TITUS
Ulrich von Eschenbach, Alexander
Part No. 63
Previous part

Chapter: 84b  
Alexanders Schlachtvorbereitungen


Verse: 7248       Alexander der werde man

Verse: 7249    hielt sich ouch vast ze gote,
Verse: 7250    und fuor in sîme gebote.

Verse: 7251    ob den sô siges kan gezemen,
Verse: 7252    des sol nieman wunder nemen.

Verse: 7253       In Issôn der fürste lac,
Verse: 7254    dar inne er hôchverte phlac.

Verse: 7255    Darîus dem schaden nâhte.
Verse: 7256    durch daʒ gebirge er gâhte

Verse: 7257    an der Eufrâtes ze tal.
Verse: 7258    von busînen hôrt man schal

Verse: 7259    und von anderm fröidenspil.
Verse: 7260    man sach vil kocken unde kiel

Verse: 7261    gezieret ûf dem waʒʒer komen.
Verse: 7262    im het für kurzewîle genomen

Verse: 7263    ein ritter der was hôch gestigen
Verse: 7264    ûf einen turn. nû sach er ligen

Verse: 7265    der vînde etslîche mâʒe
Verse: 7266    in strîtlîchem gelâʒe.

Verse: 7267    den unverzagten dûhte
Verse: 7268    wie daʒ velt erlûhte

Verse: 7269    von irm harnasch, daʒ gap schîn,
Verse: 7270    als ob cleine sunnelîn

Verse: 7271    durch die hol in vinster drungen.
Verse: 7272    manegen ritter jungen

Verse: 7273    sach er halden in wirde
Verse: 7274    von spæher kost zimirde,

Verse: 7275    als sie heten bereitet dar
Verse: 7276    die ir mit minne nâmen war

Verse: 7277    vil schônheit man mit in fuorte.
Verse: 7278    der minne kraft sie ruorte,

Verse: 7279    die sie ze ritterschefte twanc.
Verse: 7280    zagheit was an ir herze kranc.

Verse: 7281    der wartman wîsheit wielt.
Verse: 7282    ûf dem turne er sich enthielt,

Verse: 7283    er wolde des heres komen sehen
Verse: 7284    und ir geverte reht erspehen.

Verse: 7285    Ir was sô vil nû komen durch,
Verse: 7286    daʒ er velt noch die furch,

Verse: 7287    berc noch die ouwen
Verse: 7288    ninder blôʒ mohte schouwen,

Verse: 7289    eʒn wær vier mîl al umbelegt.
Verse: 7290    dannoch sich mange storje regt.

Verse: 7291    die nâch den êrsten kâmen gevarn
Verse: 7292    ritterlich mit gezierten scharn.

Verse: 7293    die banier ûf dem velde flugen
Verse: 7294    gestact ûf karren, die zugen

Verse: 7295    gewâpent kemmel und merrinder.
Verse: 7296    nâch den sach er hin hinder

Verse: 7297    komen vil elephande,
Verse: 7298    der last in strîtes mande.

Verse: 7299    er gedâhte er solt sich sûmen.
Verse: 7300    den turn begunder rûmen.

Verse: 7301    er kam dâ er den fürsten vant,
Verse: 7302    den er vaste ze strîte mant.

Verse: 7303       Er sprach 'wol ûf, welt ir iuch wern,
Verse: 7304    wir sullen hiute vînde zern

Verse: 7305    und prîs an in erwerben.
Verse: 7306    sie müeʒen vor uns ersterben.

Verse: 7307    al die werlt suocht uns mit her.
Verse: 7308    jâ hât lant unde mer

Verse: 7309    Darîus kraft bedecket,
Verse: 7310    daʒ uns ze strîte wecket.'

Verse: 7311    dô Alexander het vernomen
Verse: 7312    daʒ Darîus was über komen,

Verse: 7313    den schilt er ze ahsel swief.
Verse: 7314    mit lûter stimme der werde rief

Verse: 7315    'harnasch her! harnasch her!
Verse: 7316    nû ist mir komen des ich ger.'

