TITUS
Ulrich von Eschenbach, Alexander
Part No. 86
Previous part

Chapter: 124  
Darius macht ein Friedensangebot


Verse: 10588       die boten kâmen zuo geriten,

Verse: 10589    gegen den der fürste zuht begienc,
Verse: 10590    wirdiclich er sie enphienc;

Verse: 10591    dar nâch al den hêrren sîn
Verse: 10592    sie muosten willekomen sîn.

Verse: 10593    wol manʒ den werden dâ erbôt.
Verse: 10594    sie funden den fürsten in clagender nôt

Verse: 10595    bî dem jâmerbernden rê.
Verse: 10596    daʒ tet den werden boten wê.

Verse: 10597    die hêrren zühteclîche
Verse: 10598    trâten vür den fürsten rîche,

Verse: 10599    dem man vil der tugende jach.
Verse: 10600    Achillas für die andern sprach

Verse: 10601    'hêrre, lât iu niht missehagen
Verse: 10602    ein teil daʒ wir iu sullen sagen.

Verse: 10603    der keiser iu triuwe enboten hât,
Verse: 10604    des in iuwer wirde niht erlât,

Verse: 10605    die volleclich ist worden schîn
Verse: 10606    an iwern gevangen, den friundîn sîn,

Verse: 10607    wann er hât vernomen daʒ,
Verse: 10608    daʒ nie frouwen wurden baʒ

Verse: 10609    noch wirdiclîcher gehalden.
Verse: 10610    solicher triuwen kunnet ir walden.

Verse: 10611    waʒ er von iu hât verlorn,
Verse: 10612    daʒ hât mîn hêrre gar verkorn;

Verse: 10613    durch iuwer hôhe wirdikeit
Verse: 10614    ist er friuntschaft iu bereit

Verse: 10615    und treit gegen iu senften muot.
Verse: 10616    jâ wær er anders mit heres fluot

Verse: 10617    iu bî und mit solicher tât,
Verse: 10618    die strîteclîcheʒ werben hât.

Verse: 10619    ir sæhet in mit sînen scharn
Verse: 10620    in vîndes muote gegen in varn:

Verse: 10621    wann daʒ iuch mîner frouwen tôt
Verse: 10622    gefridet hât von strîtes nôt:

Verse: 10623    iuwer snelleʒ ors Pucivâl
Verse: 10624    sæhe man iuch berc und tal

Verse: 10625    ersprengen und gegen tjoste jagen;
Verse: 10626    des kundet ir iuch niht entsagen,

Verse: 10627    daʒ wiʒʒet, ûf iwern glanzen schilt
Verse: 10628    wære vîntlich tât gezilt,

Verse: 10629    dar zuo alle iuwer schar
Verse: 10630    müesten doln strîtes vâr.

Verse: 10631    daʒ wil mîn hêrre lâʒen
Verse: 10632    und sich strîtes gegen iu mâʒen.

Verse: 10633    alrêst mugt ir gerne leben:
Verse: 10634    iu wil der edle keiser geben

Verse: 10635    sîn tohter ze wîbe,
Verse: 10636    daʒ nie von frouwen lîbe

Verse: 10637    schœner kint geborn wart.
Verse: 10638    mit süeʒer zuht von reiner art

Verse: 10639    ist daʒ minniclîche kint
Verse: 10640    an tugenden balt, an valsche blint,

Verse: 10641    der jâre kranc, an triuwen wîs,
Verse: 10642    sie wirt der kiusche ein berndeʒ rîs.

Verse: 10643    ûf sie ledet der wirde last.
Verse: 10644    mit schœne der sunnen widerglast

Verse: 10645    ist daʒ süeʒe fröiwelîn.
Verse: 10646    jâ muoʒ er immer sælic sîn,

Verse: 10647    dem sô vil êren dâ geschiht,
Verse: 10648    daʒ im ir mündel gruoʒes giht.

Verse: 10649    sol sie werden iuwer wîp,
Verse: 10650    jâ müeʒt ir fröidenbernden lîp

Verse: 10651    immer mit hôher wirde tragen,
Verse: 10652    siht man iuch minne dâ bejagen.

Verse: 10653    dannoch biut iu mîn hêrre mêr.
Verse: 10654    waʒ zwischen Eufrâtes und Frixeô mer

Verse: 10655    geltes bringen alle lant,
Verse: 10656    den hât der werde iu benant.

Verse: 10657    noch sol werden iu dâ bî
Verse: 10658    von Kaucasas und Arâbî

Verse: 10659    goldes drîʒic tûsent phunt.
Verse: 10660    daz lobt iu sîn wârer munt,

Verse: 10661    ob die ordenunge ergê
Verse: 10662    nâch triuwen unde veste bestê.

