TITUS
Ulrich von Eschenbach, Alexander
Part No. 93
Previous part

Chapter: 127c  
Schlachtvorbereitungen bei Alexander


Verse: 12667       an daʒ êrste ich wider komen wil.
Verse: 12668    Victôria rîcher günste zil

Verse: 12669    dem fürsten Alexander stieʒ,
Verse: 12670    den sie mit helfe nie verlieʒ.

Verse: 12671    ze frouwen Êren sie dô sprach
Verse: 12672    'unser ritter lîdet ungemach.

Verse: 12673    ûf strît er grôʒer sorge phliget,
Verse: 12674    âne slâf der hêrre liget.

Verse: 12675    dar umb ich mir gedenke
Verse: 12676    daʒ in daʒ sêre krenke.

Verse: 12677    er dolt von sorgen swære zît.
Verse: 12678    er sol doch morgen haben strît.'

Verse: 12679    ir gevidere sie swanc.
Verse: 12680    in trüebe wolken sie dranc,

Verse: 12681    sie kam mit grôʒem zâfe
Verse: 12682    zuo irm friunde, dem Slâfe.

Verse: 12683    sie sprach 'stant ûf, vater mîn,
Verse: 12684    und var durch mîne liebe hin

Verse: 12685    dâ der Kriechen fürste sî.
Verse: 12686    dem ist strenge sorge bî,

Verse: 12687    daʒ er niht geslâfen mac
Verse: 12688    und im doch nâhet strîtes tac.

Verse: 12689    hilf im daʒ er geslâfen müge,
Verse: 12690    ich hoffe im daʒ ze kreften tüge.

Verse: 12691    geruoche dem werden hêrren
Verse: 12692    mit slâfe ruowe mêren.'

Verse: 12693    der Slâf was zer verte laʒ,
Verse: 12694    iedoch tet er daʒ,

Verse: 12695    als in die frouwe mante.
Verse: 12696    dem hêrren er ruowe sante,

Verse: 12697    der er sunder trahten phlac
Verse: 12698    biʒ ûf den mitten morgen tac.

Verse: 12699    des die hêrren sêre verdrôʒ.
Verse: 12700    sie huoben ein murmelen grôʒ.

Verse: 12701    sie funden manege ræte
Verse: 12702    daʒ erʒ vor vorhten tæte,

Verse: 12703    daʒ er niht slâfes phlæge,
Verse: 12704    sust et in der lûʒe er læge

Verse: 12705    und trahte ûf ein fliehen,
Verse: 12706    den ruden hoveshalp ziehen.

Verse: 12707    der rede wart dô gnuoc getân.
Verse: 12708    der werde Permêniô gienc sân

Verse: 12709    vür sîn bette, dâ er lac.
Verse: 12710    er sprach 'eʒ ist wol mitter tac.

Verse: 12711    ich tar iuch niht wol wecken.
Verse: 12712    eʒ clagen gar die recken

Verse: 12713    und schrîet al daʒ volc wâfen,
Verse: 12714    daʒ ir kunnet sô lange slâfen.

Verse: 12715    hêrre, wie ist iu geschehen ?
Verse: 12716    wir haben alle daʒ gesehen

Verse: 12717    daʒ ir der êrste erwachtet fruo.
Verse: 12718    alze lange ligt ir nuo.'

Verse: 12719       Der angelogne erwahte,
Verse: 12720    gegen dem hêrren er erlahte,

Verse: 12721    an in lieplich er sach.
Verse: 12722    er rihte sich ûf und sprach

Verse: 12723    'mich hât ein strenge sorge gelân,
Verse: 12724    die ich unz her getragen hân.

Verse: 12725    dô sich der keiser von uns zôch
Verse: 12726    mit strîte und alleʒ vor uns flôch,

Verse: 12727    ich vorhte daʒ er wolde
Verse: 12728    entrinnen und daʒ ich solde

Verse: 12729    mînes willen mich niht nieten.
Verse: 12730    sît er uns strît wil bieten

Verse: 12731    mit werlîcher hant und gegen uns komet,
Verse: 12732    wol mir daʒ an fröiden fromet,

Verse: 12733    der nû mîn herze niht misset.
Verse: 12734    ich bin des wol gewisset,

Verse: 12735    er muoʒ uns lant und leben lân,
Verse: 12736    daʒ uns werden undertân

Verse: 12737    arm unde rîche,
Verse: 12738    die welt al gelîche.

Verse: 12739    sust hân ich sorge vergeʒʒen.
Verse: 12740    daʒ volc heiʒet eʒʒen.