Verse: 7317    die fürsten er vaste mante.
Verse: 7318    gegen den Persânen er rante

Verse: 7319    allen sînen fürsten vor.
Verse: 7320    werder prîs truoc in enbor.

Verse: 7321    unsiteclich der werde vogt
Verse: 7322    gegen den Darîânen zogt,

Verse: 7323    der schar er schiere hete zertrant.
Verse: 7324    mit im die werden kâmen gerant

Verse: 7325    die gaʒʒen durch sie hieben.
Verse: 7326    man sach dô helme clieben.

Verse: 7327    die Persân riefen 'Jupiter'
Verse: 7328    (daʒ in der hülfe was ir ger),

Verse: 7329    'Macedô was dirre krîe.
Verse: 7330    hurtâ, wie der frîe

Verse: 7331    in dem her sich umbewarf!
Verse: 7332    sîn swert ze beiden ecken scharf

Verse: 7333    vast eʒ durch die helme wuot.
Verse: 7334    Persân heten ouch den muot

Verse: 7335    daʒ sie wolden strîten.
Verse: 7336    sie heten an allen sîten

Verse: 7337    die Alexandrînen umbezogen:
Verse: 7338    wâ er sie sach ze houfe gesmogen,

Verse: 7339    aldar mit hurte er dructe;
Verse: 7340    von einander er sie ructe,

Verse: 7341    wâ er mit sînen scharn fuor.
Verse: 7342    als mir die âventiure swuor,

Verse: 7343    im greif dô nieman in den zoum.
Verse: 7344    wâ gedrenge was, dâ macht er roum.

Verse: 7345    wol zweinzic tûsent valten sie dâ tôt.
Verse: 7346    solich enphâhen er in bôt,

Verse: 7347    alsô kund er sie des enziehen,
Verse: 7348    daʒ sie ê jâhen er wolde fliehen.

Verse: 7349    ungefuoge erʒ an in rach.
Verse: 7350    ir hoffenunge was nû swach

Verse: 7351    der sie sich vor versâhen,
Verse: 7352    dô sie im fliehens jâhen.

Verse: 7353    sie heten alsô lûten ruof,
Verse: 7354    der vil ungemaches schuof

Verse: 7355    den Kriechen und Alexander.
Verse: 7356    manege rote vander,

Verse: 7357    an die er mit strîte kam,
Verse: 7358    der ein die ander niht vernam.

Verse: 7359    wærn sie einer sprâche gewesen,
Verse: 7360    jâ möhte nimer sîn genesen

Verse: 7361    der unverzagte Macedô.
Verse: 7362    Darîus hete gedâht alsô,

Verse: 7363    er solt in umbeziehen,
Verse: 7364    daʒ er niht möht entfliehen:

Verse: 7365    er wolt in gar gewissen haben.
Verse: 7366    sîn volc hieʒ er vaste an in draben

Verse: 7367    (eʒ was vil wîslich getân):
Verse: 7368    so enwolt et disen werden man

Verse: 7369    guot gelücke niht verlân.
Verse: 7370    wem Fortûna heiles gan

Verse: 7371    und wem eʒ bî ist mit sælden siten,
Verse: 7372    der hât schiere gestriten.

Verse: 7373    gewissem dinge eʒ schirm gît.
Verse: 7374    nieman sô sêre beswæret lît,

Verse: 7375    eʒn künne in schiere erheben hôch.
Verse: 7376    guot gelücke die Persân vlôch,

Verse: 7377    stæte dinc eʒ kan erwegen,
Verse: 7378    ganz gelücke eʒ wil ouch regen.

Verse: 7379    eʒ macht den frischen ungesunt,
Verse: 7380    vesten dingen tuot eʒ wanken kunt,

Verse: 7381    grôʒe hœhe macht eʒ nider,
Verse: 7382    eʒ vert hin, eʒ vert wider,

Verse: 7383    eʒ vert dar, eʒ vert her,
Verse: 7384    gelück ist deheiner stæte wer.

Verse: 7385       Alexander mit den sînen
Verse: 7386    fuogte den vînden tôdes pînen.

Verse: 7387    nâch dem strîte in müede lêrte
Verse: 7388    daʒ er in Issôn kêrte.

