TITUS
Ulrich von Eschenbach, Alexander
Part No. 68
Previous part

Chapter: 84g  
Darius flieht


Verse: 8527       Darîus vil fürsten sach verlorn,
Verse: 8528    die im helfe heten gesworn.

Verse: 8529    dô er sach den grôʒen mort
Verse: 8530    wie daʒ velt hie und dort

Verse: 8531    mit den sînen was belegt,
Verse: 8532    grôʒen jâmer im daʒ regt.

Verse: 8533    ze den er helfe sich versach,
Verse: 8534    an den kôs er tôtlich ungemach.

Verse: 8535    dô er sie sach vor im erslagen,
Verse: 8536    sîn herze begunde zwîvel jagen

Verse: 8537    wie er von dann gekêrte,
Verse: 8538    daʒ sich der schade an im iht mêrte.

Verse: 8539    im was daʒ ein swære nôt,
Verse: 8540    sîn wagenman lac vor im tôt,

Verse: 8541    der in dann bringen solde.
Verse: 8542    dô gedâht er ob er wolde

Verse: 8543    entwîchen mit der gênden diet.
Verse: 8544    sîn herze im manger hande riet,

Verse: 8545    ob er ze orse mohte
Verse: 8546    fliehen oder waʒ im tohte,

Verse: 8547    welheʒ im fuogete baʒ.
Verse: 8548    dô er alse in sorgen saʒ,

Verse: 8549    Perdicas hete gekrieget dar,
Verse: 8550    Darîus nam er mit schuʒʒe war,

Verse: 8551    der durch besehen an den stunden
Verse: 8552    het den helm abe gebunden.

Verse: 8553    ein schuʒ ûf in alsô geriet,
Verse: 8554    sîn guldîn hersnier er verschriet

Verse: 8555    dem keiser dâ durch die stirne,
Verse: 8556    doch schirmte daʒ bein dem hirne,

Verse: 8557    daʒ er niht sêre wart verwunt.
Verse: 8558    von dem karrâtschen zestunt

Verse: 8559    der edle jâmers rîche
Verse: 8560    spranc vil snelleclîche,

Verse: 8561    ûf in sich lasters bürde zôch:
Verse: 8562    mit den fuoʒgengeln er flôch

Verse: 8563    über heide und gevilde
Verse: 8564    vaste gegen der wilde.

Verse: 8565    der edle fürste überlief
Verse: 8566    vil berge hôch und gründe tief.

Verse: 8567    von müede er grôʒen kummer leit.
Verse: 8568    ein sîn ritter nâch im reit,

Verse: 8569    Ausones in wol bedâhte,
Verse: 8570    ein ors dem fürsten er brâhte,

Verse: 8571    dar ûf der admirât dô saʒ.
Verse: 8572    den wec gegen Eufrâtes er maʒ.

Verse: 8573    er vant dâ sîner liute ein teil
Verse: 8574    mit schiffen, daʒ dûht in ein heil

Verse: 8575    nâch grôʒem ungelücke wesen.
Verse: 8576    er dâhte er solde wol genesen.

Verse: 8577       Darîus und Ausones
Verse: 8578    fuoren über die Eufrâtes.

Verse: 8579    dô er im die sîn niht volgen sach,
Verse: 8580    jæmerlich der fürste sprach

Verse: 8581    'ôwê, war ist mîn sælde komen?
Verse: 8582    schaden den ich hân genomen

Verse: 8583    nicht sich dem gelîchet.
Verse: 8584    sorgen mîn herze rîchet.

Verse: 8585    ei, minniclich mîn süeʒeʒ wîp,
Verse: 8586    waʒ nû dîn minneclîcher lîp

Verse: 8587    sorge und angest umb mich enphât!
Verse: 8588    des dich triuwe niht erlât,

Verse: 8589    du enweist umb mîn leben niht,
Verse: 8590    ichn weiʒ ouch waʒ dir geschiht.

Verse: 8591    wie haben die gote ze mir getân!
Verse: 8592    nâch dir, frouwe, muoʒ ich hân

Verse: 8593    jâmer und immer werndeʒ leit.'
Verse: 8594    alsô in Babilôn er reit.

Verse: 8595    die burger triuwe an im begiengen,
Verse: 8596    nâch wirde sie in enphiengen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.