TITUS
Ulrich von Eschenbach, Alexander
Part No. 105
Previous part

Chapter: 126  
Belagerung Uxiâs


Verse: 14903       Dar nâch der junge helt gemeit
Verse: 14904    gegen Sûsâ der stat reit,

Verse: 14905    die was grôʒ und guotes rîche,
Verse: 14906    die im williclîche

Verse: 14907    gâben die burgære
Verse: 14908    âne strîtlich swære.

Verse: 14909    sie bewîsten im holden muot
Verse: 14910    und gâben im ein creftic guot,

Verse: 14911    golt, silber, edel gesteine,
Verse: 14912    daʒ er den hêrren gemeine

Verse: 14913    teilte milticlîche.
Verse: 14914    ouch was der fürste rîche

Verse: 14915    mit den burgæren frô.
Verse: 14916    er ahte cleine der vînde drô.

Verse: 14917    dô er von Sûsâne schiet,
Verse: 14918    gegen Uxiâ sîn wec geriet,

Verse: 14919    dâ hôrte zuo ein rîcheʒ lant.
Verse: 14920    die stat er wol ze wer vant.

Verse: 14921    dar obe ein burc gar veste lac,
Verse: 14922    der ein getriuwe hêrre phlac.

Verse: 14923    die veste stat und daʒ lant
Verse: 14924    hete der keiser im benant,

Verse: 14925    eʒ solt im wesen undertân.
Verse: 14926    er was ein wert edel man,

Verse: 14927    getriuwe, stæte unde wîs.
Verse: 14928    er hete mit rehter manheit prîs

Verse: 14929    in strîte mit ritterschaft bejagt,
Verse: 14930    er truoc ein herze unverzagt:

Verse: 14931    Medates der werde hieʒ.
Verse: 14932    Alexander an im werben lieʒ

Verse: 14933    daʒ er im gæbe die stat.
Verse: 14934    Medates die triuwe hat,

Verse: 14935    daʒ er jach ern wolde,
Verse: 14936    waʒ im geschehen solde.

Verse: 14937    er jach er wolde dienest tuon
Verse: 14938    der süeʒen Sisîcâmis suon,

Verse: 14939    gegen dem solt sîn triuwe
Verse: 14940    wesen alt und niuwe:

Verse: 14941    wie manʒ im sæch uneben gên,
Verse: 14942    er wolt im doch niht abe gestên.

Verse: 14943    ûʒ der stat gar heimelichen
Verse: 14944    kâmen geslichen

Verse: 14945    etslîche der burgære.
Verse: 14946    sie sagten dem Kriechen mære,

Verse: 14947    durch den vels gienge ein hol,
Verse: 14948    daʒ man in die burc wol

Verse: 14949    heimelîchen mohte komen.
Verse: 14950    dô Alexander daʒ hete vernomen,

Verse: 14951    er schuof dar hern Thaurôn,
Verse: 14952    an dem er manheit was gewon,

Verse: 14953    die er mit vesten triuwen truoc:
Verse: 14954    er was ze solichen sachen cluoc;

Verse: 14955    mit im werder ritter vil,
Verse: 14956    der ich nû niht nennen wil,

Verse: 14957    wann mir ir ist verzigen:
Verse: 14958    durch daʒ sint sie von mir verswigen.

Verse: 14959    sie kâmen heimelîche dar.
Verse: 14960    dâ sie des holes wurden gewar,

Verse: 14961    Thaurôn sich bereite
Verse: 14962    zuo der arbeite.

Verse: 14963    der helt kêrte gegen dem hol.
Verse: 14964    nû wâren dô bereitet wol

Verse: 14965    ebenhœh, trîbocke, mangen,
Verse: 14966    pheterære, katzen, hebstangen,

Verse: 14967    mit menteln und igelen
Verse: 14968    sach man die veste verigeln,

Verse: 14969    aller hande strîtes werc
Verse: 14970    hieʒ er triben an den berc,

Verse: 14971    ouch vaste criegete den sînen vor
Verse: 14972    Alexander gegen dem tor.