Verse: 7389    dô lêrte manegem tôdes val
Verse: 7390    vor Issôn behaben daʒ wal.

Verse: 7391    Alexander was in der stat.
Verse: 7392    sîn ritter er gemeine bat

Verse: 7393    daʒ sie sich legten ûf daʒ velt
Verse: 7394    und dar ûf slüegen ir gezelt.

Verse: 7395    daʒ vil gâhes geschach.
Verse: 7396    schône man sie ligen sach.

Verse: 7397    nû was ir her doch cleine.
Verse: 7398    eʒ gebôt der valsches reine

Verse: 7399    daʒ die fürsten vür in kæmen,
Verse: 7400    grâven, ritter, und vernæmen

Verse: 7401    waʒ er in sagen wolde,
Verse: 7402    wer bî im strîten solde.

Verse: 7403    die fuoʒgenger wâren in der kür,
Verse: 7404    er sprach die solden zogen vür.

Verse: 7405    ze Nicânor der fürste sprach
Verse: 7406    'dich man ie bî manheit sach,

Verse: 7407    der ich noch getrûwe dir
Verse: 7408    und daʒ du helfe bietest mir,

Verse: 7409    als dich dîn triuwe lêret.
Verse: 7410    dîn menlich prîs dich êret.

Verse: 7411    ze mîner zeswen sîten
Verse: 7412    solt du bî mir strîten.

Verse: 7413    Tholomêus dir helfe biutet,
Verse: 7414    des herze ouch manheit triutet

Verse: 7415    und tât die sich ze prîse zôch
Verse: 7416    (unprîs ie Tholomêum flôch),

Verse: 7417    und der burcgrâve Aminctas,
Verse: 7418    der ie der vînde schûr was.

Verse: 7419    sîn schilt sich ie gegen der herte bôt,
Verse: 7420    an im ist alle zacheit tôt.

Verse: 7421    sîn frecheʒ herze nie vergaʒ
Verse: 7422    der dinge die man gegen prîse maʒ.

Verse: 7423    Perdicas mit sîner frechen schar
Verse: 7424    neme dâ mit dir strîtes war.

Verse: 7425    lobes dem werden nie gebrach,
Verse: 7426    wâ man in bî vinden sach.

Verse: 7427    der kan mit sînen henden
Verse: 7428    der vînde hôchvart swenden.

Verse: 7429    Cênôs sol man ouch dâ sehen,
Verse: 7430    dem man ie hât gejehen

Verse: 7431    daʒ er mit ritterlîcher tât
Verse: 7432    in strîte prîs erworben hât.

Verse: 7433    menlîcher wirde man im ie jach.'
Verse: 7434    ze Clitus er daʒselbe sprach,

Verse: 7435    er solde mit den sînen
Verse: 7436    in der selben rote erschînen.

Verse: 7437    er sprach ze Meleâger
Verse: 7438    'gedenke, helt, daʒ biʒ her

Verse: 7439    dîn herze manheit fuorte,
Verse: 7440    zagheit eʒ nie beruorte.

Verse: 7441    nû schaffe hiute daʒ dîn hant
Verse: 7442    der vînde hôchvart mache phant.'

Verse: 7443       Die fürsten, die ich hân genant,
Verse: 7444    an den er guote helfe vant.

Verse: 7445    als mir die âventiure las,
Verse: 7446    ietslîcher mit sunder schar dâ was,

Verse: 7447    den sie ze fürsten wârn gegeben.
Verse: 7448    sie kunden swenden der vînde leben.

Verse: 7449    doch was ir geleite vor
Verse: 7450    der unverzagte Nicânor.

Verse: 7451    er schuof zem linken teile,
Verse: 7452    der den tôt gap wolveile

Verse: 7453    den vînden, wâ er an sie kam,
Verse: 7454    Permêniô, als ich vernam.

Verse: 7455    ze dem wart geschaffet dar
Verse: 7456    Crâthêrus mit sîner frechen schar.

Verse: 7457    des gemüete ie stunt sô,
Verse: 7458    daʒ er strîtes was frô,

Verse: 7459    wâ er mit vinden den solt tuon.
Verse: 7460    Philôtam, Permêniônis suon,

Verse: 7461    und Hector sînen bruoder,
Verse: 7462    die mit tôdes ruoder

Verse: 7463    durch die vînde kunden varn,
Verse: 7464    die schuof er dar mit iren scharn.