Verse: 12741    dar nâch aber zuo im sprich
Verse: 12742    daʒ eʒ ze strîte bereite sich.'

Verse: 12743    dô wart manec busînen horn
Verse: 12744    von den die dar zuo wârn erkorn

Verse: 12745    erclenget mit süeʒem schalle.
Verse: 12746    dô vernam die werlt alle

Verse: 12747    daʒ die fürsten eʒʒen wolden
Verse: 12748    und ûf strît bereiten solden.

Verse: 12749    nû was mit wurzen wol bereit
Verse: 12750    spîse vil, als man mir seit,

Verse: 12751    die man vür den fürsten truoc,
Verse: 12752    dar zuo clâres trankes gnuoc.

Verse: 12753       Als schiere dô wart geʒʒen,
Verse: 12754    nû was des niht vergeʒʒen

Verse: 12755    man bræht im sîn harnasch dar.
Verse: 12756    dar în wart er bereitet gar.

Verse: 12757    dâ was sîn sper und ouch sîn schilt,
Verse: 12758    Pûcival ein knappe dâ hielt:

Verse: 12759    der fürste den schilt ze ahseln vienc,
Verse: 12760    menlich er ze dem rosse gienc,

Verse: 12761    von der erden er sich swanc,
Verse: 12762    von fröiden er in den satel spranc

Verse: 12763    algâhes sunder stegereif.
Verse: 12764    der hôchgemuote daʒ sper begreif,

Verse: 12765    sust reit er ûf dem velde
Verse: 12766    zuo al der hêrren gezelde.

Verse: 12767    er bat alle sîne man
Verse: 12768    daʒ sie zwîvel wolden lân

Verse: 12769    und zagheit entslîfen,
Verse: 12770    menlich ze strîte grîfen.

Verse: 12771    er sprach 'ich wil iu allen sagen,
Verse: 12772    wâ ir die gesensten wagen

Verse: 12773    gegen iu varn seht durch strît,
Verse: 12774    machent in den rûm sô wît,

Verse: 12775    daʒ sie sunder dringen varn.
Verse: 12776    kumen sie durch, ir sult ir niht sparn:

Verse: 12777    lâʒt die phîle vaste an gezogen
Verse: 12778    ûf sie fliegen von den bogen,

Verse: 12779    die die karrâtschen trîben,
Verse: 12780    dâ von sie tôt belîben.

Verse: 12781    von ir ungelenken
Verse: 12782    kunnen sie niht entwenken.

Verse: 12783    ze rücke trîbent vaste ûf sie,
Verse: 12784    sô mugen niht genesen die

Verse: 12785    ûf den karrâtschen rîten,
Verse: 12786    die müeʒen tôdes erbîten.'

Verse: 12787    dô er in alsô gap die lêr,
Verse: 12788    nû kam gegen im geloufen her

Verse: 12789    ein fremder knappe, der im seit
Verse: 12790    daʒ die velt wærn durchleit

Verse: 12791    mit fuoʒîsen an manger stat.
Verse: 12792    'dâ hin iuwer rîten lât'

Verse: 12793    alsô er ze den fürsten sprach.
Verse: 12794    Alexander dô jach

Verse: 12795    daʒ man den Persân
Verse: 12796    unz ûf die zît solde vân,

Verse: 12797    daʒ man möhte gesehen
Verse: 12798    ob er rehte hæte verjehen,

Verse: 12799    dar nâch solde man im lônen.
Verse: 12800    er hieʒ sîn mit huote schônen.

Verse: 12801    den berc zehant sie rûmten,
Verse: 12802    vil dœne sich nicht sûmten

Verse: 12803    von tambûren und busînen.
Verse: 12804    aber sprach er ze den sînen:

Verse: 12805    'ir hêrren, merket der velde stat,
Verse: 12806    als uns der ê berihtet hât,

Verse: 12807    dâ die fuoʒîsen sint geleget!
Verse: 12808    werden helde, iuch nû reget,

Verse: 12809    habt gegen vînden vesten muot!
Verse: 12810    seht! wer solt sô grôʒeʒ guot

Verse: 12811    und gezierde von im lân,
Verse: 12812    als uns ir zagheit schiebet an?

Verse: 12813    âne grôʒer swære teil
Verse: 12814    bejage wir prîse unde heil

Verse: 12815    und mugen ir habe gewinnen.
Verse: 12816    sie bringens niht von hinnen,

Verse: 12817    wie vîntlich sie sich zeigen,
Verse: 12818    geloubent, sie sint die veigen.

