TITUS
Ulrich von Eschenbach, Alexander
Part No. 88
Previous part

Chapter: 123  
Grabmal der Frau des Darius


Verse: 11105       Die wîle der muotes slehte
Verse: 11106    het nâch fürsten rehte

Verse: 11107    bewart daʒ keiserlîche wîp.
Verse: 11108    gebalsmet wart ir tôter lîp.

Verse: 11109    in edel wurze und arômatâ
Verse: 11110    wart sie wol bewunden dâ.

Verse: 11111    süeʒer smac sie niht vlôch.
Verse: 11112    er hie; ûf dem gebirge hôch

Verse: 11113    ûʒ gelfem marmelsteine
Verse: 11114    wît bûwen reine

Verse: 11115    ein grap, dem kost niht gebrach,
Verse: 11116    dem man grôʒer rîcheit jach,

Verse: 11117    dar inne die frouwe wart begraben.
Verse: 11118    dar het Apelles în erhaben

Verse: 11119    ein werc gemâlet von golde,
Verse: 11120    daʒ man billich loben solde.

Verse: 11121    er was von hêbrêischer art,
Verse: 11122    an sinnen künstelich bewart.

Verse: 11123    dem werden meister was wol kunt
Verse: 11124    wie rehte ordenunge stunt

Verse: 11125    aller dinge und ir geschaft,
Verse: 11126    ouch worht er ritters tât mit kraft.

Verse: 11127    er kunde die buoch der Juden ê,
Verse: 11128    als sie sie vernâmen von Moysê.

Verse: 11129    sîn muot was volleclîche scharf.
Verse: 11130    mit dem pinsel er entwarf

Verse: 11131    in daʒ grap nâch einer lenge
Verse: 11132    von der werlde anegenge

Verse: 11133    (listeclich het erʒ dar brâht),
Verse: 11134    als unser schepher het erdâht

Verse: 11135    die vier element ân underscheit
Verse: 11136    in einer gestalt wol bereit;

Verse: 11137    wie den himel und die erden
Verse: 11138    got von êrst hieʒ werden.

Verse: 11139    als uns Genesis vergiht,
Verse: 11140    dô was ûf der erden niht,

Verse: 11141    die man vinster sach bedecken.
Verse: 11142    got wolt sîn craft errecken.

Verse: 11143    er lieʒ sînes geistes leben
Verse: 11144    hôch über alle waʒʒer sweben.

Verse: 11145    got mit wîsheit alsô sprach
Verse: 11146    'nû welde ein lieht' daʒ geschach.

Verse: 11147    dem vil süeʒen reine gemuot
Verse: 11148    geviel daʒ lieht, wann eʒ was guot.

Verse: 11149    nâch sînem willen daʒ geriet,
Verse: 11150    sîn craft eʒ von der vinster schiet.

Verse: 11151    dem liehte er tages namen brâht
Verse: 11152    und die vinster nante er naht.

Verse: 11153    an dem êrsten tage, des er gedâht,
Verse: 11154    wurden dise werc zuo brâht.

Verse: 11155    eʒ het der wîse meister clâr
Verse: 11156    wunneclich geteilet dar

Verse: 11157    wie nâch der wârheit sage
Verse: 11158    got an dem andern tage

Verse: 11159    gap den waʒʒern underscheit
Verse: 11160    mit des firmamentes stætikeit,

Verse: 11161    daʒ sîner süeʒen worte ruof
Verse: 11162    des tages sinneclîche schuof.

Verse: 11163       Dar nâch mâlt er mêre
Verse: 11164    wie an dem dritten tac der hêre

Verse: 11165    schepher gar gewaldic got
Verse: 11166    allen waʒʒern gebôt

Verse: 11167    daʒ sie sich samenten an ein stat,
Verse: 11168    dâ ûʒ ietslîcheʒ flieʒen hât.

Verse: 11169    dar nâch daʒ ertrîch trucke was,
Verse: 11170    dar nâch kam loup unde gras.

Verse: 11171    dar nâch mâlt er in daʒ grap,
Verse: 11172    wie der süeʒe reine gap

Verse: 11173    dem firmament besunder
Verse: 11174    mit sternen schœnheit wunder.

Verse: 11175    der vierde tac dô ergienc,
Verse: 11176    dô die luft ir glast bevienc.

Verse: 11177    den fünften tac dar mâlt sîn hant,
Verse: 11178    wie gotes güete wart bekant,

Verse: 11179    daʒ uns brâht sîn gotlich craft
Verse: 11180    vogel, tier, aller vische geschaft.

Verse: 11181    aber mâlte Apelles dô
Verse: 11182    den sehsten tac dar alsô,

Verse: 11183    an dem got den menschen brâhte
Verse: 11184    der werlde, dem er gedâhte

Verse: 11185    aller sîner geschephte fruht
Verse: 11186    und waʒ die werlt bringet genuht;

Verse: 11187    wie der süeʒe wîse
Verse: 11188    in dem paradîse

Verse: 11189    sante slâf in Âdam,
Verse: 11190    dô er von sînem rippe nam

Verse: 11191    frowen Êvam von sînem lîbe,
Verse: 11192    die er im gap ze wîbe;

Verse: 11193    wie in der werde reine got
Verse: 11194    der einer hande fruht verbôt,

Verse: 11195    dar inne der andern âne vâr
Verse: 11196    solden sie genieʒen gar.

