TITUS
Ulrich von Eschenbach, Alexander
Part No. 97
Previous part

Chapter: 118a  
Darius flieht


Verse: 14087       der keiser jâmer grôʒ dô sach.
Verse: 14088    der werde vür wâr dô sprach

Verse: 14089    daʒ die Kriechen al gelîche
Verse: 14090    waren manheit rîche;

Verse: 14091    daʒ Alexander ûf daʒ velt
Verse: 14092    hæt brâht mangen tiuren helt.

Verse: 14093    von âvoy an strîtes âventiur
Verse: 14094    und von craft des Pelliur

Verse: 14095    manger ûf dem wale bleip.
Verse: 14096    ir strît ûʒ werden herzen treip

Verse: 14097    süeʒe fröide und dructe dar în
Verse: 14098    ganzes jâmers wernde pîn.

Verse: 14099    dô wart schadens gnuoc gekorn
Verse: 14100    und liute beider sît verlorn.

Verse: 14101    in der bittern helle wîte
Verse: 14102    den tac, als ob eʒ snîte

Verse: 14103    und hagelte gar sêre,
Verse: 14104    ergie der soldier rêre.

Verse: 14105       Der keiser dannoch vaste streit.
Verse: 14106    sîn jâmer und sîn herzeleit

Verse: 14107    sach er sich vaste frischen,
Verse: 14108    mit werndem pîne mischen.

Verse: 14109    mit snellen schüʒʒen gâhte
Verse: 14110    der edle fürste gedâhte

Verse: 14111    waʒ im solde ze staten komen,
Verse: 14112    daʒ eʒ im an sige mohte fromen.

Verse: 14113    kranken trôst er vor im sach.
Verse: 14114    der werde ûʒ jâmers siten sprach:

Verse: 14115    'Frou Sælde hât mich gar verlân.
Verse: 14116    mîn haben dise werde man

Verse: 14117    entgolten, die hie sint erslagen.
Verse: 14118    nî muoʒ mîn riuwe herze tragen

Verse: 14119    haʒ vil süeʒer herzen,
Verse: 14120    die immer wernden smerzen

Verse: 14121    umb ir trût enphâhent,
Verse: 14122    von fröiden ze jâmer gâhent

Verse: 14123    suln mir die geheʒʒic sîn,
Verse: 14124    waʒ touc mir dann daʒ leben mîn ?'

Verse: 14125    er begunde mit gedanken
Verse: 14126    hin und her wanken.

Verse: 14127    gerne wære er gewesen dan,
Verse: 14128    dann er weste niht ob sîne man

Verse: 14129    mit im wolden kêren
Verse: 14130    oder baʒ dâ strîten mêren,

Verse: 14131    wann er sie sach noch an der wer.
Verse: 14132    er gedâhte 'ob ich nû von in kêr

Verse: 14133    aleine, waʒ mac mich helfen daʒ?
Verse: 14134    ich friste mich bî in verre baʒ'.

Verse: 14135    dô er alsô in sorgen ranc,
Verse: 14136    ûf ein ors er sich swanc.

Verse: 14137    dannoch vil der Kriechen
Verse: 14138    muosten von im sît siechen,

Verse: 14139    die er ungefuoge schôʒ,
Verse: 14140    ouch tet er manegen lebens blôʒ.

Verse: 14141    noch wolt er gerne blîben.
Verse: 14142    er sach die sînen trîben

Verse: 14143    die Kriechen ûf der ouwe entwer,
Verse: 14144    in flühte jagen gegen im her.

Verse: 14145    nû was von im ungespart,
Verse: 14146    er warf sich ûf der flühte vart.

Verse: 14147    vast er mit den sînen vlôch
Verse: 14148    gegen Erbelâ dem waʒʒer er zôch.

Verse: 14149    der brücken dô vergaʒer,
Verse: 14150    durch den pfloum die furt maʒer.

Verse: 14151    mit der fluht sie gâben zol.
Verse: 14152    der keiser was geriten wol:

Verse: 14153    ich wæne im wære daʒ niht leit,
Verse: 14154    eʒ müet aber den der in jeit.

Verse: 14155    die Persân volgeten sîme spor,
Verse: 14156    den fuor er selbzwelfte vor.

Verse: 14157    an einen bach kam er gerant
Verse: 14158    gar tief, der ist Lincus genant.

Verse: 14159    dâ kam er über eine brücke.
Verse: 14160    der fürste sach ze rücke,

Verse: 14161    er trahte ob er solde
Verse: 14162    die brücke brechen: er enwolde.

Verse: 14163    er dâhte 'frist ich sô mîn leben,
Verse: 14164    sô sîn die dem tôde gegeben,

Verse: 14165    die nâch mir in flühte varn.'
Verse: 14166    durch daʒ hieʒ er die brücke sparn.

