TITUS
Ulrich von Eschenbach, Alexander
Part No. 67
Previous part

Chapter: 84f  
Schlacht bei Issos


Verse: 7831       ir sult mir gelouben des,
Verse: 7832    bî dem waʒʒer Eufrâtes

Verse: 7833    ûf einem wîten anger dâ
Verse: 7834    und in den landen anderswâ

Verse: 7835    ergienc die ritterschaft sô hart,
Verse: 7836    dâ von die helle erfröuwet wart.

Verse: 7837    noch lâgen von einander
Verse: 7838    Darîus und Alexander.

Verse: 7839    wie vil der sumer brâhte
Verse: 7840    varwe, der im gedâhte

Verse: 7841    wunneclich der meie
Verse: 7842    mit gezierde mangerleie

Verse: 7843    sîner kunft ze helfe,
Verse: 7844    in sô rîchem gelfe

Verse: 7845    vernam man nie anger noch die heide,
Verse: 7846    als man die her beide

Verse: 7847    mit zierde geflorieret sach
Verse: 7848    von rîcher kost, als man mir jach.

Verse: 7849    nû was komen die zît,
Verse: 7850    daʒ die fürsten wolden haben strît.

Verse: 7851       Rûschung von harnasch was sô grôʒ,
Verse: 7852    daʒ man der tambûren dôʒ

Verse: 7853    noch der busînen schal
Verse: 7854    niht moht vernemen ûf dem wal.

Verse: 7855    zwischen den hern beiden
Verse: 7856    Arêthas, ein rîcher heiden,

Verse: 7857    von Syriâ der werde vogt,
Verse: 7858    waʒ durch tjost vor gezogt:

Verse: 7859    dâ mit er prîs wolt bejagen,
Verse: 7860    den doch lange hete getragen

Verse: 7861    sîn name mit hôher wirde.
Verse: 7862    man kôs an im grôʒ zirde.

Verse: 7863    mit rîcher kost was die zuo brâht.
Verse: 7864    von seltsænem werke erdâht

Verse: 7865    heten ir wunneclîche wîp,
Verse: 7866    die dâ mit zierten sînen lîp,

Verse: 7867    die sîner minne gerten
Verse: 7868    und in hôhes muotes werten.

Verse: 7869    sîn wâpenroc, sîn kovertiuren
Verse: 7870    heten der vil gehiuren

Verse: 7871    hende mit flîʒe geworht.
Verse: 7872    nû hielt der fürste unervorht

Verse: 7873    in harnasch wîʒ als der snê
Verse: 7874    mit vestem muote ûf dem klê

Verse: 7875    strîtlîcher tjost gernde.
Verse: 7876    aldâ was in der wernde

Verse: 7877    der hurteclich von sînen scharn
Verse: 7878    mit vrechem muote kam gevarn:

Verse: 7879    der vogt und Alexander
Verse: 7880    sprangten gegen einander.

Verse: 7881    ir beider schilt der lewe was.
Verse: 7882    einen helm fuorte Arêthas,

Verse: 7883    dar abe die karfunkel lûhten.
Verse: 7884    mit tjost zesamen sie dûhten,

Verse: 7885    der dô vîntlich wart gespilt.
Verse: 7886    dâ die buckel ûf des vogtes schilt

Verse: 7887    mit rîcher kost was geslagen,
Verse: 7888    dâ durch kunde Alexander jagen

Verse: 7889    rund durch daʒ harnasch sînen schaft
Verse: 7890    in sîn herze mit tjoste kraft,

Verse: 7891    dâ von der tôt sîn herze brach.
Verse: 7892    sîgen man Arêthen sach

Verse: 7893    von dem orse ûf den clê.
Verse: 7894    daʒ tet den Asîânen wê.

Verse: 7895    'Macedô' wart dô geschrît.
Verse: 7896    sie ructen vürbaʒ in den strît.

Verse: 7897    ôwê, der wart dô vil hart.
Verse: 7898    die wîte etlîchem ze enge wart.

Verse: 7899    Permêniô mit der Kriechen vanen
Verse: 7900    kunde die vînde jâmers manen.

Verse: 7901    Darîus vanen fuorte
Verse: 7902    Mâzêus, der sich ruorte:

Verse: 7903    in strîte er sich niht sûmte,
Verse: 7904    durch die vînde er gaʒʒen rûmte.

Verse: 7905       Alexander nam rehte war
Verse: 7906    wâ Darîus mit der rîchen schar

Verse: 7907    und mit den wolgezierten lac.
Verse: 7908    aldâ hin er strîtes phlac.

Verse: 7909    er sach von geschoʒʒe ob im ein dach,
Verse: 7910    dâ durch er kûm die wolken sach.

Verse: 7911    Alexander mit heldes henden
Verse: 7912    kunde der vînde leben swenden,

Verse: 7913    mit im der werde Eufêstiô.
Verse: 7914    dô wart vil dicke 'Macedô'

Verse: 7915    von den Kriechen geschrît.
Verse: 7916    durch gedrenge hiewen sie gaʒʒen wît,

Verse: 7917    der Persâne valten sie vil tôt.
Verse: 7918    Alexander sich gegen der herte ie bôt,

Verse: 7919    dâ er die vînde schaden lêrte.
Verse: 7920    sîn hant sie nider rêrte.

