TITUS
Ulrich von Eschenbach, Alexander
Part No. 85
Previous part

Chapter: 122  
Darius' Ehefrau stirbt


Verse: 10283       Vor irn strîte der vierde tac
Verse: 10284    liehtes schînes gar verphlac.

Verse: 10285    die sunne ir lieht verbarc.
Verse: 10286    der tac bôt nebel vinster starc,

Verse: 10287    dô ir reise von dem gevilde
Verse: 10288    geriet in ein gebirge wilde,

Verse: 10289    daʒ sie dûhte alsô hôch,
Verse: 10290    daʒ eʒ den lüften gelîch zôch.

Verse: 10291    ir ungeverte wart dâ grôʒ.
Verse: 10292    in dem gebirge ein waʒʒer flôʒ,

Verse: 10293    Arênôsa heiʒet eʒ nâch dem grieʒ.
Verse: 10294    lûter ist eʒ mit snellem flieʒ,

Verse: 10295    über grôʒe steine tuot eʒ val
Verse: 10296    vaste gegen Erbelâ ze tal.

Verse: 10297    nû wolt sich an dem selben tage
Verse: 10298    jâmer mêren mit clage

Verse: 10299    und manegem herzen bringen leit,
Verse: 10300    mit riuwe daʒ der tac versneit

Verse: 10301    und im wernden kummer stieʒ.
Verse: 10302    Carafilîen niht erlieʒ

Verse: 10303    ir triwe, sie wolde swære haben.
Verse: 10304    ir herze in jâmer was begraben,

Verse: 10305    der sich mêrt von tage ze tage.
Verse: 10306    man vernam der süeʒen stæte clage.

Verse: 10307    umb daʒ sie enbern muoste
Verse: 10308    irs hêrren, ir fröide wuoste,

Verse: 10309    dar zuo umb liute unde lant
Verse: 10310    wart sie solicher swære ermant:

Verse: 10311    von irn triuwen daʒ geschach,
Verse: 10312    des tages der tôt ir herze brach.

Verse: 10313    die werlt daʒ von fröiden schiet.
Verse: 10314    der tac dem wol gelîche geriet,

Verse: 10315    dô die süeʒe reine art
Verse: 10316    Herzeloyde der werlde benomen wart:

Verse: 10317    die lac an clagenden triuwen tôt,
Verse: 10318    Carafilîe leit die selbe nôt.

Verse: 10319    dô die süeʒe verscheiden was,
Verse: 10320    in der gezelde palas

Verse: 10321    gâben die fürstinne clagenden schal,
Verse: 10322    der mit jâmers dône erhal

Verse: 10323    vaste ûf dem velde
Verse: 10324    und in der fürsten gezelde.

Verse: 10325    daʒ velt mit jâmer wart gerîchet,
Verse: 10326    daʒ sich dem niht gelîchet.

Verse: 10327    sie clagten ir kiusche, ir schœne, ir tugent,
Verse: 10328    ir triuwe, ir süeʒe werde jugent,

Verse: 10329    der daʒ reine wîp vil het.
Verse: 10330    ir muoter ûf dem velde tet

Verse: 10331    clagen mit jâmers ungedult,
Verse: 10332    des ir herze was erfult.

Verse: 10333       Dô Alexander het vernomen
Verse: 10334    daʒ die frouwe was von lîbe komen,

Verse: 10335    des hêrren fröide gar gelac.
Verse: 10336    vor leide er alsô sêre erschrac,

Verse: 10337    als ob er hete vernomen mære
Verse: 10338    daʒ ab lîbe worden wære

Verse: 10339    sîn muoter und die swester sîn.
Verse: 10340    sîn triuwe fuogte im die pîn,

Verse: 10341    man sach den valsches einen
Verse: 10342    alsô tiure weinen,

Verse: 10343    (als mir der sage meister jach),
Verse: 10344    daʒ es dem keiser gebrach,

Verse: 10345    den man doch kôs in swære,
Verse: 10346    dô er hort die leiden mære.

Verse: 10347       Alexander ze den frouwen saʒ.
Verse: 10348    mit clage er jâmer aldâ maʒ

Verse: 10349    der selden ê ist geschehen
Verse: 10350    von sô frechem fürsten, hœr ich jehen.

Verse: 10351    eʒ machte sîn wirdiclîche tugent,
Verse: 10352    die sîn edle süeʒe jugent

Verse: 10353    des mit barmder senfte twanc,
Verse: 10354    daʒ er alsô mit jâmer ranc.