Verse: 11197    dô wurden alle sîne werc volbrâht.
Verse: 11198    des sibenden tages er erdâht,

Verse: 11199    an dem er ruowet, den noch sol
Verse: 11200    der mensche mit vîre haben wol.

Verse: 11201       Apelles mâlte ouch dar în
Verse: 11202    wie mit den untriuwen sîn

Verse: 11203    der tiuvel vor sînem nîde grôʒ
Verse: 11204    (den unser sælden verdrôʒ)

Verse: 11205    Êven sîn stricke stalte,
Verse: 11206    daʒ die werden und uns valte

Verse: 11207    und unser sælde stôrte:
Verse: 11208    dô sie got überhôrte,

Verse: 11209    dâ von wir alle wârn verlorn;
Verse: 11210    wie des reinen werden zorn

Verse: 11211    sie ûʒ dem paradîse stieʒ
Verse: 11212    und daʒ den engel hüeten hieʒ

Verse: 11213    mit viurigem swerte,
Verse: 11214    der in daʒ vürbaʒ werte;

Verse: 11215    wie an sælden die verherten
Verse: 11216    die erde bûweten, die werlt mêrten;

Verse: 11217    wie Âbel dem süeʒen got
Verse: 11218    sîn vil reineʒ opher bôt,

Verse: 11219    daʒ sîn güete wol enphienc,
Verse: 11220    und wie ein viur gienc

Verse: 11221    über valsches ophers schîn
Verse: 11222    des ungetriuwen Kâîn;

Verse: 11223    wie der Âbels leben stôrt,
Verse: 11224    alsô sich huop der êrste mort;

Verse: 11225    dâ von man Kâîn flühtic sach
Verse: 11226    in den walt; wie daʒ geschach

Verse: 11227    daʒ in sîn bruoder, her Lamêch,
Verse: 11228    den got der ougen lieht verzêch

Verse: 11229    durch daʒ er huop den êrsten huor,
Verse: 11230    dâ von wart sîn fröide muor:

Verse: 11231    Kâîn er ze tôde schôʒ,
Verse: 11232    des Âdam fröiden sît verdrôʒ:

Verse: 11233    in der wilde under einem ronen
Verse: 11234    muoste Kâîn tôter wonen;

Verse: 11235    wie sich die werlt mêrte
Verse: 11236    und sich von gote kêrte

Verse: 11237    und von guoten werken flôch,
Verse: 11238    schande und sünde ûf sich zôch,

Verse: 11239    dar umb man trûriclîche
Verse: 11240    sach stên den schepher rîche,

Verse: 11241    als dâ er sprach 'mir ist leit
Verse: 11242    daʒ ich den menschen hân bereit'.

Verse: 11243       Man sach dar nâch gemâlet mê
Verse: 11244    wie got gebôt hern Nôê,

Verse: 11245    dem werden man getriuwen,
Verse: 11246    er solt ein arke biuwen,

Verse: 11247    daʒ er die veste bereite:
Verse: 11248    dem werden er dô seite

Verse: 11249    daʒ er næme mit im dar în
Verse: 11250    sîn wîp und die süne sîn,

Verse: 11251    mit im Sarfrasatam,
Verse: 11252    Satam unde Farsatam,

Verse: 11253    drî frouwen sîner süne konen,
Verse: 11254    die solden ouch dâ inne wenen;

Verse: 11255    wie dar în nam der wîse man
Verse: 11256    (als im des hœhsten rede quam)

Verse: 11257    zwei gemahel vogel, tier,
Verse: 11258    unde wie dar nâch gar schier

Verse: 11259    die werlt vertarp von der fluote;
Verse: 11260    wie sît Nôê der guote,

Verse: 11261    dô die fluot widerwante
Verse: 11262    einen raben ûʒ gesante,

Verse: 11263    daʒ er im bræhte mære
Verse: 11264    ob der werlde iht blôʒ wære:

Verse: 11265    der rabe kam ûf ein âs,
Verse: 11266    daʒ ûf dem velde erstunken was,

Verse: 11267    aldâ durch frâʒ lieʒ er sich nider,
Verse: 11268    Nôê brâhte er niht mære wider;

Verse: 11269    wie er dar nâch die tûben hieʒ
Verse: 11270    ûʒ fliegen, die in wiʒʒen lieʒ

Verse: 11271    wie eʒ ûf dem lande stunt:
Verse: 11272    mit eime zwî tet sie daʒ kunt,

Verse: 11273    daʒ sie von einem boume brach,
Verse: 11274    daʒ im der werde bringen sach.

Verse: 11275       Dar nâch mâlt Apelles mê
Verse: 11276    wie nâch der fluot her Nôê

Verse: 11277    und die ahte die werlt mêrten
Verse: 11278    und ir dienst an got kêrten,

Verse: 11279    wie sie bûweten die erden
Verse: 11280    und wie an dem alden werden

Verse: 11281    man sach trunkenheit gesigen,
Verse: 11282    des man in kôs enblecket ligen,

Verse: 11283    unde wie sîn sun her Kam
Verse: 11284    des vater war mit spotte nam:

Verse: 11285    Sem und Japhet was daʒ leit,
Verse: 11286    daʒ er daʒ spotten niht vermeit.