Verse: 7921    mit slegen er sie vaste blou.
Verse: 7922    manegen sîn komen dar berou.

Verse: 7923    man sach dâ Clitum in den scharn
Verse: 7924    und Tholomêum umbe varn,

Verse: 7925    die Persân sêre zern.
Verse: 7926    nû seht wie clein sich mac gewern

Verse: 7927    ein schâf gegen hungerigen löuwen,
Verse: 7928    sô clein sie ahten der vînde dröuwen,

Verse: 7929    die in haʒ dô truogen:
Verse: 7930    sô vil sie der nider sluogen,

Verse: 7931    daʒ sie ûf den âsen riten.
Verse: 7932    nû kam mit vîntlîchen siten

Verse: 7933    von Mêdâ der fürste Dodontôn,
Verse: 7934    der in strîte minniclîchen lôn

Verse: 7935    hete erworben in sînen tagen.
Verse: 7936    er wolt ouch aldâ prîs bejagen.

Verse: 7937    gegen Tholomêo er kam gevarn,
Verse: 7938    ûf den er tjost niht wolde sparn.

Verse: 7939    sie sancten beide gelîche sper,
Verse: 7940    die helde wârn in strîtes ger,

Verse: 7941    in was ûf einander gâch.
Verse: 7942    Tholomêus den fürsten stach

Verse: 7943    under der schôʒ zer weiche durch:
Verse: 7944    Dodontôn muoste des ackers furch

Verse: 7945    suochen vor nôt mit valle.
Verse: 7946    mit hôchverte schalle

Verse: 7947    schrîten die Kriechen irn ruof.
Verse: 7948    Dodontôn den sînen jâmer schuof

Verse: 7949    die dô wolden rechen sînen tôt.
Verse: 7950    Tholomêus brâhten sie in nôt,

Verse: 7951    ûf den sie nît truogen,
Verse: 7952    ungefuoge sie ûf in sluogen:

Verse: 7953    wær man im niht ze helfe komen,
Verse: 7954    er hæt sîn ende aldâ genomen.

Verse: 7955    mit helflîchem trôste
Verse: 7956    Clitus in erlôste.

Verse: 7957    er kam gegen Ordôphilôn geriten
Verse: 7958    mit eim trunzel in tjostes siten.

Verse: 7959       Dô im Clitus nâhte,
Verse: 7960    Ordôphilôn ouch gegen im gâhte.

Verse: 7961    von ir strîtlîchen ger
Verse: 7962    veilten sie beide mit dem sper,

Verse: 7963    mit pûse ze houfe sie kâmen.
Verse: 7964    solichen bêhurt sie dô nâmen,

Verse: 7965    man sach die ors dâ nider ligen,
Verse: 7966    in beiden sinne wart verzigen.

Verse: 7967    hie einer dort der ander lac.
Verse: 7968    ietslîches volc dô jâmer phlac,

Verse: 7969    sie wânden die fürsten haben verlorn.
Verse: 7970    ir herze stach des jâmers dorn.

Verse: 7971    Clitus wider ze sinnen kam,
Verse: 7972    der Persân ouch craft mit sinnen nam,

Verse: 7973    der im von valle was verzigen.
Verse: 7974    nû wolden sie beide niht mê dâ ligen.

Verse: 7975    zesamen die quecken sprungen,
Verse: 7976    ir swert vaʒte erclungen,

Verse: 7977    die herten schilde sie schrieten,
Verse: 7978    sie wolden sich strîtes nieten.

Verse: 7979    der schilde wênic ganz beleip.
Verse: 7980    Clitus mit slage den Darîân treip,

Verse: 7981    daʒ der unverzagete man
Verse: 7982    vor im strûchen began:

Verse: 7983    durch die zimierde die er truoc
Verse: 7984    und durch den helm er in sluoc,

Verse: 7985    unz ûf die zene der slac geriet.
Verse: 7986    alsô er in von leben schiet.

Verse: 7987    Ordôphilôn sîn ende dô nam,
Verse: 7988    Clitus wider ze orse kam.

Verse: 7989    mit den Kriechen andersît
Verse: 7990    hielt Mâzêus herten strît

Verse: 7991    mit unverzagtem lîbe.
Verse: 7992    des keiser swester ze wîbe

Verse: 7993    was dem fürsten gelobt.
Verse: 7994    er streit reht als ob er tobt.

Verse: 7995    im brâht menlich gemüete
Verse: 7996    die clâre mit ir güete,

Verse: 7997    sîn herze mit minne sie besaʒ.
Verse: 7998    vîntlîche slege er maʒ.

Verse: 7999    der minniclîchen er sich fröute.
Verse: 8000    die Kriechen ungezalt er ströute,

Verse: 8001    er brâhte ir vil von lîbe:
Verse: 8002    des gib ich schult dem wîbe.