Verse: 14167    man sach wol geriten man
Verse: 14168    nâch irm hêrren kêren dan.

Verse: 14169    sus tâten sie von dannen kêr
Verse: 14170    hie gegen der wilde, dort gegen dem mer,

Verse: 14171    etslîche an fluht dô phlihten,
Verse: 14172    nâch dem admirât sie rihten.

Verse: 14173    war umbe fliuht der keiser hie?
Verse: 14174    weste er rehte oder wie

Verse: 14175    im sîn sterben wære bereit,
Verse: 14176    sîn jâmer wurde des alze breit.

Verse: 14177    sîn wirde dolte die nôt,
Verse: 14178    ê daʒ er swechlîchen tôt

Verse: 14179    von sînen bœsern kür;
Verse: 14180    den lîp er lieber hie verlür.

Verse: 14181       Dô Darîus von strîte brach
Verse: 14182    und daʒ Alexander sach,

Verse: 14183    nû wart dô lützel gebiten,
Verse: 14184    dô wart mit sporn versniten

Verse: 14185    sîn snelleʒ ors Pûcival
Verse: 14186    tet starke sprünge sunder twâl

Verse: 14187    ûf der ouwe über manic âs,
Verse: 14188    daʒ dâ mit strîte geströwet was.

Verse: 14189    nâch im die Kriechen kâmen gehurt
Verse: 14190    ûf dem plân durch bluotes furt.

Verse: 14191    als ein strenger donerschric
Verse: 14192    und ein sneller himelblic,

Verse: 14193    des kunft mit jâmer wirt geclagt,
Verse: 14194    sô wart den vînden nâch gejagt.

Verse: 14195    ir nâchjagen wart gar sûr
Verse: 14196    den heiden und sô gar ir schûr.

Verse: 14197    sie sluogen ir an flühte mê,
Verse: 14198    dann dô sie mit in striten ê.

Verse: 14199    vil heiden, die an flühte riten,
Verse: 14200    als sie in harnasch heten gestriten

Verse: 14201    gar den sumerlangen tac,
Verse: 14202    der mit liehter sunnen phlac

Verse: 14203    gar ungefüeger hitze,
Verse: 14204    dô lêrte durstes witze,

Verse: 14205    dô sie den Lincum sâhen,
Verse: 14206    sie begunden dar în gâhen.

Verse: 14207    daʒ waʒʒer was sô ungesunt,
Verse: 14208    des wart überal den heiden kunt

Verse: 14209    von irs trankes ungenuht
Verse: 14210    daʒ man heiʒet die waʒʒersuht,

Verse: 14211    ouch wart von ir gedrenge
Verse: 14212    die breite brücke ir lenge

Verse: 14213    alze kurz und ze smal:
Verse: 14214    'in den Lincum ergie ir val:

Verse: 14215    waʒ ir dar ûf komen was,
Verse: 14216    der drîʒigoste ir niht genas.

Verse: 14217    sus dolten die Sarrazîne
Verse: 14218    allenthalben swære pîne.

Verse: 14219       Die sunne ze gemache zôch
Verse: 14220    hinder daʒ gebirge hôch.

Verse: 14221    Alexander daʒ wal
Verse: 14222    mit den sînen behielt und prîses mâl.

Verse: 14223    des hôhen fürsten wirdikeit
Verse: 14224    was daʒ von allem herzen leit

Verse: 14225    daʒ im nû strîtes gebrach:
Verse: 14226    daʒ macht daʒ er dâ nieman sach

Verse: 14227    wann die sînen ûf den velden.
Verse: 14228    die fürsten ze irn gezelden

Verse: 14229    hieʒ der werde rîten.
Verse: 14230    nû sant im an den zîten

Verse: 14231    Permêniô sînen boten,
Verse: 14232    daʒ er sît halp der Persân roten

Verse: 14233    hete mit strîte zerbrochen
Verse: 14234    und sic wær im gesprochen,

Verse: 14235    daʒ er et gegen im gâhte.
Verse: 14236    der werden vil er brâhte,

Verse: 14237    die er hete gevangen
Verse: 14238    des mohte wol erlangen

Verse: 14239    in ir heimôte süeʒe wîp,
Verse: 14240    wann daʒ des fürsten lîp

Verse: 14241    gnâden vil an in begienc
Verse: 14242    und sie nâch ir bete enphienc.

Verse: 14243       Der Kriechen vogt sach man frô.
Verse: 14244    gegen sîm gezelte kêrter dô,

Verse: 14245    er wânde haben guot gemach.
Verse: 14246    gegen im ûʒ dem gebirge brach

Verse: 14247    Exâtreus mit grôʒem her.
Verse: 14248    gegen Alexandrô tet er kêr.

