TITUS
Ulrich von Eschenbach, Alexander
Part No. 104
Previous part

Chapter: 199a  
Alexander als Herrscher


Verse: 14839       Dô der freche Macedôn
Verse: 14840    schiet von der rîchen Babilôn,

Verse: 14841    vil stete, bürge, wîte lant
Verse: 14842    lêch des unverzagten hant.

Verse: 14843    er machte die sînen rîche,
Verse: 14844    die im dienten willeclîche.

Verse: 14845    er hieʒ ie tûsent einem man
Verse: 14846    gewarten und wesen undertân.

Verse: 14847    er bat sie flîʒlîche
Verse: 14848    daʒ sie lieplîche

Verse: 14849    mit einander wolden leben
Verse: 14850    und stæte helfe under in geben.

Verse: 14851    an sinnen der bewarte
Verse: 14852    durch daʒ sîn volc sô scharte,

Verse: 14853    ob er ze strîte kæme,
Verse: 14854    daʒ er reht vernæme

Verse: 14855    und wol möhte besehen
Verse: 14856    welhen er manheit möhte jehen,

Verse: 14857    unde baʒ ieclîchen man
Verse: 14858    nâch sîner wirde möhte hân.

Verse: 14859    er verwandelt ouch die site,
Verse: 14860    die vor dem fürsten fuoren mite.

Verse: 14861    wann mit here sie lâgen,
Verse: 14862    sô sie ûfbrechens phlâgen,

Verse: 14863    eʒ wær bî tage oder bî naht,
Verse: 14864    sô gâben ir busînen braht.

Verse: 14865    Alexander daʒ verkêrte,
Verse: 14866    einen niuwen siten er lêrte:

Verse: 14867    er hieʒ ûʒ den hütten viur
Verse: 14868    machen. aber der Pelliur

Verse: 14869    gebôt daʒ man ein stange
Verse: 14870    des tages ûf stieʒ gar lange,

Verse: 14871    daʒ solden sie ze zeichen hân,
Verse: 14872    wann man rûmen solde den plân.

Verse: 14873    waʒ er werder ritter het,
Verse: 14874    beide mit gâbe und mit bet

Verse: 14875    kunder sie bringen dar an,
Verse: 14876    daʒ sie im wâren undertân

Verse: 14877    und wâren im irs willen sleht.
Verse: 14878    aller der lande al die reht

Verse: 14879    in beʒʒer er kêrte,
Verse: 14880    als in sîn wîsheit lêrte.

Verse: 14881    er hielt sîn burgære wol,
Verse: 14882    als ein ietslich fürste sol,

Verse: 14883    und dâ bî doch in vorhte:
Verse: 14884    sîn genendikeit daʒ worhte.

Verse: 14885    Theodosîus ein keiser hieʒ,
Verse: 14886    der gotes gebot ungerne lieʒ.

Verse: 14887    er was der sêle ein heilic man.
Verse: 14888    den heiden er gesiget an,

Verse: 14889    dô sîn strît mit in ergienc;
Verse: 14890    vil er ir in strîte vienc,

Verse: 14891    die er nâch ir willen twanc.
Verse: 14892    Rœmer sagten im des danc

Verse: 14893    und lobten in des sêre.
Verse: 14894    sô lob ich den noch mêre

Verse: 14895    der ungevangenʒ bringet
Verse: 14896    volc und dar zuo twinget,

Verse: 14897    daʒ eʒ ze sîme gebote stât,
Verse: 14898    durch daʒ tuot unde lât.

Verse: 14899    hæt mich ein gar krankeʒ wîp
Verse: 14900    in vancnisse ûf den lîp,

Verse: 14901    ir gebot ich leisten solde,
Verse: 14902    ob ich mich neren wolde.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.