Verse: 8003    wann er an die gedâhte,
Verse: 8004    solich kraft im daʒ brâhte,

Verse: 8005    die mit manheit sîn herze erlûhte,
Verse: 8006    daʒ den hôchgemuoten dûhte

Verse: 8007    im wærn hundert als ein man,
Verse: 8008    swa er die eine solde bestân.

Verse: 8009    alsô der minniclîchen gestalt
Verse: 8010    der grâve Jollas mit tôde entgalt,

Verse: 8011    den Mâzêus dô hete erslagen.
Verse: 8012    daʒ wolt Philôtas niht vertragen.

Verse: 8013    sîn ors mit sporn er mante,
Verse: 8014    gegen Mâzêô er rante.

Verse: 8015    von gir daʒ ors in vertruoc.
Verse: 8016    iedoch er einen fürsten sluoc,

Verse: 8017    der des übele genôʒ,
Verse: 8018    daʒ vür Mâzêum mit loufe schôʒ

Verse: 8019    sô snelleclîchen daʒ ros:
Verse: 8020    Ðchus sîn leben dô verlôs,

Verse: 8021    ûf den der slac mit tôde wart brâht,
Verse: 8022    des Mâzêô was erdâht.

Verse: 8023       Die frechen von Ircâniâ
Verse: 8024    wolden irn hêrren rechen dâ,

Verse: 8025    Ðchum, den sie heten verlorn.
Verse: 8026    sie erzeigten strîtlîchen zorn,

Verse: 8027    des Philôtas enphant.
Verse: 8028    er was dar umbe nâch gewant,

Verse: 8029    alsô daʒ er sîn frecheʒ leben
Verse: 8030    vil nâch dem tôde hete gegeben.

Verse: 8031    cleine er eʒ in doch vertruoc,
Verse: 8032    mê dann hundert er ersluoc.

Verse: 8033    man sach in ir helme spalten.
Verse: 8034    sie heten in umbehalten

Verse: 8035    daʒ er niht mohte entwîchen.
Verse: 8036    sînen vesten schilt rîchen

Verse: 8037    heten sie von im gehouwen gar.
Verse: 8038    er nam nû anders schirmes war.

Verse: 8039    vIl slege wurden ûf in getân,
Verse: 8040    die muost er ûf den lîp enphân.

Verse: 8041    hurtâ, wie hurteclîche
Verse: 8042    Permêniô, der manheit rîche,

Verse: 8043    mit im Cênôs und Antigonus,
Verse: 8044    der prîses gernde Crâthêrus

Verse: 8045    an die Irkânen kam gevarn!
Verse: 8046    der leben sie wênic wolden sparn.

Verse: 8047    sie valten vil der werden
Verse: 8048    mit tôde ze der erden.

Verse: 8049    Antigonus einen fürsten sluoc,
Verse: 8050    Phêax, der menlich herze truoc

Verse: 8051    und werden prîs bî sînen tagen.
Verse: 8052    von Gênôs Mîdâ wart erslagen,

Verse: 8053    von Sardîn des alten Mîdâ mâc
Verse: 8054    von sîner hant dâ tôt gelac,

Verse: 8055    der sich doch vil tiure galt.
Verse: 8056    wol drîʒic er mit tôde valt,

Verse: 8057    durch der leben er mit swerte wuot
Verse: 8058    und ûf den anger gôʒ ir bluot.

Verse: 8059    Amphilicôn von einem karchen streit,
Verse: 8060    dâ von er schieʒen niht vermeit:

Verse: 8061    den Alexandrînen fuogt er nôt,
Verse: 8062    vil vellet er ir nider tôt,

Verse: 8063    die er mit sîme gelüppe schôʒ.
Verse: 8064    Crâthêrum sînes strîtes verdrôʒ.

Verse: 8065    daʒ ros er mit den sporn mante,
Verse: 8066    an den karchen er rante.

Verse: 8067    Crâthêrus güete gar entsleif,
Verse: 8068    Amphilicôn er mit dem helme begreif,

Verse: 8069    ûʒ dem wagen er in ructe,
Verse: 8070    daʒ swert mit slage er dructe

Verse: 8071    in sîn houbt durch den helm.
Verse: 8072    zuo im valt er ûf den melm

Verse: 8073    Anthimôdem, sînen wagenman.
Verse: 8074    uneben machten sie den plân

Verse: 8075    mit hûfen von den tôten.
Verse: 8076    den grüenen anger sach man rôten

Verse: 8077    von irm bluote, daʒ sie verguʒʒen,
Verse: 8078    dar inne die tôten fluʒʒen.

Verse: 8079       Alrêst samente sich der strît.
Verse: 8080    Permêniô truoc den vînden nît,

Verse: 8081    daʒ er in dô erzeigte.
Verse: 8082    ir leben sîn hant dô veigte.

Verse: 8083    dâ sie mit den Kriechen striten,
Verse: 8084    dar kom er mit grimme geriten.

Verse: 8085    gegen im ûʒ der vînde scharn
Verse: 8086    kam ein Darîân gevarn.

Verse: 8087    ein swære lanze er fuorte,
Verse: 8088    daʒ ors mit sporn er ruorte.