Verse: 14249    er brâhte die ungefüege schar
Verse: 14250    aller rîcheit wunder dar.

Verse: 14251    Alexander wânde sân
Verse: 14252    dô wolt ein ander tac ûf gân.

Verse: 14253    Exâtreus tet des war,
Verse: 14254    dô der Krieche mit cleiner schar

Verse: 14255    gegen der poulûne reit,
Verse: 14256    dar er sîn reise niht vermeit

Verse: 14257    lûte schrei der Persân 'Jupiter'.
Verse: 14258    er sprangte und neigte sîn sper.

Verse: 14259    'Macedô' wart hie geschrît.
Verse: 14260    alrêst huop sich ein niuwer strît.

Verse: 14261    die alumbe hôrten wol
Verse: 14262    daʒ ir hêrre leit strîtes dol,

Verse: 14263    die ze irn rossen gâhten
Verse: 14264    und im mit helfe nâhten.

Verse: 14265    sie funden den helt gar unverzagt.
Verse: 14266    der sach wâ dort her gegen im jagt

Verse: 14267    der al der roten leiter was.
Verse: 14268    als ein gar liehteʒ spiegelglas

Verse: 14269    was sîn harnasch, daʒ er fuorte,
Verse: 14270    sîn helm, den schilt ouch ruorte

Verse: 14271    manic tiur edelstein,
Verse: 14272    der liehtem sterne gelîch erschein

Verse: 14273    und bran als ein gar queckeʒ lieht
Verse: 14274    sîn ros und er sich sûmten niht,

Verse: 14275    durch tjost er gegen dem Kriechen kam,
Verse: 14276    der Pûcival mit walap nam.

Verse: 14277    ir tjost dô ungelîch geriet,
Verse: 14278    Exâtreum er von leben schiet:

Verse: 14279    alsô kund im der Pelliûr
Verse: 14280    dar sîn komen machen sûr.

Verse: 14281    die roten ze houfe drungen.
Verse: 14282    ach, wie die swert erclungen

Verse: 14283    ûf helm und durch schildel
Verse: 14284    sie wâren strîtes milde.

Verse: 14285    dâ wart von den helden tiur
Verse: 14286    ûʒ den adamanten viur

Verse: 14287    mit slegen stæte gefrumet,
Verse: 14288    ir herten schilt von in gedrumet,

Verse: 14289    der man sie blôʒ sach rîten.
Verse: 14290    herte was ir strîten.

Verse: 14291    die Kriechen dort unde hie
Verse: 14292    die vînde sluogen, ouch sluoc man sie.

Verse: 14293    nû kam Permêniô gevarn
Verse: 14294    und ander fürsten mit irn scharn.

Verse: 14295    dô die wurden gelâʒen an,
Verse: 14296    dô wart strît dâ getân,

Verse: 14297    der mit craft wart zuo brâht
Verse: 14298    und werte vaste unz in die naht.

Verse: 14299    mitten besît hie und dort
Verse: 14300    sie fuogten ungefüegen mort.

Verse: 14301    der strît vil nâch was gewegen,
Verse: 14302    noch deheiner was gelegen,

Verse: 14303    er wære vergolten alsô tiur.
Verse: 14304    ofte rief der Pelliur

Verse: 14305    'wer dich, frecher Macedô!'
Verse: 14306    dar nâch wart gehurtet sô

Verse: 14307    durch herte rote enge
Verse: 14308    mit hurtlîchem getwenge,

Verse: 14309    von einander er sie clôʒte.
Verse: 14310    der Kriechen craft nû grôʒte.

Verse: 14311    hie durch die vînde dringâ drinc,
Verse: 14312    dô volgt von swerten clingâ clinc.

Verse: 14313    sie tâten starc einander wê.
Verse: 14314    nû heten sie niht tages mê,

Verse: 14315    dâ von in liehtes gebrach.
Verse: 14316    den himel man gestirnet sach.

Verse: 14317    ouch wart der Persân muot sô cranc,
Verse: 14318    daʒ sie ze flühte tâten wanc.

Verse: 14319    dâ hin der keiser was gevarn
Verse: 14320    sach man sie den wec niht sparn.

Verse: 14321    vil ir doch gevangen bleip.
Verse: 14322    dâ mittenaht ir zît vertreip,

Verse: 14323    kâmen sie ûf Erbelas,
Verse: 14324    die ouwe, dâ der keiser was,

Verse: 14325    der sie trûriclich enphie,
Verse: 14326    als des den hêrren nôt an gie.

