TITUS
Ulrich von Eschenbach, Alexander
Part No. 76
Previous part

Chapter: 93  
Belagerung von Tyrus (II)


Verse: 9195       einsît ligen an dem mer
Verse: 9196    vant er Tyrus wol ze wer.

Verse: 9197    die stat ein mûre bevienc
Verse: 9198    mit türnen hôch dar umbe gienc.

Verse: 9199    Tyrus was unmâʒen grôʒ.
Verse: 9200    ein arm al umb und umbe flôʒ

Verse: 9201    des mers in gemûrten graben,
Verse: 9202    dar ûf zinnen hôch erhaben.

Verse: 9203    die stat lac wunneclîche.
Verse: 9204    man kôs wol daʒ rîche

Verse: 9205    dar inne die burger wâren.
Verse: 9206    sie hete vor manegen jâren

Verse: 9207    erbûwet der küne Agênor.
Verse: 9208    nû lac der fürste dâ vor.

Verse: 9209    der burc, der stat er sich fröute,
Verse: 9210    vür die man vaste ströute

Verse: 9211    manegen enden ûf daʒ velt
Verse: 9212    kostbære grôʒe gezelt.

Verse: 9213    er künc hieʒ die stat im geben,
Verse: 9214    ob die burger wolden leben.

Verse: 9215       Dô jâhen die burgære
Verse: 9216    daʒ ir wille sô niht wære.

Verse: 9217    sie wolden sie dem alten
Verse: 9218    irm hêrren noch behalten.

Verse: 9219    daʒ was dem fürsten ungemach.
Verse: 9220    schiere man bereiten sach

Verse: 9221    vür die stat trîbocken, mangen.
Verse: 9222    die türne wârn behangen

Verse: 9223    mit hürden und alsô beriht,
Verse: 9224    daʒ in daʒ werfen schatte niht.

Verse: 9225    die innern wâren wol ze wer.
Verse: 9226    vast sie schuʒʒen in daʒ her.

Verse: 9227    eʒ heten jene dort innen
Verse: 9228    ûf türnen und an den zinnen

Verse: 9229    rückarmbrust, selbschoʒʒe vil
Verse: 9230    (ein wârheit ich iu sagen wil),

Verse: 9231    die den vînden dröuten tôt
Verse: 9232    und in von wunden schuofen nôt.

Verse: 9233    wie sie dâ heten tarschen hart,
Verse: 9234    vil ir doch dâ erworfen wart.

Verse: 9235    Alexander machen hieʒ
Verse: 9236    ebenhœhe, die er hieʒ

Verse: 9237    ûf daʒ mer bereiten,
Verse: 9238    an die burc mit schiffen leiten.

Verse: 9239    dâ lac an manic starker bol,
Verse: 9240    sie wârn vor würfen bewart wol,

Verse: 9241    der doch genuoc dar ûf geschach,
Verse: 9242    daʒ man in wênic schaden sach.

Verse: 9243    ietslich ebenhœ behielt
Verse: 9244    driu gaden, dar ûʒ wart gespielt

Verse: 9245    werfens, schieʒens an die zinnen,
Verse: 9246    daʒ dâ von entrinnen

Verse: 9247    muosten die burgære.
Verse: 9248    sie liten grôʒen swære.

Verse: 9249    ouch andersît die geste
Verse: 9250    heten vür die veste

Verse: 9251    daʒ man mentel heiʒet machen
Verse: 9252    von sô starken sachen,

Verse: 9253    den ouch daʒ werfen schatte niht
Verse: 9254    und dar ûf ir schieʒen was ein wiht.

Verse: 9255    dâ hinder ûf schîben
Verse: 9256    sach man hantwerc trîben,

Verse: 9257    dar ûʒ sie wurfen viur
Verse: 9258    in die stat. des wart in tiur

Verse: 9259    daʒ man heiʒet guot gemach.
Verse: 9260    daʒ volc man vaste retten sach.

Verse: 9261    in tet daʒ viur sô gedon
Verse: 9262    und bôt in sô swache won,

Verse: 9263    daʒ sie vergâʒen manger wer,
Verse: 9264    der sie ê phlâgen gegen dem her.