Verse: 8089    Permêniô kunde sich niht sûmen,
Verse: 8090    Dîmôn lêrt er den satel rûmen:

Verse: 8091    mit solchen kreften er in stach,
Verse: 8092    daʒ man in tôten vallen sach.

Verse: 8093    sîn ende er dô an tjoste nam.
Verse: 8094    eim Kriechen daʒ ze staten kam,

Verse: 8095    der ouch von tjostes gruoʒe
Verse: 8096    ûf der planîe was ze fuoʒe,

Verse: 8097    dâ von er schumpfentiure kôs:
Verse: 8098    Permêniô gap Ðrestî daʒ ros,

Verse: 8099    dar ûf der unverzagte saʒ:
Verse: 8100    sîn hant der vînde niht vergaʒ.

Verse: 8101    Isannen den clâren,
Verse: 8102    der in sînen jungen jâren

Verse: 8103    lop mit werdem prîse truoc;
Verse: 8104    Permêniô ouch den fürsten sluoc

Verse: 8105    den künec von Agrimontîn,
Verse: 8106    des tôt die wîp lêrte pîn.

Verse: 8107    die minne verlust dô enphienc
Verse: 8108    an dem dô schedelich mort ergienc.

Verse: 8109    umbe den valsches frîen
Verse: 8110    hôrt man sie in jâmer schrîen

Verse: 8111    und jæmerlîchen umb die clagen
Verse: 8112    ir diener, die dô wurden erslagen,

Verse: 8113    die sie beidersît verlôs,
Verse: 8114    an den sie grôʒen jâmer kôs.

Verse: 8115    vil minne lônes dô vertarp
Verse: 8116    an Isannes, dô er erstarp.

Verse: 8117    waʒ ir herze jâmers vant,
Verse: 8118    der er mit minne was bekant,

Verse: 8119    die im nâch dienst gap süeʒen lôn,
Verse: 8120    die künigîn von Celidôn,

Verse: 8121    die im mit minne bôt süeʒen lîp,
Verse: 8122    daʒ vil wunneclîche wîp,

Verse: 8123    die im der wirde günstic was.
Verse: 8124    jâ wundert mich ob sie genas,

Verse: 8125    dô ir kâmen die mære
Verse: 8126    daʒ ir hêrre erslagen wære.

Verse: 8127       Den dô die minne haʒʒet,
Verse: 8128    Permêniô sich niht laʒʒet.

Verse: 8129    under den werden begienc er mort,
Verse: 8130    dâ von frow Vênus jâmer hôrt

Verse: 8131    und immer wernde clag enphienc.
Verse: 8132    sîn zorn vast über die fürsten gienc.

Verse: 8133    Permêniô in dem strîte
Verse: 8134    machte in gedrenge wîte.

Verse: 8135    gegen drin fürsten kam er gevarn,
Verse: 8136    die ûf in strît niht kunden sparn.

Verse: 8137    man sach die drî mit frechen liden
Verse: 8138    ûf dem unverzagten smiden

Verse: 8139    als smide ûf einen anebôʒ.
Verse: 8140    Permêniô sîner kraft genôʒ,

Verse: 8141    daʒ er sîn leben dô behielt.
Verse: 8142    ir helme, ir schilde er von in spielt,

Verse: 8143    durch harnasch die fürsten er verschriet.
Verse: 8144    alsô under in der strît geriet:

Verse: 8145    Âgilôn und Êlân
Verse: 8146    die fürsten tet er lîbes ân;

Verse: 8147    Cherippum von Arâbiâ
Verse: 8148    valt er tôten ouch aldâ;

Verse: 8149    er ströute volkes âne zal
Verse: 8150    ûʒ irn scharn ûf daʒ wal.

Verse: 8151    mit sînen heldes henden
Verse: 8152    kunder ir leben swenden,

Verse: 8153    als der schûr tuot den walt.
Verse: 8154    sô vil het er der werden gevalt,

Verse: 8155    daʒ man ir rote schetern sach,
Verse: 8156    den man dâ vor dicke jach.

Verse: 8157    Diâspes und Eudochiôn
Verse: 8158    die kâmen an Eumênidôn,

Verse: 8159    den wolden sie mit tôde zern.
Verse: 8160    waʒ solt er tuon? er muost sich wern.

Verse: 8161    hie mit geschoʒʒe, dort mit swerte
Verse: 8162    die vînde er strîtes werte.

Verse: 8163    eʒ heten von krefte überlast
Verse: 8164    die Persân nâch ervellet den gast,

Verse: 8165    wann daʒ er gap strîtes gegenbiet.
Verse: 8166    ir leben er ûʒ ir verche schriet.

Verse: 8167    Diâspes valte er dô tôt,
Verse: 8168    Eudochiôn leit von wunden nôt.

Verse: 8169    man sach in ûf und nider
Verse: 8170    daʒ volc vaste ströuwen nider.

Verse: 8171    gegen der Eufrâtes bîsît
Verse: 8172    hielt Nicânor mit vînden strît,

Verse: 8173    den er erzeigt mit swerte haʒ.
Verse: 8174    daʒ velt macht er von bluote naʒ.