Verse: 10663    vür rede die wir hân getân
Verse: 10664    wil er hie ze gîsel lân

Verse: 10665    mîn frowen sîn muoter, sînen suon.
Verse: 10666    wolt ir ganze suone tuon,

Verse: 10667    ob man sol der wârheit jehen,
Verse: 10668    so mac iu nimmer baz geschehen

Verse: 10669    an keinem wîbe dann an ir,
Verse: 10670    ob halt die gote nâch ir gir

Verse: 10671    unde nâch ir heilikeit
Verse: 10672    heten wîbes iuch bereit.

Verse: 10673    ouch ist im des ze muote,
Verse: 10674    daʒ er mit grôʒem guote

Verse: 10675    von iu die frowen lœsen wil,
Verse: 10676    der ir habt gevangen vil.

Verse: 10677    ob nû iuwer hôhe geburt
Verse: 10678    der gote sippe hæte begurt,

Verse: 10679    doch solt ir gegen dem guoten
Verse: 10680    billîcher frides muoten

Verse: 10681    und solicher friuntschaft in gewern,
Verse: 10682    als gegen iu kan der guote gern.

Verse: 10683    des wære hêrre nû wol zît.
Verse: 10684    vil fürsten craft im helfe gît.

Verse: 10685    er hât von sîme gebotes craft
Verse: 10686    in harnasch vil volkes brâht,

Verse: 10687    die er verre hât erweget,
Verse: 10688    mit den die waʒʒer sîn beleget.

Verse: 10689    ritter die sich manheit flîʒen,
Verse: 10690    der helme siht man glîʒen

Verse: 10691    und ir vesten gezierten schilde.
Verse: 10692    ûf ouwen und in der wilde

Verse: 10693    sîn craft bedecket überal
Verse: 10694    berc, eben unde tal

Verse: 10695    (daz wiʒʒet) in manger mîle zil.
Verse: 10696    noch siht man alle tage vil

Verse: 10697    der werden zuo im gâhen,
Verse: 10698    die im mit helfe nâhen

Verse: 10699    gar mit werlîchem her
Verse: 10700    an dem lande und ûf dem mer

Verse: 10701    in kielen, kocken, barken.
Verse: 10702    sîn craft beginnet starken.

Verse: 10703    wie daʒ ertrîche volkes treget,
Verse: 10704    daʒ ist ze strîte durch in erweget

Verse: 10705    sunder iuch selben und daʒ iur.
Verse: 10706       Dô sprach der werde Pelliur

Verse: 10707    'ich weiʒ wol ir habt der werden vil.
Verse: 10708    vernemet waʒ ich iu sagen wil.

Verse: 10709    wie sæhe wir anders prîs bejagen,
Verse: 10710    den wir wirdeclîche möhten tragen,

Verse: 10711    wenne daʒ man beginnet sagen
Verse: 10712    daʒ unser einer habe erslagen

Verse: 10713    der iuwern mê dann hundert ?
Verse: 10714    die nâchgeboren des wundert.

Verse: 10715    daʒ wir vil volkes an gesigen
Verse: 10716    mit cleiner craft und ob ligen,

Verse: 10717    daʒ stêt ze loben verrer mêr
Verse: 10718    dann eʒ ergienge mit gelîchem her.

Verse: 10719    doch wil ich sîn rât enphân.'
Verse: 10720       dô wart die frâge von im getân

Verse: 10721    gegen fürsten, die bî im wâren,
Verse: 10722    die ir rede gar verbâren.

Verse: 10723    sie swigen alle stille,
Verse: 10724    sie enwesten niht sînes willen.

Verse: 10725    Permêniô vür sie alle sprach,
Verse: 10726    den man sô gemuoten sach,

Verse: 10727    daʒ baʒ torst sprechen sîn munt,
Verse: 10728    dann im wol reden wære kunt.

Verse: 10729    er sprach 'hêrre, ob ich tar
Verse: 10730    des besten iuch bescheiden gar,

Verse: 10731    waʒ die boten gegen iu werben,
Verse: 10732    daʒ lâʒent niht verterben.

Verse: 10733    die frowen, die iwer gevangen sîn,
Verse: 10734    die lât, hêrre, und nemt von in

Verse: 10735    grôʒen hort, den man iu gît
Verse: 10736    wær daʒ geschehen vor manger zît,

Verse: 10737    sô möht ir hân mêr der habe
Verse: 10738    von den, die sint entrunnen abe

Verse: 10739    und alle tage noch hin komen.
Verse: 10740    sie irren mê dann sie uns fromen.