Verse: 12819    wie sie von golde glîʒen
Verse: 12820    frâʒes sie sich flîʒen

Verse: 12821    beide an tranc und an huor.
Verse: 12822    wiʒʒet sie sint an manheit muor.'

Verse: 12823    aber sprach der Pelliur
Verse: 12824    'waʒ sie haben, daʒ ist iur.

Verse: 12825    nû turret eʒ frîlich genemen.
Verse: 12826    wol dan, helde, lât iu zemen

Verse: 12827    prîs, der iu lange ist bereit,
Verse: 12828    und immer wernde werdekeit:

Verse: 12829    ir sult mir âne bâgen
Verse: 12830    volgen. sît ich eʒ wâgen

Verse: 12831    iu gelîche in strîte tar,
Verse: 12832    ich hân daʒ vür wâr

Verse: 12833    ir gelîche müeʒet jehen,
Verse: 12834    als ir mir alle habt gesehen

Verse: 12835    den êrsten vor und under dem vanen.
Verse: 12836    hœrt ir mich iuch in strîte manen,

Verse: 12837    ir sâht mich nie gefliehen
Verse: 12838    noch gegen strîte widerziehen

Verse: 12839    durch vorhte nôt fuoʒes lanc.
Verse: 12840    ouch nâch prîse in strîte ich ranc,

Verse: 12841    daʒ ist durch mich eine niht getân:
Verse: 12842    rehten muot ich gegen iu hân

Verse: 12843    getragen, als ich solde,
Verse: 12844    werdekeit ich iu wolde

Verse: 12845    erwerben unde manheit namen,
Verse: 12846    wie ir den trüeget ane schamen.'

Verse: 12847       aber zôch sich ûf der tac,
Verse: 12848    daʒ man deheines strîtes phlac.

Verse: 12849    die naht sie slâf gar vermeit.
Verse: 12850    vaste man an den warten reit.

Verse: 12851    des morgens ê die sunne
Verse: 12852    irs schînes begunne,

Verse: 12853    dô wâren sie bereit algar.
Verse: 12854    'hurtâ, helde, nû wol dar.'

Verse: 12855    wart dô beider sît geschrît.
Verse: 12856    alsô samnete sich der strît.

Verse: 12857    mit manger storje hurte
Verse: 12858    hie ûʒ dorf, dort ûʒ furte

Verse: 12859    manic rote lieht ersprancte.
Verse: 12860    werlich ir sper sie sancte.

Verse: 12861    sie riten manger hande tier,
Verse: 12862    ros, elephante, sagt man mir.

Verse: 12863    von ir tjost der spere crach
Verse: 12864    und manic tambûren brach;

Verse: 12865    ûf die helme slege grôʒ;
Verse: 12866    von glanzen schilden manic stôʒ,

Verse: 12867    dô man sie sach ersprengen;
Verse: 12868    von manger decke erclengen

Verse: 12869    wuohs sô ungefüeger schal,
Verse: 12870    daʒ walt und ouwe engegen hal.

Verse: 12871    sie buten sô ungefüegen dôʒ,
Verse: 12872    daʒ es alle vogel verdrôʒ.

Verse: 12873    nie sô wunneclich gecleit
Verse: 12874    von manger varwe underscheit

Verse: 12875    wart anger, ouwe noch der walt,
Verse: 12876    als der mit kost was gezalt

Verse: 12877    von rîcher schônheit wunder:
Verse: 12878    ûf schilde cleinôt besunder,

Verse: 12879    die man die werden füeren sach,
Verse: 12880    ûf liehten decken tiure dach

Verse: 12881    von samît kostlich gesniten,
Verse: 12882    phellel mit spacher kunst gebriten

Verse: 12883    ûʒ sîden, golt von Arabîe,
Verse: 12884    als ir ietlîches amîe

Verse: 12885    hete durch minne ze lône erdâht;
Verse: 12886    in ir dienst wart dar brâht

Verse: 12887    mit golde gezieret manec harnasch,
Verse: 12888    dar gegen der sunnen schîn niht lasch,

Verse: 12889    von tiuren steinen rîchen.
Verse: 12890    als die minniclîchen

Verse: 12891    heten sie ûf daʒ velt beriht,
Verse: 12892    daʒ bleip unversoldet niht

Verse: 12893    von den, die eʒ dâ fuorten.
Verse: 12894    dô sie zesamne ruorten,

Verse: 12895    dô was alsô lûter duʒ,
Verse: 12896    als ob aller waʒʒer guʒ

Verse: 12897    walt, berc, heide, velt und tal
Verse: 12898    zesamen riʒʒen überal.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.