TITUS
Ulrich von Eschenbach, Alexander
Part No. 62
Previous part

Chapter: 84a  
Exkurs: Geschichte Gêdeôns


Verse: 7145       uns ist in dirre werlde leben
Verse: 7146    zweier dinge gewalt gegeben:

Verse: 7147    ûf ein êwic verliesen
Verse: 7148    oder ze gewinne kiesen.

Verse: 7149    wer an daʒ bœse sînen muot
Verse: 7150    wendet oder daʒ gerne tuot,

Verse: 7151    dâ hin ist sîn geleite
Verse: 7152    der bœse vil bereite;

Verse: 7153    wer sîn gemüete ze gote lât,
Verse: 7154    bî dem ist got an aller stat

Verse: 7155    und hilfet im ze aller stunt.
Verse: 7156    daʒ ist dicke worden kunt,

Verse: 7157    sus was eʒ ie und muoʒ noch wesen.
Verse: 7158    von eime edlen Juden wir lesen,

Verse: 7159    dem von den vînden dicke wê
Verse: 7160    geschach in strîte durch die ê,

Verse: 7161    die wolt er nâch gotes gebote tragen.
Verse: 7162    er hôrt im eine stimme sagen,

Verse: 7163    daʒ sich die heiden mit starkem her
Verse: 7164    machten gegen im ze wer,

Verse: 7165    und die starker craft wærn:
Verse: 7166    des solt er sich niht erværn,

Verse: 7167    got het des siges im gedâht.
Verse: 7168    Gêdeôn doch gerne vaht.

Verse: 7169    er was ein helt unverzagt.
Verse: 7170    die schrift vil prîses von im sagt.

Verse: 7171    ze sîme volke der fürste sprach
Verse: 7172    'got uns ie wârer helfe jach,

Verse: 7173    alsô wil er uns immer jehen.'
Verse: 7174    des lâʒ ich iuch urkunde sehen.'

Verse: 7175    dô eʒ an den âbent kam,
Verse: 7176    von wollen einen schæper er nam,

Verse: 7177    den hieʒ er dan ûf daʒ velt
Verse: 7178    verre legen vür die gezelt.

Verse: 7179    er sprach 'wirt der von touwe naʒ
Verse: 7180    und niht die erde, bewîset daʒ

Verse: 7181    daʒ wir den sic sullen hân.'
Verse: 7182    des morgens dô der werde man

Verse: 7183    besehen wolt die wollen,
Verse: 7184    die was gar envollen

Verse: 7185    betowet und niht die erde.
Verse: 7186    des fröute sich der werde,

Verse: 7187    dô in daʒ got bewîste.
Verse: 7188    Gêdeôn der geprîste

Verse: 7189    hieʒ daʒ volc komen dar
Verse: 7190    und der wunder nemen war.

Verse: 7191    dô daʒ volc die wârheit sach,
Verse: 7192    grôʒer fröiden eʒ im jach

Verse: 7193    und begonden sich ze strîte
Verse: 7194    berihten an der zîte.

Verse: 7195       Aber sprach der fürste hêr
Verse: 7196    'ir sult noch trôstes sehen mêr,

Verse: 7197    und unser got wil ruochen,
Verse: 7198    daʒ well wir hînt versuochen.'

Verse: 7199    Gêdeôn der wol bedâht,
Verse: 7200    dô eʒ nû wolde werden naht,

Verse: 7201    dô hieʒ der fürste mære
Verse: 7202    aber den schæpære

Verse: 7203    tragen ûf ein schœneʒ gras,
Verse: 7204    sô eʒ schœnest dâ was.

Verse: 7205    er sprach 'ob daʒ alsô ergêt,
Verse: 7206    daʒ dirre schæper hînt bestêt

Verse: 7207    trucken und in der tou verbirt
Verse: 7208    und die erde begoʒʒen wirt,

Verse: 7209    daʒ ist ein zeichen daʒ wir gesigen
Verse: 7210    an den vînden und in ob geligen,

Verse: 7211    und daʒ der hôchgelobte got
Verse: 7212    uns von sînem gebot

Verse: 7213    und von sîner craft sol lœsen
Verse: 7214    von dem volke bœsen,

Verse: 7215    daʒ uns wil trîben von der ê,
Verse: 7216    die der werde Moiʒê

Verse: 7217    ûf Sînâi dem berge nam.'
Verse: 7218    des morgens dô die naht hin kam,

Verse: 7219    dô gienc der fürste schouwen
Verse: 7220    mit dem volke ûf der ouwen.

Verse: 7221    dô vant er den schæpære
Verse: 7222    als er gederret wære,

Verse: 7223    die bluomen befloʒʒen,
Verse: 7224    daʒ gras wol begoʒʒen

Verse: 7225    als eʒ genetzet hete der tou,
Verse: 7226    daʒ der werden wênic rou.

Verse: 7227    wol kan der hôchgelobte got
Verse: 7228    die sînen trœsten in nôt.

Verse: 7229       Gêdeôn was wol ze wer
Verse: 7230    mit eime creftigen her.

Verse: 7231    dô er ûf strît sich het beriht,
Verse: 7232    dô vernam der hêrre, als uns giht

Verse: 7233    die schrift, daʒ im ein stimme sagt
Verse: 7234    daʒ der fürste unverzagt

Verse: 7235    solt daʒ volc von im lân,
Verse: 7236    die vînde mit kleinem her bestân,

Verse: 7237    ûf daʒ an im besunder
Verse: 7238    erschine gotes wunder,

Verse: 7239    sîn gotlich craft und sîn gewalt.
Verse: 7240    Gêdeôn der degen balt,

Verse: 7241    als in die stimme bewîset het,
Verse: 7242    gar unervorht er daʒ tet.

Verse: 7243    niht vil liute er mit im nam,
Verse: 7244    mit den er an die vînde kam

Verse: 7245    und sluoc der manic tûsent tôt.
Verse: 7246    die sînen liten keine nôt.

Verse: 7247    er fuorte ir vil gevangen dan.



Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.