Verse: 8175    dâ von man ungefüegen bach
Verse: 8176    ûf der ebnen flieʒen sach

Verse: 8177    in die Eufrâtes ze tal.
Verse: 8178    er machte der vînde sô grôʒen val,

Verse: 8179    mit strîtes ungedulte
Verse: 8180    der velde unebne er fulte.

Verse: 8181       Nû kam dort her gegen in gevarn
Verse: 8182    Edîmus mit gezierten scharn.

Verse: 8183    solt ich sagen al ir gezirde
Verse: 8184    und solicher koste wirde,

Verse: 8185    als mit spæhem sinne
Verse: 8186    süeʒe wîp durch minne

Verse: 8187    heten sie bereitet dar,
Verse: 8188    sô müest ich nemen vil lande war

Verse: 8189    und nennen wâ sie wârn geworht.
Verse: 8190    Cyrus mâc der unervorht

Verse: 8191    ûf Nicânor ein sper zerstach,
Verse: 8192    dâ von jâmers mê geschach

Verse: 8193    an Edîmô dem jungen:
Verse: 8194    an der sît dem fürsten în drungen

Verse: 8195    durch die barbier die sprîʒen,
Verse: 8196    die in blendens niht erlieʒen.

Verse: 8197    Nicânor der krefte wielt,
Verse: 8198    als ein veste gebûwe er hielt,

Verse: 8199    daʒ niht erschricket von dem schûr.
Verse: 8200    jâmer der Persân nâchgebûr

Verse: 8201    und werder wîbe herze wart,
Verse: 8202    den fröide umb Edîmum was verspart.

Verse: 8203       Hurtâ, wie dô geflôret kam
Verse: 8204    an dem man rîche kost vernam

Verse: 8205    an harnasche und an zimirde,
Verse: 8206    als im sie durch sîn wirde

Verse: 8207    und durch minne sanden
Verse: 8208    clâre wîp ûʒ manegen landen.

Verse: 8209    verdient er daʒ niht umb die wîp,
Verse: 8210    die alsô zierten sînen lîp?

Verse: 8211    jâ er. sie brâhten in dar zuo
Verse: 8212    daʒ er spâte unde fruo

Verse: 8213    in ritterschaft sich wâgte.
Verse: 8214    durch sie in des niht betrâgte.

Verse: 8215    man nam ouch an sîner schar
Verse: 8216    von gezierde wunder war.

Verse: 8217    Negûsar von Ninivê
Verse: 8218    dem tet Edîmus schade wê.

Verse: 8219    sîn kunft mich sêre riuwet.
Verse: 8220    der künc Ninus der êrste erbiuwet

Verse: 8221    Ninivê: er was des swester barn,
Verse: 8222    der hie mit hurte kam gevarn

Verse: 8223    aldar ûf der Kriechen schaden.
Verse: 8224    sich muosten herze in jâmer baden

Verse: 8225    umb werde ritter, die dô striten,
Verse: 8226    an die Negûsar kam geriten.

Verse: 8227    strîtlîcher kunst der fürste genôʒ.
Verse: 8228    disen er sluoc, jenen er schôʒ.

Verse: 8229    hie mit der ax, dort mit dem swerte
Verse: 8230    die Kriechen er tôdes werte.

Verse: 8231    sîn ax wuot Êlim durch daʒ hirn.
Verse: 8232    vaste die Kriechen vor im rirn.

Verse: 8233    von sînes swertes swæren slegen
Verse: 8234    muosten lebens vor im verphlegen

Verse: 8235    Actorides der strîtes milde
Verse: 8236    und Dorilum den nie bevilde

Verse: 8237    er wolde strît nâch prîse tuon:
Verse: 8238    er was des werden Actorides suon.

Verse: 8239    Hermogenem er valte,
Verse: 8240    der ouch aldâ bezalte.

Verse: 8241    die viere und ander frumt er tôt.
Verse: 8242    sîn strît den Kriechen jâmer bôt

Verse: 8243    mit sîner ungefüegen schar.
Verse: 8244    zweinzic tûsent brâht er dar,

Verse: 8245    manegen ritter er verlôs,
Verse: 8246    an den er grôʒen schaden kôs,

Verse: 8247    die er doch ungefuoge rach.
Verse: 8248    dô Philôtas daʒ gesach

Verse: 8249    daʒ der edle Negûsar
Verse: 8250    nam der Kriechen mit tôde war,

Verse: 8251    sîn güete gar an im verswant.
Verse: 8252    an den fürsten er kam gerant.

Verse: 8253    dâ sîn zimierde erlûhte clâr
Verse: 8254    nam er sîn mit slage war,

Verse: 8255    dier im von dem helme sluoc:
Verse: 8256    des helmes herte den slac ab truoc,

Verse: 8257    ûf die ahsel er im geriet,
Verse: 8258    den linken arm er von im schriet.

Verse: 8259    er was des schildes worden blôʒ,
Verse: 8260    des er übel genôʒ.