Verse: 9265    vaste man in zuo buoʒte.
Verse: 9266    dô sie daʒ viur sô gruoʒte,

Verse: 9267    sie wurben biʒ an den keiser fride.
Verse: 9268    dâ gegen bôt er in die wide

Verse: 9269    und anders niht wann sterben.
Verse: 9270    sie kunden niht erwerben

Verse: 9271    daʒ der fürste senften muot
Verse: 9272    gegen in hete. sie buten im guot

Verse: 9273    dar zuo ir dienst und die stat.
Verse: 9274    vaste er die sînen bat

Verse: 9275    daʒ sie sich vaste wolden regen
Verse: 9276    und die hantwerc mit würfen wegen.

Verse: 9277    ritter, die frides bâten,
Verse: 9278    frides unberâten

Verse: 9279    wider in die stat riten.
Verse: 9280    nû wart mit würfen dâ gestriten

Verse: 9281    von den ûʒern an die wer.
Verse: 9282    den innern sie frumten herzesêr.

Verse: 9283    daʒ viur, wær daʒ niht gewesen,
Verse: 9284    sie wærn irs stürmens wol genesen.

Verse: 9285       Den fürsten zorn ruorte.
Verse: 9286    in sîner hant er fuorte

Verse: 9287    ein sper, dar an ein cleinen vanen.
Verse: 9288    die ûf dem mer wolt er manen

Verse: 9289    daʒ sie sich iht verlægen
Verse: 9290    und von den schiffen stürmens phlægen.

Verse: 9291    ein fürste dort inne sprach,
Verse: 9292    dô er disen rîten sach,

Verse: 9293    der burcgrâve von Tyrus
Verse: 9294    'sul wir sîn betwungen sus

Verse: 9295    und verterben als die wîp?
Verse: 9296    noch wil ich lieber den lîp

Verse: 9297    mit tjoste wâgen an den
Verse: 9298    wir dort an dem stade sên.

Verse: 9299    als ich mich versinnen kan,
Verse: 9300    ich wæne daʒ er sî der man,

Verse: 9301    der ditz her her hât brâht
Verse: 9302    und unsers schaden hât gedâht.

Verse: 9303    nimmer an im baʒ
Verse: 9304    mugen wir gerechen daʒ.

Verse: 9305    jâ mac er des niht überic sîn,
Verse: 9306    ob er niuwan erbeitet mîn,

Verse: 9307    mit tjoste twinget in mîn hant,
Verse: 9308    daʒ er mit tôde den sant

Verse: 9309    von mîner kraft suochen muoʒ
Verse: 9310    oder sunder danc geruochen ze fuoʒ

Verse: 9311    hiute volgen dâ her în.
Verse: 9312    an dirre porte wartet mîn,

Verse: 9313    ob mir gelinge, daʒ ir
Verse: 9314    wider în helfet mir.

Verse: 9315    ist aber daʒ ich erstirbe,
Verse: 9316    êrlîcher sterben ich wirbe,

Verse: 9317    den ob ich hinne verbrinne.'
Verse: 9318    sîn wîp, die burcgrævinne,

Verse: 9319    was dô engegen antwurt,
Verse: 9320    der lîp mit jâmer was begurt

Verse: 9321    von manger hande leiden:
Verse: 9322    doch tet ir daʒ scheiden

Verse: 9323    des hêrren vil und verre mê
Verse: 9324    dann al ir ungemüete wê.

Verse: 9325    eʒ brâhte lebendigen tôt.
Verse: 9326    süeʒen munt sie im bôt

Verse: 9327    mit minniclîchem kusse.
Verse: 9328    durch ir ougen des herzen gusse

Verse: 9329    den hôchgemuoten sô begôʒ,
Verse: 9330    daʒ sie im ûf den buosem flôʒ.

Verse: 9331    sie sprach 'hêrre, mîne leit
Verse: 9332    werdent nû lanc unde breit.