Verse: 7465    Antigonum er zuo in fuogte
Verse: 7466    mit den sînen, des sie genuogte.

Verse: 7467    noch heten ze strîte sich geschart
Verse: 7468    an den nie zagheit funden wart

Verse: 7469    Dîmus und die geste.
Verse: 7470    sie wârn irs muotes veste.

Verse: 7471    mit scharn sie schône lâgen,
Verse: 7472    sie torstenʒ wol gewâgen.

Verse: 7473       In harnasche Alexander
Verse: 7474    von einer schar ze der ander

Verse: 7475    mit verbundem helme rante,
Verse: 7476    die fürsten er vaste mante,

Verse: 7477    mit im sîn schiltgeverte
Verse: 7478    Eufêstiô, in strîte der herte.

Verse: 7479    in stieʒ daʒ alter glîcheʒ zil.
Verse: 7480    er hete mit ritterlîchem spil

Verse: 7481    wirde und prîs gewunnen.
Verse: 7482    zagheit was im entrunnen,

Verse: 7483    daʒ man die ninder bî im sach.
Verse: 7484    schœne und tugende man im jach.

Verse: 7485    er het sô wunneclîchen lîp,
Verse: 7486    dar umb in minten süeʒe wîp,

Verse: 7487    der fröiden vil an im lac.
Verse: 7488    die clagten verlustbæren tac,

Verse: 7489    dô er rûmte Kriechenlant;
Verse: 7490    die man nâch im in riuwen vant.

Verse: 7491    des lîbes cleine er was doch starc.
Verse: 7492    der künc sîn heimelich zuo im barc,

Verse: 7493    er getrûwet wol dem jungen man
Verse: 7494    (alrêrst entsprungen im die gran).

Verse: 7495    bî Alexander man in rîten sach,
Verse: 7496    der ze sînem volke sprach

Verse: 7497    'erzeigent hiute triuwen site.
Verse: 7498    fürsten, grâven, ritter ich bite

Verse: 7499    dar zuo waʒ ich liute hân,
Verse: 7500    daʒ sie vorhte wellen lân

Verse: 7501    und manheit an sich vaʒʒen
Verse: 7502    gegen den strîtes laʒʒen.

Verse: 7503    nû seht sie sint vil nâch verzagt.
Verse: 7504    waʒ man uns grûse von in sagt,

Verse: 7505    der merke ich eine niht an in.
Verse: 7506    wir erwerben hiute prîses gewin.

Verse: 7507    lât hiute swert erclingen,
Verse: 7508    lernent nâch lobe ringen

Verse: 7509    und nâch hôher wirdikeit,
Verse: 7510    die man nâch Achille seit

Verse: 7511    und nâch vil fürsten, die sint begraben,
Verse: 7512    der namen wir noch lebendic haben,

Verse: 7513    daʒ ir iuch zwîvels welt verzîhen.
Verse: 7514    frîheit ich wil verlîhen

Verse: 7515    den die ê wârn mîn eigen.
Verse: 7516    ich wil triuwe erzeigen.

Verse: 7517    iuch suln erbarmen niht die sper.
Verse: 7518    lât iuch vinden in strîtes ger!

Verse: 7519    lernent vaste die bogen ziehen,
Verse: 7520    lêrt die vînde vor iu fliehen.

Verse: 7521    ir hêrren mit den slingen,
Verse: 7522    ir sult hiute die arme erswingen,

Verse: 7523    daʒ man nâch iuwer lebens tagen
Verse: 7524    von iuwer manheit müeʒe sagen.

Verse: 7525    ir mit den helmbarten,
Verse: 7526    durch die vînde schrôtent scharten,

Verse: 7527    laʒ sie iuwer kunft enphinden
Verse: 7528    und vor iu mit valle swinden.

Verse: 7529    füegent den Asiânen leit!'
Verse: 7530       Aber ze den fürsten er reit.