Verse: 8261    dô er den arm sach verlorn
Verse: 8262    und solichen schaden het gekorn,

Verse: 8263    dar umbe sîn herze fröide vlôch;
Verse: 8264    die ax ze slage er hôhe zôch,

Verse: 8265    die er mit grimme ze tal lieʒ.
Verse: 8266    Aminctas ein hêrre hieʒ,

Verse: 8267    der den schilt für sînen geverten bôt,
Verse: 8268    Philôtas hæte anders den tôt

Verse: 8269    dô enphangen von dem slage.
Verse: 8270    sich wolde mêren des fürsten clage,

Verse: 8271    an dem mêr schaden dô ergienc.
Verse: 8272    sîn ax vaste in dem schilde hienc.

Verse: 8273    die er niht mohte wider geziehen.
Verse: 8274    Philôtas der niht kunde fliehen

Verse: 8275    den andern arm ouch von im swanc.
Verse: 8276    Negûsar sach daʒ dô kranc

Verse: 8277    was sîn strîten und sîn leben,
Verse: 8278    nû wolt er ouch nâch tôde streben.

Verse: 8279    daʒ ors mit sporn er mante,
Verse: 8280    ûf Jollam er rante,

Verse: 8281    den er mit orse nider stieʒ.
Verse: 8282    Jollas dô sîn leben lieʒ,

Verse: 8283    der rosse tepich er dô wart.
Verse: 8284    Negûsar vallen ouch niht spart.

Verse: 8285    die beide ze tôde man trette,
Verse: 8286    ir leben wart dô wette.

Verse: 8287    Jollas ors von schüʒʒen nôt
Verse: 8288    in dem strîte leit den tôt.

Verse: 8289    der anger mit jâmer wart gemischet,
Verse: 8290    daʒ velt mit bluote gefrischet,

Verse: 8291    des man nû wênic blecken sach.
Verse: 8292    die tôten wârn des angers dach,

Verse: 8293    der dô vil was gevalt.
Verse: 8294    daʒ velt nâch jâmer was gestalt.

Verse: 8295    des grüene was erloschen gar,
Verse: 8296    eʒ was nâch jâmer nû gevar.

Verse: 8297       Alexander ûf Pûcival
Verse: 8298    bî dem waʒʒer ûf dem wal

Verse: 8299    mit slegen dô vaʒte mêrte
Verse: 8300    die vînde ersterben lêrte,

Verse: 8301    der bluot er kunde vergieʒen.
Verse: 8302    dâ inne man sie sach flieʒen,

Verse: 8303    die tôt von im wurden erslagen.
Verse: 8304    man hôrt die minne über in clagen

Verse: 8305    umb ir werden dienære,
Verse: 8306    die er mit tôdes swære

Verse: 8307    von ir lebne brâhte.
Verse: 8308    daʒ Darîus ie gedâhte

Verse: 8309    zinses, den er an in hiesch,
Verse: 8310    dâ von man grôʒen jâmer friesch.

Verse: 8311    übel der keiser sich versan.
Verse: 8312    ich wolde daʒ erʒ hæte gelân.

Verse: 8313    jâ stalt er dô solichen mort,
Verse: 8314    dâ von manic herze bekort

Verse: 8315    jâmer, der im ê waʒ unkunt.
Verse: 8316    man vant dô jæmerlîchen funt

Verse: 8317    an den, die brâhte der keiser dar.
Verse: 8318    der er in strîte wart gewar,

Verse: 8319    alt und junc, wie er dâ was,
Verse: 8320    ir deheiner vor im genas.

Verse: 8321    wer im in strîte wider reit,
Verse: 8322    der leben er ûʒ ir verche eneit.

Verse: 8323       Alsô Alexander rach
Verse: 8324    daʒ Darîus zins ûf in sprach

Verse: 8325    beide dô und ouch sider.
Verse: 8326    Exâtreus der samnete wider

Verse: 8327    vil roten, die wârn zerstœret.
Verse: 8328    ich hân alsô gehœret,

Verse: 8329    Exâtreus Darîus bruoder was.
Verse: 8330    er sach gevellet ûf daʒ graʒ

Verse: 8331    zweinzic tûsent oder mê
Verse: 8332    der Persân, die dâ nâmen den rê.

Verse: 8333    etslîcher dô erschoʒʒen wart;
Verse: 8334    mit kiulen starke slege hart

Verse: 8335    sumelîcher dô enphienc,
Verse: 8336    daʒ im daʒ bluot zem munde ûʒ gienc;

Verse: 8337    mit spern und mit dem swerte
Verse: 8338    genuoge man tôdes werte.

Verse: 8339    an den werden moht man schouwen
Verse: 8340    ungefüegeʒ verhouwen,

Verse: 8341    dâ von sie wurden lebens blôʒ.
Verse: 8342    man sach dâ swære und jâmer grôʒ

Verse: 8343    an den, die nû dâ lâgen.
Verse: 8344    die vor hôchverte phlâgen,

Verse: 8345    dirre gegen tôde hischte,
Verse: 8346    jenem die sêle entwischte.

Verse: 8347    Alexander ouch liute dô verlôs,
Verse: 8348    dar umb man in in swære kôs.