Verse: 11287    von tiurem golde rîche
Verse: 11288    gemâlet gar wunneclîche

Verse: 11289    stunt ouch an dem sarke
Verse: 11290    Abrahâm der patriarke,

Verse: 11291    dar nâch Isac und Jâcop.
Verse: 11292    eʒ muost dem meister sprechen lop

Verse: 11293    wer sîn gemælde ie gesach,
Verse: 11294    daʒ dar nâch alsô verjach

Verse: 11295    wie Abrahâm sîn lant verlieʒ
Verse: 11296    und in got gewaltic hieʒ,

Verse: 11297    wie er in fremdem lande
Verse: 11298    des engels wort bekande,

Verse: 11299    daʒ von des werden lîbe
Verse: 11300    und Sârâ sînem wîbe

Verse: 11301    solde werden her Isac.
Verse: 11302    des tât ouch dâ mit koste lac,

Verse: 11303    wie er ze Êsaû sprach,
Verse: 11304    dem er vür Jâkob liebe jach,

Verse: 11305    der von der muoter wart betrogen:
Verse: 11306    er hie: in harnasch unde bogen

Verse: 11307    mit im nemen ze walde
Verse: 11308    und des gâhen balde;

Verse: 11309    wie Rebeccâ der witze wielt
Verse: 11310    den segen sie Jâcop behielt:

Verse: 11311    er was ir vür Êsaû liep;
Verse: 11312    wie Jâcop, des segens diep,

Verse: 11313    sich vor vorhten dannen zôch
Verse: 11314    und ze fremden landen flôch,

Verse: 11315    dar inne er diente manegen tac,
Verse: 11316    in den er sach, dô er lac

Verse: 11317    in slâfe, ein leiter von himel gên,
Verse: 11318    die rihte unz ûf die erden stên,

Verse: 11319    dar an sich die engel drungen
Verse: 11320    und mit einander rungen,

Verse: 11321    der er einen begreif,
Verse: 11322    dâ von im sælde niht entsleif,

Verse: 11323    die der engel an dem hêrren
Verse: 11324    mit dem segen muoste mêren:

Verse: 11325    ein huf er im mit slage brach,
Verse: 11326    sît man den werden hinken sach

Verse: 11327    und eben gên muoste fliehen:
Verse: 11328    dâ von noch die Juden ziehen

Verse: 11329    die âdern ûʒ dem fleische gar,
Verse: 11330    des sie nieʒen, daʒ ist wâr.

Verse: 11331       Dar nâch was gemâlet sân
Verse: 11332    wie Jâcop der wîse man

Verse: 11333    einem werden friunde sîn
Verse: 11334    siben jâr tet dienest schîn

Verse: 11335    umb sîn tohter Lyam wert,
Verse: 11336    der er durch schœne ze wîbe gert.

Verse: 11337    ie magt im wart ze ê gegeben.
Verse: 11338    man sach sie wirdeclîche leben.

Verse: 11339    sie beliben beide kinder bar.
Verse: 11340    daʒ an dem hêrren niht enwar,

Verse: 11341    daʒ wart an sîner dierne schîn,
Verse: 11342    die gebar von im zwei kindelîn.

Verse: 11343    dar umb wolt er die frouwen lân.
Verse: 11344    er diente sît hern lâbân

Verse: 11345    umb Racheln, die werden magt,
Verse: 11346    die im der werde niht versagt,

Verse: 11347    dô er ir swester Lyam lieʒ.
Verse: 11348    die im minne wert gehieʒ,

Verse: 11349    zwelf süne er mit ir gewan,
Verse: 11350    als die schrift bewîsen kan.

Verse: 11351       Nû enwas daʒ niht bliben,
Verse: 11352    der meister hete dar geschriben

Verse: 11353    wie sîn sun durch troumen,
Verse: 11354    Jôseph muoste roumen

Verse: 11355    sînes vater erbe und lant
Verse: 11356    und in fremdem gotes helfe vant;

Verse: 11357    wie er von sînes verches art
Verse: 11358    Ismâhêliten verkouft wart;

Verse: 11359    wie im sîn hêrre Phâraôn
Verse: 11360    umb sîn dienst gap swachen lôn:

Verse: 11361    sîn wîp die küniginne
Verse: 11362    durch sîn schœne bat in minne.

Verse: 11363    dô er sie niht wolde wern,
Verse: 11364    des muost er fröiden sît enpern.

Verse: 11365    in schuof gevangen ûf den lîp
Verse: 11366    daʒ vil ungetriuwe wîp.

Verse: 11367    des künges schenke gevangen lac,
Verse: 11368    sîn phister der selben sorgen phlac.

Verse: 11369    sie begunden Jôseph verjehen
Verse: 11370    waʒ sie in slâfe heten gesehen.

Verse: 11371    die tröume er in bescheinde,
Verse: 11372    daʒ des phisters künne weinde:

Verse: 11373    Phâraô hieʒ in hâhen
Verse: 11374    des morgens und des gâhen.

