TITUS
Ulrich von Eschenbach, Alexander
Part No. 96
Previous part

Chapter: 118  
Schlacht bei Erbela (Gaugamela)


Verse: 13013       Habt ir von strîte ie nôt vernomen,
Verse: 13014    der wil ditz buoch ze ende komen.

Verse: 13015    Ob ie wunnenberndeʒ wîp
Verse: 13016    senenden fröidelôsen lîp

Verse: 13017    gewan umb ir amîs,
Verse: 13018    der durch ir minne und werden prîs

Verse: 13019    in ritters muot den lîp verlôs,
Verse: 13020    aldâ man dem gelîche kôs

Verse: 13021    manic reine fröuwelîn,
Verse: 13022    in des herzen wernde pîn

Verse: 13023    der werden strît aldô brâht
Verse: 13024    und in ir suoʒe sûre vlaht

Verse: 13025    der fürsten strîtlich morden.
Verse: 13026    jâmer ganz und leitlich horden

Verse: 13027    sach man sie laden ze hûse,
Verse: 13028    ûʒ minniclîcher clûse

Verse: 13029    sust ir fröide gar vertreip,
Verse: 13030    dar nâch mit stæte er dâ bleip.

Verse: 13031    man vindet ouch manegen heiden,
Verse: 13032    des werdekeit ist gescheiden

Verse: 13033    gar von aller missetât,
Verse: 13034    sunder daʒ in der touf verlât:

Verse: 13035    alsô mac man ouch ir frouwen
Verse: 13036    in süeʒer wirde schouwen,

Verse: 13037    in tugenden der sie wunder gern.
Verse: 13038    sie kunnen ouch süeʒer fröide wern.

Verse: 13039    sie sîn cristen oder heidenîn,
Verse: 13040    sie haben alle daʒ loben mîn.

Verse: 13041    ein wîp in rehtes wîbes siten
Verse: 13042    mit süeʒen tugenden undersniten,

Verse: 13043    wonet dâ wîplich güete bî,
Verse: 13044    ich wæne daʒ niht werder sî

Verse: 13045    dann ir wunnebernder lîp.
Verse: 13046    wirt sie getriuwes mannes wîp,

Verse: 13047    daʒ sich ir kiusche flihtet
Verse: 13048    in sîne wirde, der ist berihtet,

Verse: 13049    des ich offenbâr wil jehen,
Verse: 13050    im mac nimmer baʒ geschehen.

Verse: 13051       Als mir daʒ buoch urkunde gît,
Verse: 13052    sô was eʒ rehte umb die zît

Verse: 13053    sô der aprîlis ende hât,
Verse: 13054    der sumer blüende ane gât.

Verse: 13055    des jârs erschein der êrste tac,
Verse: 13056    der ie süeʒer wunne phlac,

Verse: 13057    wunneclich des meien,
Verse: 13058    dô die werden leien

Verse: 13059    einander haʒ erzeigten
Verse: 13060    und ir werdeʒ leben veigten.

Verse: 13061    wie in halt dort wære,
Verse: 13062    so enphâht mîn herze swære

Verse: 13063    und kan mir fröide krenken,
Verse: 13064    sô ich irs mordes muoʒ gedenken,

Verse: 13065    daʒ sieʒ verdienten umbe got
Verse: 13066    daʒ er in solich phlâge bôt.

Verse: 13067       dô kam ein fürste ûʒ Indiâ
Verse: 13068    mit gezierde mangerleie dâ:.

Verse: 13069    der hete namen von Crêtês.
Verse: 13070    des werde hieʒ Aristêmonês.

Verse: 13071    er brâhte ein wunneclîcheʒ her.
Verse: 13072    gegen Alexandrô tet er kêr.

Verse: 13073    er reit ein schœneʒ elephant.
Verse: 13074    dem fürsten manheit was bekant.

Verse: 13075    ir kam ouch mê aldâ mit im;
Verse: 13076    als ichʒ von dem meister nim,

Verse: 13077    vil olbente, schœne ros,
Verse: 13078    ûf den man tiure decklach kôs,

Verse: 13079    dar ûf rîchlich gesniten
Verse: 13080    nâch kostbærn siten

Verse: 13081    verworren in golt ûf samît blâ
Verse: 13082    tiure gesteine hie und dâ,

Verse: 13083    ûf helmen und ûf schilden
Verse: 13084    (die gâben schîn gar milden)

Verse: 13085    karfunkel, tiur rubîne.
Verse: 13086    der Crêtês und die sîne

Verse: 13087    nâch der vinster wârn gevar.
Verse: 13088    sie kâmen wol geflôret dar,

Verse: 13089    doch was ir fürste gezieret baʒ.
Verse: 13090    dem elephante er slege maʒ

Verse: 13091    mit einer geiseln von zehen strenen:
Verse: 13092    daʒ tier sach man in vaste menen.

Verse: 13093    man seite die geisel koste vil,
Verse: 13094    ein tiur jaspis wær ir stil.

Verse: 13095    der elephant gar drâte schreit,
Verse: 13096    den er unverzaget reit,

Verse: 13097    gegen dem Kriechen, dô er in sach,
Verse: 13098    ûf dem ein starkeʒ sper er brach.

Verse: 13099    Tabrôn was sîn crîe:
Verse: 13100    alsô hieʒ des fürsten amîe,

Verse: 13101    die in hôchgemüete lêrte.
Verse: 13102    an im ir minne mêrte

Verse: 13103    menlich craft, die im nâhte,
Verse: 13104    wann er an sie gedâhte.

Verse: 13105    der junge iedoch der tjost besaʒ.
Verse: 13106    Alexander niht vergaʒ,

Verse: 13107    er merkte rehte und eben,
Verse: 13108    dô daʒ tier eneben

Verse: 13109    hât dâ mit eʒ eʒʒen mac,
Verse: 13110    dar er tjost sich bewac.

Verse: 13111    alsô daʒ sper er dâ durch brach,
Verse: 13112    daʒ man ûf die erden sach

Verse: 13113    vallen des tieres geweide.
Verse: 13114    daʒ was dem swarzen leide,

Verse: 13115    der dannoch hielt dô strîtes vil.
Verse: 13116    von uncraft daʒ elephant viel.

Verse: 13117    der Krieche mit dem swerte sîn
Verse: 13118    durch daʒ hersnier guldîn,

Verse: 13119    dô der helm wante,
Verse: 13120    imʒ mit slage spante.

Verse: 13121    den heiden man an houbt sach,
Verse: 13122    und im der nagel wart ze swach,

Verse: 13123    dâ der schilt gehangen was:
Verse: 13124    den sach man bluomen unde gras

Verse: 13125    ûf dem anger decken
Verse: 13126    und niht den swarzen recken.

Verse: 13127    vor zagheit die gefrîten
Verse: 13128    'Macedô' sie alle schrîten

Verse: 13129    und daʒ der sic wære ir.
Verse: 13130    dannoch mit strîtlîcher gir

Verse: 13131    sach man irn hêrren dâ
Verse: 13132    rechen die von Indiâ.

Verse: 13133    des Kriechen schilt ein venster truoc,
Verse: 13134    ûf den wart gestriten gnuoc.

Verse: 13135       Hector fuorte der Kriechen vanen.
Verse: 13136    den hôrte man die fürsten manen

Verse: 13137    'helde, nû verzaget niht!
Verse: 13138    iuwer edel art iu manheit giht.'

Verse: 13139    Alexander streit den sînen vor.
Verse: 13140    im bôt dô strît manec herter môr,

Verse: 13141    sie wurden gehurtet an einen clôʒ,
Verse: 13142    die degen strîtes niht verdrôʒ.

