TITUS
Ulrich von Eschenbach, Alexander
Part No. 89
Previous part

Chapter: 126  
Alexander schickt Eumênidus auf Erkundung


Verse: 11821       Nû ist volbrâht der frouwen grap.
Verse: 11822    irs wirtes vînt die kost gap.

Verse: 11823    nû ist daʒ werde wîp begraben.
Verse: 11824    ein ander rede sul wir haben,

Verse: 11825    die ze strîte ziehen wil.
Verse: 11826    heten sie vor gestriten vil,

Verse: 11827    niht daʒ hie gelîchen mac.
Verse: 11828    alrest dô nâhet jâmers tac,

Verse: 11829    der ze leide hât gephlihtet.
Verse: 11830    des wart an wîben entnihtet

Verse: 11831    vil fröiden der sie wârn gewenet,
Verse: 11832    die der strît mit jâmers garte menet

Verse: 11833    ûʒ manegem süeʒen herzen
Verse: 11834    und bôt in sûren smerzen.

Verse: 11835    Eumênidô hieʒ ein grâve wert,
Verse: 11836    des manheit het ie des gegert

Verse: 11837    daʒ er muoste strîten.
Verse: 11838    den hieʒ der fürste rîten

Verse: 11839    ûf die wart, daʒ er besæhe
Verse: 11840    ob inder in der næhe

Verse: 11841    Darîus mit here wære.
Verse: 11842    der solde ervarn die mære.

Verse: 11843    die vînde er nâhen ligende vant.
Verse: 11844    nû was Mâzêus ouch gerant

Verse: 11845    ûf die wart von der ouwen.
Verse: 11846    an dem helde moht man schouwen

Verse: 11847    harnasch von rîcher koste.
Verse: 11848    nâch viures varwe gloste

Verse: 11849    waʒ der werde an im fuorte.
Verse: 11850    daʒ ors mit craft er ruorte

Verse: 11851    ûf den unverzagten helt,
Verse: 11852    des ors mit sprüngen maʒ daʒ velt.

Verse: 11853    aldâ sach man die vieren
Verse: 11854    sunder feilieren

Verse: 11855    beider sît vertuon die sper
Verse: 11856    mit tjost nâch werder ger,

Verse: 11857    daʒ sie doch beide besâʒen.
Verse: 11858    ich wæn sie niht vergâʒen

Verse: 11859    die swert sach man sie ziehen,
Verse: 11860    ir deheiner wolde fliehen.

Verse: 11861    Mâzêus was ze strîte cluoc.
Verse: 11862    der fürste an schilt, ûf helme truoc

Verse: 11863    Bêlî, der Babilône got,
Verse: 11864    dem jener swære slege bôt.

Verse: 11865    ir beider harnasch daʒ was guot,
Verse: 11866    des beliben vor wunden sie behuot.

Verse: 11867    waʒ sie von tiurer kost bevienc,
Verse: 11868    dar über der helde strît gienc.

Verse: 11869    dise beide manheit rîche
Verse: 11870    vâhten menlîche.

Verse: 11871    ûf sich ir ungefüegeʒ bern
Verse: 11872    sach man wol in beiden hern.

Verse: 11873    ir strîten lange hete gewert.
Verse: 11874    ir schilde, ir helme wârn verschert,

Verse: 11875    ir cleinôt rîch versêret,
Verse: 11876    manic stein dar abe gerêret,

Verse: 11877    verhouwen gar die samît tiur.
Verse: 11878    nâch irn slegen sach man viur

Verse: 11879    lieht ûf der hôhe erblicken
Verse: 11880    ûʒ ir helmes randen dicken.

Verse: 11881    wie sol ich den heiden
Verse: 11882    und den heiden gescheiden,

Verse: 11883    sît ir deheiner wil verzagen
Verse: 11884    und sie doch solden widersagen

Verse: 11885    ietslîcher in sîn selbes her
Verse: 11886    der vînde gelæge und ir wer?

