TITUS
Ulrich von Eschenbach, Alexander
Part No. 61
Previous part

Chapter: 84  
Darius' Schlachtvorbereitungen (Issos)


Verse: 6849       Darîus hôchverte phlac.
Verse: 6850    des morgens als erlûhte der tac

Verse: 6851    und die sunne wolde ûf gân,
Verse: 6852    dô het er gerne strît getân.

Verse: 6853    dâ wâren mit im künge hêr
Verse: 6854    vier und zweinzic und eines mêr.

Verse: 6855    ietslîcher selbsehste fürste was,
Verse: 6856    als mir der mære meister las,

Verse: 6857    die ûf dem plân dâ lâgen
Verse: 6858    und grôʒer rîcheit phlâgen.

Verse: 6859    man mohte ûf irn gezelden
Verse: 6860    golt, edel gesteine melden,

Verse: 6861    daʒ dar ûf was verworht.
Verse: 6862    dâ heten die fürsten unervorht

Verse: 6863    aller gezierde wunder.
Verse: 6864    ietslîcher fürste besunder

Verse: 6865    het dâ sîne frouwen.
Verse: 6866    man moht dâ wirde schouwen

Verse: 6867    beide an anger und ûf velde.
Verse: 6868    mit süeʒem minnegelde

Verse: 6869    was eʒ etswâ beʒtröut,
Verse: 6870    daʒ die werden wol erfröut,

Verse: 6871    wie eʒ halt hernâch ergê.
Verse: 6872    jâ wart aldâ ûf dem clê

Verse: 6873    ûf der süeʒen minne schilt
Verse: 6874    solicher tjost alsô gespilt,

Verse: 6875    daʒ man die clâren vallen sach.
Verse: 6876    âne zürnen daʒ geschach,

Verse: 6877    wart etelîcher verruct ir schôʒ,
Verse: 6878    daʒ ir daʒ diehel erblecte blôʒ.

Verse: 6879    in sô süeʒer ougelweide
Verse: 6880    gesach man nie anger noch heide.

Verse: 6881    dâ brâhten der süeʒen wîbe blicke
Verse: 6882    in manic herze senede stricke,

Verse: 6883    dâ von die vesten wurden versêret,
Verse: 6884    dâ bî in hôchgemüete mêret.

Verse: 6885    ûf gezelden wârn dâ rîche dach.
Verse: 6886    innen man sie baʒ gezieret sach

Verse: 6887    von deʒ wunsches âventiuren.
Verse: 6888    an den wunneclich gehiuren

Verse: 6889    man dâ soliche wunne kôs,
Verse: 6890    dâ von die rôse irn schîn verlôs,

Verse: 6891    die der minniclîchen
Verse: 6892    mündel niht kunde gelîchen.

Verse: 6893    die süeʒen hergesellen
Verse: 6894    minnen stricke kunden stellen,

Verse: 6895    dâ mit sie manegen viengen
Verse: 6896    und süeʒen gewalt an im begiengen.

Verse: 6897    Frou minne die kan beide
Verse: 6898    füegen liep mit leide.

Verse: 6899    sie gît trûren dar under frô.
Verse: 6900    in swære steigt sie doch herze hô;

Verse: 6901    swie vil sie senede kunne geben,
Verse: 6902    sie zilt dâ bî doch süeʒeʒ leben.

Verse: 6903    jâ wæne ich daʒ die minne ie bôt
Verse: 6904    fröide und dâ bî süeʒe nôt.

Verse: 6905       dô was rîcher gezelde vil.
Verse: 6906    von zwein ich iu sagen wil.

Verse: 6907    daʒ eine hete die keiserîn,
Verse: 6908    daʒ gap von rîcheit liehten schîn;

Verse: 6909    sie was sîn swester und sîn wîp,
Verse: 6910    die minne wert deʒ fürsten lîp.

Verse: 6911    bluomen lieht und grüeneʒ graʒ
Verse: 6912    ûf der plânîe gewahsen was.

Verse: 6913    in der ouwe lac ein wênic berc.
Verse: 6914    dar ûf sach man daʒ beʒte werc

Verse: 6915    an eime gezelde, daʒ dar was brâht.
Verse: 6916    dem keiser waʒ der stat erdâht,

Verse: 6917    daʒ er dâ ruowen solde.
Verse: 6918    von gesteine und von golde

Verse: 6919    wâren trachen dar ûf geslagen.
Verse: 6920    solt ich iu al sîn rîcheit sagen,

Verse: 6921    maneger sich zühte roubte,
Verse: 6922    der mir des niht geloubte.

