TITUS
Ulrich von Eschenbach, Alexander
Part No. 92
Previous part

Chapter: 127b  
Exkurs: Victoria


Verse: 12507       Eʒ nâhet ûf den morgen.
Verse: 12508    bî Rôme ein hûs verborgen

Verse: 12509    wunneclich erbûwet stêt,
Verse: 12510    die Tiber eʒ umbegêt.

Verse: 12511    eʒ ist von wunderlîcher art.
Verse: 12512    nie kein gebûwe sô spæhe wart,

Verse: 12513    daʒ ichʒ niht wol mac gesagen.
Verse: 12514    vier siule daʒ werc enbor tragen

Verse: 12515    ûʒ gelfem marmelsteine
Verse: 12516    dar under geworht gar reine.

Verse: 12517    wer eʒ suochet und wil eʒ vinden,
Verse: 12518    vor dem kan eʒ verswinden.

Verse: 12519    von gelücke man dar komet:
Verse: 12520    an manegem dinge eʒ dem fromet.

Verse: 12521    man wil daʒ eʒ gerihte stê,
Verse: 12522    als der mâne die rihte ûf gê.

Verse: 12523    Victôria ist dâ frouwe,
Verse: 12524    die dâ ist in werdem schouwe.

Verse: 12525    tûsent tür daʒ palas hât,
Verse: 12526    dâ man ûʒ und in gât,

Verse: 12527    die sîn von kost tiure.
Verse: 12528    ouch ist des hûses miure

Verse: 12529    gezieret mit manegem steine rîch.
Verse: 12530    von jaspide ist sîn esterîch

Verse: 12531    underworht mit topâʒiô.
Verse: 12532    sîn ist mit kunst erdâht alsô,

Verse: 12533    wer dar ûf wirfet einen stein
Verse: 12534    sunder grœʒe, ist er wol clein,

Verse: 12535    das hûs mit dône erhillet,
Verse: 12536    daʒ eʒ über al die werlt erschillet.

Verse: 12537    waʒ dâ türn hangen an,
Verse: 12538    wann die werden ûf getân,

Verse: 12539    selber sich die slieʒen zuo.
Verse: 12540    ob irs geruochet, sô hœrt nuo

Verse: 12541    wer aller der türn kemerer sî
Verse: 12542    und in mit stæte wese bî.

Verse: 12543    als ich mit sage bin bereit,
Verse: 12544    daʒ ist die leide gîtikeit.

Verse: 12545    von manger hande steine craft,
Verse: 12546    die inʒ gewelbe sîn gehaft,

Verse: 12547    die geben dâ durchliuhtic lieht,
Verse: 12548    die naht man als den tac dâ siht

Verse: 12549    wer wiʒʒen wil des hûses ahte.
Verse: 12550    vil eben sich der betrahte:

Verse: 12551    lîhte bewîset in sîn sin
Verse: 12552    daʒ er komen ist dar în,

Verse: 12553    daʒ er hât gevellet
Verse: 12554    den stein, daʒ hûs erschellet.

Verse: 12555    mitten al dar inne
Verse: 12556    ist geworht mit spæhem sinne,

Verse: 12557    mit rîcher kostlîcher kur
Verse: 12558    ein gesidele von ebur,

Verse: 12559    daʒ ist geheiʒen helfenbein.
Verse: 12560    dar ab ûʒ tiurem golde schein

Verse: 12561    aller stein geslehte,
Verse: 12562    ietslîcher nâch sînem rehte.

Verse: 12563    dâ sitzet in hôher wirde
Verse: 12564    des siges frouwe in hôher zirde,

Verse: 12565    und ouch die frouwen umbe sie
Verse: 12566    als iuch daʒ buoch bewîset hie.

Verse: 12567    man kiuset dâ rîcheit wunder.
Verse: 12568    ietslîche hât besunder

Verse: 12569    vor ir fremdeʒ seitenspil,
Verse: 12570    dar ûfe sie ze êren vil

Verse: 12571    lobs ir frouwen singen.
Verse: 12572    ir dœne suoʒe erclingen.

Verse: 12573    man siht dâ fürsten crône tragen
Verse: 12574    von grüenem lôrboum, hœr ich sagen.

Verse: 12575    daʒ waʒ rœmischer künge site,
Verse: 12576    daʒ man sie krônte dâ mite,

Verse: 12577    wann sie sic genâmen
Verse: 12578    in strîte und wider kâmen.

Verse: 12579    als der meister wolde,
Verse: 12580    die andern frowen von golde

Verse: 12581    siht man tragen crône lieht,
Verse: 12582    den man rîcher koste giht.