Verse: 8349    vil wol ich daʒ sprechen mac:
Verse: 8350    der tôt ist ein gîtic sac.

Verse: 8351    des mordes in niht genuogte,
Verse: 8352    mêr schaden er dannoch fuogte

Verse: 8353    an dem werden Zorcas,
Verse: 8354    der in Êgiptô fürste was.

Verse: 8355    aldâ mit geruoten scharn
Verse: 8356    kam der fürste schône gevarn.

Verse: 8357    was dâ gezierde ê vil gesehen,
Verse: 8358    der muost man disen wunder jehen,

Verse: 8359    die dâ kâmen mit Zorcas.
Verse: 8360       der fürste der schrift sô wîse was,

Verse: 8361    daʒ man vor noch sît
Verse: 8362    biʒ her unz an dise zît

Verse: 8363    nie sô künstic herze vant.
Verse: 8364    Zorcâ was die kunst bekant,

Verse: 8365    an dem gestirne kunder sehen
Verse: 8366    waʒ der werlde solt geschehen:

Verse: 8367    wâ von die jâr gerâten wol
Verse: 8368    an fruht, daʒ wiste der hêrre wol;

Verse: 8369    wa von die jâr niht enbernt,
Verse: 8370    sô sie die liute mangels wernt;

Verse: 8371    wâ von der winter bringet snê.
Verse: 8372    noch wiste der edle fürste mê

Verse: 8373    wâ von der lenze mit sîner kraft
Verse: 8374    die erde bringet berhaft;

Verse: 8375    wâ von der sumer hitze hât
Verse: 8376    und man im herbste wirfet die sât;

Verse: 8377    wie sich unser sanc gelîche
Verse: 8378    dem sange im himelrîche.

Verse: 8379    Zorcas der junge
Verse: 8380    der planêten ordenunge

Verse: 8381    alle wol bekante.
Verse: 8382    sîn herze in wîsheit mante,

Verse: 8383    wie die sunne und Vênus,
Verse: 8384    der mân und Mercûrius,

Verse: 8385    Saturnus, Mars, Jupiter
Verse: 8386    sich rüeren hin unde her;

Verse: 8387    wie verre sie von einander stên
Verse: 8388    in dem ringe, dâ sie gên;

Verse: 8389    wider des himels firmament
Verse: 8390    wie sie mit gewalt stênt;

Verse: 8391    wie allermenlich übergêt
Verse: 8392    mit loufe die sunne die planêt,

Verse: 8393    wie sie der zwelf zeichen alle jâr
Verse: 8394    nimt mit umbeloufe war

Verse: 8395    (wer der namen wil erkennen,
Verse: 8396    die kan ich im wol genennen);

Verse: 8397    wie sie über aht und zweinzic jâr
Verse: 8398    des himels reif durchslîchet gar;

Verse: 8399    wie über niunzehen jâr der mân
Verse: 8400    muoʒ den himel ouch umbegân;

Verse: 8401    wie verre von einander sîn
Verse: 8402    die zwelf zeichen mit liehtem schîn

Verse: 8403    und mit welcher sache
Verse: 8404    ietslich planêt ze gemache

Verse: 8405    ze den zeichen ziuhet;
Verse: 8406    wâ von die planêten senfte fliuhet,

Verse: 8407    wâ von sie güete müegen hân:
Verse: 8408    daʒ wiste wol der wîse man.

Verse: 8409    waʒ stern wir in den lüften sehen,
Verse: 8410    laʒ kunder mit sinne wol spehen.

Verse: 8411    wie die iren schîn füeren,
Verse: 8412    und welich sich dar an rüeren;

Verse: 8413    waʒ dem menschen solde geschehen,
Verse: 8414    laʒ kunder in dem gestirn wol sehen.

Verse: 8415    niht mê ich dâ von sprechen wil:
Verse: 8416    Zorcas hete künste vil;

Verse: 8417    wîsheit, der himel und erde genôʒ,
Verse: 8418    des fürsten herze gar beslôʒ.

Verse: 8419    der Memphîtes Zorcas
Verse: 8420    im selbe in dem gestirne las

Verse: 8421    daʒ er in strîte würde erslagen,
Verse: 8422    dar umbe wolt er niht verzagen:

Verse: 8423    wie er der künste was erwelt,
Verse: 8424    er waʒ des lîbes doch ein helt.

Verse: 8425    er brâht ein wolgeflôrteʒ her
Verse: 8426    schône berihtet ze wer.

Verse: 8427    an im man rîche kost vernam.
Verse: 8428    er selbe ûf einem wagen kam.

Verse: 8429    an dem werden nam man war
Verse: 8430    harnasch lieht nâch snê gevar.

Verse: 8431       Nû merkte rehte Zorcas
Verse: 8432    wa Alexander in strîte was.

Verse: 8433    er solt in strîte sterben,
Verse: 8434    er gedâht er wolt erwerben

Verse: 8435    wie er von dem fürsten wurde erslagen,
Verse: 8436    von dem er hôrt vil prîses sagen:

Verse: 8437    Zorcam sîn herze lêrte
Verse: 8438    an den Macedôn er kêrte,

Verse: 8439    ûf des schilt er vaste schôʒ.
Verse: 8440    mit lûter stimme gap er dôʒ

Verse: 8441    'ist dir inder manheit bî,
Verse: 8442    sô lâ mich niht strîtes frî.

