TITUS
Ulrich von Eschenbach, Alexander
Part No. 72
Previous part

Chapter: 85b  
Alexander nimmt Darius Verwandte gefangen


Verse: 8765       Alexander ûf daʒ velt
Verse: 8766    hin dan vür der clâren gezelt

Verse: 8767    der fürste was erbeiʒet.
Verse: 8768    daʒ zuht und tugent heiʒet

Verse: 8769    wonte des fürsten herze bî.
Verse: 8770    er was von missewende frî,

Verse: 8771    des ieglich fürste wol bedarf
Verse: 8772    über daʒ harnasch er warf

Verse: 8773    einen mantel von samît tiure.
Verse: 8774    alsô gienc der gehiure

Verse: 8775    in des gezeldes palas,
Verse: 8776    dâ Darîus frouwe inne was.

Verse: 8777    bî der keiserinne
Verse: 8778    vant er die küniginne

Verse: 8779    Dulcâmûr von Samargôn,
Verse: 8780    die künigîn von Celidôn,

Verse: 8781    Isannes wîp die clâren
Verse: 8782    vil jæmerlich gebâren:

Verse: 8783    die jâmers rîchen sich fliʒʒen
Verse: 8784    ir gebende, ir hâr sie riʒʒen.

Verse: 8785    von Arâbî die künigîn
Verse: 8786    die gap minneclîchen schîn,

Verse: 8787    swie sie in grôʒer swære
Verse: 8788    und in jâmers clage wære.

Verse: 8789    die künigîn von Ninivê
Verse: 8790    die hôrt man dicke lûte ôwê

Verse: 8791    jæmerlîchen schrîen
Verse: 8792    umb Negûsar den valsches frîen.

Verse: 8793    von Ircânia die frouwen
Verse: 8794    mohte man in jâmer schouwen

Verse: 8795    und in leide bernder nôt
Verse: 8796    umb Ðchus des werden tôt

Verse: 8797    die künigîn von Êgiptô
Verse: 8798    umb Zorcam sach man unfrô.

Verse: 8799    niht vil ich iu dâ von sagen wil.
Verse: 8800    die frouwen triben jâmers vil,

Verse: 8801    den ir hêrren wârn erslagen.
Verse: 8802    er vernam ouch dâ der keiserîn clagen.

Verse: 8803    der herze bevienc dô jâmers hort.
Verse: 8804    in clage sprach sie dise wort

Verse: 8805    'Ich hân verlorn den hêrren mîn,
Verse: 8806    dar umb muoʒ an mir wernde sîn

Verse: 8807    jâmer mit ganzer riuwe
Verse: 8808    in mînem herzen niuwe,

Verse: 8809    den ich vür fröide ze hûse lade.
Verse: 8810    mir ist von der sælden phade

Verse: 8811    abe geworfen der stîc.
Verse: 8812    unsælic herze, nû sîc

Verse: 8813    von hôher wirde in swachen won.
Verse: 8814    wâ ist nû süeʒer minne lôn,

Verse: 8815    des du mich, hêrre, kundest wern?
Verse: 8816    ôwê und sol ich dîn enbern,

Verse: 8817    friunt und trûtgeselle mîn,
Verse: 8818    nâch dir muoʒ ich in jâmer sîn.

Verse: 8819    kunde mir ieman trôst gegeben,
Verse: 8820    ob man dich funde noch bî leben,

Verse: 8821    waʒ danne an mir geschæhe,
Verse: 8822    mit willen ich des verjæhe,

Verse: 8823    daʒ dich dîn sun iht verlür
Verse: 8824    und der niht schaden an dir kür;

Verse: 8825    daʒ der iht wurde verweiset dîn,
Verse: 8826    den doch dîn minne und ouch die mîn

Verse: 8827    mit süeʒer fruht der werlde brâht.
Verse: 8828    nû haben die gote ûf mich erdâht

Verse: 8829    schaden ân ergetzen,
Verse: 8830    die mich in jâmer setzen.

