TITUS
Ulrich von Eschenbach, Alexander
Part No. 60
Previous part

Chapter: 83a  
Thymodes verrät Alexander


Verse: 6767       Ein hêrre Thymodes hieʒ,
Verse: 6768    den des untriuwe niht erlieʒ

Verse: 6769    ern wolde ze Darîô kêren
Verse: 6770    und sînes hêrren schaden mêren.

Verse: 6771    er was ein Thêbânære,
Verse: 6772    den er ouch fuogte swære,

Verse: 6773    dô er von Thêbas kêrte:
Verse: 6774    der Kriechen künc er lêrte

Verse: 6775    daʒ Thêbas zerstœret wart.
Verse: 6776    der tet ouch hie die übervart.

Verse: 6777    sîne reise er sêre hal.
Verse: 6778    von Alexandrô er sich stal,

Verse: 6779    er kam zuo dem Asiân,
Verse: 6780    dem bôt er sînen dienst an.

Verse: 6781    der keiser gerne in enphienc.
Verse: 6782    Thymodes untriuwe begienc.

Verse: 6783    er sprach 'ich gan iu, hêrre, wol
Verse: 6784    guotes, als ich billich sol.

Verse: 6785    nû welt ir unwîslîchen varn,
Verse: 6786    daʒ ir wol mugt bewarn.

Verse: 6787    ir füert al iuwern hort mite,
Verse: 6788    daʒ ist ein seltsæner site.

Verse: 6789    ob ir den sic verlieset,
Verse: 6790    seht waʒ ir schaden kieset.

Verse: 6791    waʒ welt ir muoter, wîbe, kinder?
Verse: 6792    heiʒent sie kêren wider hinder.

Verse: 6793    ob ir iuch lîhte schamet des,
Verse: 6794    sô volgent mir doch eines.

Verse: 6795    heiʒent mit sunder ritterschar
Verse: 6796    mit huote nemen der frouwen war.

Verse: 6797    seht waʒ schaden ir danne kurt,
Verse: 6798    ob ir sô grôʒen hort verlurt.

Verse: 6799    wie grôʒer craft man iu giht,
Verse: 6800    sô wiʒʒen wir doch des wægesten niht.'

Verse: 6801    wie er in daʒ beste lêrte,
Verse: 6802    der keiser sich dar an niht kêrte.

Verse: 6803    der rât dûhte in bœse sîn.
Verse: 6804    die Persân und ander Sarrazîn,

Verse: 6805    die dâ wârn des hêrren rât,
Verse: 6806    wolden lêren den admirât,

Verse: 6807    daʒ er untriwe begienge
Verse: 6808    und Thymodem vienge

Verse: 6809    unde zuo im rihte.
Verse: 6810    daʒ was des râtes getihte:

Verse: 6811    sus rieten sie ûf die geste.
Verse: 6812    Darîus was triuwen veste,

Verse: 6813    der rât im niht behagte,
Verse: 6814    dar umb er in widersagte.

Verse: 6815    er sprach: 'ich tuo des niht.
Verse: 6816    mîn edel art mir des vergiht,

Verse: 6817    wer mich durch guot suoche,
Verse: 6818    daʒ ich des mit guote ruoche.

Verse: 6819    sie sollen blîben mit gemache.
Verse: 6820    sie sint durch dienstes sache

Verse: 6821    und ûf gnâde komen her,
Verse: 6822    des ich sie billîchen wer.

Verse: 6823    solt ich mîner wirde name
Verse: 6824    setzen in ein swache schame?

Verse: 6825    ir hêrren, ir wîsent mich niht wol.
Verse: 6826    zîtlîcher ich in helfen sol,

Verse: 6827    denn ich in iht arges tæte.
Verse: 6828    ich volge iu niht der ræte.'

Verse: 6829    Thymodes aldâ bleip,
Verse: 6830    als mir die âventiure schreip.

Verse: 6831    Darîus gerne hete gesehen
Verse: 6832    daʒ schiere der strît wære geschehen.

Verse: 6833    Thymodes er volgte sider.
Verse: 6834    in Dâmascus hieʒ er wider

Verse: 6835    des hordes füeren daʒ grôʒer teil.
Verse: 6836    jâ gedâht er daʒ unheil

Verse: 6837    und ungelücke ist schiere komen,
Verse: 6838    und daʒ ouch beʒʒer wær genomen

Verse: 6839    ein schedel dann ein schade.
Verse: 6840    gegen Dâmascô ûf dem pfade

Verse: 6841    sach man zogen mit dem guote
Verse: 6842    freche ritter in hôhem muote.

Verse: 6843    sie erschinen in strîtlichem site.
Verse: 6844    dem admirât muost volgen mite

Verse: 6845    muoter, kinder und die küniginne.
Verse: 6846    in Dâmascô sîn friundinne,

Verse: 6847    die im hete gevolget dar,
Verse: 6848    nam sîner widerkünfte war.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.