Verse: 14973    die werc ûf den schîben
Verse: 14974    an die mûre hieʒ er trîben,

Verse: 14975    die wâren wît unde starc,
Verse: 14976    dar in vil volkes sich verbarc,

Verse: 14977    daʒ dar ûʒ die mûre brach.
Verse: 14978    manic wurf dar ûʒ geschach,

Verse: 14979    der in schatte cleine.
Verse: 14980    von den ûʒern mit manegem steine

Verse: 14981    wart in die burc geswenket,
Verse: 14982    daʒ der innern fröide krenket.

Verse: 14983    mit dem trîbocke grôʒ
Verse: 14984    an daʒ tor manic stôʒ

Verse: 14985    crefteclîchen ergienc,
Verse: 14986    daʒ doch lützel vervienc.

Verse: 14987    swâ in des daches gebrach,
Verse: 14988    swinde man dâ die Kriechen sach

Verse: 14989    ûʒ den wern letzen,
Verse: 14990    sunder lebens ergetzen.

Verse: 14991    ouch gulten sich die Grâiure
Verse: 14992    an dem sturme harte tiure.

Verse: 14993       Alexander die sînen
Verse: 14994    begunde mit worten pînen.

Verse: 14995    'ôwê' sprach er 'der schanden!
Verse: 14996    man sach mit heldes handen

Verse: 14997    iuch ie prîs erwerben,
Verse: 14998    daʒ wil alhie verterben.

Verse: 14999    waʒ iuwer ellen erziuget hât,
Verse: 15000    schemelich daʒ lop zergât.

Verse: 15001    gedenket daʒ unz her nie wart
Verse: 15002    dehein werc sô veste noch sô hart,

Verse: 15003    ir habt mit krefticlîcher hant
Verse: 15004    eʒ ân der vînde danc zertrant.

Verse: 15005    jâ wart nie sô stickel mûr.
Verse: 15006    wolt ir iuch regen, ir wert ir schûr.

Verse: 15007    seht waʒ mac vor uns bestên,
Verse: 15008    dem wir mit haʒʒe gegen gên?'

Verse: 15009    dô er in dise wort vor sprach,
Verse: 15010    der fürste gegen dem turne sach.

Verse: 15011    dô was nû Thaurôn komen ûf,
Verse: 15012    der lûte schrît der Kriechen ruof

Verse: 15013    'hie Macedô! hie Macedô!
Verse: 15014    werden Kriechen weset frô!'

Verse: 15015    die an die veste kêrten
Verse: 15016    mit grimme ir prîs dô mêrten.

Verse: 15017    die burger swære nôt begreif,
Verse: 15018    sie umbeslôʒ der sorgen reif.

Verse: 15019    sumelîche durch genesen
Verse: 15020    von der burc wolden wesen,

Verse: 15021    etslîche wolden sich noch wern,
Verse: 15022    die selben sach man kêrn

Verse: 15023    gegen Thaurô über lanzen, turn,
Verse: 15024    dâ von sie stürmen niht verburn.

Verse: 15025    mit schüʒʒen tâten sie gedon
Verse: 15026    dem unverzagten Thaurôn;

Verse: 15027    sie buten in daʒ selbe wider.
Verse: 15028    doch der burcgrâve sante nider

Verse: 15029    in fride drîʒic sîner man,
Verse: 15030    von den die bete wart getân,

Verse: 15031    daʒ man daʒ volc lieʒ abe gên
Verse: 15032    gesunt, und daʒ man lieʒ bestên

Verse: 15033    die burc unzerbrochen.
Verse: 15034    daʒ wart widersprochen.

Verse: 15035    er jach sie müesten ir leben
Verse: 15036    algelîch ze gelte geben.

Verse: 15037    er wolt ir dehein gnâde hân.
Verse: 15038    trûric kêrten sie von dan

Verse: 15039    zuo irn burgæren
Verse: 15040    niht mit guoten mæren.

Verse: 15041    man sach dô hant winden,
Verse: 15042    von frouwen unde kinden,

Verse: 15043    manec wengel lieht erbleichen,
Verse: 15044    daʒ ê truoc der rôsen zeichen,

Verse: 15045    dô in der fürste enbôt den tôt,
Verse: 15046    manec süeʒeʒ mündel rôt

Verse: 15047    sach man mit jâmers güssen
Verse: 15048    mit senender clage küssen

Verse: 15049    ûf der burc die werden heiden.
Verse: 15050    an tœtlîcheʒ scheiden

Verse: 15051    daʒ volc dô gedâhte,
Verse: 15052    daʒ vil jâmers brâhte.

