TITUS
Ulrich von Eschenbach, Alexander
Part No. 107
Previous part

Chapter: 127a  
Alexander trifft auf den fliehenden Darius


Verse: 15200       Nû sach er wâ von verren reit

Verse: 15201    der keiser und gegen Bractân zôch,
Verse: 15202    als er vor Permêniône flôch.

Verse: 15203    der müede rief die müeden an
Verse: 15204    'werden helde, nû wol dan!'

Verse: 15205    selbe ersprangter mit dem vanen.
Verse: 15206    er kande wol die sînen manen.

Verse: 15207    er bôt in lîp unde guot,
Verse: 15208    daʒ sie hielten strîtes muot.

Verse: 15209    Alexanders wirdikeit
Verse: 15210    fuogte dâ maneger frouwen leit,

Verse: 15211    die sîn craft von leben schiet.
Verse: 15212    mit tjost ein fürste gegen im geriet.

Verse: 15213    nû lâ wir sie ze houfe komen.
Verse: 15214    von den helden wirt vernomen

Verse: 15215    strîtes âventiure.
Verse: 15216    der Persân und der Grâiure

Verse: 15217    zerten die sper an der tjost.
Verse: 15218    die swert schiere wârn erlôst

Verse: 15219    menlîchen ûʒ den scheiden.
Verse: 15220    dô sach man von in beiden

Verse: 15221    starkeʒ viur erwecken
Verse: 15222    ûʒ ir helm mit scharfen ecken.

Verse: 15223    man sach die strîtes milden
Verse: 15224    von harnasch und schilden

Verse: 15225    rêren manic tiure werc.
Verse: 15226    daʒ werte unz daʒ sie keinen berc

Verse: 15227    von schildes dache mohten hân:
Verse: 15228    des muosten sie ûf den lîp enphân

Verse: 15229    slege ungezalte.
Verse: 15230    ietweder nâch prîse stalte

Verse: 15231    mit strîte menlîchen
Verse: 15232    den Persân krefte rîchen

Verse: 15233    hôrt man schrîen 'Jupiter',
Verse: 15234    (daʒ im der hulfe daʒ was sîn ger),

Verse: 15235    sô rief der Krieche 'Macedô!
Verse: 15236    süeʒe Candacis, nû wis frô!

Verse: 15237    hie und ze allen zîten
Verse: 15238    hilfest du mir, frouwe, strîten.'

Verse: 15239    dar nâch mit slage er gâhte
Verse: 15240    an den Persân, dem ouch brâhte

Verse: 15241    trôst ein wunneclîcheʒ wîp,
Verse: 15242    daʒ des ellenthaften lîp

Verse: 15243    mit süeʒen tugenden des ie twanc
Verse: 15244    daʒ er nâch hôher wirde ranc.

Verse: 15245    doch muoʒ der strît sich enden.
Verse: 15246    die zwêne starc genenden

Verse: 15247    herteclîches kampfes smide
Verse: 15248    erswungen krefteclich ir lide.

Verse: 15249    ôwê, nû muoʒ ich iu sagen
Verse: 15250    daʒ manic herze muoʒ beclagen

Verse: 15251    in der Persân lande,
Verse: 15252    die der strît fröiden phande:

Verse: 15253    in wart ein fürste hie erslagen.
Verse: 15254    sîn muosten wîte lant verzagen,

Verse: 15255    die fröiden kraft durch daʒ verkurn,
Verse: 15256    daʒ sie sô küenen man verlurn.

Verse: 15257    der Krieche mit kraft gewalte
Verse: 15258    den werden Persân valte.

Verse: 15259    dar nâch criegt er in die dicke.
Verse: 15260    dâ stalt er tôdes stricke,

Verse: 15261    er und die andern an grôʒem mort,
Verse: 15262    (vür wâr hân ich alsô gehôrt)

Verse: 15263    der nie sô grôʒ vor geschach.
Verse: 15264    dô man sie in offem strîte sach,

Verse: 15265    waʒ der Persân dâ was,
Verse: 15266    der deheiner genas,

Verse: 15267    als ich die rede vernomen hân.
Verse: 15268    Darîus aleine entran.

Verse: 15269    er kêrte war er mohte,
Verse: 15270    als eʒ nû dem hêrren tohte.

Verse: 15271    doch was Alexander leit
Verse: 15272    daʒ im der keiser entreit.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.