Verse: 10355    er clagte daʒ minneclîche wîp,
Verse: 10356    ir leben, irn tugentbernden lîp,

Verse: 10357    ir schœne, der niht glîche wac,
Verse: 10358    dar umb er ir mit huote phlac.

Verse: 10359    eʒ hete der edle daʒ ervorht,
Verse: 10360    ob sie ir kiusche wurde entworht

Verse: 10361    durch ir schœne mit gewalde,
Verse: 10362    daʒ daʒ sîn êre valde.

Verse: 10363    ich wæne daʒ im daʒ mêre
Verse: 10364    brâhte wirde und êre,

Verse: 10365    sô wir der wârheit sullen jehen,
Verse: 10366    den ob dâ iht anders wære geschehen.

Verse: 10367    mit den frowen gevangen wart
Verse: 10368    ein knappe an triuwen wol bewart.

Verse: 10369    er was von Tyriâ geborn.
Verse: 10370    der edle was dar zuo erkorn,

Verse: 10371    daʒ er wære ir kamerære.
Verse: 10372    mich hât beriht daʒ mære,

Verse: 10373    daʒ der triuwen rîche kneht
Verse: 10374    zwischen den beinen wære sleht,

Verse: 10375    als man dâ noch vindet edle kint,
Verse: 10376    die ze phlege vor den frouwen sint.

Verse: 10377    der knappe sich von dannen stal,
Verse: 10378    gegen dem keiser er sîn reise hal,

Verse: 10379    der getriuwe sich jâmers fleiʒ,
Verse: 10380    gewant und hâr er von im reiʒ,

Verse: 10381    sîn ougen wârn von weinen rôt.
Verse: 10382    der edle leit von jâmer nôt.

Verse: 10383       Dô er vür den keiser kam,
Verse: 10384    der wart an hôhem muote lam,

Verse: 10385    dô er des boten wart gewar,
Verse: 10386    des antlitze bedect sîn hâr,

Verse: 10387    und dô im von den ougen flôʒ
Verse: 10388    der zeher regen, der in begôʒ.

Verse: 10389    der hêrre ûz jâmers site sprach
Verse: 10390    'ôwê mir immer unde ach!

Verse: 10391    dîn jâmer und dîn weinen
Verse: 10392    wil mir niht guot bescheinen.

Verse: 10393    swære und angest eʒ mir gît.
Verse: 10394    lâ hœren, sage bî der zît

Verse: 10395    jâmer, den ich vernemen sol,
Verse: 10396    des doch mîn senedeʒ herze ist vol.

Verse: 10397    ist mir noch inder sælde bî,
Verse: 10398    dîn kunft wil mich der machen frî.

Verse: 10399    wont mir noch inder fröide mite,
Verse: 10400    die wilt du mit jâmers site

Verse: 10401    hiute an mir ersterben
Verse: 10402    und wernde pîn ûf mich erben.

Verse: 10403    des ich unz her mit riuwen phlac,
Verse: 10404    kein leit sich dem gelîchen mac,

Verse: 10405    des mir nû dîn kunft vergiht.
Verse: 10406    vor scham tar ich gereden niht'.

Verse: 10407    dô sprach der bote wolgezogen
Verse: 10408    'nie fürstinne wart sô wol gephlogen

Verse: 10409    noch frouwen deheine:
Verse: 10410    nâch êren ich eʒ meine.

Verse: 10411    beide naht und ouch den tac
Verse: 10412    mit grôʒer wirde man ir phlac.

Verse: 10413    iwer muoter und ander gevangen
Verse: 10414    sie endarf des halben niht belangen.

Verse: 10415    er hât solich wirde an sie geleit,
Verse: 10416    daʒ ich ze sagen niht bin bereit,

Verse: 10417    des mich twinget jâmers nôt:
Verse: 10418    hêrre, mîn frouwe die ist tôt.'

Verse: 10419       Dô der keiser daʒ vernam,
Verse: 10420    sô gar er von kreften kam,

Verse: 10421    in dem gezelde viel er nider.
Verse: 10422    sus wielz er ûf unde nider.

Verse: 10423    jæmerlîcher swære er phlac.
Verse: 10424    iezunt die ougen, schiere den nac

Verse: 10425    sach man den alten werden
Verse: 10426    bliuwen ûf die erden.

Verse: 10427    sîn zimelîche grâwe hâr
Verse: 10428    wurden mit stoube bedecket gar.

