TITUS
Ulrich von Eschenbach, Alexander
Part No. 79
Previous part

Chapter: 104a  
Der Amonstempel


Verse: 9785       Nû was er komen in daʒ lant,
Verse: 9786    dem nie frühte wart bekant

Verse: 9787    weder von touwe noch von regen;
Verse: 9788    man muoʒ noch bûwes dâ verphlegen.

Verse: 9789    Libiâ stæte von hitze brüet.
Verse: 9790    des landes dürre die lüfte müet.

Verse: 9791    er vant dâ boum, loup noch gras
Verse: 9792    noch waʒʒer, niwan sant dâ was.

Verse: 9793    wâ die sunne ûf den gleiʒ
Verse: 9794    mit schîn, dâ wart er alsô heiʒ,

Verse: 9795    wenne sô ein wintsprût kam,
Verse: 9796    manegem er sîn leben nam,

Verse: 9797    wann in der wint ûf fuorte.
Verse: 9798    wa er ros oder liute ruorte,

Verse: 9799    mit hitze er die sô an geriet,
Verse: 9800    daʒ er sie tôt von leben schiet.

Verse: 9801    sie muosten dô swære und angest haben.
Verse: 9802    mangen sach man sich begraben

Verse: 9803    vor hitze in dem sande,
Verse: 9804    der doch ze tôde verbrande.

Verse: 9805    welchem der sant kam in den munt,
Verse: 9806    des grieʒes hitze in sô verwunt,

Verse: 9807    daʒ er in mit bluote verdöute.
Verse: 9808    der tôt daʒ volc dâ ströute

Verse: 9809    vaste ze der erden.
Verse: 9810    der stoup von den pherden

Verse: 9811    kummer in dâ mêrte.
Verse: 9812    ir leben was dô herte.

Verse: 9813    man sach ir wênic genesen.
Verse: 9814    lieber wæren sie gewesen

Verse: 9815    ûf dem mer mit guotem willen,
Verse: 9816    dâ Sirtes, Caribde, Cillen

Verse: 9817    mit gewalt die schif ertrenken
Verse: 9818    und in des wâges tiefe senken.

Verse: 9819    sie dolten aldâ bitter nôt.
Verse: 9820    im nam dâ volkes mêr der tôt,

Verse: 9821    den er in strîte ie hete verlorn.
Verse: 9822    daʒ wecket Alexandrô zorn

Verse: 9823    und betruobt im sîn gemüete gar,
Verse: 9824    wann er ir sît unsanfte enbar.

Verse: 9825       Nû heten sie swære vil erliten.
Verse: 9826    tac und naht sie wârn geriten.

Verse: 9827    mich berihte daʒ buoch mit sage,
Verse: 9828    daʒ sie an dem vierden tage,

Verse: 9829    dô die sunne sich wolt neigen
Verse: 9830    und irn schîn niht mê zeigen;

Verse: 9831    dô sie sich ze gemache stalt,
Verse: 9832    nû kâmen sie zuo einem walt,

Verse: 9833    dâ sie in kurzen stunden
Verse: 9834    einen brunnen funden.

Verse: 9835    daʒ waʒʒer lusteclîche vlôʒ,
Verse: 9836    daʒ beide phert und liut genôʒ.

Verse: 9837    ich wil iu sagen des brunnen art.
Verse: 9838    nie dehein viur sô heiʒ wart,

Verse: 9839    als er ist ze mitternaht;
Verse: 9840    sô biutet sîn wal mit duʒʒe braht.

Verse: 9841    dar nâch er die hitze lât.
Verse: 9842    des morgens sô die sunne ûf gât,

Verse: 9843    als ob er sî gewermet lâ,
Verse: 9844    vindet man den brunnen noch dâ.

Verse: 9845    sô der tac wahsen beginnet,
Verse: 9846    ie mêr er kelte minnet.

Verse: 9847    umb den brunnen ist eʒ sô gestalt,
Verse: 9848    nie kein îs wart sô kalt,

Verse: 9849    als er ze mittentage wirt.
Verse: 9850    wenn sô der tac abe birt

Verse: 9851    und sich die sunne læʒet nider,
Verse: 9852    sô vaʒʒet er aber wirme wider

Verse: 9853    den âbent als den morgen.
Verse: 9854    dar nâch unverborgen

Verse: 9855    viures hitze er an sich nimet.
Verse: 9856    solicher art dem brunnen zimet.

Verse: 9857    Clitôrius ist er genant.
Verse: 9858    dâ bî daʒ volc erbûwen vant

Verse: 9859    ein tempel wol gefieret
Verse: 9860    und wunneclich gezieret.

Verse: 9861    dar inne ûf einem alter stunt
Verse: 9862    Âmons bilde, daʒ tet in kunt

Verse: 9863    maneger hande rîcheit.
Verse: 9864    mit tiurem phelle was bespreit

Verse: 9865    der tempel und behangen.
Verse: 9866    mit irm opfer sie kâmen gegangen

Verse: 9867    vür ein grôʒ bilde von golde
Verse: 9868    gelîch einem wider, daʒ man solde

Verse: 9869    êren vür den hœhsten got JovÎ.
Verse: 9870    im stunden vil der gote bilde bî.

Verse: 9871    dô er und daʒ volc getet
Verse: 9872    den goten opfer mit gebet,

Verse: 9873    an dem fünften morgen fruo
Verse: 9874    kêrten sie von dannen nuo.

Verse: 9875    durch der êrsten verte freise
Verse: 9876    geviengen sie ein umbereise

Verse: 9877    zwischen Pâtelamunt und Libiâ.
Verse: 9878    ich hân vernomen daʒ aldâ

Verse: 9879    Gâlôes sun Gamuret,
Verse: 9880    leiste Belacânen bet,

Verse: 9881    der edlen mœrinne,
Verse: 9882    die mit triuwen brâhte minne

Verse: 9883    und ouch minne von im enphienc,
Verse: 9884    daʒ ir nâch jâmer sît ergienc.

Verse: 9885    ir liebe ir ougen sît wart sûr,
Verse: 9886    ir fröiden hagel und ir schûr.

Verse: 9887    eʒ hete enphangen die süeʒe zuht
Verse: 9888    ein kint von ir beider minne fruht,

Verse: 9889    daʒ er sie lebendic tragen lieʒ
Verse: 9890    (den hœhsten kummer ir daʒ stieʒ),

Verse: 9891    dô er sich von der süeʒen stal
Verse: 9892    und vor ir sîn vart verhal.

Verse: 9893    eʒ diente sît habe, der selbe grieʒ
Verse: 9894    und al der lande genieʒ

Verse: 9895    der frouwen sun, dem vêchgemâl
Verse: 9896    Feirafîʒ: sîn bruoder was Parcivâl.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.