Verse: 11375    dem schenken erʒ alsô ûʒ leit,
Verse: 11376    er kæm an hôher wirdikeit,

Verse: 11377    dann er vor wære gewesen.
Verse: 11378    des sach man Jôseph sît genesen.

Verse: 11379    dâ der schenke genas
Verse: 11380    und Jôseph noch gevangen was,

Verse: 11381    Phâraô in slâfe tröume sach.
Verse: 11382    der künc ze sîme volke sprach,

Verse: 11383    wer in kunde bescheiden
Verse: 11384    von sînen tröumen beiden,

Verse: 11385    dem wolt er immer mêre
Verse: 11386    erbieten wird und êre.

Verse: 11387    an Jôseph der schenke gedâhte.
Verse: 11388    vür den künc er gâhte,

Verse: 11389    an den gevangen er im riet,
Verse: 11390    der in der tröume beschiet,

Verse: 11391    waʒ in den landen künftic wære
Verse: 11392    beide guot und daʒ swære.

Verse: 11393       An der selben sarkes want
Verse: 11394    man noch mê gemâlet vant,

Verse: 11395    wie Jôseph sît gewaldic wart;
Verse: 11396    wie sînes vater und sîner brüeder vart

Verse: 11397    ze im geriet nâch trôste;
Verse: 11398    wie er sie von swære lôste.

Verse: 11399    daʒ gemælde mê verjach
Verse: 11400    wie man Babilôn zerstœret sach;

Verse: 11401    wie got Moysen sante
Verse: 11402    Phâraône und in des mante

Verse: 11403    umb sîn volc, daʒ er gevangen het.
Verse: 11404    sîne bet er niht entet,

Verse: 11405    des wart über al Êgypten lant
Verse: 11406    gotes zorn grôʒ bekant

Verse: 11407    mit zehen phlâgen herten,
Verse: 11408    die lant und liut mit jâmer zerten,

Verse: 11409    des sie mohte wol verdrieʒen.
Verse: 11410    man sach die luft mit bluote ergieʒen,

Verse: 11411    dar nâch kroten schutte der regen,
Verse: 11412    (solicher swære muosten sie phlegen)

Verse: 11413    dar nâch bremen, die valten tôt
Verse: 11414    liute und vihe mit strenger nôt.

Verse: 11415    aber er zorn ûf sie warf
Verse: 11416    (die pîne was in gar ze scharf),

Verse: 11417    mit dem fünften slage daʒ vie
Verse: 11418    tôt er gar, als ich vergie.

Verse: 11419    zem sehsten mâle wurden sie geslagen.
Verse: 11420    man sach alle waʒʒer tragen

Verse: 11421    blatern grôʒ von bluote:
Verse: 11422    des was in wê ze muote,

Verse: 11423    als uns die wârheit vergiht.
Verse: 11424    der waʒʒer sie genuʒʒen niht.

Verse: 11425    ich wæne ir leben wære sûr.
Verse: 11426    die sibende macht in fröide tûr:

Verse: 11427    waʒ er bî craft hete gelâʒen,
Verse: 11428    die kevern daʒ abe gâʒen.

Verse: 11429    alsô ergienc die ahte phlâge.
Verse: 11430    ir fröide ringet an der wâge.

Verse: 11431    dar nâch die sunne vergienc.
Verse: 11432    die zehende mit tôde bevienc

Verse: 11433    daʒ volc nâch sînem rehte:
Verse: 11434    in allem irm geslehte

Verse: 11435    den eldesten er ir leben brach.
Verse: 11436    alsô der süeʒe schepher rach

Verse: 11437    des israhêleschen volkes nôt
Verse: 11438    und daʒ der künc sîn gebot

Verse: 11439    Phâraô dô vor versaʒ.
Verse: 11440       dô wart gezieret mit golde baʒ

Verse: 11441    wie der êwige got
Verse: 11442    spîse wert des himels brôt

Verse: 11443    sîme volke ze helfe sante,
Verse: 11444    als in sîn güete ermante;

Verse: 11445    wie Moyses der hêrre gienc
Verse: 11446    ûf den berc Sînâ und dâ enphienc

Verse: 11447    von dem almehtigen got
Verse: 11448    und vernam aldâ die zehen bot:

Verse: 11449    dô Moyses was wider komen,
Verse: 11450    daʒ volk het sünde an sich genomen,

Verse: 11451    gegen eime kalbe eʒ dienest tet
Verse: 11452    mit êren unde mit gebet,

Verse: 11453    daʒ het Aaron gegoʒʒen in:
Verse: 11454    trûric was des hêrren sin,

Verse: 11455    grôʒ zorn den werden ruorte,
Verse: 11456    den apgot er zerfuorte;

Verse: 11457    wie Moyses in der wüeste sluoc
Verse: 11458    den stein; wie der waʒʒer truoc;

Verse: 11459    wie dar nâch, dô er starp,
Verse: 11460    Nûnus sun daʒ erwarp,

Verse: 11461    Jôsuê, daʒ im got
Verse: 11462    daʒ volc ze leitene gebôt;

Verse: 11463    wie der junge wîse man
Verse: 11464    sluoc daʒ waʒʒer Jordân

Verse: 11465    mit Moyses ruoten,
Verse: 11466    des erstorben guoten;

Verse: 11467    wie daʒ volc über kam;
Verse: 11468    welich leben eʒ dar nâch an sich nam.