Verse: 6923    vor dem gezelde ein lôrboum stunt,
Verse: 6924    ouch ander wurze, die tâten kunt

Verse: 6925    senften ruch und süeʒen smac.
Verse: 6926    ein brunne entspringens aldâ phlac

Verse: 6927    ûʒ einem herten steine
Verse: 6928    kalt, lûter unde reine.

Verse: 6929    dem urspringe bôt der lôrboum schaten.
Verse: 6930    durch die bluomen hôrt man waten

Verse: 6931    des waʒʒers fluʒ und suoʒe clingen,
Verse: 6932    in die ouwe ze tal dringen.

Verse: 6933    vor den gezelden ûf dem plân
Verse: 6934    daʒ waʒʒer breiten sich began,

Verse: 6935    dâ eʒ ouch snelheit verphlac,
Verse: 6936    daʒ al umbe den berc lac.

Verse: 6937    der künc was gegangen hin vor
Verse: 6938    daʒ gezelt. hôch enbor

Verse: 6939    under den boum der fürste trat
Verse: 6940    an eine wunneclîche stat.

Verse: 6941    der berc heiʒt Dêâlamon.
Verse: 6942    man was dâ vor dar ûf gewon

Verse: 6943    daʒ die gotinne kâmen dar,
Verse: 6944    des ouch die gote nâmen war,

Verse: 6945    die ir hôchzît niht verlâgen,
Verse: 6946    mit in sie dâ fröiden phlâgen.

Verse: 6947    der anger heiʒt Dêâmaniur.
Verse: 6948    dar ûf lac der fröiden stiur,

Verse: 6949    ich mein wîp heideninne,
Verse: 6950    manec werde küniginne,

Verse: 6951    die ouch süeʒen kunden
Verse: 6952    minne, den sie der gunden.

Verse: 6953       man sach den künc in wirden stên.
Verse: 6954    er hieʒ die fürsten vür sich gên,

Verse: 6955    der er wol hundert bî im sach.
Verse: 6956    zuo den er mit zühten sprach.

Verse: 6957    'Alexander uns nâhen lît.
Verse: 6958    ich hoffe er habe morgen strît.

Verse: 6959    teilent iuwer volc in schar,
Verse: 6960    schaffent daʒ eʒ schône var.

Verse: 6961    bî iuwer edele ich iuch man,
Verse: 6962    ir sult gedenken ouch dar an,

Verse: 6963    daʒ iuch die gote haben erkorn,
Verse: 6964    von den mit wirde ir sît erborn,

Verse: 6965    daʒ ir manheit sult begên
Verse: 6966    und iwerm geslehte bî gestên.

Verse: 6967    wer mac sich iu gelîchen?
Verse: 6968    von Jupiter dem rîchen

Verse: 6969    erbet an iuch wirdikeit,
Verse: 6970    die Cêfalus iu niht verseit,

Verse: 6971    des hôhen Jupiters barn.
Verse: 6972    der wil mit helfe uns bewarn.

Verse: 6973    von Cêfalô kam Bêlûn,
Verse: 6974    der muoʒ von rehte uns helfe tuon.

Verse: 6975    von Bêlûn kam Abas,
Verse: 6976    der uns mit triuwen günstic was.

Verse: 6977    von Abas Acrîsius kam,
Verse: 6978    der uns in sîne phlege ie nam:

Verse: 6979    sîn helfe ist uns ofte worden kunt,
Verse: 6980    mit triwen er uns ie bî stunt.

Verse: 6981    Acrîsius zilte Dânen,
Verse: 6982    den süeʒen valsches ânen,

Verse: 6983    der uns helfe in nœten bôt.
Verse: 6984    er bekennet ouch selbe strîtes nôt.

Verse: 6985    Dânes Perseum brâhte,
Verse: 6986    der sich ie prîse nâhte,

Verse: 6987    der süeʒe vil gehiure
Verse: 6988    bringet uns vil helfe stiure.

Verse: 6989    von des werden süeʒen art
Verse: 6990    Achanes geborn wart,

Verse: 6991    des sun ouch Ortânes hieʒ,
Verse: 6992    der ie menlich helfe stieʒ

Verse: 6993    friunden, wa er die wiste in nôt.
Verse: 6994    wir versehen uns an den selben got

Verse: 6995    helfe, der in niht bevilt,
Verse: 6996    die er uns ouch mit staten zilt,

Verse: 6997       Ich hân iu die genennet gar,
Verse: 6998    die iuwer nemen mit helfe war

Verse: 6999    und ouch rât her abe geben
Verse: 7000    von iren himeln, dâ sie leben.

