TITUS
Ulrich von Eschenbach, Alexander
Part No. 83
Previous part

Chapter: 119  
Epilog


Verse: 10209       Der fürste sich alsô bedâht,
Verse: 10210    dannoch vor tage mitternaht

Verse: 10211    hieʒ er ûf brechen sîn gezelt.
Verse: 10212    aldâ rûmten sie daʒ velt.

Verse: 10213    gegen der ouwe er ouch reise phlac,
Verse: 10214    dâ Darîus mit samenunge lac.

Verse: 10215       daʒ dirte buoch hât ende.
Verse: 10216    Jhêsu mir helfe sende,

Verse: 10217    daʒ ich sunder missehagen
Verse: 10218    daʒ vierde mit sinnen müeʒe sagen:

Verse: 10219    der mich dîn craft bereite,
Verse: 10220    dir ze lobe ich dise rede breite,

Verse: 10221    daʒ sich nie kunde verliesen,
Verse: 10222    man muost eʒ kreftic kiesen

Verse: 10223    an juden und an heiden,
Verse: 10224    die des niht sîn ûʒ gescheiden,

Verse: 10225    sie nemen helfe und craft von dir,
Verse: 10226    wie doch des ungelouben gir

Verse: 10227    ir herze habe beseʒʒen,
Verse: 10228    daʒ sie dîn vergeʒʒen

Verse: 10229    und dîner wunder wellen
Verse: 10230    und ze dem helfelôsen sich gesellen.

Verse: 10231    ditz mære vert her unde dar,
Verse: 10232    iezunt frô, schiere des bar,

Verse: 10233    kurze fröide eʒ mêret,
Verse: 10234    die eʒ schiere mit jâmer rêret;

Verse: 10235    reht urkünde eʒ uns gît
Verse: 10236    dirre werlde unstæte zît.

Verse: 10237    süeʒer got, nû hilf uns dar
Verse: 10238    dâ unzergenclich sint dîn jâr,

Verse: 10239    dâ stæte fröide dîn güete birt.
Verse: 10240    daʒ wir des werden iht verirt,

Verse: 10241    des hilf uns Jhêsu guoter
Verse: 10242    durch Marîam, dîn süeʒe muoter,

Verse: 10243    der gnâde uns helfe nie bevilt:
Verse: 10244    sie was ie und ist der sünder frideschilt.




Book: 4  
4. Buch

Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.