TITUS
Ulrich von Eschenbach, Alexander
Part No. 95
Previous part

Chapter: 143  
Prolog


Verse: 12903    Got aller wunder hât gewalt,
Verse: 12904    die ich werhaft und manicvalt

Verse: 12905    geloube und erkennen sol.
Verse: 12906    got ist aller güete vol,

Verse: 12907    daʒ wir wol alle tage sehen,
Verse: 12908    ob wir der wârheit wellen jehen.

Verse: 12909    wer in güetlîche mant,
Verse: 12910    dem tuot er sîne helfe bekant.

Verse: 12911    daʒ ist ofte worden schîn.
Verse: 12912    die götlîche güete sîn

Verse: 12913    bewîsete sich den sînen ie,
Verse: 12914    als wir noch ofte lesen hie,

Verse: 12915    daʒ er gegen einem starken her
Verse: 12916    einen man schuof ze wer,

Verse: 12917    daʒ er sic an den ervaht.
Verse: 12918    des hân ich vür wunder mir gedâht

Verse: 12919    und muoʒ mir seltsæne wesen,
Verse: 12920    als wir von Saul dem künge lesen,

Verse: 12921    dô er gegen Gôliâ lac,
Verse: 12922    gegen dem er grôʒer sorgen phlac,

Verse: 12923    wenn man het des risen maht
Verse: 12924    gegen zehen tûsent geaht,

Verse: 12925    als man singet unde list,
Verse: 12926    und noch von im geschriben ist.

Verse: 12927    Saul vorhte den tôt.
Verse: 12928    in al den landen er gebôt,

Verse: 12929    wer den risen törste bestân,
Verse: 12930    den wolt er ze einem friunde hân,

Verse: 12931    er wolt im sîne tohter geben,
Verse: 12932    ob er Gôliâ næme daʒ leben.

Verse: 12933    dô daʒ gebot und die wort
Verse: 12934    der hirte Dâvît hete gehôrt,

Verse: 12935    er jach er wolt den grôʒen man
Verse: 12936    ûf die rede bestân,

Verse: 12937    ob daʒ solde wesen stæte,
Verse: 12938    daʒ er gelobt hæte.

Verse: 12939    Saul sprach, ân allen vâr
Verse: 12940    wolt er eʒ gerne lâʒen wâr.

Verse: 12941    dô wart Dâvîde dar getragen
Verse: 12942    Sauls harnasch, hôrt ich sagen.

Verse: 12943    dô er daʒ an hete geleit,
Verse: 12944    dô sprach Dâvît, der helt gemeit,

Verse: 12945    'ich hab des deheinen muot,
Verse: 12946    daʒ mir daʒ sî ze ihte guot,

Verse: 12947    daʒ ir mir habt angetân.
Verse: 12948    niht wol ich mich berüeren kan.

Verse: 12949    schütt mich dar ûʒ und gebt mir her,
Verse: 12950    dâ mit ich mich sîn baʒ erwer,

Verse: 12951    mînen stap und mîne slinge.'
Verse: 12952    fünf herte kiselinge

Verse: 12953    Dâvît und sîne slinge nam,
Verse: 12954    mit der wer er an Gôliam kam.

Verse: 12955    daʒ was dem risen ungemach.
Verse: 12956    ze Dâvît dem cleinen er sprach

Verse: 12957    'du solt verdienen hie cleinen solt.
Verse: 12958    waʒ dîn manheit an mir erholt,

Verse: 12959    daʒ bevindestu an dirre stunde.
Verse: 12960    als gegen einem hunde

Verse: 12961    komest du gegen mir mit dînem stabe.
Verse: 12962    schiere ich dir daʒ bewîset habe,

Verse: 12963    daʒ mich müet dîn komen her.
Verse: 12964    an dirre stund ich dich des wer,

Verse: 12965    daʒ ich wil dîn bluot vergieʒen,
Verse: 12966    des die hunde suln genieʒen.

Verse: 12967    dîn fleisch wil ich den vogeln geben,
Verse: 12968    alsô endet sich dîn leben.'

Verse: 12969    Gôlias mit zorne ranc.
Verse: 12970    vor dem snellîchen spranc

Verse: 12971    Dâvît unde mante got,
Verse: 12972    daʒ er bedæhte sîne nôt.

Verse: 12973    Dâvît der cleine
Verse: 12974    Gôliam mit eime steine

Verse: 12975    warf durch die stirne.
Verse: 12976    er erschellet im sîn hirne,

Verse: 12977    daʒ der grôʒe Gôlias
Verse: 12978    wênic weste wâ er was.

Verse: 12979    den andern wurf er alsô maʒ,
Verse: 12980    dêr dructe den êrsten vürbaʒ,

Verse: 12981    der dritte die zwêne vürbaʒ treip.
Verse: 12982    Dâvît in der mâʒe bleip:

Verse: 12983    des vierden er alsô erdâhte,
Verse: 12984    der die drî vürbaʒ brâhte.

Verse: 12985    der fünfte wurf alsô geschach,
Verse: 12986    daʒ der êrste durch daʒ hirne brach

Verse: 12987    und hinden durch daʒ houbet.
Verse: 12988    daʒ Gôliam lebens roubet.

Verse: 12989    der viel ûf die erde nider,
Verse: 12990    daʒ Saul wênic clagte sider,

Verse: 12991    dô Dâvît des gedâhte
Verse: 12992    daʒ er im sîn houbet brâhte;

Verse: 12993    ouch schiet der wênige man
Verse: 12994    gar ân allen schaden dan.

Verse: 12995    dâ von sîn wirde was sô grôʒ,
Verse: 12996    des sînen sweher sît verdrôʒ

Verse: 12997    und beswærte sêre sînen gedanc,
Verse: 12998    daʒ man dis lop vür sînes sanc

Verse: 12999    man hôrt in dem liede sagen
Verse: 13000    daʒ Saul tûsent hæt erslagen,

Verse: 13001    Dâvît slüege zehen tûsent tôt
Verse: 13002    und half gotes volc ûʒ nôt.

Verse: 13003    die wunder got an im begie.
Verse: 13004    ob ich iu nû sage hie

Verse: 13005    wie ouch ein rise wart erslagen,
Verse: 13006    daʒ solt ir niht spotlîche tragen,

Verse: 13007    sunder vaʒt in iwer gemüete,
Verse: 13008    daʒ des hôchgelobten güete

Verse: 13009    ie helfe bôt den sînen
Verse: 13010    und lieʒ sîn vînde pînen.

Verse: 13011    der müeʒe alsô bî uns wesen,
Verse: 13012    daʒ an der sêle wir genesen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.