Verse: 13143    man sach in manegen starken bogen
Verse: 13144    lange phîle gar an gezogen,

Verse: 13145    die sie mit kreften lieʒen.
Verse: 13146    manec hant âne verdrieʒen

Verse: 13147    man irn hêrren rechen sach.
Verse: 13148    dirre sluoc, jener stach.

Verse: 13149    der Kriechen fürst der streit et hin,
Verse: 13150    wann daʒ sîn guot gelücke in

Verse: 13151    in des strîtes herte
Verse: 13152    vor tôde dô ernerte.

Verse: 13153    wunder was daʒ er genas,
Verse: 13154    sô vil strîtes ûf in was.

Verse: 13155    er begunde des swarzen recken
Verse: 13156    volc mit slegen vlecken,

Verse: 13157    als der hamer tuot daʒ îsen.
Verse: 13158    ûf den plân sach man sie rîsen,

Verse: 13159    vor im und vor den sînen,
Verse: 13160    von starker slege pînen

Verse: 13161    ir bleip aldâ wol tûsent tôt.
Verse: 13162    vil Kriechen ouch die selbe nôt

Verse: 13163    von den swarzen dolten,
Verse: 13164    wie sie doch sic erholten.

Verse: 13165    Alexander hiew ein phat
Verse: 13166    biʒ an den fürsten Eliphat,

Verse: 13167    den werden von Êgiptiâ,
Verse: 13168    und an Pharôs von Ciriâ.

Verse: 13169    die zwêne mit in brâhten
Verse: 13170    fünfzehen tûsent, die ze strîte gâhten.

Verse: 13171    an Eliphat und Pharôs,
Verse: 13172    an Arcanî volc man rîcheit kôs.

Verse: 13173    ir helm, ir harnasch brunnen,
Verse: 13174    ir banier gelîch der sunnen.

Verse: 13175    sie heten sich kost gefliʒʒen.
Verse: 13176    ir liehten schilde gliʒʒen.

Verse: 13177    waʒ den menschen tragen mac,
Verse: 13178    ir volc daʒ ze rîten phlac.

Verse: 13179    manic ungehiure tier
Verse: 13180    truoc dô rîche lankenier.

Verse: 13181    ûf karrâtschen grôʒen
Verse: 13182    krefteclich wârn ûf gestôʒen

Verse: 13183    ir banier und dar in gesniten
Verse: 13184    Jupiter nâch rîcheit siten.

Verse: 13185    dise zwêne hergesellen
Verse: 13186    wârn ze strîte die snellen,

Verse: 13187    in was senfte gemüete tiur.
Verse: 13188    sie kâmen an den Pelliur.

Verse: 13189    dô wurden vriunde und mâge geclaget.
Verse: 13190    mit strîtes tât al unverzaget

Verse: 13191    buten die helde einander gelt,
Verse: 13192    des die heide und ander velt

Verse: 13193    mit fluhte gar genuʒʒen
Verse: 13194    von irm bluote, daʒ sie verguʒʒen.

Verse: 13195    die Kriechen und mê die Sarracîn
Verse: 13196    ûf der ouwe bluomen schîn

Verse: 13197    mit valle bedacten,
Verse: 13198    dar ûf ir ende volracten.

Verse: 13199    Pharôs und Eliphat
Verse: 13200    zeigten dô menlîche tât.

Verse: 13201    sie kunden wol in strîten
Verse: 13202    ir prîses craft gewîten.

Verse: 13203    man hôrt sie schrîen 'Jupiter,'
Verse: 13204    die Kriechen hin unde her

Verse: 13205    gewalticlich ir menlich hant
Verse: 13206    valte sunder lebens ûf daʒ lant.

Verse: 13207    dô daʒ Alexander sach,
Verse: 13208    sîn manheit bôt in swæren schâch,

Verse: 13209    dar nâch gap er in swæren mat.
Verse: 13210    er sluoc den künc Eliphat

Verse: 13211    durch helm und durch daʒ houbet,
Verse: 13212    daʒ er wart craft beroubet

Verse: 13213    und sîn wirdiclîcheʒ leben
Verse: 13214    dô dem tôde wart gegeben.

Verse: 13215    von Ciriâ der künc Pharôs
Verse: 13216    ouch sîn leben dô verlôs,

Verse: 13217    daʒ er ûʒ sînem verche brach.
Verse: 13218    daʒ swert mit craft er durch in stach.

Verse: 13219    sûr was sîn lônen.
Verse: 13220    er kunde niht vînde schônen,

Verse: 13221    im was einer als der ander.
Verse: 13222    alrêst Alexander

Verse: 13223    hielt gegen der herte.
Verse: 13224    mit strît poinders verte,

Verse: 13225    ê er die vînde durchbrach,
Verse: 13226    die sîne man in gelten sach,

Verse: 13227    die er in strîte hete verlorn.
Verse: 13228    im nâhte craft unde zorn.

Verse: 13229    werlich und âne verdrieʒ
Verse: 13230    er sîn swert dô smiden lieʒ,

Verse: 13231    daʒ hôrte man erclingen,
Verse: 13232    durch der vînde leben dringen.

Verse: 13233    er sluoc dô volkes alsô vil,
Verse: 13234    daʒ einen senft geladen kiel

Verse: 13235    hete die fluot enbor getragen
Verse: 13236    von bluote, die dô wurden erslagen.

Verse: 13237    sust irn schaden er phlihte
Verse: 13238    und ir craft er gar entnihte.

Verse: 13239    prîs und sic er dô behielt,
Verse: 13240    dâ von sîn wirde sich nie gespielt.

Verse: 13241    selbe er schrîte 'Macedô.'
Verse: 13242       Nû kam gegen im gestrichen dô

Verse: 13243    Geôn von dem rôten mer.
Verse: 13244    im volget ein engestlîcheʒ her.

Verse: 13245    er selber gienc, die sînen riten.
Verse: 13246    alrêst wart aldâ gestriten.

Verse: 13247    des ungefüegen Geôn
Verse: 13248    munt gap alsô lûten dôn,

Verse: 13249    wann er iht sprach, sô wânden dise
Verse: 13250    daʒ man ein grôʒeʒ horn bliese.

Verse: 13251    mit grimme er kam gegangen.
Verse: 13252    er truoc ein starke stangen

Verse: 13253    gelîch eime grôʒen boume.
Verse: 13254    die Kriechen tâten an in goume.

Verse: 13255    er truoc wunderlîcheʒ vel.
Verse: 13256    er tet sprünge mit loufe snel,

Verse: 13257    im was ûf Alexander gâch.
Verse: 13258    waʒ er volkes vor dem sach,

Verse: 13259    daʒ muost vor sîner slege nôt
Verse: 13260    aldâ lîden sûren tôt.

Verse: 13261    wâ sîn slahen hin geriet,
Verse: 13262    dâ kunder ros und ouch die diet

Verse: 13263    mit craft von leben bringen.
Verse: 13264    durch die rote sach man in dringen,

Verse: 13265    als ob in nieman irret.
Verse: 13266    sîn strît von fröiden virret

Verse: 13267    in Eurôpa manic wîp,
Verse: 13268    die sît beweinte irs friundes lîp.

Verse: 13269    der ungefüege vêch gevar
Verse: 13270    het in der fuoʒgengel schar

Verse: 13271    manegen man von lîbe brâht.
Verse: 13272    vast er ûf den fürsten gâht.

Verse: 13273    mit der stangen die er truoc
Verse: 13274    fünfzehen mit eime slag er sluoc,

Verse: 13275    daʒ eʒ Alexander sach,
Verse: 13276    der unverzegelîchen sprach

Verse: 13277    'du verfluohte crêatûr!
Verse: 13278    solt du nû sîn der werden schûr?