Verse: 10741    iu biutet eʒ der keiser wol;
Verse: 10742    daʒ iu, hêrre, gevallen sol.

Verse: 10743    grôʒeʒ gelt und manic lant
Verse: 10744    hât er durch suone iu benant:

Verse: 10745    die sult ir lieber âne strît
Verse: 10746    nemen und âne swære zît,

Verse: 10747    die iuwer volc dâ von muoʒ tragen
Verse: 10748    beide verwunt und erslagen.'

Verse: 10749       dô sprach der manheit rîche
Verse: 10750    'ir redent dem gelîche,

Verse: 10751    als ich niht landes hêrre sî.
Verse: 10752    ich wæne doch mir wese bî

Verse: 10753    vil lande, die mir dienest tuont.'
Verse: 10754    Permêniô sprach 'daʒ iʒt mir kunt.

Verse: 10755    ich weiʒ den fürsten ninder leben,
Verse: 10756    dem sô vil lande dienst geben,

Verse: 10757    als sie iu mit willen tuon
Verse: 10758    zwischen Eufrâtes und Histrûn.

Verse: 10759    die selben habt in frides phlege.
Verse: 10760    lât die fremden after wege.

Verse: 10761    in iuwern sinnen sult ir hân
Verse: 10762    die werlt dem keiser guotes gan

Verse: 10763    und ist im irs willen sleht.
Verse: 10764    er hât ze dem sînen reht.

Verse: 10765    in iuwerm muote sâʒet
Verse: 10766    iuwer lant wie ir die lâʒet

Verse: 10767    die wîle ir in dem fremden vart.
Verse: 10768    waʒ ob man iuch dâ heim niht spart

Verse: 10769    und iuwerm lande schaden phlihtet?
Verse: 10770    wes sint die dâ mite berihtet?

Verse: 10771    jâ mac uns misselingen,
Verse: 10772    ê wir die werlt betwingen.

Verse: 10773    mînen rât ich alsô tuo,
Verse: 10774    hêrre, daʒ ir grîftet zuo.

Verse: 10775    wol erʒ iu erbieten kan.
Verse: 10776    eʒ iʒt ouch zît daʒ wir lân

Verse: 10777    strît und harnasch underwegen
Verse: 10778    und mit den süeʒen fröiden phlegen,

Verse: 10779    den tugenthaften wîben,
Verse: 10780    die mit liebe leit vertrîben.'

Verse: 10781       'iuwer rât ist gegen mir alze cluoc.
Verse: 10782    Permêniô wær mir als iu gnuoc,

Verse: 10783    sô wær mir guot für êre.
Verse: 10784    ich volge niht iwer lêre.

Verse: 10785    solichen rât, den mir gît
Verse: 10786    mîn versinneclîche zît;

Verse: 10787    sô stunt ie alsô mîn muot
Verse: 10788    daʒ ich umb êre wolde guot

Verse: 10789    unverzegelîche geben.
Verse: 10790    âne guot ich wolde leben,

Verse: 10791    ê daʒ ich êre enbære
Verse: 10792    und lobes, geloubt der mære.

Verse: 10793    ir heiʒet mich guot für sælde nemen.
Verse: 10794    wie solt daʒ mînem namen zemen?

Verse: 10795    waʒ koufmannes solt ich sîn?
Verse: 10796    solt ich daʒ gelücke mîn

Verse: 10797    umb golt oder schatz geben,
Verse: 10798    deʒ müest ich swechlîche leben.

Verse: 10799    nie niht veiles ich gewan.
Verse: 10800    ir râtent als ein tummer man.

Verse: 10801    sol man dise frouwen lân,
Verse: 10802    daʒ wirt âne gelt getân.

Verse: 10803    gebe ich sie im ze koufen wider,
Verse: 10804    des wurde mîn hôhe wirde nider.

Verse: 10805    wes solt er mir wiʒʒen danc?
Verse: 10806    Permêniô, iuwer rât ist cranc.

Verse: 10807    umb den ich iht erkoufen muoʒ,
Verse: 10808    dem wil ich nimmer dankes gruoʒ

Verse: 10809    umb gekoufte dinc erbieten.
Verse: 10810    der site wil ich mich nieten.'

Verse: 10811       Nû was der rât vil gar vernomen.
Verse: 10812    die boten hieʒ er vür sich komen.

Verse: 10813    er sprach 'ir sult dem keiser sagen,
Verse: 10814    guot willen den ich tragen

Verse: 10815    gegen den gevangen frouwen hân,
Verse: 10816    daʒ hân ich durch reht getân

Verse: 10817    und niht durch den willen sîn.
Verse: 10818    wâ in ist êre worden schîn

Verse: 10819    und nâch irm leide guot gemach,
Verse: 10820    mit mînem willen daʒ geschach.