Verse: 9333    umb dich mîn herze muoʒ verzagen.
Verse: 9334    vil fröiden, die ich hân getragen,

Verse: 9335    wilt du nû die benemen mir?
Verse: 9336    süeʒer friunt, nû volge mir,

Verse: 9337    des sich die andern versehen,
Verse: 9338    des lâʒ ouch uns mit volge jehen.'

Verse: 9339       Der fürste die frowen kuste,
Verse: 9340    er dructe sie ze der bruste.

Verse: 9341    er sprach 'frowe, gehabe dich wol!
Verse: 9342    mîn herze ist manheit vol,

Verse: 9343    du kanst mit süeʒen sachen
Verse: 9344    mir den muot gemachen.

Verse: 9345    dîn tugent mich læʒt niht verzagen.
Verse: 9346    ich wil hiute prîs bejagen.

Verse: 9347    du muost hiute an im gesigen,
Verse: 9348    dâ von sîn hôchvart muoʒ geligen.'

Verse: 9349    aber er sie kuste und umbevienc.
Verse: 9350    dâ mit er ze dem orse gienc,

Verse: 9351    dar ûf der manheit rîche saʒ.
Verse: 9352    man sach der clâren ougen naʒ,

Verse: 9353    ir wengel lieht vür ir gewant.
Verse: 9354    im muost die reine mit ir hant

Verse: 9355    reichen den helm, schilt und sper.
Verse: 9356    dâ hielt der helt in strîtes ger,

Verse: 9357    als er erwünschet wære.
Verse: 9358    ouch sagt uns daʒ mære,

Verse: 9359    daʒ mit irn wîʒen henden linden
Verse: 9360    die frowe im muost verbinden.

Verse: 9361    urloup nam der helt gemeit.
Verse: 9362    heimelich er ze einer porten reit.

Verse: 9363    die frouwe ûf die mûre trat,
Verse: 9364    heiles sie irm hêrren bat.

Verse: 9365    sie wolde selbe daʒ ende sehen,
Verse: 9366    waʒ irm gesellen solde geschehen.

Verse: 9367    bî dem mer an einem orte
Verse: 9368    sach Alexander die porte,

Verse: 9369    die wart gâhes ûf getân,
Verse: 9370    dar ûʒ einen gezierten man

Verse: 9371    mit verbundem helme rîten,
Verse: 9372    daʒ er bî sînen zîten

Verse: 9373    nie baʒ gezierten ritter sach,
Verse: 9374    alsô der fürste selbe jach.

Verse: 9375    an im von rîcher koste
Verse: 9376    ein tiur samît gloste

Verse: 9377    vor rœte als ob er brunne.
Verse: 9378    von sînem helm ein sunne

Verse: 9379    schîn der edlen steine bôt;
Verse: 9380    rubîn gar durchliuhtic rôt

Verse: 9381    dar an verkastet lâgen,
Verse: 9382    die ouch schînes dar abe phlâgen,

Verse: 9383    daʒ den künic dûhte
Verse: 9384    wie dâ gar rôt erlûhte

Verse: 9385    alrêst der morgensterne.
Verse: 9386    Alexander sach in gerne.

Verse: 9387    sîn schilt von manger zirde,
Verse: 9388    sîn kovertiur in wirde

Verse: 9389    was von rîchem gelfe erdâht,
Verse: 9390    ein samît rôt von Suntîn brâht.

Verse: 9391    nû solt ir gelouben mir
Verse: 9392    daʒ nie sô wunneclîcheʒ tier

Verse: 9393    in dem strîte wart vernomen:
Verse: 9394    sîn ors sach man in sprüngen komen,

Verse: 9395    daʒ der fürste reit mit kraft.
Verse: 9396    er fuort einen starken schaft,

Verse: 9397    dâ mit der hêrre bescheinte
Verse: 9398    Alexandrô daʒ er in meinte.

Verse: 9399    daʒ ors mit den sporn nam
Verse: 9400    Alexander und dirre alsam.

Verse: 9401    'wol her' sprach der inner helt,
Verse: 9402    'ich muoʒ alhie prîses gelt

Verse: 9403    hiute an dir erwerben
Verse: 9404    oder von dir ersterben.'