Verse: 10429    sus clagt er die mære
Verse: 10430    mit jæmerlîcher swære,

Verse: 10431    daʒ die frouwe was verscheiden.
Verse: 10432    lûte schrei der heiden

Verse: 10433    'wer gevriesch ie sô grôʒen schaden,
Verse: 10434    als nû ein tôt wil ûf mich laden

Verse: 10435    und sich dringen in mîn herze ?
Verse: 10436    ein bitter wernder smerze

Verse: 10437    der wil mîn fröide slinden.
Verse: 10438    nû sol mîn leben swinden.

Verse: 10439    ôwê mir jâmers bernde nôt,
Verse: 10440    die mir gît der reinen tôt,

Verse: 10441    der nû hât von lîbe brâht
Verse: 10442    des mir ze fröiden was erdâht,

Verse: 10443    ein wîp mit zuht, mit süeʒer tugent.
Verse: 10444    ir stætikeit, ir reine jugent

Verse: 10445    brâht mir wunneclîcheʒ leben,
Verse: 10446    des mich ir tôt nû wil begeben.

Verse: 10447    nie fürste hât sô vil verlorn,
Verse: 10448    der in der werlde ie wart geborn:

Verse: 10449    fröide und minniclich gemach,
Verse: 10450    des mir ir süeʒer lîp verjach

Verse: 10451    und ir wirdic wîplich güete,
Verse: 10452    der vil an ir erblüete.

Verse: 10453    wer sol mir daʒ vürbaʒ bieten?
Verse: 10454    des muoʒ ich mich mangels nieten.

Verse: 10455    ich sol an wîbes armen
Verse: 10456    vürbaʒ niht mê erwarmen.

Verse: 10457    an ir mir schœne niht gebrach,
Verse: 10458    in ir triwen ich mich ersach

Verse: 10459    als in liehtem spiegelglase.
Verse: 10460    nû hât ir tôt sterbens mâse

Verse: 10461    durch mîn herze geschrôten.
Verse: 10462    west ich wær eʒ von den goten,

Verse: 10463    daʒ sie sie heten mir benomen;
Verse: 10464    möhte kein list mich gefromen,

Verse: 10465    daʒ sie her nider kæmen,
Verse: 10466    nieman möht mir daʒ benemen,

Verse: 10467    sie müesten von mir lîden nôt,
Verse: 10468    daʒ ander risen noch Memrôt

Verse: 10469    in geworhten nie sô wê.
Verse: 10470    ich was ir undertâne ê.

Verse: 10471    mêr êren müeʒen sie enbern,
Verse: 10472    ich wil sie niuwan haʒʒes wern.

Verse: 10473    alle ir heilikeit in niht tugen
Verse: 10474    daʒ sie mich iht ergetzen mugen

Verse: 10475    sô unvergetzlîcher verlust.
Verse: 10476    mir swillet herze unde brust

Verse: 10477    in jâmers bernder swære.'
Verse: 10478    der fürste mit ungebære

Verse: 10479    clagte und quelte sînen lîp
Verse: 10480    umb daʒ reine erstorben wîp,

Verse: 10481    lûte schrei er wâfen.
Verse: 10482    die fürsten begunden in strâfen.

Verse: 10483    sie jâhen er solt sich mâʒen
Verse: 10484    solicher clage und die lâʒen.

Verse: 10485    michel was des volkes kradem.
Verse: 10486    Darîus in ein heimelich gadem

Verse: 10487    den boten mit im fuorte.
Verse: 10488    ein sunder swære in ruorte,

Verse: 10489    als er dem boten dâ verjach.
Verse: 10490    der fürste ûʒ jâmers siten sprach.

Verse: 10491       'Mîn frowe der wirde krône
Verse: 10492    truoc mit tugenden schône.

Verse: 10493    ir schœne den fürsten des betwanc
Verse: 10494    daʒ er ân der süeʒen danc

Verse: 10495    sich dâ minne hât gewert.
Verse: 10496    die vorhte mîn herze hât versêrt

Verse: 10497    und ist mir vor allem ungemach,
Verse: 10498    daʒ mir zer welde ie geschach.

Verse: 10499    mit willen hât sies niht verjehen,
Verse: 10500    eʒ ist ân irn danc geschehen,

Verse: 10501    ob er ir bî hât gelegen:
Verse: 10502    dâ von sie lebens muost verphlegen.'

