TITUS
Ulrich von Eschenbach, Alexander
Part No. 91
Previous part

Chapter: 127a  
Kriegsrat bei Alexander


Verse: 12346       die Kriechen heten sich bedâht

Verse: 12347    von ir manheit girde,
Verse: 12348    dô sie vernâmen die zirde,

Verse: 12349    sie wolden durch strît ersprengen.
Verse: 12350    des wolde niht verhengen

Verse: 12351    der fürste Alexander.
Verse: 12352    einen vesten berc den vander,

Verse: 12353    der was wît, ze mâʒen hôch.
Verse: 12354    die sunne gegen dem âbent zôch,

Verse: 12355    irs liehtes sie verphlac.
Verse: 12356    man wil daʒ sie den selben tac

Verse: 12357    kurzte irn clâren schîn,
Verse: 12358    daʒ sie den mortlîchen pîn

Verse: 12359    vor jâmer niht mohte gesehen,
Verse: 12360    daʒ des tages solde geschehen.

Verse: 12361    vor naht der berc wart umbegraben.
Verse: 12362    daʒ liut muost alles dar in haben,

Verse: 12363    daʒ sie niht gæhelîchen
Verse: 12364    die vînde möhten erslîchen,

Verse: 12365    dâ von sie schumpfentiure kürn
Verse: 12366    und prîs und lop dâ von verlürn.

Verse: 12367    sie mercten an der huote
Verse: 12368    die heiden in dem muote,

Verse: 12369    daʒ sie strît wolden geben
Verse: 12370    und ahten niht ûf swacheʒ leben

Verse: 12371    und sie harnasch alle bevienc,
Verse: 12372    und daʒ von mangem orse hienc

Verse: 12373    tiure werc unz ûf daʒ gras,
Verse: 12374    und daʒ al die welt dâ was

Verse: 12375    und ûf der velde wîte
Verse: 12376    gegen in lac ze strîte.

Verse: 12377    sie sâhen wol hin und jene her.
Verse: 12378    nû lief sorge dô entwer.

Verse: 12379    triuwen, des niht wundert mich.
Verse: 12380    eineʒ wil gelouben ich,

Verse: 12381    waren sie gewesen alle risen
Verse: 12382    und daʒ sie hæten ûf der wisen

Verse: 12383    sô grôʒe hersfluot gesehen,
Verse: 12384    in muoste der hûfe freise jehen.

Verse: 12385    nû muoʒ ich ouch sagen daʒ
Verse: 12386    der Krieche ein teil sich widersaʒ.

Verse: 12387    als ûf dem mer ein schifman tuot,
Verse: 12388    dem lützel zwîvelt der muot,

Verse: 12389    sô er der luft zeichen siht,
Verse: 12390    daʒ ungewiter im vergiht:

Verse: 12391    den menlich sin niht gar verlât,
Verse: 12392    der suochet ze sînen geverten rât,

Verse: 12393    er manet sie, ob die weter komen,
Verse: 12394    daʒ sie im mit helfe wellen fromen:

Verse: 12395    alsô tet Alexander hie.
Verse: 12396    er begunde manen dise und die

Verse: 12397    und suochen helfe und rât ze in,
Verse: 12398    waʒ sie daʒ wægeste dûhte sin,

Verse: 12399    daʒ sie in des bewîsten
Verse: 12400    und dar an ir triuwe prîsten.

Verse: 12401    die fürsten allesament swigen,
Verse: 12402    durch vorhte im antwort wart verzigen

Verse: 12403    unz Permêniô aber sprach.
Verse: 12404    'wær eʒ iu niht ungemach,

Verse: 12405    mac eʒ mit iuwern hulden sîn,
Verse: 12406    hêrre, sô hœrt den rât mîn

Verse: 12407    und lützel daʒ ich sprechen wil.
Verse: 12408    irs volkes ist unmâʒen vil.

Verse: 12409    eʒ ist arbeit niht gewenet,
Verse: 12410    niuwen nâch ruowe eʒ sich senet.

Verse: 12411    sît eʒ ziuhet ûf die naht,
Verse: 12412    sô hât gemaches eʒ gedâht

Verse: 12413    und ist vor slâfe træge.
Verse: 12414    des dunket mich ditz wæge,

Verse: 12415    daʒ wir noch hînt,
Verse: 12416    sô sie ungewarnet sint,

Verse: 12417    dar nâch als ich uns füere,
Verse: 12418    daʒ wir in durch die snüere

Verse: 12419    hurteclich ersprengen,
Verse: 12420    ir fröide mit jâmer mengen,

Verse: 12421    dâ von sie schumphentiure holn,
Verse: 12422    die sie ungerne mugen doln.