Verse: 9405    in was beiden ze tjoste gâch.
Verse: 9406    ietslîcher ûf dem andern brach

Verse: 9407    mit unverzagtem muote den schaft,
Verse: 9408    daʒ dô von ir beider kraft

Verse: 9409    die splittern gegen den lüften stuben
Verse: 9410    und sich ir beider schilte cluben

Verse: 9411    und ûf die hahsen kâmen die phert.
Verse: 9412    alsô die fürsten wurden gewert

Verse: 9413    des sie beide gerten.
Verse: 9414    dar nâch mit den swerten

Verse: 9415    der burcgrâve und Alexander
Verse: 9416    sluogen ûf einander,

Verse: 9417    daʒ nieman dar zuo tohte,
Verse: 9418    der ir slege gezeln mohte.

Verse: 9419    ir beider harnasch daʒ was guot,
Verse: 9420    ouch heten sie vesten strîtes muot:

Verse: 9421    von slegen ir ungefuogeʒ smiden
Verse: 9422    under in die ors kûme erliden.

Verse: 9423    von irn helmen viures funken
Verse: 9424    ir cleinôt begunden sunken.

Verse: 9425    dô sie sô striten beide,
Verse: 9426    nû merkent ob iht leide

Verse: 9427    der süeʒen dort inne,
Verse: 9428    die dâ stunt an der zinne,

Verse: 9429    umb irn hêrren wære.
Verse: 9430    jâ, sô grôʒ was ir swære

Verse: 9431    daʒ die guote kûm genas.
Verse: 9432    wie er dannoch bî wer was,

Verse: 9433    ûf irn hêrren kam ein slac,
Verse: 9434    dâ von irs herzen craft gelac,

Verse: 9435    daʒ sie ir clegde gar versweic
Verse: 9436    und creftelôs ze tale seic

Verse: 9437    von der zinnen ûf die mûre nider.
Verse: 9438    als sie kam ze kreften wider,

Verse: 9439    sô leinte sich die reine
Verse: 9440    aber an die steine.

Verse: 9441    sie bôt die ougen unde herze dar,
Verse: 9442    dâ jene nâmen strîtes war.

Verse: 9443    der wirt ein menlich herze truoc,
Verse: 9444    ungefuoge der werde sluoc

Verse: 9445    ûf den unverzagten gast:
Verse: 9446    daʒ swert im vor der hende brast

Verse: 9447    niht verre vor der hilze entzwei:
Verse: 9448    daʒ sach die frowe, die lûte schrei.

Verse: 9449    Alexander an den stunden
Verse: 9450    sluoc im eine wunden

Verse: 9451    durch den helm und daʒ gesteine
Verse: 9452    durch des houptes gebeine,

Verse: 9453    dâ von im lebens lenge flôch.
Verse: 9454    mit valle er gegen dem sande zôch,

Verse: 9455    aldâ lêrt er in sterbens nôt.
Verse: 9456    der fürste mit eime slage tôt

Verse: 9457    sluoc den hêrren und dort inne
Verse: 9458    sîn wîp die burcgrævinne.

Verse: 9459    dô sie irn hêrren vallen sach,
Verse: 9460    ein bitter tôt ir herze brach.

Verse: 9461    ûf der mûre ungemach
Verse: 9462    wart von jâmer solicher crach,

Verse: 9463    daʒ eʒ erbarmte den vogt.
Verse: 9464    wider er ze den sînen zogt.

Verse: 9465    von dem tôten daʒ harnasch er gap,
Verse: 9466    daʒ man in fuogte in ein grap.

Verse: 9467    in der stat was grôʒ geschrei.
Verse: 9468    in was die wâre fröide enzwei

Verse: 9469    zeschrocken mit grôʒer swære.
Verse: 9470    nû vernemet baʒ ditz mære.

Verse: 9471       Die von der mûre her abe
Verse: 9472    fuogten mangen ouch ze grabe,

Verse: 9473    den sie brâhten ûf tôdes zil
Verse: 9474    mit würfen und mit schüʒʒen vil.

Verse: 9475    in tet daʒ viur doch sô gedon,
Verse: 9476    daʒ sie muosten dâ von

Verse: 9477    sich der würfe mâʒen.
Verse: 9478    irs schieʒens sie gar vergâʒen.