Verse: 15053    Medates doch ermante,
Verse: 15054    heimelich er sante

Verse: 15055    ze der frowen Sisîcâmis.
Verse: 15056    in dûhte wesen daʒ gewis,

Verse: 15057    wes sie an dem fürsten gerte,
Verse: 15058    daʒ er sie des gewerte.

Verse: 15059    er bat sie umb hulde werben
Verse: 15060    und wenden ir volkes sterben.

Verse: 15061    Medates der triuwen phlac.
Verse: 15062    er was der küniginne mâc

Verse: 15063    und ouch der keiser ir suon,
Verse: 15064    des solde sieʒ ze rehte tuon.

Verse: 15065    die frowe in lange versagte,
Verse: 15066    daʒ den boten niht behagte,

Verse: 15067    doch ermante sie rehte güete,
Verse: 15068    die ie stæte erblüete

Verse: 15069    an werden wîben süeʒen,
Verse: 15070    daʒ sie sich erbarmen müeʒen,

Verse: 15071    wâ sie ieman wiʒʒen in nôt.
Verse: 15072    rehte triuwe ir daʒ gebôt.

Verse: 15073    dô sprach die guote
Verse: 15074    in trûrigem muote

Verse: 15075    'west ich wie mit êren
Verse: 15076    den fürsten an gekêren,

Verse: 15077    er hât mich erhœret vil:
Verse: 15078    ouch ichʒ noch versuochen wil'.

Verse: 15079    ze dem fürsten sie sante,
Verse: 15080    umb Medatem sie in mante

Verse: 15081    und al der beseʒʒen schulde,
Verse: 15082    daʒ er in gæbe hulde.

Verse: 15083    alsô lût der frouwen bete,
Verse: 15084    daʒ er mit dem lande tete

Verse: 15085    waʒ sîn wille wære.
Verse: 15086    dô sprach der helt mære

Verse: 15087    'waʒ gebiutet die frouwe mîn,
Verse: 15088    daʒ sol âne zwîvel sîn,

Verse: 15089    des ich sie williclîche wer'.
Verse: 15090    zehant hieʒ gebieten er

Verse: 15091    daʒ sie lieʒen ir strîten
Verse: 15092    und daʒ volc mit fride abe rîten,

Verse: 15093    daʒ der burcgrâve, vür in kæme
Verse: 15094    und sîne wort vernæme.

Verse: 15095    Medates die besten mit im nam.
Verse: 15096    dô er vür den fürsten kam,

Verse: 15097    der tet im sînen willen kunt.
Verse: 15098    der burcgrâve in zühten stunt,

Verse: 15099    der man im ie und manheit jach.
Verse: 15100    hœrt, wie Alexander sprach!

Verse: 15101    'mîn frouwe hât erworben
Verse: 15102    daʒ gegen iu ist erstorben

Verse: 15103    und gegen den iuwern mîn zorn,
Verse: 15104    der leit ich starke hete gesworn.

Verse: 15105    danket ir und sît sîn begeben.
Verse: 15106    ir sult âne swære leben.

Verse: 15107    durch triuwe, die ich an iu weiʒ,
Verse: 15108    die burc und des landes kreiʒ,

Verse: 15109    her Medates, sol wesen iur.
Verse: 15110    ouch gibe ich iu daʒ ze stiur:

Verse: 15111    sît zinses frî immer mê
Verse: 15112    die wîle, daʒ die werlt stê !'

Verse: 15113    er bôt im êren alsô vil:
Verse: 15114    vür wâr ich daʒ sprechen wil,

Verse: 15115    sie wârns von Darîô erlân.
Verse: 15116    dô die hete was getân,

Verse: 15117    Medates was gar frô,
Verse: 15118    ouch sîn geverten wâren so.

Verse: 15119    dem künge wart dô vil genigen
Verse: 15120    daʒ er sie tôdes hete verzigen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.