Verse: 12423    ouch wil ich iu sagen mê,
Verse: 12424    der keiser wil niht als ê

Verse: 12425    strîten in der enge
Verse: 12426    noch in der berge gedrenge,

Verse: 12427    er wil uns ûf der wîte umbeligen,
Verse: 12428    sô mac er ouch an uns gesigen.

Verse: 12429    jâ habt wol vernomen ir
Verse: 12430    hunde menige vellet creftic tier.

Verse: 12431    daʒ mugent ir gar wol underkomen,
Verse: 12432    wirt unser reise hînt dar genomen.

Verse: 12433    ouch füeren wir ros, die sint schie.
Verse: 12434    komen wir des tages an sie,

Verse: 12435    von ungestalt vil tieren
Verse: 12436    mugen sie Ims entschumphieren.

Verse: 12437    Ob die unser ros erschiuwen,
Verse: 12438    daʒ mac uns wol geriuwen

Verse: 12439    und mugen erwerben swachen lôn.'
Verse: 12440    dô sprach Poliparcôn

Verse: 12441    'Permêniô, ir sagt wâr.
Verse: 12442    wir suln uns bereiten dar.'

Verse: 12443       Dô sprach der junge fürste clâr
Verse: 12444    'diebe erzeigen solich vâr.

Verse: 12445    von iuwer zagheit sachen
Verse: 12446    wolt ir mich ze diebe machen.

Verse: 12447    diebe ir vart kunnen heln,
Verse: 12448    so sie des nahtes wellen steln.

Verse: 12449    iu enist der lîp nie sô trût,
Verse: 12450    jâ müeʒt ir offenbâr die hût

Verse: 12451    gegen in füeren ûf die wâge,
Verse: 12452    und niht in diebes lâge.

Verse: 12453    ir kunnet nâch fürsten êren
Verse: 12454    niht râten unde lêren.

Verse: 12455    traget ir mîner wirde haʒ?
Verse: 12456    wâ mit hân ich verschuldet daʒ?

Verse: 12457    wiʒʒet daʒ ich offenbâr
Verse: 12458    wil gegen im durch strîten dar.

Verse: 12459    wie solt mir daʒ ze prîse fromen?
Verse: 12460    wa ich verholne solde komen,

Verse: 12461    dâ ich tûsent slâfende fünde,
Verse: 12462    alein ich die bestünde.

Verse: 12463    geloubet mir der mære:
Verse: 12464    ob eʒ ein geteilteʒ wære,

Verse: 12465    daʒ ich alsô solt gesigen
Verse: 12466    oder offenbâr underligen,

Verse: 12467    ich wolt ê sic verliesen,
Verse: 12468    ê ich alsô wolde sic kiesen.'

Verse: 12469    Poliparcôn sprach: 'mir ist leit.
Verse: 12470    der volge, hêrre, ich bin bereit,

Verse: 12471    naht und tac ist mir gelîch,
Verse: 12472    wann ir wolt, sô wil ouch ich.

Verse: 12473    hêrre, senftet iuwern zorn!'
Verse: 12474    der fürste sprach 'daʒ sî verkorn.'

Verse: 12475    dâ mit die fürsten kêrten dan
Verse: 12476    ze irn gezelden ûf den plân.

Verse: 12477       Der admirât sich ouch versan,
Verse: 12478    als der rât dort wart getân.

Verse: 12479    er hieʒ daʒ volc alleʒ wachen,
Verse: 12480    starke viur machen.

Verse: 12481    der was durch lieht doch dâ niht nôt:
Verse: 12482    sîn eines helm den tac dâ bôt

Verse: 12483    von der steine glesten:
Verse: 12484    wol tûsent der besten

Verse: 12485    gâben dar abe sô queckeʒ lieht,
Verse: 12486    daʒ dem mohte gelîchen niht,

Verse: 12487    waʒ liehtes von den sternen schein,
Verse: 12488    niuwan der sunnen glast alein.

Verse: 12489    doch sint grôʒe viure
Verse: 12490    in herverten guote stiure.

Verse: 12491    ich wæne daʒ die selbe naht
Verse: 12492    mit ungemach hin wurde brâht.

Verse: 12493    den fürsten sorge engegen lief.
Verse: 12494    ir ietweder wênic slief.

Verse: 12495    sie trahten ûf den komenden tac.
Verse: 12496    Alexander sorgen phlac

Verse: 12497    wâ oder ze welher sîten
Verse: 12498    er die vînde solt ane rîten,

Verse: 12499    ob er die rihte gegen den scharn
Verse: 12500    mit poinders hurte mohte varn,

Verse: 12501    wie er die reder entnihtet,
Verse: 12502    dar an die sensen wârn gerihtet.

Verse: 12503    die naht wol tûsent leie gedanc
Verse: 12504    mit sorge durch sîn herze dranc.

Verse: 12505    alsô ungeslâfen er lac.
Verse: 12506    schiere wolde komen der tac.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.