Verse: 11469       dâ stunt wie Zoreb die stat
Verse: 11470    got Achorn zerfüeren bat,

Verse: 11471    war umbe der tumbe man
Verse: 11472    dô verdiente den êrsten ban.

Verse: 11473    dâ stunt wie Jôsuês hant
Verse: 11474    teilte daʒ gelopte lant

Verse: 11475    den Juden, die Moyses der her
Verse: 11476    brâhte über daʒ rôte mer;

Verse: 11477    dô Jôsuê hete getân sîn leben,
Verse: 11478    wie dem volke wart gegeben

Verse: 11479    Sampson ze rihtære;
Verse: 11480    wie den brâhte in swære

Verse: 11481    sîn vil ungetriuweʒ wîp,
Verse: 11482    dâ von vertarp sît manic lîp.

Verse: 11483       Apelles mâlte ouch in daʒ grap
Verse: 11484    wie ein Jude hieʒ Moap

Verse: 11485    nâch sîme tôde ein frouwen lieʒ
Verse: 11486    (Ruth die selbe frowe hieʒ),

Verse: 11487    die gienc sît ehern ûf daʒ velt,
Verse: 11488    dô sie nam minnengelt

Verse: 11489    von Booʒ von Raap,
Verse: 11490    kranke miete er ir doch gap.

Verse: 11491    die frowe enphienc von im ein kint.
Verse: 11492    ich wæne nû mêr gîtic sint

Verse: 11493    nâch gelte umb minne die wîp,
Verse: 11494    dann dô wære der frouwen lîp:

Verse: 11495    sie nement nû baʒ phenninge war.
Verse: 11496    daʒ werde wîp Obêth gebar.

Verse: 11497    von Obêth geborn wart
Verse: 11498    der hêrre Jesse von hôher art.

Verse: 11499    dar nâch über lange zît
Verse: 11500    von Jesse kam der werde Dâvît,

Verse: 11501    ûʒ des geslehte ist uns geborn
Verse: 11502    die uns ze heile ist erkorn,

Verse: 11503    die süeʒe maget frîe,
Verse: 11504    frowen Annen dochter, sant Marîe,

Verse: 11505    von der uns geborn ist
Verse: 11506    Jhêsus, den wir nennen Crist.

Verse: 11507       An des sarkes ander want
Verse: 11508    mâlte des meisters künstic hant

Verse: 11509    mit rôtem golde von Kaucasas,
Verse: 11510    (daʒ beʒʒer dann daʒ êrste was)

Verse: 11511    ir wer, ir leben, ir strîten,
Verse: 11512    wenn sie bî iren zîten

Verse: 11513    wâren muotes rîche.
Verse: 11514    dâ stunt Êly wunneclîche

Verse: 11515    mit sînen lieben sünen zwein.
Verse: 11516    meisterlîchen daʒ erschein,

Verse: 11517    wie Sâmuêl und sîn alder sun
Verse: 11518    grôʒe sünde kunde tuon

Verse: 11519    gegen irm schepher unde got,
Verse: 11520    dar umb er Êly gebôt

Verse: 11521    daʒ er sîn süne von sünden craft
Verse: 11522    züge mit sîner meisterschaft.

Verse: 11523    Êly daʒ gebot vermeit,
Verse: 11524    dar umb er sît, dô er reit

Verse: 11525    sîn lant berihten und besehen
Verse: 11526    (die schrift uns hât alsô verjehen),

Verse: 11527    ûʒ dem satel viel, den hals er brach,
Verse: 11528    daʒ man den hêrren tôten sach.

Verse: 11529       Dar nâch waʒ in Sylô geschach.
Verse: 11530    daʒ volc nâch eime künge sprach,

Verse: 11531    dô wart in Saul gegeben,
Verse: 11532    dar umb daʒ er reineʒ leben

Verse: 11533    wandelte und ze sünden vlôch:
Verse: 11534    die der fürste ûf sich zôch,

Verse: 11535    des wart sîn wirde gehœnet.
Verse: 11536    her Dâvît wart gekrœnet,

Verse: 11537    der mit sîner würfe gewalde
Verse: 11538    Gôliam den risen valde.

Verse: 11539    den sach man dâ nû crône tragen
Verse: 11540    und mit strîte Saule jagen

Verse: 11541    ûf mont Gelbôê mit tôdes zil,
Verse: 11542    des Dâvît doch genôʒ niht vil,

Verse: 11543    wann man in sît in jâmer kôs
Verse: 11544    umb sînen sun, den er verlôs,

Verse: 11545    Jonatham den snellen.
Verse: 11546    des wîtvengec prîses ellen

Verse: 11547    in strîte sterben dô erwarp,
Verse: 11548    der umb Dâvît an wunden starp,

Verse: 11549    der er niht vürbaʒ ruochte.
Verse: 11550    der fürste aldâ verfluochte

Verse: 11551    dem gebirge Gelbôê,
Verse: 11552    daʒ von der zît immermê

Verse: 11553    dar ûf kam regen noch der tou.
Verse: 11554    alsô der tôt Dâvîden rou

Verse: 11555    wie dar nâch Sauls fürste Asahel,
Verse: 11556    des manheit was gegen prîse snel,

Verse: 11557    Dâvît einen fürsten sluoc,
Verse: 11558    Abnern, der menlich herze truoc;

Verse: 11559    wie Jôab, Abners bruoder,
Verse: 11560    Asahel sînes lebens muoder

Verse: 11561    durch râche sît in strîte verschriet,
Verse: 11562    dâ mit er in von leben schiet.