Verse: 9479    von der mûre sie entwichen.
Verse: 9480    nû waren dar geslichen

Verse: 9481    einhalp die Kriechen ûf dem mer,
Verse: 9482    dâ sie die mûre âne wer

Verse: 9483    und âne liute funden:
Verse: 9484    sie vielen an den stunden

Verse: 9485    ûʒ der ebenhœ dar ûf.
Verse: 9486    zehant sie schrîten irn ruof.

Verse: 9487    die stat an mangen enden bran,
Verse: 9488    dannoch sie truogen viur an.

Verse: 9489    ir wârn wol tûsent komen în.
Verse: 9490    von den manic Sarracîn

Verse: 9491    in der stat wart verterbet
Verse: 9492    und an leben ersterbet.

Verse: 9493    sie drungen sich vaste umb die tor,
Verse: 9494    dâ was vil volkes ûʒen vor,

Verse: 9495    sie wurden mit exen ûf geslagen.
Verse: 9496    daʒ hôrte man die innern clagen.

Verse: 9497    daʒ viur sich vaste mêrte,
Verse: 9498    daʒ volc eʒ sterben lêrte.

Verse: 9499    dô ergienc mangerleie tôt
Verse: 9500    unde michel jâmers nôt.

Verse: 9501    dirre vor vorhten flôch daʒ swert,
Verse: 9502    den doch daʒ viur tôdes wert,

Verse: 9503    jener wânde dem viure entrinnen
Verse: 9504    hie sach man den von den zinnen

Verse: 9505    vor vorhten tuon mit sprunge val
Verse: 9506    in daʒ mer hin ze tal:

Verse: 9507    sie dûhte des swertes tôt sô sûr,
Verse: 9508    daʒ die veigen von der mûr

Verse: 9509    ûʒ vielen an daʒ lant,
Verse: 9510    aldâ man sie tôt vant.

Verse: 9511    dirre von dem viure lief,
Verse: 9512    den durch sîn herze sô tief

Verse: 9513    von swerte wunden wurden gegeben,
Verse: 9514    dâ von sich enden muost sîn leben.

Verse: 9515    dô wuohs sô jâmerbernder ruof,
Verse: 9516    der der lufte trüebe schuof.

Verse: 9517    wîp, kint oder man
Verse: 9518    deheineʒ dem tôde entran,

Verse: 9519    ân die sich vor vorhten zugen
Verse: 9520    in die tempel und dar în flugen.

Verse: 9521    mich riuwen die minneclîche wîp,
Verse: 9522    die dâ verlurn irn lîp,

Verse: 9523    an den fröiden vil vertarp.
Verse: 9524    daʒ ander volc, daʒ dâ erstarp,

Verse: 9525    daʒ riuwet harte cleine mich.
Verse: 9526    noch kan mêr gesagen ich:

Verse: 9527    wer triuwe suochet und vinden wil
Verse: 9528    der haben werde frouwen vil,

Verse: 9529    an den triuwe nie gebrach.
Verse: 9530    valscheit ist in ungemach

Verse: 9531    und irs herzen swære.
Verse: 9532    geloubent mir der mære,

Verse: 9533    ein ietslich wîp valsches blôʒ,
Verse: 9534    die mac wol sîn engels genôʒ.

Verse: 9535       ich wæne iht daʒ ieman lebe,
Verse: 9536    der mir des gewisheit gebe

Verse: 9537    und der daʒ neme ûf sînen eit,
Verse: 9538    daʒ er mit fröiden sunder leit

Verse: 9539    ganzen tac sî bliben
Verse: 9540    und ân ungemüete habe vertriben.

Verse: 9541    solichen lôn die werlt gît.
Verse: 9542    got helf uns daʒ wir dise zît

Verse: 9543    alsô müeʒen bringen hin,
Verse: 9544    daʒ wir dâ der engel schîn

Verse: 9545    immer wert ân enden
Verse: 9546    unser sêle hin senden,

Verse: 9547    dâ nimmer fröide wirt benomen;
Verse: 9548    daʒ wir ze dem süeʒen komen,

Verse: 9549    der durch unser sünden siten
Verse: 9550    hie swære und angest hât erliten:

Verse: 9551    der helf uns daʒ wir im danken
Verse: 9552    sîner marter sunder wanken,

Verse: 9553    die umb unser sünden schult
Verse: 9554    der süeʒe sunder ungedult

Verse: 9555    an dem kriuze durch minne enphienc.
Verse: 9556    sîn minne sælde an uns begienc.

