tiure goltvaʒ,
Verse: 15468    die nimmer mohten wesen baʒ

Verse: 15469    geworht noch gezieret,
Verse: 15470    die wurden dô quetschieret

Verse: 15471    und an manegen clôʒen
Verse: 15472    in die secke gestôʒen,

Verse: 15473    ouch wart dô manic rîch gewant
Verse: 15474    von ir ungedult zertrant.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.