Verse: 11887    sie wâren beide müede vil.
Verse: 11888    dem Babilôn daʒ swert enphiel.

Verse: 11889    von überslahen daʒ geschach.
Verse: 11890    dô daʒ Eumênidôn ersach,

Verse: 11891    er sprach 'næm ich iu nû den lîp,
Verse: 11892    sô slüeg als mær ich ein wîp.

Verse: 11893    nû wirt hie strîten gar gelân.
Verse: 11894    guoten ruom solt ir hân.

Verse: 11895    daʒ iu die wer werde wider,
Verse: 11896    die mîne lige ouch dâ nider.

Verse: 11897    ob ir sô von mir wurdet erslagen,
Verse: 11898    des müeste mîn werdekeit verzagen.'

Verse: 11899    dô daʒ der Babilôn ersach,
Verse: 11900    ze dem Kriechen er sprach

Verse: 11901    'ich danke dir, menlîcher helt!
Verse: 11902    mîn leben ze tôde was verselt,

Verse: 11903    des mich dîn manheit hât begeben.
Verse: 11904    ich sol nâch dîme gebote leben.

Verse: 11905    nû sî gar prîses gewin
Verse: 11906    und ouch der sic ganzer dîn,

Verse: 11907    den mit ellenthafter tât
Verse: 11908    dîn hant an mir erstriten hât.

Verse: 11909    wiʒʒe, des hœhet sich dîn prîs.
Verse: 11910    sage mir, hêrre, wer du sîs.

Verse: 11911    durch dîn menlîch werdekeit
Verse: 11912    ist dir bereit mîn sicherheit.'

Verse: 11913    er sprach 'ich heiʒ Eumênidô
Verse: 11914    und habe niht geworben sô,

Verse: 11915    daʒ ich ze prîse habe phliht,
Verse: 11916    des mir iuwer zuht vergiht.

Verse: 11917    ouch sît ir des von mir erlân
Verse: 11918    daʒ ich von iu welle enphân

Verse: 11919    sicherheit, die ir bietent mir.
Verse: 11920    die wil ich daʒ ir

Verse: 11921    von mir alhie enphâhet
Verse: 11922    und des balde gâhet.

Verse: 11923    jâ hætet ir, helt, mit gewalt
Verse: 11924    sic und prîs an mir bezalt,

Verse: 11925    (des ich iu sicherlich wil jehen)
Verse: 11926    wær der val niht geschehen.

Verse: 11927    alsô bin ich vor iu genesen.
Verse: 11928    lât mich iuwer dienest wesen,

Verse: 11929    des durft ir nimmer iuch geschamen.
Verse: 11930    ich weste ouch gerne iuwern namen'.

Verse: 11931    er sprach 'wer mich kennet,
Verse: 11932    Mâzêus er mich nennet.

Verse: 11933    in Babilôn ich vogt bin.
Verse: 11934    hêrre, wann ir komet dâ hin,

Verse: 11935    dâ wirt eʒ iu wol erboten.'
Verse: 11936    des swuor der her bî sînen goten.

Verse: 11937    dô wart ein suone under in getân,
Verse: 11938    dâ mit sie kêrten von dem plân.

Verse: 11939    sie beide mit der île
Verse: 11940    spielten sich an der wîle.

Verse: 11941    Mâzêus gegen den sînen jagte,
Verse: 11942    sîn geverte dem keiser er sagte,

Verse: 11943    daʒ ûf in strît was geschehen
Verse: 11944    und bî vînden wære gesehen;

Verse: 11945    ouch sagt er im die mære
Verse: 11946    daʒ Alexander nâhen wære,

Verse: 11947    und daʒ der Kriechen wartman
Verse: 11948    riten ûf der huote plân.

Verse: 11949    Eumênidô ouch wider kam,
Verse: 11950    von dem man in dem here vernam

Verse: 11951    daʒ der keiser nâhen læge
Verse: 11952    und grôʒer êren phlæge.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.