Verse: 8831    fröiden ich verweiset wîp!
Verse: 8832    sich sol mîn clagebernder lîp

Verse: 8833    von der werlde ziehen
Verse: 8834    und alle wunne fliehen.

Verse: 8835    uns beide doch ein muoter truoc,
Verse: 8836    die hât ouch schaden gnuoc,

Verse: 8837    die sich ze jâmer ziuhet.
Verse: 8838    wie uns nû sælde fliuhet,

Verse: 8839    die uns ê was in fröiden mite!
Verse: 8840    nû hât sie mit jâmers snite

Verse: 8841    unser herze sêre verwunt.
Verse: 8842    wir haben den wâren sorgen funt

Verse: 8843    an dis strîtes stunden
Verse: 8844    verlüsteclich erfunden.

Verse: 8845    ôwê wie sol ein sterben
Verse: 8846    ich armeʒ wîp erwerben?

Verse: 8847    fröiden mit wirde, der ich phlac,
Verse: 8848    die hât jâmers bernder tac

Verse: 8849    mir alzemâle gar benomen.
Verse: 8850    mîn hêrre, war bistu bekomen?

Verse: 8851    jâ wærest du mîn leitvertrîp,
Verse: 8852    ich der dîn und du mîn lîp.

Verse: 8853    ich weiʒ wol, ob du lebendic bist,
Verse: 8854    dîn herze nâch mir in jâmer ist,

Verse: 8855    daʒ sich nâch mir in swære sent,
Verse: 8856    aldâ dîn triwe mich hât gewent.'

Verse: 8857       diu frouwe clagender worte gesweic.
Verse: 8858    unversunnen sie hin seic,

Verse: 8859    die süeʒe mit dem tôde ranc.
Verse: 8860    die zene man ir ûf twanc,

Verse: 8861    waʒʒer man ir dick în gôʒ.
Verse: 8862    daʒ volc stunt ob ir fröiden blôʒ.

Verse: 8863    Alexander den ungemach
Verse: 8864    ungerne ouch an der frouwen sach.

Verse: 8865    wann die guote sich versan,
Verse: 8866    sô huop sich niuwer jâmer an.

Verse: 8867    nie dehein herze sô hart
Verse: 8868    noch alsô versteinet wart,

Verse: 8869    hæt eʒ den jâmer gesehen,
Verse: 8870    im müeste menscheit riuwe jehen

Verse: 8871    und umb die minniclîchen
Verse: 8872    ûʒ fröiden spor entwîchen.

Verse: 8873    daʒ treip die frowe unz ûf den tac,
Verse: 8874    daʒ sie vor leide tôt gelac.

Verse: 8875       Von des fürsten wirdekeit
Verse: 8876    bliben die frowen âne leit

Verse: 8877    und ouch solicher schame frî,
Verse: 8878    die den andern wonte bî.

Verse: 8879    der fürste zuht erzeigte.
Verse: 8880    ze dienste er sich neigte

Verse: 8881    den frouwen, swâ er kunde.
Verse: 8882    nieman er des gunde

Verse: 8883    der vür in ir diener wære.
Verse: 8884    sus ringet in ir swære

Verse: 8885    der edle, swâ er mohte.
Verse: 8886    waʒ ze fröiden tohte

Verse: 8887    williclîchen schuof er daʒ.
Verse: 8888    ir wegen hieʒ er zieren baʒ

Verse: 8889    mit golde und mit gesteine,
Verse: 8890    dar ûf man fuort die reine,

Verse: 8891    Darîus wîp, die keiserin,
Verse: 8892    sîn muoter, sîn sun ze Issôn în,

Verse: 8893    mit ir werder frouwen vil,
Verse: 8894    die alle uobten jâmers spil,

Verse: 8895    dâ man sie stæte inne sach.
Verse: 8896    der fürste schuof in guot gemach:

Verse: 8897    waʒ in der hêrre trôstes bôt,
Verse: 8898    man sach die frouwen doch in nôt.