Verse: 13279    hete dich der hœhste Jupiter
Verse: 13280    mit sîner helfe bereitet her,

Verse: 13281    du muost arnen disen mort.'
Verse: 13282    Geôn scheltlîche wort

Verse: 13283    gegen dem wîgande het,
Verse: 13284    den flans er wîte ûf tet

Verse: 13285    gelîch eim grôʒen ûre.
Verse: 13286    ze im sprach der ungehûre

Verse: 13287    'wie torstest du ie geleben die zît,
Verse: 13288    daʒ du woldest halten strît

Verse: 13289    gegen der risen mâgen?
Verse: 13290    lebens dich kan betrâgen.

Verse: 13291    die hie die gote haben vertriben;
Verse: 13292    âne strît ist kûme bliben

Verse: 13293    der hœhste got Jupiter:
Verse: 13294    waʒ woldestu tôre gegen mir her?'

Verse: 13295    dô er alsô in rede stunt
Verse: 13296    und im offen stunt der munt,

Verse: 13297    er schôʒ mit dem schafte,
Verse: 13298    daʒ im die zunge hafte

Verse: 13299    vaste ze dem guomen.
Verse: 13300    gelegen was sîn ruomen,

Verse: 13301    daʒ im sprechen wart al tiur.
Verse: 13302    zuo im sprach der Pelliur

Verse: 13303    'nieman fürsten schelten sol.
Verse: 13304    wer biderb ist der vînt daʒ wol,

Verse: 13305    sît in der hœhsten fürsten rât
Verse: 13306    fürsten namen geordent hât.'

Verse: 13307    dannoch Geôn vaste streit.
Verse: 13308    Alexander im die stangen underreit,

Verse: 13309    mit dem orse Pûcival
Verse: 13310    stieʒ er den grôʒen ze tal

Verse: 13311    daʒ er tet ûf die erde val.
Verse: 13312    in der ouwe daʒ erhal

Verse: 13313    als ob ûʒ der erden riʒʒen
Verse: 13314    und sich valles fliʒʒen

Verse: 13315    starke boume in dem walde.
Verse: 13316    vil volkes er mit im valde.

Verse: 13317    dô wart vaste ûf in getriben
Verse: 13318    vil sper, swert durch in geriben.

Verse: 13319    dô er an dem rücke lac,
Verse: 13320    sô ungefüeger slege er phlac,

Verse: 13321    dâ maneger von bezalte.
Verse: 13322    wol hundert er dannoch valte,

Verse: 13323    ê er mit tôde sîn ende nam.
Verse: 13324       dar nâch Alexander kam

Verse: 13325    an des tôten Geôns her,
Verse: 13326    daʒ bôt kreftige wer.

Verse: 13327    sie sluogen unde stâchen,
Verse: 13328    ir hêrren sie vaste râchen,

Verse: 13329    des name des volkes krîe was.
Verse: 13330    wênic ir doch dô genas.

Verse: 13331    in wart sic ab gestriten.
Verse: 13332    sie wârn gar træge geriten,

Verse: 13333    dâ von ir wênic kam von dan:
Verse: 13334    sie bliben tôt ûf dem plân.

Verse: 13335    unverzagt die frîen
Verse: 13336    hôrte man ir crîe schrîen.

Verse: 13337       Alexander müede lêrte,
Verse: 13338    an die wîte er kêrte.

Verse: 13339    Pûcival durch ruowe erʒ tet,
Verse: 13340    daʒ er sêre gemüet het.

Verse: 13341    daʒ ors von dem testiere
Verse: 13342    hete er enblœʒet schiere.

Verse: 13343    dô nam der junge wîgant
Verse: 13344    ob dem harnasche sîn gewant,

Verse: 13345    den sweiʒ er im von den ougen streich.
Verse: 13346    Pûcival müede entweich.

Verse: 13347    wie vil der vînde was gelegen,
Verse: 13348    dannoch sach er dâ sich regen

Verse: 13349    manic rote und gegen im jagen,
Verse: 13350    als ob dâ nieman wære erslagen

Verse: 13351    noch nie strît wære geschehen.
Verse: 13352    dô hôrte man den fürsten jehen

Verse: 13353    'ich wæn ditz volc untôtlich sî
Verse: 13354    und im niht sterbens wone bî.

Verse: 13355    waʒ wir ir haben geslagen nider,
Verse: 13356    die sint ze kreften komen wider.

Verse: 13357    sît wir sie aber suln bestân,
Verse: 13358    werden helde, nû wol dan!'

Verse: 13359    menlich der wîgant
Verse: 13360    gegen den vînden kam gerant.

Verse: 13361    Enôs von Elamîe
Verse: 13362    vor untât der frîe,

Verse: 13363    und Kânaân von Frîgiâ,
Verse: 13364    die zwêne brâhten gegen im dâ

Verse: 13365    manegen wol gezierten man,
Verse: 13366    von den dô strîten wart getân.

Verse: 13367    sie brâhten manegen glanzen schilt,
Verse: 13368    dâ ûf frô Jûnô was gezilt.

Verse: 13369    sie selbe der heide gelîch gevar,
Verse: 13370    sô die in wunne erschînet gar,

Verse: 13371    alsô wârn ir ros gedecket,
Verse: 13372    dar ûf mit golde gestrecket

Verse: 13373    der selben gotinne bilde
Verse: 13374    von spæhem werke wilde.

Verse: 13375    sie fuorten manegen tiuren stein,
Verse: 13376    der ûʒ ir helme lieht erschein.

Verse: 13377    sie nâmen dâ hin strîtes war,
Verse: 13378    dâ Esipholus mit schar

Verse: 13379    ûf Erbelâ durch strît was komen.
Verse: 13380    dâ wart ir hurten hin genomen.

Verse: 13381    Esipholus, der gerne streit,
Verse: 13382    er und sîne wârn gereit.

Verse: 13383    dâ wart von spern lûter crach.
Verse: 13384    der vînde rote mit craft er brach.

Verse: 13385    sie triben in hin und er sie her,
Verse: 13386    vaste ûf Erbelâ entwer.

Verse: 13387    Esipholus, der junge helt,
Verse: 13388    under die ors ûf daʒ velt

Verse: 13389    ströute dô manegen Sarracîn,
Verse: 13390    als ob von wollen lemberîn

Verse: 13391    der werden harnasch wære.
Verse: 13392    mit vîntlîcher swære

Verse: 13393    sach man ouch dô die heiden
Verse: 13394    die Kriechen von lîbe scheiden.

Verse: 13395    Enôs was sîn schade leit.
Verse: 13396    mit einer starken ax er streit,

Verse: 13397    dâ mit er dem helde bôt
Verse: 13398    Esipholô durch helm den tôt.

Verse: 13399    doch ê der werde wurde gevalt,
Verse: 13400    er eine sich wol mit hunderten galt.

Verse: 13401    dô sînen tôt Philôtas sach,
Verse: 13402    der zorn ûʒ sînem herzen brach,

Verse: 13403    güete im dô gar verswant.
Verse: 13404    mit grimme der werde kam gerant

Verse: 13405    ûf Enôs unde Kânaân,
Verse: 13406    der eʒ ouch guot hete getân.

Verse: 13407    dô die helde zesamen riten,
Verse: 13408    hurtâ, wie dâ wart gestriten

Verse: 13409    von den zwein und dem einen!
Verse: 13410    dar umb man sît sach weinen

Verse: 13411    vil manic wunneclîcheʒ wîp.
Verse: 13412    die zwêne fürsten irn lîp

Verse: 13413    von Philôtam verlurn.
Verse: 13414    wirdic ende sie doch kurn.

