TITUS
Ulrich von Eschenbach, Alexander
Part No. 80
Previous part

Chapter: 104  
Alexander plant den weiteren Feldzug


Verse: 9897       Alexander ungespart
Verse: 9898    gegen Memphî tet sîn widervart

Verse: 9899    ze der houbtstat in Êgiptô,
Verse: 9900    dâ er mit sînen liuten dô

Verse: 9901    etslîche tage durch ruowe was.
Verse: 9902    dâ truoc ein crône Zorcas,

Verse: 9903    der vor Issôn wart erslagen.
Verse: 9904    nû hôrte Alexander sagen

Verse: 9905    daʒ der keiser in kurzer zît
Verse: 9906    wolde mit im haben strît,

Verse: 9907    und daʒ er læge in glanzem schouwe
Verse: 9908    ûf Erbelâ der ouwe,

Verse: 9909    und daʒ man sæch in breitem blicke
Verse: 9910    waʒʒer lant mit roten dicke,

Verse: 9911    daʒ berc und tal was belegt,
Verse: 9912    als die sîn kraft het erwegt

Verse: 9913    und mit brieven mohte besenden
Verse: 9914    in den landen allen enden

Verse: 9915    (gebûre von dem phluoge
Verse: 9916    was mit im genuoge,

Verse: 9917    alde junge und cleine kinder);
Verse: 9918    daʒ gewâfente merrinder

Verse: 9919    vil werhafter karchen zügen;
Verse: 9920    vil helfante die bercvrit trüegen;

Verse: 9921    olbenten, kemmel grôʒen solt
Verse: 9922    durch daʒ gebirge hæten geholt;

Verse: 9923    und daʒ er hæte drîstunt mê
Verse: 9924    liute ze strîte danne ê.

Verse: 9925       Dô Alexander dise wort
Verse: 9926    und die mære hete gehôrt,

Verse: 9927    er sprach 'ir leide Sarracîn!
Verse: 9928    wâ mugen die lant alle sîn,

Verse: 9929    dâ sie sint unz her gewesen!
Verse: 9930    ich sach ir wênic doch genesen

Verse: 9931    vor Issôn, dâ sie wurden erslagen.
Verse: 9932    joh wæn ich sie hie die acker tragen,

Verse: 9933    als sie tuon mit uns daʒ korn.
Verse: 9934    wâ ir ê einer ist verlorn,

Verse: 9935    dâ sint drî wider komen.
Verse: 9936    ich hân dem gelîcheʒ ê vernomen,

Verse: 9937    dô Hercules mit Anthêô vaht,
Verse: 9938    wann er den ze der erden brâht,

Verse: 9939    so wuohs im kraft drîstunt mê,
Verse: 9940    dann er ir het gehabt ê

Verse: 9941    idra heiʒet ein freislich wurm,
Verse: 9942    gegen dem tet er ouch strîtes sturm:

Verse: 9943    daʒ houbt er von dem wurme sluoc,
Verse: 9944    dar nâch er driu hin wider truoc:

Verse: 9945    doch der fürste an im gesigt.
Verse: 9946    den verfluohten daʒ gelîche wigt.

Verse: 9947    ob sie der walt noch kunde blüen,
Verse: 9948    wir soln sie doch mit strîte müen.'

Verse: 9949       er wolt gen Gâzâ sîn gevarn:
Verse: 9950    daʒ muost er durch die mære sparn.

Verse: 9951    dar umb er in Memphis bleip
Verse: 9952    sîne brieve er sô hin schreip,

Verse: 9953    fürsten die er hete gelâʒen dort,
Verse: 9954    wann sie der schrifte wort

Verse: 9955    mit der botschaft vernæmen,
Verse: 9956    daʒ sie âne sûmen kæmen.

Verse: 9957    die frowen sie solden bringen mite
Verse: 9958    und der phlegen nâch zühte site:

Verse: 9959    wurde der deheine umb ein hâr
Verse: 9960    betrüebet und wurd er des gewar,

Verse: 9961    die besten müesten im daʒ leben
Verse: 9962    vür daʒ leit ze phande geben.

Verse: 9963    in Memphî er sich bereite
Verse: 9964    ze strîtes arbeite.

Verse: 9965    fürsten den man manheit jach,
Verse: 9966    ietslîchem er sunderrote sprach,

Verse: 9967    daʒ die næmen sînes vanen war
Verse: 9968    und den vînden buten vâr.

Verse: 9969    der fürste menlich herze truoc.
Verse: 9970    sîn sinne wârn ze strîte cluoc,

Verse: 9971    gegen den vînden sîn gemüete scharf:
Verse: 9972    wol des ein ietslich fürste bedarf

Verse: 9973    daʒ er kunne sîn sinne wetzen
Verse: 9974    ûf die sich gegen im setzen

Verse: 9975    im kâmen alle tage boten
Verse: 9976    wie sich mêrten des keisers roten,

Verse: 9977    daʒ er hete wâren zil gegeben,
Verse: 9978    als er den strît wolde heben.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.