Verse: 7531    er sprach 'ir sît dâ vür erkant
Verse: 7532    daʒ man ie triuwe an iu vant

Verse: 7533    und manheit, die des geruochten
Verse: 7534    daʒ sie iuch mit strîte suochten.

Verse: 7535    die werlt kan des gegen uns gern,
Verse: 7536    sie wil uns diensts und helfe wern.

Verse: 7537    seht erwunschten tac und ouch die zît,
Verse: 7538    dâ unser fröiden vil an lît,

Verse: 7539    die uns mit sælden sît gehieʒ
Verse: 7540    Fortûna, die uns nie verlieʒ.

Verse: 7541    sie was uns bî mit helfe siten,
Verse: 7542    dô wir mit Thêbânern striten:

Verse: 7543    dô was sie uns siges wer.
Verse: 7544    von Eurôpâ unz biʒ her

Verse: 7545    habe wir vil lande betwungen.
Verse: 7546    uns ist noch wol gelungen.

Verse: 7547    ûf den selben gedingen
Verse: 7548    wel wir nâch prîse ringen.

Verse: 7549    als ich die vînde hân gesehen,
Verse: 7550    ich enmac an in gespehen

Verse: 7551    ninder werlîchen lîp.
Verse: 7552    nû seht sie halten als die wîp.

Verse: 7553    niuwan hôchvart sie sich flîʒen.
Verse: 7554    merkent wie sie von golde glîʒen.

Verse: 7555    sie füeren wîbes cleider an,
Verse: 7556    wie möhten sie menlich site hân?

Verse: 7557    sie kunnen zwâre niht wann dröun.
Verse: 7558    uns sol alhie ir golt erfröun,

Verse: 7559    des sie vil haben herbrâht;
Verse: 7560    des hât frou Sælde uns erdâht.

Verse: 7561    wie solt in sic genâhen?
Verse: 7562    sie turren niht wunden enphâhen,

Verse: 7563    sie sint weicher dann die frouwen.
Verse: 7564    durch zimier sul wir sie houwen

Verse: 7565    mit herten swerten, die wir tragen,
Verse: 7566    dâ von wir werden prîs bejagen.

Verse: 7567    ir habt ie liebe mir verjehen
Verse: 7568    und triwen, daʒ lât mich hiute sehen.

Verse: 7569    wann ir sô gewerbet
Verse: 7570    daʒ ir die vînde ersterbet

Verse: 7571    und ich von iu verhouwen sehe
Verse: 7572    iuwer helme, schilde, alrêrst ich jehe

Verse: 7573    daʒ ir mit triuwen meinet mich,
Verse: 7574    der ich gegen iu versehe mich.

Verse: 7575    wiʒʒet, wer sîne vînde spart,
Verse: 7576    daʒ sich der niht wol bewart.

Verse: 7577    rechent hiute den alden nît,
Verse: 7578    den von alder her an dise zît

Verse: 7579    gegen uns die Persân tragen.
Verse: 7580    sie haben uns friunde vil erslagen,

Verse: 7581    sie haben von unrehter kraft,
Verse: 7582    unser vordern gemacht zinshaft,

Verse: 7583    sie haben uns noch vür eigen:
Verse: 7584    nû sul wir in daʒ erzeigen

Verse: 7585    mit slegen und mit tôdes pîn,
Verse: 7586    daʒ wir frî wellen sin.

Verse: 7587    waʒ ir der vînde vor iu seht,
Verse: 7588    wie grôʒ ir iren hûfen speht,

Verse: 7589    ob wir sie gar erslüegen;
Verse: 7590    jâ solt uns niht genüegen

Verse: 7591    vür schaden, den uns haben getân
Verse: 7592    Asiân und Persân.

Verse: 7593    gedenkent an kint und an wîp!
Verse: 7594    habt werlîchen lîp!

Verse: 7595    diz giltet niht wann sterben
Verse: 7596    oder wir müeʒen prîs erwerben.

Verse: 7597    sît hiute der vînde schûr!
Verse: 7598    waʒ ir gewinnet, daʒ sî ûr,

Verse: 7599    des ich iuch williclîchen wer:
Verse: 7600    niuwan aleine des lobes ich ger.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.