Verse: 10821    man sol mich gegen den frouwen
Verse: 10822    niht in haʒʒe schouwen.

Verse: 10823    waʒ zornes solt ich gegen in hân?
Verse: 10824    nû füeren sie niht harnasch an.

Verse: 10825    wer solde wesen vînt der süeʒen,
Verse: 10826    die swære ringen und kummer büeʒen?

Verse: 10827    süeʒe wer die süeʒen tragen.
Verse: 10828    ich wil in nimmer widersagen,

Verse: 10829    niht wann den die sturmes phlegen,
Verse: 10830    gegen den ich mich hân bewegen.

Verse: 10831    die frouwen twingen sunder swert.
Verse: 10832    ir süeʒeʒ twingen daʒ ist wert.

Verse: 10833    in ir dienste wil ich wesen,
Verse: 10834    ân ir hulde wolt ich niht genesen.

Verse: 10835    ich wil arger tât gegen in geswîgen:
Verse: 10836    mîn sælde solde des sîgen,

Verse: 10837    ob immer wurde von mir gehôrt
Verse: 10838    gegen den süeʒen argeʒ wort.

Verse: 10839    die reinen haben wirde vil,
Verse: 10840    ir êre ich immer breiten wil

Verse: 10841    durch die, gegen der ich dienst trage.
Verse: 10842    jâ ist daʒ mîn meiste clage

Verse: 10843    und beswæret mîn gemüete,
Verse: 10844    daʒ süeʒer wîbe güete

Verse: 10845    sich kan von mir verren.
Verse: 10846    daʒ muoʒ mir immer werren

Verse: 10847    und mînen fröiden swære sîn,
Verse: 10848    doch hân ich lônes trôst ze in.

Verse: 10849    nâch mîme tôde der keiser ranc.
Verse: 10850    des dar an zwîvelt mîn gedanc,

Verse: 10851    ob er willeclîche
Verse: 10852    mir al der werlde rîche

Verse: 10853    âne strît wolde abe gestên,
Verse: 10854    daʒ eʒ nâch suone möhte ergên.

Verse: 10855    die rehten wârheit ich enweiʒ.
Verse: 10856    an mînen schaden er sich ie fleiʒ.

Verse: 10857    daʒ ist dicke worden schîn,
Verse: 10858    wann er vil der hêrren mîn

Verse: 10859    sîn golt, sîn helfe ûf mich bôt,
Verse: 10860    daʒ sie mich solden slahen tôt.

Verse: 10861    alsô kunder ûf mich werben.
Verse: 10862    des muoʒ sîn lop verterben;

Verse: 10863    alsô er heimelîchen
Verse: 10864    wolde mich erslîchen.

Verse: 10865    als ein heimelich mordære
Verse: 10866    warp er mîne swære,

Verse: 10867    der in stabe treit ein swert;
Verse: 10868    alsô er mînes tôdes gert,

Verse: 10869    niht als ein offenbârer vînt.
Verse: 10870    dâ von sîn êre gekrenket sint.

Verse: 10871    wurdeʒ nû alsô getân,
Verse: 10872    daʒ ich fride wolde hân,

Verse: 10873    alzehant begunner jehen
Verse: 10874    eʒ wær vor vorhten geschehen.

Verse: 10875    ir bietent mir mîn selbes lant,
Verse: 10876    hât er iuch her alsô gesant:

Verse: 10877    die zwischen den zwein waʒʒern sin,
Verse: 10878    ich hânʒ dâ vür sie wesen mîn,

Verse: 10879    wann ich sie nû erstriten hân.
Verse: 10880    kunnet ir iuch niht verstân

Verse: 10881    daʒ wir ûf den selben ligen?
Verse: 10882    der im ist vil gar verzigen.

Verse: 10883    sît er des giht sie wesen sîn,
Verse: 10884    sô kom er her und trîb mich hin.

Verse: 10885    vür grôʒe crancheit man daʒ giht,
Verse: 10886    getar er daʒ sîne wern niht.

Verse: 10887    zwâr er biutet mir êren vil !
Verse: 10888    sîn tohter er mir geben wil,

Verse: 10889    die er Mâʒêô hete gelobt,
Verse: 10890    der ist sîn man: ich wæne er tobt.