Verse: 13415    'Macedô' wart dô geschrît.
Verse: 13416    alrêst der fürsten rote strît

Verse: 13417    sach man unverzaget geben.
Verse: 13418    sie râchen vast daʒ von dem leben

Verse: 13419    die künge gescheiden wâren.
Verse: 13420    der Kriechen sach man sie vâren

Verse: 13421    hie mit slegen, dort mit stich.
Verse: 13422    zornic gar was ir gerich.

Verse: 13423    der unverzagte Philôtas
Verse: 13424    iedoch ir aller schûr was,

Verse: 13425    der ie truoc rehtes heldes muot.
Verse: 13426    sîn swert vast durch ir leben wuot,

Verse: 13427    der werde sic ab in ervaht.
Verse: 13428    zwei tûsent ir wurden von leben brâht.

Verse: 13429       Clitus der werde ûʒerkorn,
Verse: 13430    des ellen ze manheit het gesworn,

Verse: 13431    sîn swester Alexander souc.
Verse: 13432    sînem adele daʒ niht louc

Verse: 13433    in sîner kintheite zît.
Verse: 13434    ich wold eʒ lâʒen âne nît

Verse: 13435    daʒ man hôher fürsten fruht
Verse: 13436    bevelhe frowen mit kiuscher zuht,

Verse: 13437    die adels niht verdriuʒet:
Verse: 13438    werdekeit der geniuʒet

Verse: 13439    mit spîse daʒ edel kindelîn.
Verse: 13440    gelîch bewîset mîn sin

Verse: 13441    daʒ der kinder anhanc sî
Verse: 13442    waʒ site den ammen wone bî.

Verse: 13443    Clitus swester, die guote,
Verse: 13444    die reine wol gemuote,

Verse: 13445    ir zuht ie missewende vlôch.
Verse: 13446    mit zühten sie den fürsten zôch.

Verse: 13447    ir bruoder cleine genôʒ des sît,
Verse: 13448    daʒ mir, weiʒgot, swære gît.

Verse: 13449    dâ von ich niht mê sprechen wil.
Verse: 13450    der werde muoʒ hie strîten vil.

Verse: 13451    dise fürsten mit ir scharn
Verse: 13452    gegen dem helde kâmen gevarn:

Verse: 13453    der künc Mêthâ von Dâmazôn,
Verse: 13454    mit im Sanga und Triphôn,

Verse: 13455    des alten süne beide,
Verse: 13456    die ich von prîse niht scheide,

Verse: 13457    den mit ritterlîcher tât
Verse: 13458    ir hôhe wirde erworben hât.

Verse: 13459    sie brâhten schônheit wunder.
Verse: 13460    driu starke her besunder

Verse: 13461    in liehter ougelweide
Verse: 13462    geverwet nâch der heide,

Verse: 13463    ir glanz vil ougen müeten.
Verse: 13464    den boumen glîch erblüeten

Verse: 13465    ir zimier mangerleie gevar,
Verse: 13466    mit golde, gesteine gemischet gar.

Verse: 13467    vil seltsæner tiere
Verse: 13468    gesniten in ir baniere,

Verse: 13469    rîch samît ûʒ manegem lande
Verse: 13470    an den werden man bekande.

Verse: 13471    ûf der edlen orsen man sach
Verse: 13472    von Sardîn phelle tiure dach.

Verse: 13473    ir schilde, ir schiltriemen
Verse: 13474    kunde volahten niemen.

Verse: 13475    ietslîcher sîner wer genôʒ.
Verse: 13476    Triphôn sluoc unde schôʒ.

Verse: 13477    Mêthâ gebôt dem selben suon
Verse: 13478    er solde vorstrîten tuon.

Verse: 13479    er kam ûf Clitum geriten
Verse: 13480    mit eime sper in tjostes siten.

Verse: 13481    Clitus im daʒ selbe bôt.
Verse: 13482    über die schilde gienc die nôt,

Verse: 13483    die tjost wart dar ûf gefrumet,
Verse: 13484    ir starke sper enzwei gedrumet.

Verse: 13485    dô in beiden der gebrach,
Verse: 13486    ze den swerten was in gâch.

Verse: 13487    hie Dâmazôn, dort Macedô:
Verse: 13488    ir beider crîe was alsô.

Verse: 13489    alsô der strît sich menget.
Verse: 13490    vil swerte wurden erclenget

Verse: 13491    ûf helm und ûf harnasch.
Verse: 13492    manegem sîn leben dô verlasch.

Verse: 13493    Clitus der wîgant
Verse: 13494    mit unverzegelîcher hant

Verse: 13495    Triphôn durch die zimierde sluoc,
Verse: 13496    durch helm, dô er daʒ leben truoc,

Verse: 13497    daʒ er tôt vor im gelac.
Verse: 13498    den Kriechen daʒ vil ringe wac

Verse: 13499    daʒ der edle niht genas,
Verse: 13500    wann er dô ir schade was.

Verse: 13501    dô daʒ tôtlich ungemach
Verse: 13502    Sanga an dem bruoder sach,

Verse: 13503    sîn herze ze jâmer wart verselt.
Verse: 13504    der unverzagte junge helt

Verse: 13505    mit starker rote ersprancte sâ
Verse: 13506    als tet der alte Mêthâ,

Verse: 13507    dô er den sun verlorn sach,
Verse: 13508    daʒ leit im durch sîn herze brach.

Verse: 13509    Sanga ûf eim karrâtschen streit,
Verse: 13510    dar ûf er vast gegen Clitus reit.

Verse: 13511    sîn ungedult was sô grôʒ,
Verse: 13512    snel und âne verdrieʒ er schôʒ

Verse: 13513    ûf in scharphe gabilôt.
Verse: 13514    sîn schilt im schirm gap vür den tôt.

Verse: 13515    in dûhte lebens zît ze lanc.
Verse: 13516    Sanga von dem wagen spranc,

Verse: 13517    an dem sprunge er Clitum sluoc
Verse: 13518    dô er daʒ lieht gesteine truoc.

Verse: 13519    wer dâ hersnier niht gewesen,
Verse: 13520    er wær des slages niht genesen.

Verse: 13521    Sanga daʒ swert fuor ûʒ der hant,
Verse: 13522    daʒ begreif der wîgant:

Verse: 13523    den slac er swære rach,
Verse: 13524    daʒ selbe swert er durch in stach,

Verse: 13525    daʒ der junge werde
Verse: 13526    viel tôt ûf die erde.

Verse: 13527    dô der vater daʒ ersach,
Verse: 13528    Mêthâ jæmerlîche sprach

Verse: 13529    'wol her, gar verfluohter man!
Verse: 13530    dîn hant hie mort hât getân,

Verse: 13531    der liehten ougen wirdet sûr.
Verse: 13532    ir fröiden hagel, ir süeʒe schûr

Verse: 13533    ist dîn ungeêrte hant,
Verse: 13534    die nû den süeʒen tuot bekant

Verse: 13535    jâmer ganz mit wernder nôt
Verse: 13536    umb der jungen fürsten tôt.

Verse: 13537    ôwê Sanga und Triphôn!
Verse: 13538    nû ist minnengeltes lôn

Verse: 13539    vil gar an iu verterbet
Verse: 13540    und fröiden vil ersterbet.

Verse: 13541    jâ suln immer werde wîp
Verse: 13542    mit flîʒe haʒʒen dînen lîp.

Verse: 13543    dir sol von in noch von den goten
Verse: 13544    nimmer werden wirde erboten,

Verse: 13545    ouch muost du ir haben mangel,
Verse: 13546    du fröiden scharpher angel,

Verse: 13547    vergift du arger natern zagel.
Verse: 13548    du bist der süeʒen wunne hagel,

Verse: 13549    du aller tugende frîe.
Verse: 13550    hâst du liebe amîe,

Verse: 13551    kint oder ander mâge,
Verse: 13552    durch dich die fröiden betrâge,

Verse: 13553    sô daʒ dîn velschlîcheʒ leben
Verse: 13554    dem bittern tôde sî gegeben.

