TITUS
Ulrich von Eschenbach, Alexander
Part No. 87
Previous part

Chapter: 125  
Mâzêus zieht gegen Alexander


Verse: 10974       Mâzêus huop sich ûf den wec

Verse: 10975    mit den fürsten ellens rîche.
Verse: 10976    man sach sie dem gelîche

Verse: 10977    berc und tal übervarn,
Verse: 10978    als sie strît niht wolden sparn.

Verse: 10979    nû sach man von beiden sîten
Verse: 10980    der fürsten wartman rîten.

Verse: 10981    maniger cleinôt gezirde
Verse: 10982    benam der heide ir wirde.

Verse: 10983    solichen glanz gap ir harnasch,
Verse: 10984    dâ von der bluomen schîn verlasch.

Verse: 10985    sus wâren sie bî huote.
Verse: 10986       nû wolt der hôchgemuote

Verse: 10987    Alexanders schiltgeverte,
Verse: 10988    in strîte der herte,

Verse: 10989    Eufêstiô, der fröiden hagel,
Verse: 10990    von des kraft des jâmers nagel

Verse: 10991    durch süeʒe herze wart getriben,
Verse: 10992    die fröiden blôʒ von im bliben

Verse: 10993    umb ir werden amîsen,
Verse: 10994    die er mit tjoste prîsen

Verse: 10995    an scharphen poinder brâhte;
Verse: 10996    von ir leben alhie der gâhte

Verse: 10997    suochende ûf der warte.
Verse: 10998    an manheit der bewarte

Verse: 10999    ûf eime starken orse saʒ,
Verse: 11000    daʒ daʒ velt mit sprungen maʒ.

Verse: 11001    in dûhte er hæte sich verlegen,
Verse: 11002    sît er niht strîtes hæte gephlegen

Verse: 11003    (ich wæne des was niht lanc,
Verse: 11004    daʒ er in strîte prîs erranc):

Verse: 11005    in twanc strît und senende nôt,
Verse: 11006    daʒ er sich ie gegen der herte bôt.

Verse: 11007    der kam durch tjost geriten hie.
Verse: 11008    nû vernemt ouch wie

Verse: 11009    kam Sêren von Trîbalibôt,
Verse: 11010    dem rehte manheit daʒ gebôt

Verse: 11011    daʒ er durch prîs, durch werde wîp
Verse: 11012    in ritterschefte wâgte den lîp.

Verse: 11013    eʒ kam der wol gefieret
Verse: 11014    ûf die wart mit kost gezieret.

Verse: 11015    sîn helm bôt dâ liehten schîn.
Verse: 11016    an dem wâpenrocke sîn

Verse: 11017    moht man tiure geworhte spehen
Verse: 11018    von tiurem samît, hôrt ich jehen,

Verse: 11019    grüene als ein niuweʒ gras.
Verse: 11020    sîn kovertiur des selben was,

Verse: 11021    dar ûf manger hande tier
Verse: 11022    mit flîʒe geworht, sagt man mir,

Verse: 11023    ouch wâren ûf daʒ selbe cleit
Verse: 11024    von rôtem golde gar durchleit

Verse: 11025    bilde gelîch den frouwen.
Verse: 11026    Eufêstiô muost dô schouwen

Verse: 11027    dem er nie gesach gelîche:
Verse: 11028    Sêren der muotes rîche

Verse: 11029    fuorte in sîner hant ein sper.
Verse: 11030    niuwan strît was sîn ger.

Verse: 11031    Eufêstiô truoc werden lîp.
Verse: 11032    er bestunt man, tier und wîp.

Verse: 11033    als man den swarzen komen sach,
Verse: 11034    in beiden was zesamne gâch.

Verse: 11035    ir beider ors wurden gehurt
Verse: 11036    ûf dem plân durch bluomen furt.