Verse: 14327       noch nie kein fürste wart geborn,
Verse: 14328    der in strîte hete sô vil verlorn

Verse: 14329    an werdem volke, an guote.
Verse: 14330    in trûrigem muote

Verse: 14331    er ze den hêrren sprach,
Verse: 14332    waʒ er der noch bî im sach.

Verse: 14333    'vür wârheit ich wol jehen mac,
Verse: 14334    dô mir wîlen sælde lac,

Verse: 14335    dâ wiget nû vür swærlîchen grôʒ
Verse: 14336    in allen ort unsælden lôʒ.

Verse: 14337    swie mir sælde sî entsliffen,
Verse: 14338    unsælde mich hât begriffen

Verse: 14339    und twinget mich unmâʒen.
Verse: 14340    doch muge wir niht gelâʒen

Verse: 14341    unser grôʒlîche verlust
Verse: 14342    der Kriechen vogt umbesust.

Verse: 14343    durch verlust unser mâge
Verse: 14344    müeʒe wir noch in wâge

Verse: 14345    daʒ beliben teil setzen,
Verse: 14346    sie müeʒen uns noch letzen

Verse: 14347    oder wir gerechen uns ein teil.
Verse: 14348    noch versuoche wir unser heil.

Verse: 14349    nâch des hœhsten gebot,
Verse: 14350    der über alle gote ist got,

Verse: 14351    werden alle dinc getân
Verse: 14352    und müeʒen nâch sînem willen gân:

Verse: 14353    daʒ er uns âne helfe lât,
Verse: 14354    daʒ bringet unser missetât,

Verse: 14355    daʒ man der werlde unstæte giht
Verse: 14356    und daʒ gelücke wanken siht.

Verse: 14357    nû hât er uns gephlâget vil,
Verse: 14358    waʒ ob nû der hœhste wil

Verse: 14359    verschulten haʒ ab uns kêren
Verse: 14360    und unser gelücke mêren

Verse: 14361    und unser swære krenken?
Verse: 14362    ir lebt noch vil, die des gedenken

Verse: 14363    wie Crêsus mit Cyrô streit
Verse: 14364    und mit gewalt in überreit,

Verse: 14365    daʒ er in siges entworhte,
Verse: 14366    daʒ der unervorhte

Verse: 14367    sît strîteclich sich rach,
Verse: 14368    wann er sît sîn leben brach

Verse: 14369    und al sîn craft valte sider.
Verse: 14370    dô was Cyrô gelücke wider

Verse: 14371    komen und frou Sælden gunst.
Verse: 14372    die wîle wir craft und vernunst

Verse: 14373    haben und noch werlich leben,
Verse: 14374    wir suln uns sô niht begeben.

Verse: 14375    wir wellenʒ, noch versuochen.
Verse: 14376    waʒ ob unser ruochen

Verse: 14377    frou Sælde mit craft beginnet
Verse: 14378    und helfe gegen uns versinnet?

Verse: 14379    gewinnen und verliesen
Verse: 14380    muoʒ man in strîte kiesen:

Verse: 14381    der durch verlust wil verzagen,
Verse: 14382    der mac nimmer prîs bejagen.

Verse: 14383    wir mugen lieber den tôt
Verse: 14384    tragen dann schemelîche nôt.

Verse: 14385    dar umbe wir bezîte
Verse: 14386    berihten uns ze strîte,

Verse: 14387    ê daʒ ir craft sich baʒ zeige
Verse: 14388    und unser tât sich veige.

Verse: 14389    wir besuochen mâge unde man,
Verse: 14390    der wir noch vil geruowet hân:

Verse: 14391    in Mêdâ und Persiâ
Verse: 14392    vinde wir guote helfe da'.

Verse: 14393       gâher antwurt im gebrast,
Verse: 14394    wann sie het des strîte last

Verse: 14395    des tages erværet,
Verse: 14396    ouch wârn etslîche beswæret

Verse: 14397    mit unheilhaften wunden.
Verse: 14398    sô trahten die gesunden,

Verse: 14399    ob der werde Macedôn
Verse: 14400    erstrite die vesten Babilôn

Verse: 14401    oder listeclich erwurbe,
Verse: 14402    daʒ dann alleʒ verturbe

Verse: 14403    in strîtlîchem gedinge.
Verse: 14404    noch wârn dâ jungelinge,

Verse: 14405    der geburt was clâr, ir manheit grôz
Verse: 14406    die noch strîtes niht verdrôʒ,

Verse: 14407    die dem keiser helfe sprâchen,
Verse: 14408    die strenge pîne stâchen

Verse: 14409    umb friunt und mâge harte.
Verse: 14410    mit jæmerlîchem garte

Verse: 14411    schiere kêrte der keiser dan
Verse: 14412    gegen dem lande Bractân.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.