Verse: 13555    unbillich ist dir niht ze tuon.
Verse: 13556    wol her, verfluohtes wîbes suon,

Verse: 13557    velle mich ze den kinden.
Verse: 13558    mîn leben sol ouch swinden.'

Verse: 13559    der jâmers rîch, an fröiden cranc
Verse: 13560    eines gabilôtes swanc

Verse: 13561    tet ûf Clitum mit swacher craft,
Verse: 13562    daʒ die lanze kûme behaft.

Verse: 13563    sîn schelten fuogte Clitô zorn,
Verse: 13564    dâ von Mêthâ wart verlorn.

Verse: 13565    er bôt im mit dem swerte
Verse: 13566    den tôt, des er doch gerte.

Verse: 13567    sîn val ûf die kint ergienc.
Verse: 13568    under ietslîchen arm er einen vienc:

Verse: 13569    alsô er bî den sünen starp.
Verse: 13570    Clitus in strîte aldâ erwarp

Verse: 13571    daʒ die Sarrazîne
Verse: 13572    buten sic mit jâmers pîne.

Verse: 13573    Clitus menlîches strîtens phlac.
Verse: 13574    er hete von tôten einen hac

Verse: 13575    umb sich gehouwen ûf dem plân,
Verse: 13576    die ûʒvart er kûm mohte hân

Verse: 13577    von den Sarrazînen,
Verse: 13578    mit den ouch der sînen

Verse: 13579    wol hundert bliben ûf dem wal.
Verse: 13580    doch fuort er dannen prîses mâl.

Verse: 13581       Nicânor ein Grâiur
Verse: 13582    kam dar durch strîtes âventiur.

Verse: 13583    prîs und ellen in des twanc,
Verse: 13584    daʒ er nâch hôher wirde ranc,

Verse: 13585    die was ie sîn geverte.
Verse: 13586    nû sach der muotes herte

Verse: 13587    daʒ gegen im durch strît dar kam
Verse: 13588    an dem der hêrre vil vernam

Verse: 13589    rîcheit, der der komende phlac.
Verse: 13590    sîn harnasch gleste als der tac

Verse: 13591    schînet von glanze der sunnen.
Verse: 13592    als starke viur brunnen,

Verse: 13593    die owe sach er erschînen
Verse: 13594    von dem keiser und den sînen.

Verse: 13595    den truoc ein alsô rîcher wagen,
Verse: 13596    des kost ich halp niht mac gesagen.

Verse: 13597    dâ von bôt schîn der rîche
Verse: 13598    in harnasch wunneclîche.

Verse: 13599    waʒ der andern mit im kam,
Verse: 13600    in allen schîn er gar benam.

Verse: 13601    er sach in ûʒ in allen brehen.
Verse: 13602    habt ir dunkel sterne gesehen

Verse: 13603    dar under einen liehten gar?
Verse: 13604    sô lûht er vür sie alle clâr.

Verse: 13605    manic tûsent reit im vor.
Verse: 13606    gegen den ersprancte Nicânor.

Verse: 13607    âvoy, wie dô wart gestriten!
Verse: 13608    mit tjoste starc ze houf geriten!

Verse: 13609    ouch wurden beider sît die schar
Verse: 13610    mit slegen her unde dar

Verse: 13611    gehurtet ûf der ouwen.
Verse: 13612    man moht dâ strîten schouwen,

Verse: 13613    des beider sît dâ vil geschach.
Verse: 13614    Nicânor mit sînen roten brach

Verse: 13615    durch die Persân dar und her.
Verse: 13616    sîn hant lief in dem strît entwer

Verse: 13617    hie mit stiche, dort mit slage.
Verse: 13618    er wære der küene oder der zage,

Verse: 13619    wer im in strîte widerstieʒ,
Verse: 13620    vor im er dô sîn leben lieʒ.

Verse: 13621    sus kunder dô erschînen
Verse: 13622    bî vînden mit den sînen,

Verse: 13623    mit den er brâht der Persân vil
Verse: 13624    von frechem leben ûf tôdes zil.

Verse: 13625    ir zal gesagen ich niht enmac,
Verse: 13626    sô vil ir dâ dar nider lac.

Verse: 13627    alsô tet er der vînde goum.
Verse: 13628    in dem gedrenge macht er roum,

Verse: 13629    daʒ man an jenem ende sach
Verse: 13630    wol waʒ an disem orte geschach

Verse: 13631       Rennôn von Arâbiâ
Verse: 13632    wolt sîn mâge rechen dâ.

Verse: 13633    der hôchgemuote kam gevarn
Verse: 13634    wol geziert ûʒ sînen scharn.

Verse: 13635    er und sîn ros von rœte bran,
Verse: 13636    rôt was alleʒ daʒ der man

Verse: 13637    ûf der planîe fuorte.
Verse: 13638    tiure kost daʒ ruorte.

Verse: 13639    man hât alsô gesagt mir,
Verse: 13640    tigris daʒ übel tier

Verse: 13641    wær in den samît gesniten,
Verse: 13642    sîn schilt nâch dem selben siten,

Verse: 13643    ûf dem helm eʒ swebt enbor.
Verse: 13644    er kam durch tjost gegen Nicânor,

Verse: 13645    die der ûf den fürsten rôt
Verse: 13646    gar unverzaget bôt.

Verse: 13647    zwischen den scharn sie sprancten,
Verse: 13648    ir sper ze rehte sie sancten,

Verse: 13649    sunder feil die tjost geschach.
Verse: 13650    ietweder aldâ sîn lanzen brach.

Verse: 13651    dem Arâboysen tet daʒ wê,
Verse: 13652    daʒ er den Kriechen niht ûf den clê

Verse: 13653    hete mit tjost gevellet.
Verse: 13654    nâch prîse der werde stellet.

Verse: 13655    in grimme ructe er daʒ swert,
Verse: 13656    er hielt vaste ûf den tegen wert.

Verse: 13657    Nicânor sich kunde wern.
Verse: 13658    ir rîch zimierde sach man sie zern,

Verse: 13659    man mohte ir schilde schouwen,
Verse: 13660    ir wâfencleit verhouwen.

Verse: 13661    kovertiure und lieht kursît
Verse: 13662    swante vaste der werden strît.

Verse: 13663    sie wârn der schilde enblœʒet gar.
Verse: 13664    nû nam ir beider manheit war

Verse: 13665    strîtes ze blôʒen sîten.
Verse: 13666    unverzagt sach man sie rîten

Verse: 13667    zesamne ûf dem plange.
Verse: 13668    nû het ir strît sô lange

Verse: 13669    ûf der ouwe gewert,
Verse: 13670    daʒ des verzagten die phert.

Verse: 13671    des muosten die werden
Verse: 13672    ze fuoʒ ûf der erden

Verse: 13673    strît einander bieten.
Verse: 13674    ir helme, harnasch sie schrieten,

Verse: 13675    dar nâch vaste dranc daʒ bluot.
Verse: 13676    sie zeigten vesten heldes muot.

Verse: 13677    Nicânor der Grâiur
Verse: 13678    brâhte mit strîtes schumphertiur,

Verse: 13679    den Arâboysen ûf die knie,
Verse: 13680    von slege nôt in craft verlie.

Verse: 13681    Nicânor die sînen rach,
Verse: 13682    durch Rennôn daʒ swert er stach.

Verse: 13683    'Macedô' der junge rief
Verse: 13684    mit manger swæren wunden tief.