Verse: 7001    welt ir iuwer geslehte
Verse: 7002    merken und wiʒʒen rehte,

Verse: 7003    jâ wâren sie die hôhsten ie,
Verse: 7004    die menlich prîs nie verlie.

Verse: 7005    welt ir dar an gedenken,
Verse: 7006    sô turret ir niht gewenken

Verse: 7007    von manheit, die iu ist an geborn.
Verse: 7008    iu haben die gote helfe gesworn.

Verse: 7009    ist iu iht zagheite bi,
Verse: 7010    der machet iuwer herze frî.

Verse: 7011    werfent vorhte von iu nider,
Verse: 7012    vaʒʒent manheit an iuch wider.

Verse: 7013    ir sult dar umbe niht verzagen,
Verse: 7014    hœrt ir ein wênic manheit sagen

Verse: 7015    von Alexandrô dem jungen.
Verse: 7016    ist an Mennôn im gelungen

Verse: 7017    und an den die sic mit im verlurn
Verse: 7018    und ritterlich ir ende dô kurn,

Verse: 7019    die sul wir alsô mit swerten clagen,
Verse: 7020    daʒ man dâ von beginnet sagen,

Verse: 7021    und ouch sie rechen alsô,
Verse: 7022    daʒ er des nimmer blîbet frô.

Verse: 7023    ir sult eʒ haben niht für strît,
Verse: 7024    niuwan für kurzewîle zît.

Verse: 7025    wann wir im nû genâhen,
Verse: 7026    sô sol man in niuwan vâhen.

Verse: 7027    der unzuht wil ich in enziehen.
Verse: 7028    mir ist leit ob er vliehen

Verse: 7029    vor unser craft beginnet.
Verse: 7030    wol er sich des versinnet

Verse: 7031    daʒ er übel hât gevarn,
Verse: 7032    nû enwil er des niht sparn,

Verse: 7033    er welle dar nâch werben
Verse: 7034    wie er in strîte muge verterben.

Verse: 7035    daʒ wolt er kiesen für sîn leben..
Verse: 7036    ich sol mir ander râche geben.

Verse: 7037    mit êweclîchen riuwen
Verse: 7038    sol er mîn gevangnis biuwen.'

Verse: 7039    (er wolde daʒ er wære erslagen.
Verse: 7040    wie wil der arme den verjagen,

Verse: 7041    der allen fürsten obe ligt,
Verse: 7042    dem er ouch selbe dienstes phligt?)

Verse: 7043    'Alexander, ich wiste gerne
Verse: 7044    von welhem tiuvel dîn herze lerne

Verse: 7045    untriwe, die du gegen mir begâst.
Verse: 7046    dich selben du swære niht erlâst,

Verse: 7047    wilt du gegen mir in strîte sîn.
Verse: 7048    mir tuont vil lant doch dienst schîn,

Verse: 7049    die der gewaltige man
Verse: 7050    Cyrus nâch tôde hie hât gelân,

Verse: 7051    die Crêsus und ander fürsten hielden
Verse: 7052    und der mit wirde wielden:

Verse: 7053    die gewarten alle mir,
Verse: 7054    eʒ sol übel bekomen dir.

Verse: 7055    wie torstest du, bœses wîbes suon,
Verse: 7056    solich untriwe gegen mir tuon,

Verse: 7057    daʒ du mich verkiesen wilt
Verse: 7058    dir wirt zornes mite gespilt,

Verse: 7059    des dîn unsælde enphindet.
Verse: 7060    dîn gelücke sêre swindet.

Verse: 7061    wie man sagt Cyrum begraben,
Verse: 7062    man sol mich doch für Cyrum haben.

Verse: 7063    du solt daʒ wiʒʒen, lebt er noch,
Verse: 7064    er trüege mîner dienste joch.

Verse: 7065    Crêsus und ander fürsten, lebten die,
Verse: 7066    die müesten mir biegen ire knie.'

Verse: 7067       Aber er ze den fürsten sprach,
Verse: 7068    die er stênde vor im sach.