Verse: 11037    der fürsten treffen sô geriet,
Verse: 11038    die tjost sie von irn schilten schiet,

Verse: 11039    von in die vielen ûf daʒ gras.
Verse: 11040    ietweders schaft noch bliben was.

Verse: 11041    sunder der schilte decken
Verse: 11042    sach man sie ir tjost volrecken.

Verse: 11043    sie nâmen den poinder vürbaʒ wît.
Verse: 11044    alsô ergienc ir tjostes strît

Verse: 11045    von ir beider kreften,
Verse: 11046    daʒ die splittern von den scheften

Verse: 11047    hôch ûf gegen den lüften vlugen.
Verse: 11048    von poinders kraft die ros sich smugen,

Verse: 11049    iedoch wart dô der bluomen dach
Verse: 11050    Sêren, den man vallen sach

Verse: 11051    mit einer wunden durch ein arm.
Verse: 11052    man sach gras und grüenen varm

Verse: 11053    den swarzen von Trîbalibôt
Verse: 11054    mit sînem bluote machen rôt.

Verse: 11055    man sach ouch manegen enden
Verse: 11056    den walt mit tjoste swenden

Verse: 11057    von den werden âne betrâgen,
Verse: 11058    die eʒ wol torsten wâgen.

Verse: 11059    von beiden hern ûf der warte
Verse: 11060    sach man ritter vallen harte.

Verse: 11061    dirre verlôs, jener gewan
Verse: 11062    prîs. Eufêstiô kêrte dan.

Verse: 11063    an dem jungen moht man sehen,
Verse: 11064    daʒ ûf in tjost was geschehen.

Verse: 11065    sîn harnasch was alsô zefuort,
Verse: 11066    wa eʒ mit tjoste was geruort,

Verse: 11067    daʒ er anderʒ muoste hân,
Verse: 11068    ob von im strît solde ergân.

Verse: 11069       Sêren der swarze Sarracîn,
Verse: 11070    sîn grüeneʒ cleit gap rôten schîn

Verse: 11071    von des werden bluote.
Verse: 11072    er bleip doch bî strîtes muote.

Verse: 11073    er fuor von dann gegen Darîô,
Verse: 11074    der sîner wunden wart unfrô.

Verse: 11075    sô sprach der swarze heiden
Verse: 11076    'ir wolt von prîse scheiden.

Verse: 11077    wer gesach sich ie sô man verligen?
Verse: 11078    jâ wænt ir slâfende gesigen,

Verse: 11079    daʒ kûm wachende sol geschehen.
Verse: 11080    ir beginnet des die wârheit sehen,

Verse: 11081    daʒ iuch des Kriechen recken
Verse: 11082    beginnent unsanfte erwecken.'

Verse: 11083    der alte wîse ûʒ riuwen sprach
Verse: 11084    'helt, dîner wunden ungemach,

Verse: 11085    daʒ dîn manheit hât erholt,
Verse: 11086    unsanfte daʒ mîn herze dolt.

Verse: 11087    vürder man dich haben mac
Verse: 11088    dann einen der die tjost verlac.

Verse: 11089    wiʒʒe ouch, helt, daʒ dir mîn hant
Verse: 11090    teilet golt und wîte lant;

Verse: 11091    wiʒʒe daʒ ich mit strîtes spil
Verse: 11092    die wunden selber rechen wil.'

Verse: 11093       manic hôchgemuoter degen,
Verse: 11094    der sich durch prîs hete erwegen

Verse: 11095    daʒ er torste gegen vînden rîten
Verse: 11096    menlich nâch wirde strîten,

Verse: 11097    der het der keiser vil aldâ.
Verse: 11098    ze âventiure was in gâ,

Verse: 11099    die sie besunder suochten,
Verse: 11100    der ouch die Kriechen ruochten.

Verse: 11101    von disen wart ze houfe brâht
Verse: 11102    manic tjost mit kraft erdâht

Verse: 11103    alsô mit ponderlîcher vart,
Verse: 11104    des ir prîs gehôhet wart.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.