Verse: 13685    alrêst der junge wîgant
Verse: 13686    umbe warf in sîner hant

Verse: 13687    daʒ swert. swer gegen im kam gehurt,
Verse: 13688    den lêrte Nicânor den furt

Verse: 13689    suochen ûf dem plâne
Verse: 13690    verwunt und lebens âne.

Verse: 13691    doch sach man Rennôn rechen.
Verse: 13692    mit schieʒen, slahen, stechen

Verse: 13693    vaste ûf den jungen
Verse: 13694    vil rote kâmen gedrungen,

Verse: 13695    mit den der strît sich mischet.
Verse: 13696    dô wart der sant gefrischet

Verse: 13697    als mit niuwem bluote.
Verse: 13698    noch stunt in vestem muote

Verse: 13699    der widerkêre gar vermeit.
Verse: 13700    er füere, gienge oder reit,

Verse: 13701    wer gegen dem frechen kam gevarn,
Verse: 13702    den kund er mit strîte lützel sparn,

Verse: 13703    alsô daʒ er sîn ende
Verse: 13704    dâ holt von sîner hende.

Verse: 13705    wær er ze orse als ê gewesen,
Verse: 13706    ir wær der fünfte niht genesen.

Verse: 13707    michel tât er dô worhte
Verse: 13708    ze fuoʒ der unervorhte.

Verse: 13709    doch bôt er solich strîtes vâr,
Verse: 13710    daʒ der arâbischen schar

Verse: 13711    sich ze flühte kêrte:
Verse: 13712    sîn strîten sie daʒ lêrte.

Verse: 13713       Von Irkâniâ ein her
Verse: 13714    brâhte ein wert heiden her,

Verse: 13715    der burggrâve von Kalach.
Verse: 13716    dô er dise flühtic sach,

Verse: 13717    zehant an die frîen
Verse: 13718    hôrte man in lûte schrîen.

Verse: 13719    'wa nû, helde, welt ir verzagen?
Verse: 13720    sît iu der hêrre ist erslagen,

Verse: 13721    wolt ir den mit flühte rechen?
Verse: 13722    wer sol dar umbe sprechen

Verse: 13723    iu wol oder bieten êre?
Verse: 13724    ir tuot von hinnen kêre,

Verse: 13725    die iuwern prîs muoʒ crenken
Verse: 13726    und in laster tief senken.

Verse: 13727    man sol iuch immer schouwen
Verse: 13728    in haʒʒe aller frouwen,

Verse: 13729    ob man iuch sô lesterlîchen
Verse: 13730    siht von hinnen wîchen.'

Verse: 13731    sie kêrten mit dem grâven wider.
Verse: 13732    daʒ velt was ûf unde nider

Verse: 13733    mit ir mangem beströut,
Verse: 13734    daʒ die helde lützel fröut,

Verse: 13735    under den sie stênde funden
Verse: 13736    Nîcânor mit swæren wunden.

Verse: 13737    sie sâhen daʒ der wîgant
Verse: 13738    unverzagt mit sîner hant

Verse: 13739    zerte den tiuren samît
Verse: 13740    und schoup in sîne wunden wît.

Verse: 13741    dô er sie gegen im komen sach.,
Verse: 13742    der junge wider sich selben sprach

Verse: 13743    'wær ich als hiute fruo gesunt,
Verse: 13744    daʒ wiʒʒet, ich tæt iu strîten kunt:

Verse: 13745    ob ir bræhtet al iuwer her,
Verse: 13746    ir sæht mich gegen iu ze wer.

Verse: 13747    wie ich gegen tôde hân gephliht,
Verse: 13748    ê daʒ man mich hie sterben siht,

Verse: 13749    ir enphâht hie tôdes pîne,
Verse: 13750    ir leiden Sarrazîne.'

Verse: 13751    alrêst durch der tôten hac,
Verse: 13752    daʒ dicke umb in gehouwen lac,

Verse: 13753    was gerûmet im ein phat,
Verse: 13754    dâ durch er gegen den vînden trat,

Verse: 13755    dô er ze orse wolt sîn komen.
Verse: 13756    im mohte sîn snelheit niht gefromen,

Verse: 13757    im wart der sprunc underriten.
Verse: 13758    dô wart ze fuoʒ von im gestriten

Verse: 13759    mit den geriten, alsô dô vor.
Verse: 13760    man sach sich gelten Nicânor.

Verse: 13761    wîte sprünge er tet,
Verse: 13762    als ob er ninder wunden het

Verse: 13763    noch aller swære dehein.
Verse: 13764    er worhte aldâ sô grôʒen mein,

Verse: 13765    ir zal ich niht geahten mac,
Verse: 13766    sô vil ir dâ vor im gelac.

Verse: 13767    mit manger swæren wunden tief
Verse: 13768    dicke er an die sînen rief;

Verse: 13769    daʒ sie die vînde wolden müen
Verse: 13770    und ir manheit lieʒen blüen.

Verse: 13771    er sprach 'iu wont doch ellen bî:
Verse: 13772    als liep iu Alexander sî,

Verse: 13773    dem ir helfe hât gesworn
Verse: 13774    und iuch durch triwe er hât erkorn!'

Verse: 13775    manec schuʒ ûf den werden gienc,
Verse: 13776    den er nû in den lîp enphienc.

Verse: 13777    der Irkânen gabilôt
Verse: 13778    den süeʒen brâhten ûf den tôt.

Verse: 13779    alsô die ungehiure diet
Verse: 13780    Nicânor von leben schiet.

Verse: 13781       Alexander kâmen mære
Verse: 13782    daʒ der helt von lîbe wære

Verse: 13783    von strîtes craft gescheiden.
Verse: 13784    dô begunde im fröide leiden.

Verse: 13785    man hôrte in lüen als ein rint,
Verse: 13786    er weinte zeher als ein kint.

Verse: 13787    der künc dem jungen triuwe truoc.
Verse: 13788    in clage er ûf dem velde sluoc

Verse: 13789    waʒ im der vînde widerreit.
Verse: 13790    mit disen worten der Krieche streit:

Verse: 13791    'ô du süeʒer Nicânor!
Verse: 13792    gegen valscher fuore du wær ein tôr,

Verse: 13793    gegen werdiclîchem prîse
Verse: 13794    was dîn jugent wîse,

Verse: 13795    die menlich tât ie zilte.
Verse: 13796    wirdikeit dich niht bevilte,

Verse: 13797    du wîbes süeʒer ougenblic,
Verse: 13798    den nû scharphes jâmers stric

Verse: 13799    durch ganze fröide ist gezogen
Verse: 13800    und in ir herz mit craft gesmogen.

Verse: 13801    dîn hôhe wirdikeit was ganz,
Verse: 13802    rehter ellen ein blüender cranz

Verse: 13803    wær du fürste ûʒerwelt.
Verse: 13804    ôwê, süeʒer junger helt!

Verse: 13805    dîn kintheit prîs erworben hât
Verse: 13806    mit wirde grôʒ an ritters tât,

Verse: 13807    der was dîn lîp ein adamas.
Verse: 13808    ôwê, daʒ ich niht bî dir was,

Verse: 13809    dô du geselle enphie den rê:
Verse: 13810    daʒ tuot mir hiut und immer wê.

Verse: 13811    ôwê, wâ bin ich gewesen?
Verse: 13812    wann soldest du, hêrre, noch genesen,

Verse: 13813    waʒ mir der werlde ist undertân,
Verse: 13814    daʒ wolt ich williclîche lân.

Verse: 13815    wost ich ob her Jupiter
Verse: 13816    wære dînes tôdes wer,

Verse: 13817    er müeste lîden mînen haʒ.
Verse: 13818    alze verre er sich vergaʒ,

Verse: 13819    dô er sante die arge diet,
Verse: 13820    von der dîn jugent gegen tôde geriet.