Verse: 10891    rîtent wider und sagt im daʒ,
Verse: 10892    alleʒ waʒ er ie besaʒ,

Verse: 10893    dem er ze fürsten was erkorn
Verse: 10894    und daʒ er nû hât verlorn,

Verse: 10895    daʒ sol ich lîhen unde geben.
Verse: 10896    ir solt im sagen daʒ sîn leben

Verse: 10897    stêt in mîner hende,
Verse: 10898    des ich mit craft in phende.'

Verse: 10899       Urloup die boten nâmen,
Verse: 10900    ze dem keiser sie wider kâmen.

Verse: 10901    die wîsen âne verdrieʒen
Verse: 10902    hôrte man entslieʒen

Verse: 10903    des Kriechen willen unde wort,
Verse: 10904    als sie sie heten vernomen dort.

Verse: 10905    der trûrige an fröiden laʒ
Verse: 10906    mitten ûf der ouwen saʒ,

Verse: 10907    von fürsten was umb in gedranc.
Verse: 10908    die ougen er gegen berge swanc.

Verse: 10909    er sprach 'du weist wol, hœhster got,
Verse: 10910    daʒ ich von deheiner vorhte nôt

Verse: 10911    ze im nâch fride sante,
Verse: 10912    wann daʒ michs triuwe ermante.

Verse: 10913    nû kan eʒ im versmâhen.
Verse: 10914    eineʒ lît mir nâhen:

Verse: 10915    entgilt sîn ieman dann er und ich,
Verse: 10916    almeistic daʒ beswæret mich.

Verse: 10917    sît er niht strîtes wil enpern,
Verse: 10918    des sul wir in mit vollen wern.

Verse: 10919    mir ist doch fröide entsliffen.
Verse: 10920    jâmer mich hât begriffen,

Verse: 10921    ich enruoch waʒ mir mac geschehen:
Verse: 10922    des hât ein sterben mir verjehen.

Verse: 10923    nû mane ich mâge unde man
Verse: 10924    daʒ sie zagheit wellen lân.

Verse: 10925    Mâzêê, friunt von Babilôn,
Verse: 10926    an dir man prîses ist gewon,

Verse: 10927    den dîn hant erworben hât
Verse: 10928    in strît mit ellenbernder tât,

Verse: 10929    durch daʒ ich fröiden urhap
Verse: 10930    mîn tohter dir ein maget gap,

Verse: 10931    an der du süeʒes geltes lôn
Verse: 10932    vindes und vil fröiden won.

Verse: 10933    mit dir var Bozorgorgias,
Verse: 10934    der ie der vînde schûr was,

Verse: 10935    der leben sîn strîtes milde hant
Verse: 10936    krefteclich hât zertrant,

Verse: 10937    und von Perciâ Bachidis,
Verse: 10938    an dem ich triuwen bin gewis,

Verse: 10939    die er ie truoc mit ellen:
Verse: 10940    sîn tât kan prîs ersnellen,

Verse: 10941    des man sîner wirde giht
Verse: 10942    er kan der vînde schônen niht,

Verse: 10943    wâ man in mit den sînen
Verse: 10944    in strîte sach erschînen;

Verse: 10945    ouch sol der fürste von Macêt,
Verse: 10946    des lop in hôher wirde stêt

Verse: 10947    und noch stîget alle tage
Verse: 10948    von sînem prîses bejage.

Verse: 10949    Lîsias die manheit sîn
Verse: 10950    lâʒe an vînden werden schîn.

Verse: 10951    Sêren von Trîbalibôt,
Verse: 10952    des manheit ie den vînden bôt

Verse: 10953    unverzegelîchen strît:
Verse: 10954    sîn lop ist virre unde wît

Verse: 10955    in der werlde worden,
Verse: 10956    prîs kan er horden;

Verse: 10957    mit sîner ellenthafter hant
Verse: 10958    er die vînde strîtes mant.

Verse: 10959    Ambiôn von Tenabrî,
Verse: 10960    dem rehte manheit was ie bî,

Verse: 10961    der brâhte ie unverzagete her
Verse: 10962    gegen den vînden ze wer.

Verse: 10963    ir sehse mit einander
Verse: 10964    zogt gegen Alexander,

Verse: 10965    ir sît dâ wol ze mâʒe
Verse: 10966    daʒ ir im enget die strâʒe,

Verse: 10967    die durch daʒ gebirge gêt.
Verse: 10968    iuwer manheit wol gelîche stêt,

Verse: 10969    als ich ir ahte prüeven kan.
Verse: 10970    ir habt wol drîʒic tûsent man,

Verse: 10971    ze îser sint sie wol beriht.
Verse: 10972    gedenket an lop, des man iu giht,

Verse: 10973    und daʒ ir sît an prîse quec.'



Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.