Verse: 9557       in Tyrus verzaget was
Verse: 9558    volc, daʒ zwîvel an sich las,

Verse: 9559    daʒ eʒ vor vorhte und leide gienc
Verse: 9560    in die kelre und sich erhienc:

Verse: 9561    daʒ eʒ die vînde iht slüegen tôt,
Verse: 9562    an den stricken lernte eʒ sterbens nôt.

Verse: 9563    dâ wârn ouch inne (ist mir gesagt)
Verse: 9564    liute strîtes unverzagt,

Verse: 9565    die wolden zagheit sich schamen
Verse: 9566    und wolden mit manheit namen

Verse: 9567    durch reht die stat ir erbe wern.
Verse: 9568    man sach sie grimmeclîche kêrn

Verse: 9569    an die Kriechen, strît den bieten,
Verse: 9570    der leben sie verschrieten,

Verse: 9571    an den sie daʒ erwurben
Verse: 9572    daʒ sie unvergolten niht ensturben.

Verse: 9573    sie wurden erslagen, ouch sluogen sie,
Verse: 9574    die Kriechen dort unde hie

Verse: 9575    sach man sie tôt nider legen.
Verse: 9576    sie heten doch lebens sich bewegen,

Verse: 9577    dar umb sieʒ âne betrâgen
Verse: 9578    unervorht torsten gewâgen.

Verse: 9579    sie wârn ze beiden vil bereit,
Verse: 9580    ze enphâhen den tôt, daʒ selbe leit

Verse: 9581    den Kriechen sie gedâhten,
Verse: 9582    daʒ sie in mit fülle brâhten.

Verse: 9583    doch nam daʒ viur dâ überhant.
Verse: 9584    die stat ze aschen verbrant,

Verse: 9585    die der milde Agênor
Verse: 9586    hete erbûwet dâ vor.

Verse: 9587       sus wir gelouben den wîsen,
Verse: 9588    und ir lêre vür wârheit prîsen:

Verse: 9589    sie haben uns berihtet sus,
Verse: 9590    daʒ in der edlen stat Tyrus

Verse: 9591    alle künste entsloʒʒen sin,
Verse: 9592    die mac begrîfen menschen sin,

Verse: 9593    und aller dinge bescheidenheit
Verse: 9594    sint dâ mit namen ûʒ geleit.

Verse: 9595    die vor unbetwungen was
Verse: 9596    manic jâr, als ich las,

Verse: 9597    von êrst unz ûf die selbe zît,
Verse: 9598    daʒ sie zefuorte der Kriechen strît;

Verse: 9599    alsô die stat zerbrochen lac
Verse: 9600    unz ûf den sældenbernden tac,

Verse: 9601    daʒ got durch unser schulde erstarp
Verse: 9602    und uns sîn sterben leben erwarp:

Verse: 9603    dô wart gebûwet die stat
Verse: 9604    von volke, daʒ Cristen namen hât

Verse: 9605    und noch dâ flêhen umb ir nôt
Verse: 9606    Cristes namen und sînen tôt:

Verse: 9607    der ist dâ drîer in erkant
Verse: 9608    und ein, der besliuʒet der werlde lant

Verse: 9609    und immer mê ân ende
Verse: 9610    hât in sîner hende.

Verse: 9611       dô Tyrus was sô veste
Verse: 9612    under andern bürgen die beste

Verse: 9613    und sie doch der künc gewan,
Verse: 9614    sich solden wol versunnen hân

Verse: 9615    bürge und stete in den landen
Verse: 9616    daʒ sie sich des fürsten handen

Verse: 9617    und sîme gebote heten ergeben
Verse: 9618    ân strît sunder swæreʒ leben.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.