Verse: 13821    rehter fröiden schumphentiur
Verse: 13822    ist dîn sûeʒer lîp gehiur.

Verse: 13823    daʒ velt muoʒ immer wirde tragen,
Verse: 13824    dar ûf du, helt, bist erslagen,

Verse: 13825    und erblüen mit rôsen rôt,
Verse: 13826    dâ du erholtes dînen tôt

Verse: 13827    eʒ muoʒ haben wirde mêr,
Verse: 13828    dann ob dar ûf von lîbe kêr

Verse: 13829    al die gote heten getân.'
Verse: 13830       Alexander hundert man,

Verse: 13831    die wîle er den jungen clagt,
Verse: 13832    hete erslagen und vil verjagt

Verse: 13833    mit zorniclîchem gelde
Verse: 13834    von Erbelâ dem velde.

Verse: 13835    in dûht sîn strît doch wesen swach.
Verse: 13836    vil sper an tjost man ûf in brach,

Verse: 13837    vor leide er lützel des enphant.
Verse: 13838    er het einem Persân ûʒ der hant

Verse: 13839    genomen einen swæren schaft,
Verse: 13840    dô er gegen im kam mit kraft.

Verse: 13841    oft er umb Nicânor ersûft.
Verse: 13842       Nû kam gegen im dort her geschûft

Verse: 13843    der clâre werde Fidias,
Verse: 13844    der wîbes ougen süeʒe was.

Verse: 13845    dem werden heiden jungen
Verse: 13846    alrêst die gran entsprungen.

Verse: 13847    wie er der jâre wære kranc,
Verse: 13848    sîn jugent doch nâch prîse ranc

Verse: 13849    er was des edlen Cyrus mâc.
Verse: 13850    an im wîbes fröide lac,

Verse: 13851    von keisers art was er geborn.
Verse: 13852    der junge was dâ vür erkorn,

Verse: 13853    sunder Absalôn alein
Verse: 13854    so wart nie schœner fürste dehein.

Verse: 13855    er truoc menlîchen jungen lîp.
Verse: 13856    sîn selbes herze waren wîp,

Verse: 13857    gegen der dienst er sich ie zôch.
Verse: 13858    alle missewende er vlôch.

Verse: 13859    sîn vater an einer tjost vertarp,
Verse: 13860    Meimon, der nâch prîse warp,

Verse: 13861    ûf der owe bî Grânicôn.
Verse: 13862    Fidias was dô minne lôn

Verse: 13863    gelobt, ein magt, ze wîbe
Verse: 13864    mit wunneclîchem lîbe.

Verse: 13865    die clâre des keisers swester was.
Verse: 13866    der magt sich fröute Fidias.

Verse: 13867    die süeʒe wert gehêrte
Verse: 13868    an ir amîs ellen mêrte.

Verse: 13869    schône er kam geflôret dar,
Verse: 13870    als in die reine magt clâr

Verse: 13871    hete mit kost rîche bereit.
Verse: 13872    ein starke schastelân er reit;

Verse: 13873    daʒ sach man tiuren samît tragen,
Verse: 13874    dar ûf von golde rôt geslagen

Verse: 13875    bilde, der magt gelîche.
Verse: 13876    sîn helm der was gar rîche,

Verse: 13877    sîn wâpenroc, sîn kursît
Verse: 13878    wol gezieret an aller sît

Verse: 13879    mit mangem tiuren steine,
Verse: 13880    ûf die bilde verwieret gar cleine.

Verse: 13881    ouch gap sîn schilt gar liehten schîn,
Verse: 13882    dar ûf das jungfröiwelîn

Verse: 13883    was entworfen wunnenclich.
Verse: 13884    des schildes rant erlûhte rîch,

Verse: 13885    von der buckel dar abe schein
Verse: 13886    rîche und tiure manic stein.

Verse: 13887    ein sper fuort er in der hant.
Verse: 13888    gegen dem Kriechen er kam gerant.

Verse: 13889    ûf des schilt hielt er mit craft,
Verse: 13890    daʒ ze stücken brach der schaft,

Verse: 13891    des Alexander wênic ahte.
Verse: 13892    ûf den admirât er trahte.

Verse: 13893    von Fidiâ unverdroʒʒen
Verse: 13894    wart vil ûf in geschoʒʒen.

Verse: 13895    Eufêstiô hete daʒ ersehen,
Verse: 13896    als von dem Persân was geschehen,

Verse: 13897    daʒ er mit rîchlîcher kost
Verse: 13898    ûf Alexandrum brâhte ein tjost

Verse: 13899    und in noch mit geschoʒʒe twanc.
Verse: 13900    der ie nâch hôhem prîse ranc

Verse: 13901    dem was umb sînen hêrren leit,
Verse: 13902    daʒ er von Fidiâ swære leit.

Verse: 13903    gegen dem er kam mit tjoste ger
Verse: 13904    mit einem vest gemachten sper.

Verse: 13905    dâ daʒ bilde truoc der schilt,
Verse: 13906    dâ durch und durch den lîp er zilt

Verse: 13907    mit craft daʒ sper wol elen lanc.
Verse: 13908    sîn tjost den jungen sterbens twanc

Verse: 13909    und brâht in jâmer manic wîp
Verse: 13910    umb des werden fürsten lîp.

Verse: 13911       nû was Permêniô ouch komen,
Verse: 13912    von dem jâmer wart vernomen.

Verse: 13913    mit grimme rach der sînen suon.
Verse: 13914    man sach in grôʒen mort dâ tuon.

Verse: 13915    er einic sluoc dô volkes mêr,
Verse: 13916    daʒ ich michs ze sagen wer.

Verse: 13917    von der helde val unmâʒen
Verse: 13918    wil ich die rede lâʒen.

Verse: 13919       dô kom ein fürste der hieʒ Affer
Verse: 13920    durch tjost gegen Alexandrô her.

Verse: 13921    man hôrt in schrîen Jupiter.
Verse: 13922    dâ mit er sprangte und neigt daʒ sper.

Verse: 13923    dô Alexander in ersach,
Verse: 13924    dem nû muotes niht gebrach,

Verse: 13925    daʒ ors er vaʒte mit den sporn.
Verse: 13926    er gedâht mit leit an Nicânorn,

Verse: 13927    den er mit tjost an Affrô rach.
Verse: 13928    daʒ sper er durch den fürsten stach,

Verse: 13929    dâ von im lebens wart verzigen.
Verse: 13930    hin reit er und lieʒ den ligen,

Verse: 13931    gerihte gegen Darîô als ein snuor.
Verse: 13932    Lîsias im widerfuor,

Verse: 13933    nâch dem die ouwe erclanc.
Verse: 13934    mit craft er ûf den Kriechen dranc.

Verse: 13935    sich muoste wern der Pelliur.
Verse: 13936    dâ jenes helm erlûhte tiur,

Verse: 13937    dâ durch treip er den speres ort:
Verse: 13938    durch sîn houbt daʒ drunzel bort,

Verse: 13939    dâ von der fürste sîn leben lie.
Verse: 13940    ein schedlich mort an im ergie.

Verse: 13941    in wolde rechen Emulôn,
Verse: 13942    den ein wîp durch dienstes lôn

Verse: 13943    hete wunneclich bereitet dar.
Verse: 13944    rîcheit nam man an im war,

Verse: 13945    die sîn lop dâ fuorte.
Verse: 13946    mit poinders craft er ruorte

Verse: 13947    in vil wirdiclîcher koste.
Verse: 13948    ûf den Kriechen mit tjoste

Verse: 13949    Emulôn brach sîn sper dô.
Verse: 13950    der werden tjost geschach alsô:

Verse: 13951    Alexander besaʒ,
Verse: 13952    Emulôn des dô vergaʒ,

Verse: 13953    man sach in vallen ûf den plân;
Verse: 13954    mit Pûcival trette er in sân.