Verse: 11563       Er mâlte ouch wie frou Minne
Verse: 11564    hern Dâvîdes sinne

Verse: 11565    gewalticlîchen gar betwanc,
Verse: 11566    daʒ er nâch fremder minne ranc,

Verse: 11567    die er erwarb an Bersabê,
Verse: 11568    daʒ tet irm manne Urîâ wê.

Verse: 11569    Dâvît den fürsten doch ervorht,
Verse: 11570    daʒ er in êren het entworht.

Verse: 11571    nû solt ouch er in kurzer zît
Verse: 11572    mit Sauls liuten haben strît.

Verse: 11573    Dâvît brieve schrîben lieʒ,
Verse: 11574    die er Urîam füeren hieʒ

Verse: 11575    sînem fürsten in daʒ her.
Verse: 11576    daʒ fromte Urîam tôdes sêr.

Verse: 11577    die schrift was gelesen,
Verse: 11578    dâ stunt daʒ er solde wesen

Verse: 11579    in strîte ze vorderst an der schar.
Verse: 11580    dô leit sîn manheit tôtlich vâr.

Verse: 11581    dar umb sît dô Dâvît streit
Verse: 11582    jâmer mit gewalt leit

Verse: 11583    umb daʒ wortlich ungemach.
Verse: 11584    Dâvît mit sînen ougen sach

Verse: 11585    daʒ der engel mit eim swerte
Verse: 11586    sîn volc sterben lêrte,

Verse: 11587    des manic tûsent bleip dô tôt.
Verse: 11588    alrêrst rief er hin ze got

Verse: 11589    'wendâ, hêrre, dînen slac!
Verse: 11590    ich bin der, der der sünden phlac.

Verse: 11591    lâ dîn volc engelten niht
Verse: 11592    sünden, der mîn krancheit giht!'

Verse: 11593       dô Urîas verscheiden was,
Verse: 11594    dar nâch wie Bersabê Salomônis genas,

Verse: 11595    den sie von Dâvîdes minne enphie:
Verse: 11596    dar nâch mâlte der meister wie

Verse: 11597    man Absalôn den schœnde rîchen
Verse: 11598    vor dem vater sach entwîchen

Verse: 11599    wie in mit dem hâre vienc
Verse: 11600    ein ast an fluht; wie er behienc;

Verse: 11601    wie Joab ein fürste kam
Verse: 11602    und im dô sîn leben nam:

Verse: 11603    er wânde dem vater liebe tuon,
Verse: 11604    Dâvît doch weinte sînen suon.

Verse: 11605       Dar nâch wie Salomôn besaʒ
Verse: 11606    daʒ rîche, dô Dâvît lebens vergaʒ:

Verse: 11607    sîner wîsheit wunder und gewalt
Verse: 11608    er dar mit dem pinsel zalt,

Verse: 11609    wie er von koste sachen
Verse: 11610    in Jhêrusalêm lieʒ machen

Verse: 11611    den tempel gote ze êren,
Verse: 11612    dar an sach man in kêren

Verse: 11613    maneger sîner wîsheit rât.
Verse: 11614    dar nâch als in der vater bat

Verse: 11615    sluoc er hinder dem alter tôt
Verse: 11616    den der Absalône sterben bôt.

Verse: 11617    er mâlte ouch als dô vor geschach,
Verse: 11618    dô man vor Absalône sach

Verse: 11619    Dâvît vaste entwîchen,
Verse: 11620    Semeî der unzuht rîchen,

Verse: 11621    wie im der warf mit steinen nâch
Verse: 11622    und wie er haʒ dem künge sprach:

Verse: 11623    'man sach dich daʒ rîche
Verse: 11624    gar lesterlîche

Verse: 11625    und übele gewinnen,
Verse: 11626    alsô muostu im entrinnen.'

Verse: 11627    dar umb er truoc des fürsten haʒ
Verse: 11628    lange unz ûf daʒ

Verse: 11629    Semeî hulde gewan:
Verse: 11630    alsô wart die suone getân,

Verse: 11631    ob er immer fuoʒ ûʒ Jhêrusalêm quæme,
Verse: 11632    daʒ man im daʒ leben næme;

Verse: 11633    wie dar nâch über lange zît
Verse: 11634    Salomôn het mit vînden strît:

Verse: 11635    des herze tummer sîn besaʒ,
Verse: 11636    Semeî sich vergaʒ,

Verse: 11637    vor der stat man in kôs,
Verse: 11638    dâ von er daʒ houbt verlôs;

Verse: 11639    wie mit Salomônis sun Rôboam
Verse: 11640    ein sîn fürste Jerôboam

Verse: 11641    strîtes und siges gegen im phlac,
Verse: 11642    und Rôboams craft gelac,

Verse: 11643    die an Jerôboam sich mêrte,
Verse: 11644    an dem mit helfe kêrte

Verse: 11645    zehen israhêlischen geslehte,
Verse: 11646    (eʒ was doch widerʒ rehte

Verse: 11647    daʒ sie irn hêrren vertriben),
Verse: 11648    niwan zwei ir bî im bliben.