Verse: 7069    'gedenket, helde, dar an
Verse: 7070    daʒ iu Fortûna sælden gan,

Verse: 7071    die an dem Kriechen ist ersterbet,
Verse: 7072    manheit ûf uns erbet,

Verse: 7073    die unser veter nâch in lieʒen,
Verse: 7074    die ouch fürsten hieʒen.

Verse: 7075    gedenkent an kint und an wîp,
Verse: 7076    die mit wirde minnent iuwern lîp.

Verse: 7077    dâ bî sît ouch des gemant
Verse: 7078    ir strîtent umb iur eigen lant.

Verse: 7079    Iernet in strîte prîs bejagen.
Verse: 7080    wer wil uns dâ ûʒ der geslehte sagen?

Verse: 7081    Memrôtes und ander risen hêr,
Verse: 7082    die den goten frumten herzesêr,

Verse: 7083    die wîle daʒ die lebten,
Verse: 7084    nâch strîtes prîse sie strebten.

Verse: 7085    ich sage iu wie mir in kurzer frist
Verse: 7086    von Alexandrô getroumet ist,

Verse: 7087    dâ von ich âne sorge bin,
Verse: 7088    wir behaben sigehaften gewin.

Verse: 7089    dô ich nâch arbeit ruowe phlac,
Verse: 7090    vil vaste slâfende ich lac

Verse: 7091    und sach daʒ sîne gezelde
Verse: 7092    gar verbrunnen ûf dem velde

Verse: 7093    vor der stat ze Babilôn.
Verse: 7094    dar in fuort man den Mâcedôn

Verse: 7095    vür mich unversunnen.
Verse: 7096    die gezelt wârn nû verbrunnen.

Verse: 7097    im waren rîche cleider kunt,
Verse: 7098    dô er gebunden vor mir stunt.

Verse: 7099    ich sprach wider in und alzehant
Verse: 7100    der Macedô vor mir verswant.

Verse: 7101    des ich mich alsô kan verstên,
Verse: 7102    sîn hôchvart sol vor mir zergên.

Verse: 7103    der wir geben liehtes schîn
Verse: 7104    in den landen, dâ wir sîn,

Verse: 7105    bî der und bî den goten ich swer:
Verse: 7106    wer mit vlühte crenket mîn wer,

Verse: 7107    mit eiden ich im gelobe daʒ,
Verse: 7108    ich wil im immer tragen haʒ.'

Verse: 7109       Daʒ volc nam sîner worte war.
Verse: 7110    nû seht, dô kam geschiffet dar

Verse: 7111    ein wartman, als man in jagte.
Verse: 7112    den fürsten überal er sagte

Verse: 7113    daʒ Alexander vaste vlüge
Verse: 7114    und wider gegen dem mer züge.

Verse: 7115    er sæhe in mit sînen scharn
Verse: 7116    berc und tal unsitlich varn,

Verse: 7117    als ob er ninder trûwet genesen.
Verse: 7118    Darîus sprach 'welt ir noch wesen

Verse: 7119    in dem gelouben, als ich iu sagt,
Verse: 7120    daʒ Alexander wære verzagt?'

Verse: 7121    die fürsten sich rotierten,
Verse: 7122    ir volc sie partierten.

Verse: 7123    ietslîcher jach im wære gâch
Verse: 7124    Alexandrô ze jagen nâch.

Verse: 7125    ô wê, nû wænen die Persân
Verse: 7126    daʒ sie vliehe dirre man,

Verse: 7127    daʒ er zwâr niht entuot.
Verse: 7128    er hât gegen strîte sô vesten muot,

Verse: 7129    dar umbe er wil ersterben,
Verse: 7130    ê daʒ er wolt erwerben

Verse: 7131    daʒ man in nante einen zagen.
Verse: 7132    jâ wil er noch die Darîân jagen.

Verse: 7133    der wil er sich mit strîte wern
Verse: 7134    und sie alsô mit swerten bern,

Verse: 7135    dâ von ir hôchvart sîget
Verse: 7136    und etslîcher sîne vluht verswîget.

Verse: 7137    jâ wolt er âne strît niht leben,
Verse: 7138    ob im mit willen wolde geben

Verse: 7139    Darîus des rîches kür.
Verse: 7140    ê er strîtes muot verlür,

Verse: 7141    sîn lant wolt er ê verliesen
Verse: 7142    und daʒ mit willen kiesen.

Verse: 7143    ô we, wes gedenken die,
Verse: 7144    die im vliehens jehen hie?




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.