Verse: 12583    an den werden wirt bekant
Verse: 12584    mangerleie tiur gewant,

Verse: 12585    dar in sint sie geslihtet eben.
Verse: 12586    ûʒ vollen handen siht man geben

Verse: 12587    Victôriam silber, steine, golt,
Verse: 12588    den sie ist mit gunste holt.

Verse: 12589    ze næhst sitzet bî ir
Verse: 12590    Mâjestas mit gewaldes gir.

Verse: 12591    die hât ir arme wît gebreit,
Verse: 12592    ir füeʒe gar wît geleit,

Verse: 12593    dar under daʒ reht lît gesmogen.
Verse: 12594    ir craft die werlt hât bezogen.

Verse: 12595    dâ sitzet nâch frou Êre,
Verse: 12596    die nâch süeʒes herzen lêre

Verse: 12597    besliuʒet under ir armen
Verse: 12598    den rîchen und den armen,

Verse: 12599    ze den sie sich gesellet
Verse: 12600    und ir dâ bî gevellet.

Verse: 12601    dar nâch siht man sitzen
Verse: 12602    mit süeʒer tagende witzen

Verse: 12603    in kostlîchem prîse
Verse: 12604    Gerehtikeit die wîse,

Verse: 12605    ir herze mit tugenden geladen,
Verse: 12606    als sie gert niemannes schaden.

Verse: 12607    man siht die werden sô gemuot,
Verse: 12608    daʒ sie den liuten füeget guot.

Verse: 12609    ir hôhe art ir sô vergiht,
Verse: 12610    sie nimet nieman deʒ sînen niht.

Verse: 12611    waʒ mit unreht wirt genomen,
Verse: 12612    daʒ tuot sie mit reht wider komen.

Verse: 12613    vür alle dinc sie minnet got.
Verse: 12614    sie wil durch keiner gâbe urbot

Verse: 12615    von ir stæte niht wenken
Verse: 12616    noch ir reht niht lâʒen krenken.

Verse: 12617    dâ iʒt die senfte Gedult
Verse: 12618    aller tugende erfult,

Verse: 12619    die man an ir crône list,
Verse: 12620    dâ mit die hêre gecrœnet ist.

Verse: 12621    dar nâch Rîcheit geseʒʒen ist,
Verse: 12622    die swacher site niht ledic ist,

Verse: 12623    der sie selten blîbet frî.
Verse: 12624    ir wonet hôchvart und unfuoge bî.

Verse: 12625    vür die andern lebt sie dar inne
Verse: 12626    ale ein reht gebûrinne.

Verse: 12627    dar nâch siht man sitzen dâ
Verse: 12628    die süenerîn Concordiâ,

Verse: 12629    die den frowen ze aller stunde
Verse: 12630    ûʒ süeʒem wârem munde

Verse: 12631    lieplich küssen biutet,
Verse: 12632    mit senftem gruoʒe triutet.

Verse: 12633    nîde, haʒʒe unde strît
Verse: 12634    ir wîsheit friuntlich ende gît.

Verse: 12635    der frowen, die frides hât gewalt,
Verse: 12636    der sitzen ist dar nâch gezalt.

Verse: 12637    die siht man dem gelîche,
Verse: 12638    als ob sie ist gar sældenrîche.

Verse: 12639    zer lerzen hant der frouwen
Verse: 12640    mac man jâhêrren schouwen,

Verse: 12641    die maneger rede erdenken dâ.
Verse: 12642    waʒ ir gevellet, daʒ ist ir jâ.

Verse: 12643    ir deheiner sie berihtet,
Verse: 12644    wâ sie anʒ unreht phlihtet.

Verse: 12645    nâch irm willen sie jagen
Verse: 12646    ûf die rede, daʒ sie ir behagen.

Verse: 12647    der Gunst ouch dâ sîn sidel hât,
Verse: 12648    der durch nieman daʒ enlât

Verse: 12649    ern welle mit gedanken
Verse: 12650    hin und her wanken.

Verse: 12651    dar nâch sitzet ein got
Verse: 12652    in hôher wirde, der heiʒet Spot.

Verse: 12653    mit lispendem munde
Verse: 12654    smiert er ze aller stunde.

Verse: 12655    ungetriuwe ist sîn lachen.
Verse: 12656    des kan er sich zuo machen,

Verse: 12657    daʒ er den hêrren wirdet liep
Verse: 12658    und ist êren doch ein diep.

Verse: 12659    Victôria der hêren
Verse: 12660    hœrt man dise ze êren

Verse: 12661    nâch irm willen singen,
Verse: 12662    die seitspil lûte erclingen,

Verse: 12663    ouch siht man dâ der Sælden rat.
Verse: 12664    in rîcheit daʒ alumbe gât:

Verse: 12665    eʒ setzet ûf, eʒ wirfet abe,
Verse: 12666    und geben zuo und nemen abe.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.