Verse: 10503    der bote sprach 'vür wâr
Verse: 10504    ich daʒ wol bewern tar:

Verse: 10505    dô unser unsælde alsô ergienc,
Verse: 10506    daʒ er mîne frouwen vienc;

Verse: 10507    des tages er die reinen sach
Verse: 10508    und nimmer mê unz daʒ geschach,

Verse: 10509    daʒ daʒ süeʒe wîp verfuor,
Verse: 10510    die uns fröide machet muor:

Verse: 10511    ouch siht man in in jâmer clagen,
Verse: 10512    (daʒ ich vür wâr getar wol sagen),

Verse: 10513    als vor im in solicher nôt
Verse: 10514    alle sîn friunt lægen tôt.'

Verse: 10515    dô er in alsô hôrte sagen,
Verse: 10516    den keiser begunde zwîvel jagen.

Verse: 10517    er vorht dâ wær et friuntschaft bî,
Verse: 10518    der sie doch beide wâren frî.

Verse: 10519    dâ was nieman wann sie beide.
Verse: 10520    der knappe bôt sich ze dem eide:

Verse: 10521    des er mit wârheit dô verjach,
Verse: 10522    ûf den goten daʒ geschach.

Verse: 10523    dâ mit er in der swære erlôst.
Verse: 10524    eʒ was im ouch ein sunder trôst

Verse: 10525    under andern sînen leiden,
Verse: 10526    daʒ sie kiusche was verscheiden.

Verse: 10527    er begunde lop den goten geben,
Verse: 10528    die hende ûf gegen berge heben

Verse: 10529    mit flieʒenden ougen gegen den lüften.
Verse: 10530    in jâmer sprach er mit siuften

Verse: 10531    'hôher schepher aller dinge,
Verse: 10532    mîn gebet ich gegen dir bringe.

Verse: 10533    waʒ gote sîn, die helfe hân,
Verse: 10534    und mîner lande gote ich man

Verse: 10535    daʒ sie mir und den mînen
Verse: 10536    helflich wellen erschînen,

Verse: 10537    daʒ wir gewaltic unser lant
Verse: 10538    haben, des sî ir güete ermant.

Verse: 10539    ob daʒ alsô niht wesen sol,
Verse: 10540    sô gan ich nieman alsô wol

Verse: 10541    als dem unverzagten man,
Verse: 10542    der zuht mit wirde uoben kan:

Verse: 10543    daʒ ist an den gevangen sîn
Verse: 10544    volleclîchen worden schîn.'

Verse: 10545       der alte fürste getriuwe
Verse: 10546    leit mit jâmer riuwe.

Verse: 10547    eʒ was der senfte keiser
Verse: 10548    vor clage worden heiser.

Verse: 10549    frides het er vor gegert,
Verse: 10550    des Alexander in niht wert.

Verse: 10551    wie er nû wær wol bereit
Verse: 10552    mit volke ze strîtes arbeit,

Verse: 10553    sînen zorn er senften began
Verse: 10554    durch daʒ sîn vînt, der junge man,

Verse: 10555    die gevangen sô wirdiclîchen het
Verse: 10556    unde alle tage tet

Verse: 10557    êre wâ er kunde.
Verse: 10558    der reine gemuote begunde

Verse: 10559    daʒ in sîn ahte nemen,
Verse: 10560    in solt dar friuntschaft wol gezemen:

Verse: 10561    doch durch deheine vorhte,
Verse: 10562    des Kriechen wirde eʒ worhte.

Verse: 10563    sînen rât der fürste besprach,
Verse: 10564    ze den er triuwen sich versach.

Verse: 10565    dô er sînen willen sagte,
Verse: 10566    etslîchen eʒ behagte,

Verse: 10567    sumelîchen eʒ misseviel,
Verse: 10568    die wolden uoben strîtes spil.

Verse: 10569    der rât nâch sinnen wart getân,
Verse: 10570    als ich iu wol gesagen kan.

Verse: 10571    ûf die vart man boten kôs
Verse: 10572    zehen fürsten valsches lôs.

Verse: 10573    die wâren missewende frî,
Verse: 10574    in wonte sinne und manheit bî.

Verse: 10575    Achillas hieʒ der eine,
Verse: 10576    dem die andern gemeine

Verse: 10577    von Galâciâ dem zarten
Verse: 10578    solden gar gewarten.

Verse: 10579    sô in die rede bevolhen wart,
Verse: 10580    die wîsen sich huoben ûf die vart.

Verse: 10581    dem Macedô nû botschaft kam.
Verse: 10582    ob er die niht mit willen nam

Verse: 10583    und ob ir in niht genüeget,
Verse: 10584    sie het sich doch wol gefüeget.

Verse: 10585    kunder sie niht wol enphân,
Verse: 10586    niht vür wîsheit ich daʒ hân,

Verse: 10587    ich wîse eʒ sînen frechen siten.



Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.