Verse: 8443    des mîn herze gegen dir gert,
Verse: 8444    wol her an mich, du bist gewert.'

Verse: 8445    Alexander von im reit,
Verse: 8446    ungerne er mit dem fürsten streit

Verse: 8447    durch die kunst, die an im was.
Verse: 8448    aber rief Zorcas

Verse: 8449    (er wolde dem Kriechen wecken zorn)
Verse: 8450    'von Neptânabô du bist erborn,

Verse: 8451    des du maht gelougen niht.
Verse: 8452    der schanden man dîner muoter giht,

Verse: 8453    die ir nimmer wirt benomen:
Verse: 8454    du bist von huore bekomen.

Verse: 8455    man hât von dir prîs gesagt,
Verse: 8456    des ist niht, du bist verzagt.

Verse: 8457    wær inder manheit an dir,
Verse: 8458    die möhtest du zeigen hie an mir.

Verse: 8459    wie möhte manheit an dir sîn ?
Verse: 8460    du tarst dich niht gewern mîn.

Verse: 8461    du vellest die unwîsen,
Verse: 8462    wer sol daʒ an dir prîsen?

Verse: 8463    lâ sie varn, kêre an mich
Verse: 8464    hiute dîn zornic gerich!

Verse: 8465    du maht gerne an mir gesigen.
Verse: 8466    an mir die siben künste ligen,

Verse: 8467    die mîn sin besloʒʒen hât.
Verse: 8468    dîn hant prîs an mir begât.

Verse: 8469    du jagest niuwan die dâ fliehen
Verse: 8470    und sich mit strîte von dir ziehen.

Verse: 8471    die kunst von nigromancî
Verse: 8472    wonet ouch mînem herzen bî,

Verse: 8473    von der kunst ich krône trage:
Verse: 8474    von ritterschaft daʒ selbe ich sage.

Verse: 8475    sich, ob ich werde von dir erslagen,
Verse: 8476    waʒ du prîses kanst bejagen.'

Verse: 8477       Alexander was daʒ leit
Verse: 8478    daʒ dirre alsô nâch tôde streit.

Verse: 8479    zühteclich der guote
Verse: 8480    sprach mit senftem muote

Verse: 8481    'wer du sîst, ich râte dir
Verse: 8482    des du solt gerne volgen mir.

Verse: 8483    ich bite dich daʒ du lebest
Verse: 8484    und niht alsô nâch tôde strebest.

Verse: 8485    jâ wærst du schiere verterbet.
Verse: 8486    sô wurde mit dir ersterbet

Verse: 8487    vil künste und guoter sinne,
Verse: 8488    die dîn herze hât inne.

Verse: 8489    du solt mir gelouben daʒ
Verse: 8490    an dir mîn hant niht wirdet naʒ

Verse: 8491    noch mîn swert nâch bluote var.
Verse: 8492    ich nim gegen dir niht strîtes war.

Verse: 8493    ich râte dir daʒ du gerne lebest
Verse: 8494    und alsô niht zer helle strebest,

Verse: 8495    dâ dehein kunst niht erblüet.
Verse: 8496    dîn unsin mich sêre müet.'

Verse: 8497       Dô Alexander daʒ gesprach,
Verse: 8498    Zorcam man von dem wagen sach,

Verse: 8499    an den Macedôn er lief.
Verse: 8500    er sluoc im eine wunde tief

Verse: 8501    in die huf, dâ der halsberc
Verse: 8502    wante und der hosen werc.

Verse: 8503    Alexander triuwen wielt.
Verse: 8504    von im ûf daʒ velt er hielt

Verse: 8505    durch anders niht wan umbe daʒ
Verse: 8506    daʒ der fürste deste baʒ

Verse: 8507    gegen dem künsterîchen
Verse: 8508    sînem zorne mohte entwîchen.

Verse: 8509    Alexander bluote sêre.
Verse: 8510    sîn arzât gap im die lêre,

Verse: 8511    wie er hart verwundet was,
Verse: 8512    daʒ er des slages wol genas.

Verse: 8513    Meleâger wolt niht vertragen
Verse: 8514    daʒ der hêrre was geslagen.

Verse: 8515    der künsterîche Zorcas
Verse: 8516    an den beinen sunder harnasch was:

Verse: 8517    Meleâger was ze strîte cluoc,
Verse: 8518    dem edlem Zorcam er sluoc

Verse: 8519    beide knie von einander.
Verse: 8520    daʒ clagte Alexander.

Verse: 8521    alsô der fuirste ervellet wart.
Verse: 8522    der strît geriet aldâ sô hart,

Verse: 8523    dâ von im lebens wart verzigen.
Verse: 8524    nâch valle zetret sach man in ligen.

Verse: 8525    den tôt sach man in lernen,
Verse: 8526    den geist sanden sie den sternen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.