Verse: 11649       Darnâch mâlte Apelles dâ
Verse: 11650    wie Jerôboam in Sâmariâ

Verse: 11651    kelber von golde machen lieʒ
Verse: 11652    und die vür got êren hieʒ.

Verse: 11653    er entwarf ouch dâ mit golde rôt
Verse: 11654    wie einem künc hieʒ Nabôt

Verse: 11655    dienstlich was undertân
Verse: 11656    Achap, ein vil guoter man,

Verse: 11657    der einen wîngarten het,
Verse: 11658    dâ er vil dienstes von tet:

Verse: 11659    doch wolt der künc den garten hân.
Verse: 11660    sêre senen er sich began.

Verse: 11661    Jesabel des fürsten wîp
Verse: 11662    truoc schœnen velschlîchen lîp.

Verse: 11663    den künc frâgt sie mære,
Verse: 11664    war umb er trûric wære.

Verse: 11665    Nabôt die frowen des beschiet.
Verse: 11666    ir grôʒe untriuwe daʒ geriet

Verse: 11667    (der vil unreinen Jesabel,
Verse: 11668    ir sinne wârn gegen valsche snel),

Verse: 11669    sie jach Achap hete mort
Verse: 11670    begangen; ouch hân ich gehôrt,

Verse: 11671    dar umb er von lîbe kam:
Verse: 11672    der künc ouch den garten nam.

Verse: 11673    unschuldic was der guote man,
Verse: 11674    eʒ het der wîngarte getân.

Verse: 11675    dô der künc Nabôt
Verse: 11676    umb die sünd ervorhte got,

Verse: 11677    die im sîn wîp gerâten het;
Verse: 11678    über die er dô gerihte tet,

Verse: 11679    von einem hôhen turne nider
Verse: 11680    so hieʒ er die frowen werten sider.

Verse: 11681       Aber mâlte der hêre
Verse: 11682    an daʒ grap noch mêre

Verse: 11683    von Jesabel dem wîbe,
Verse: 11684    wie die bî ir lîbe

Verse: 11685    Helîam von ir hulde stieʒ
Verse: 11686    und ir in gevangen bringen hieʒ.

Verse: 11687    alle die sie nâch im sante
Verse: 11688    ein viur die gar verbrante

Verse: 11689    nâch Helîas worte.
Verse: 11690    dô Jesabel daʒ gehôrte

Verse: 11691    ander fünfzic sant sie dar,
Verse: 11692    die nâmen sîn mit güete war.

Verse: 11693    die selben bliben âne leit:
Verse: 11694    die schrift uns hât alsô geseit.

Verse: 11695    er mâlte ouch wie Helîas
Verse: 11696    mit hern Helizêo was

Verse: 11697    und ander sîn undertâne
Verse: 11698    an dem Jordâne,

Verse: 11699    und wie man in den viuregen wagen
Verse: 11700    ûf sach in die lüfte tragen.

Verse: 11701    dô er sînen mantel lieʒ
Verse: 11702    Helizêo und dem gehieʒ

Verse: 11703    von des heilegen geistes gunst
Verse: 11704    daʒ sich wîssagens kunst

Verse: 11705    vürbaʒ an dem hêrren
Verse: 11706    zwîvalt solde mêren.

Verse: 11707       Dar nâch mâlt er an den stein
Verse: 11708    von den edlen küngen zwein,

Verse: 11709    von dem weiden Ezêchiâ
Verse: 11710    und dein milden Josîâ,

Verse: 11711    wie got mit dem engel enbôt
Verse: 11712    Ezêchiâ sînen tôt

Verse: 11713    und in sîn dinc hie ahten hieʒ,
Verse: 11714    daʒ der wîse niht enlieʒ.

Verse: 11715    im kündet sô des boten sage
Verse: 11716    daʒ er an dem næhsten tage

Verse: 11717    an dem lîbe solde sterben.
Verse: 11718    dô sach man in umb riuwe werben,

Verse: 11719    got er umb sîn rîche mant.
Verse: 11720    der süeʒe fürste gegen der want

Verse: 11721    sich heiʒe weinende kêrte.
Verse: 11722    aldâ unser hêrre mêrte

Verse: 11723    sîn craft an dem werden clâr.
Verse: 11724    er gap im frist fünfzehen jâr.

Verse: 11725    daʒ kunde sîn triuwe erreichen,
Verse: 11726    daʒ manʒ geloube, ein zeichen

Verse: 11727    got dô krefteclich begie:
Verse: 11728    die sunne sich ze gemache lie,

Verse: 11729    wann eʒ ûf den âbent zôch:
Verse: 11730    die sach man wider stîgen hôch,

Verse: 11731    irn schîn gar unverborgen
Verse: 11732    bôt sie als an dem morgen,

Verse: 11733    des sie wunneclîche phlac.
Verse: 11734    dô wuohs âne naht ein ander tac.