Verse: 8899       Alexander niht vergaʒ,
Verse: 8900    wanne sô die keiserîn aʒ,

Verse: 8901    selbe wolde er sie dienstes wern,
Verse: 8902    des entorste nieman var in gern.

Verse: 8903    des keisere muoter er zuo sprach
Verse: 8904    'frouwe, al mîn ungemach

Verse: 8905    und mîn swære muoʒ ergân,
Verse: 8906    ich wil iuch ze einer muoter hân.

Verse: 8907    alsô sult ir mich ze suon:
Verse: 8908    waʒ ir gebietet, daʒ wil ich tuon,

Verse: 8909    sunder daʒ alein
Verse: 8910    daʒ ich mit Darîus über ein

Verse: 8911    welle oder müge getragen:
Verse: 8912    daʒ muoʒ mîn herze im versagen.'

Verse: 8913    sie sprach 'hêrre, mir ist leit
Verse: 8914    daʒ ûf die dinc iuwer eit

Verse: 8915    sô veste ist und sô stæte.
Verse: 8916    mînem herzen daʒ sanfte tæte,

Verse: 8917    ob ir sîn friunt woldet wesen.
Verse: 8918    jâ moht ich deste baʒ genesen.

Verse: 8919    iedoch, hêrre, wâ ir guot
Verse: 8920    gegen uns armen wîben tuot,

Verse: 8921    daʒ zimt iuwern êren wol.
Verse: 8922    ich bin gerne waʒ ich sol.'

Verse: 8923    ze der keiserîn er sprach
Verse: 8924    'mîn trûren daʒ sol werden swach.

Verse: 8925    ich bin rîcher danne gester.
Verse: 8926    frouwe, ze einer swester

Verse: 8927    wil ich iuch hiute enphâhen,
Verse: 8928    ob es iuch niht kan versmâhen.

Verse: 8929    ich wil iu triuwe erzeigen
Verse: 8930    und mich dienstlîchen neigen.

Verse: 8931    ir sult mich bruoder nennen,
Verse: 8932    in triwen dâ vür erkennen.'

Verse: 8933    ir sun vor der frouwen stunt,
Verse: 8934    den kuste der fürste an sînen munt.

Verse: 8935    er sprach 'swester, disen knaben
Verse: 8936    wil ich mir ze bruoder haben.

Verse: 8937    des enwil ich niht enbern,
Verse: 8938    ich wil in bruoders triuwe wern.'

Verse: 8939    ûʒ trûrigem muote
Verse: 8940    antwurt im die guote

Verse: 8941    'wol irʒ, hêrre, bietent mir
Verse: 8942    nâch grôʒem leide, daʒ ir

Verse: 8943    mir an dem keiser habt getân.
Verse: 8944    woldet ir den ze friunde hân

Verse: 8945    und im iuwern fride geben,
Verse: 8946    ob man in funde noch bî leben,

Verse: 8947    jâ wær ich gerne waʒ ir wolt.
Verse: 8948    jâ enhât der senfte niht verscholt

Verse: 8949    daʒ ir im haʒ erzeiget
Verse: 8950    und sîn volc mit tôde veiget.

Verse: 8951    ir tragt im âne schulde nît.
Verse: 8952    nû gît mir daʒ vil swære zît,

Verse: 8953    ich enweiʒ niht ob der guote lebt.
Verse: 8954    waʒ ir uns guotes trôstes gebt

Verse: 8955    und wa ir uns zeiget triuwen site,
Verse: 8956    dâ êrent ir iuch selben mite.

Verse: 8957    eineʒ lâʒet âne zorn:
Verse: 8958    hân ich Darîum verlorn,

Verse: 8959    ir und al die in der welde sîn
Verse: 8960    ergetzent mich niht des hêrren mîn.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.