Verse: 13955    den wolde rechen Baridach,
Verse: 13956    den er rîchlîche sach

Verse: 13957    gegen im ûf der ouwen komen.
Verse: 13958    waʒ ir ie schônheit hât vernomen,

Verse: 13959    die was gegen dirre gar ein wint.
Verse: 13960    Alexander, daʒ unguote kint,

Verse: 13961    lêrte den Persân sterben dô.
Verse: 13962    lûte schrîter 'Macedô'.

Verse: 13963       Waʒ man gestriten hete den tac,
Verse: 13964    niht daʒ dem gelîche wac

Verse: 13965    als nû streit die werde diet.
Verse: 13966    der strît an einen clôʒ geriet.

Verse: 13967    nû kâmen mit unverzagten scharn
Verse: 13968    ûʒ strîte in strîtes urhap gevarn

Verse: 13969    Antigonus, der nâch strîte kam,
Verse: 13970    und Tholomêus, der tet alsam,

Verse: 13971    Eumênidô, der freche helt,
Verse: 13972    des tât ze prîse was gezelt.

Verse: 13973    mit im fuor Meleâger,
Verse: 13974    des kunft wart den vînden swær,

Verse: 13975    und Perdicas der clâre.
Verse: 13976    der fromte dô manege bâre.

Verse: 13977    nâch dem mit hurte kam gerant
Verse: 13978    der unverzagte wîgant,

Verse: 13979    der werde Poliparcôn,
Verse: 13980    der gap in strîte sûren lôn.

Verse: 13981    man sagt mit ir zornlîchen siten
Verse: 13982    ûf ouwe in heide wurde gestriten

Verse: 13983    von Kriechen und den heiden.
Verse: 13984    des muoste fröide leiden

Verse: 13985    süeʒen ougen in manegen landen,
Verse: 13986    die jâmers kunft bekanden.

Verse: 13987    mit dem keiser kâmen dar
Verse: 13988    waʒ was der tôten fürsten schar.

Verse: 13989    er brâhte dô manic storje grôʒ.
Verse: 13990    selbe er von dem karrâtschen schôʒ

Verse: 13991    snelle schüʒʒe al ungezalt.
Verse: 13992    der Kriechen manegen er du valt.

Verse: 13993    Mâzêus sich ouch ruorte.
Verse: 13994    sehs fürsten er fuorte

Verse: 13995    den ouch manheit wonte bî.
Verse: 13996    des tages sie wâren strîtes frî

Verse: 13997    gar gewesen unz ûf die zît.
Verse: 13998    den Kriechen eʒ nû herte lît.

Verse: 13999    strîteclich sie wurden gehurt
Verse: 14000    durch Arenôsa, des waʒʒers furt,

Verse: 14001    gegen Babilôn ûf einen plân.
Verse: 14002    von den heiden manic man

Verse: 14003    wart mit craft sô angeriten,
Verse: 14004    daʒ er dô lernte sterbens siten.

Verse: 14005    dô liten die Grâiure
Verse: 14006    strenge schumphentiure.

Verse: 14007    sie gâben mit irm lîbe zins
Verse: 14008    den vînden. ein herze daʒ als ein vlins

Verse: 14009    wære verhertet worden,
Verse: 14010    daʒ müeste der edlen morden

Verse: 14011    aldâ swære beweinet hân,
Verse: 14012    hæt eʒ irn strît gesehen an.

Verse: 14013    der Kriechen craft nû sêre seic,
Verse: 14014    der Persân gelacke steic.

Verse: 14015    man hôrte sie vaste ir krîen
Verse: 14016    mit mangerleie schrîen,

Verse: 14017    hie 'Jupiter' dort 'Hâmôn',
Verse: 14018    hie 'Bêl' dort 'Cêfalôn',

Verse: 14019    ieglich ir krîe besunder.
Verse: 14020    der Kriechen maht lac under

Verse: 14021    von mittentage ûf âbends zil.
Verse: 14022    nû was volkes alsô vil

Verse: 14023    mit ungefuoge verhouwen
Verse: 14024    ûf anger und in den ouwen,

Verse: 14025    als in langer mîle ein walt
Verse: 14026    mit willen nider wære gevalt.

Verse: 14027    die werden helde küene,
Verse: 14028    dâ ê daʒ velt was grüene,

Verse: 14029    von ir herter strîtes nôt
Verse: 14030    was eʒ worden alsô rôt,

Verse: 14031    als ob willeclîche
Verse: 14032    mit rôtem tuoche gelîche

Verse: 14033    die velt gar waren überzogen.
Verse: 14034    die heiden sach man vaste brogen,

Verse: 14035    doch mit ungefüegem schade
Verse: 14036    wâren sie vaste überladen.

Verse: 14037    wie vil der leit von tôde val,
Verse: 14038    man misset ir kûme an der zal.

Verse: 14039    der Kriechen hûfe was dâ niht grôʒ.
Verse: 14040       nû wolde aber der sælden lôʒ

Verse: 14041    mit sigenunft zuo in kêren.
Verse: 14042    Alexandrum den hêren

Verse: 14043    hôrte man lûte an schrîen.
Verse: 14044    'suln uns die swachen frîen

Verse: 14045    siges unde prîses tât?
Verse: 14046    unser craft doch erworben hât

Verse: 14047    daʒ sie uns siges jâhen.
Verse: 14048    daʒ in kunde versmâhen,

Verse: 14049    sie suln hie lützel obern'.
Verse: 14050    die Kriechen sach man sich kobern,

Verse: 14051    die hôhes prîses wielten,
Verse: 14052    zesamne sie sich hielten.

Verse: 14053    ir was daʒ dritteil dâ verlorn,
Verse: 14054    dâ gegen die vînde heten gekorn

Verse: 14055    ir schaden drîʒicvalte.
Verse: 14056    die Kriechen mit gewalte

Verse: 14057    sach man nû an allen sîten
Verse: 14058    ir roten mit craft durchrîten,

Verse: 14059    hie den hêrren, dort den kneht
Verse: 14060    sie sluogen, eʒ was in alleʒ reht.

Verse: 14061    ir deheiner sie erbarmet.
Verse: 14062    sie wârn alrêst erwarmet.

Verse: 14063    owî, wie dâ gehurtet wart
Verse: 14064    mit craft durch manege storje hart

Verse: 14065    von Nycânors gesellen!
Verse: 14066    die sach man dô ir ellen

Verse: 14067    mit swerten lanc errecken,
Verse: 14068    der vînde schaden wecken.

Verse: 14069    der werde Poliparcôn
Verse: 14070    gap dâ umb den werden lôn,

Verse: 14071    dâ von manic heiden
Verse: 14072    von leben muoste scheiden.

Verse: 14073    von sîner hant dô erholt
Verse: 14074    maneger sûr erarneten solt.

Verse: 14075    dô wart manec wert Sarrazîn
Verse: 14076    durch daʒ lieht antlitze sîn

Verse: 14077    gar ungefuoge verhouwen.
Verse: 14078    man mohte die Kriechen schouwen

Verse: 14079    ûf dem velde strîtes milde.
Verse: 14080    durch der vînde helm und schilde

Verse: 14081    sach man sie mit swerten waten,
Verse: 14082    dâ von die hûfen gâben schaten

Verse: 14083    der tôten, die sie sluogen.
Verse: 14084    werlîchen lîp sie truogen,

Verse: 14085    daʒ sie wol erzeigeten
Verse: 14086    an den, die sie dô veigeten.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.