Verse: 11735       Dar nâch wie her Josîas,
Verse: 11736    des leben vor got geprîset was,

Verse: 11737    der ôstervîre er erdâht
Verse: 11738    gote ze êren, als er brâht

Verse: 11739    die Juden überʒ rôte mer,
Verse: 11740    als sie sie noch vîrent immer mêr:

Verse: 11741    der zweier fürsten leben heileger was
Verse: 11742    dann aller fürsten, dâ von man las,

Verse: 11743    als uns die schrift urkünde gît
Verse: 11744    der künge leben und ir zît.

Verse: 11745    bî den die prophêten
Verse: 11746    gewîssaget hêten

Verse: 11747    unsern sældenbernden tac
Verse: 11748    und unsern wâren tôdes slac:

Verse: 11749    mit kost man die entworfen sach,
Verse: 11750    hern Isâiam, und wie der sprach

Verse: 11751    'seht ein magt ein kint gebirt,
Verse: 11752    Emânuel sîn name wirt.'

Verse: 11753    der name bewîset 'mit uns got.'
Verse: 11754    Achaz der hêrre alsô enbôt.

Verse: 11755    dâ stunt Jeremîas der hêre,
Verse: 11756    der nâch gotes lêre

Verse: 11757    Joachim dem künge sagt
Verse: 11758    daʒ ein wîp und ein magt

Verse: 11759    mit kiuschem lîbe einen man
Verse: 11760    in kindes wîs solt umbevân;

Verse: 11761    dar nâch wie Ezêchias sprach
Verse: 11762    'von êrst und êweclich ich sach

Verse: 11763    besloʒʒen vaste der sælden tor,
Verse: 11764    dâ niht kom în mê ûʒ noch vor.'

Verse: 11765    daʒ uns ist sus boscheinet,
Verse: 11766    die süeʒe muoter er meinet,

Verse: 11767    die uns dâ bî bewîset ist
Verse: 11768    daʒ sie âne mannes mitewist

Verse: 11769    eines sunes genas,
Verse: 11770    die vor und sît doch maget was

Verse: 11771    und immer ist ân ende.
Verse: 11772    ir helfe uns kummer swende.

Verse: 11773       dâ stunt Dâniêl der werde man,
Verse: 11774    als der sîn rede het getân

Verse: 11775    'der welt ein hêrre wirt geborn,
Verse: 11776    des leben dar nâch wirt verlorn.

Verse: 11777    über driu und drîʒic jâr
Verse: 11778    sol er lîden tôdes vâr

Verse: 11779    und über sehs wochen,
Verse: 11780    sô wirt sîn leben gebrochen.'

Verse: 11781    Dar nâch muost ein gemælde gên,
Verse: 11782    die zwelf minner sach man stên

Verse: 11783    prophêten an des sarkes want.
Verse: 11784    ieglîcher het an sîner hant

Verse: 11785    einen brief, dar an geschriben was
Verse: 11786    als von erst sprach Isâias.

Verse: 11787    ir ietslîches funt bevienc
Verse: 11788    als der grœsten rede gienc

Verse: 11789    und traf vil rehte ir mære
Verse: 11790    daʒ ein magt einen sun gebære.

Verse: 11791       an des sarkes ander wende
Verse: 11792    mâlte der genende

Verse: 11793    wie Cyrus, der rîcheit wielt,
Verse: 11794    gotes volc gevangen hielt;

Verse: 11795    wie Zorobâbel mit strîtes rât
Verse: 11796    daʒ volc von im erlôst hât;

Verse: 11797    wie er die bethûs bûwet wider,
Verse: 11798    die Cyrus het gebrochen nider.

Verse: 11799    er mâlte dar unverdroʒʒen
Verse: 11800    waʒ Hester hete besloʒʒen;

Verse: 11801    war umb der künc Aswerus lie
Verse: 11802    sîn êrste wîp die hieʒ Vastie

Verse: 11803    (sît er Mardochêi niftel nam);
Verse: 11804    wie Aman an den galgen kam,

Verse: 11805    dô von zweier hêren ger
Verse: 11806    Mardochêi und Hester

Verse: 11807    der künc Aswerus ledic lieʒ
Verse: 11808    die man die Israhêliten hieʒ;

Verse: 11809    dar nâch wie her Thobîas
Verse: 11810    von einer swalben geblendet was;

Verse: 11811    wie er von sîme kinde
Verse: 11812    wart gesehen der blinde.

Verse: 11813    dar nâch wie vor Jhêrusalêm
Verse: 11814    dem fürsten Holofernem

Verse: 11815    Jûdith daʒ houbt an gewan,
Verse: 11816    daʒ sach man dâ gemâlet stân.

Verse: 11817    Apelles ouch dâ bewîsete,
Verse: 11818    wie Esdra der geprîsete

Verse: 11819    die Babilôn widerwant,
Verse: 11820    die die Juden heten verbrant.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.