TITUS
Ulrich von Eschenbach, Alexander
Part No. 77
Previous part

Chapter: 101  
Eroberung von Gâzâ


Verse: 9619       Dar nâch er fuor vür eine stat
Verse: 9620    in Barbarîe, die Gâzâ namen hât,

Verse: 9621    die niht envorhte der swære,
Verse: 9622    wie Tyrus gewunnen wære.

Verse: 9623    sie wolden nâch Darîus gebote leben
Verse: 9624    und sich disem niht ergeben.

Verse: 9625    alsô wâren sie berâten.
Verse: 9626    Ûf sîn ungelücke sie daʒ tâten.

Verse: 9627    er hieʒ die sînen gâhen dar
Verse: 9628    nemen der stat mit stürmen war.

Verse: 9629    ûf schîben mangerleie werc
Verse: 9630    sach man trîben an den berc,

Verse: 9631    des man ze stürme wol bedarf,
Verse: 9632    dar ûʒ man ungesûmet warf.

Verse: 9633    vil man ouch an die zinnen schôʒ.
Verse: 9634    des ouch die innern niht verdrôʒ,

Verse: 9635    sie spilten des selben hin wider
Verse: 9636    von der veste hin nider.

Verse: 9637    die stat ûf einem velse lac,
Verse: 9638    einsît man abe rîtens phlac.

Verse: 9639    daʒ sie wol tâten âne danc,
Verse: 9640    mangen wurf man her abe swanc.

Verse: 9641    gegen der selben sîten
Verse: 9642    sach man sie zetzende rîten

Verse: 9643    mit den vînden, gegen den sie schuʒʒen,
Verse: 9644    des die niht wol genuʒʒen,

Verse: 9645    die beider sît dô gelâgen
Verse: 9646    und lebens kraft verphlâgen.

Verse: 9647    sie tâten aldâ strîtes schîn.
Verse: 9648    iezunt sach man jene hin

Verse: 9649    jagen gegen der veste.
Verse: 9650    in fuogten leit die geste.

Verse: 9651    schiere sach man die Kriechen her,
Verse: 9652    alsô gienc der strît mit wer.

Verse: 9653    die âventiure hât geschriben
Verse: 9654    daʒ dâ von sturme tôt bliben

Verse: 9655    beidersît liute genuoge
Verse: 9656    von irs strîtes unfuoge.

Verse: 9657    dô sich der sô mit tôde war,
Verse: 9658    nû santen die burger dar

Verse: 9659    von der veste einen man her abe
Verse: 9660    in fride, der truoc in einem stabe

Verse: 9661    verborgen ein scharfeʒ swert.
Verse: 9662    frides was durch daʒ gegert,

Verse: 9663    daʒ sô der fürste wurde erslagen,
Verse: 9664    wen er im solde ir rede sagen.

Verse: 9665    dô dirre vor dem künge stunt
Verse: 9666    und tet im der burger rede kunt,

Verse: 9667    er ructe daʒ swert, daʒ er truoc,
Verse: 9668    dem fürsten er nâch dem halse sluoc:

Verse: 9669    des er vælte mit dem slage.
Verse: 9670    dô wart erfüllet der wîsen sage,

Verse: 9671    die heten sô gewîssaget niht
Verse: 9672    daʒ mit susgetâner geschiht

Verse: 9673    er von lîbe komen solde.
Verse: 9674    Lachesis des niht wolde,

Verse: 9675    der gunst im dannoch lachet.
Verse: 9676    iedoch het sie gemachet

Verse: 9677    gift mit der götîn gunst zuo brâht,
Verse: 9678    als sie ir dem fürsten het erdâht,

Verse: 9679    von Flegetôn unreine starc,
Verse: 9680    die sich ninder wol verbarc

Verse: 9681    in deheinem vaʒʒe, die vil unwerde,
Verse: 9682    niwan in eim huofe von eim pherde:

Verse: 9683    dâ mit sie sît über zehen jâr
Verse: 9684    verterbte den edlen fürsten clâr.

Verse: 9685    der in dô gerne hete erslagen
Verse: 9686    dem hieʒ der fürste (hôrt ich sagen)

Verse: 9687    hende und füeʒe abe slâhen
Verse: 9688    und des balde mit im gâhen.

Verse: 9689    sie heten im ouch boten ê gesant,
Verse: 9690    nû wart der fürste des ermant

Verse: 9691    daʒ sieʒ in untriuwen tâten
Verse: 9692    und in alsô wolden verrâten.

Verse: 9693    er begunde sich selbe erbeiten
Verse: 9694    und an die stat die sînen leiten.

Verse: 9695    selbe er sturmte den sînen vor.
Verse: 9696    nâhe der mûre bî eime tor

Verse: 9697    von der mûre ein gabilôtes swanc
Verse: 9698    im durch den linken arm dranc.

Verse: 9699    dô er der wunden enphant,
Verse: 9700    guot gemüete im gar verswant.

Verse: 9701    vast er an die sînen rief.
Verse: 9702    ûʒ der stat ûʒ einer blîden swief

Verse: 9703    der mangen meister einen stein,
Verse: 9704    der dem fürsten brach sîn bein.

Verse: 9705    der nôt die Kriechen bevilde.
Verse: 9706    von der stat ûf eime schilde

Verse: 9707    sach man sie den fürsten tragen.
Verse: 9708    man hôrt sie schrîen unde clagen.

Verse: 9709    er bat daʒ volc verzagen niht
Verse: 9710    durch sîner wunden geschiht.

Verse: 9711    ze Thedalûn der fürste sprach
Verse: 9712    'dich man ie bî manheit sach,

Verse: 9713    daʒ lâ hiute werden schîn.
Verse: 9714    du solt die vînde lêren pîn.

Verse: 9715    teilet iuch mit sundern scharn,
Verse: 9716    geruochet die vînde hiute niht sparn.'

Verse: 9717    daʒ von dem fürsten gar geschach.
Verse: 9718    einsît man wol gezieret sach

Verse: 9719    ûʒ Gâzâ Jambrî rîten.
Verse: 9720    der fürste wolde strîten.

Verse: 9721    ein frecheʒ volc er fuorte,
Verse: 9722    an die Kriechen er ruorte.

Verse: 9723    man sach den werden Thedalûn
Verse: 9724    mit im aldâ strît tuon,

Verse: 9725    daʒ der burger prîs zertrante.
Verse: 9726    gnuoge er dâ lebens phante.

Verse: 9727    man sach ouch dâ die Kriechen rîsen,
Verse: 9728    doch gelanc den strîtes wîsen

Verse: 9729    an irn vînden und an Jambrî
Verse: 9730    die sie dô machten siges frî.

Verse: 9731    gegen der stat ûf der flühte vart
Verse: 9732    der barbarôn gevangen wart

Verse: 9733    von Thedalûn, der fürste von Câzôn,
Verse: 9734    Jambrî, dem dô tôdes lôn

Verse: 9735    alsô ze gelte gegeben wart:
Verse: 9736    er wart mit rossen dô zerzart.

Verse: 9737    der sînen was ouch vil erslagen,
Verse: 9738    daʒ kunde den burgern missehagen.

Verse: 9739    in wart geboten ein swærer mat.
Verse: 9740    alrêst dô gâben sie die stat:

Verse: 9741    daʒ wær âne strît ê baʒ getân.
Verse: 9742    man sach den fürsten in Câzân

Verse: 9743    füern mit swæren wunden,
Verse: 9744    die im senfte wurden gebunden

Verse: 9745    von meistern, die in nerten
Verse: 9746    und imʒ zem besten kêrten.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.