TITUS
Ulrich von Eschenbach, Alexander
Part No. 64
Previous part

Chapter: 84c  
Darius' Schild


Verse: 7601       Des siges als er im verjach,
Verse: 7602    Darîus des selben sich versach.

Verse: 7603    die Alexandrînen zogten zuo.
Verse: 7604    waʒ welt ir daʒ Darîus tuo?

Verse: 7605    er hieʒ im sîn harnasch bringen.
Verse: 7606    von guldînen ringen

Verse: 7607    mit tiurer kost was eʒ zuo brâht,
Verse: 7608    dar ûf wârn mit kunst erdâht

Verse: 7609    vil tôter künge bilde.
Verse: 7610    vernement von sînem schilde,

Verse: 7611    wie der was gehêret,
Verse: 7612    rîche kost dar in gekêret.

Verse: 7613    siben ringe er behielt
Verse: 7614    der ietslîcher koste wielt.

Verse: 7615       In dem obersten ringe man las
Verse: 7616    wie Babilôn erbûwet was;

Verse: 7617    war umbe des Memrôt erdâhte,
Verse: 7618    durch daʒ im kein fluot mê nâhte.

Verse: 7619    an dem andern man gemâlet sach
Verse: 7620    wie got die hôchvart an im rach,

Verse: 7621    mit sîner kraft gewalde
Verse: 7622    der fürsten hôchvart valde,

Verse: 7623    dar umbe ir werc niht volkam.
Verse: 7624    die ê einer sprâche gezam,

Verse: 7625    êbrêisch, daʒ sie kunden,
Verse: 7626    seltsæner sprâche sie begunden.

Verse: 7627    eines morgens die meister ûf stunden
Verse: 7628    und irs werkes begunden:

Verse: 7629    deheiner vernam der andern wort.
Verse: 7630    ir êrste sprâch was in zerstôrt.

Verse: 7631    ir keiner wiste waʒ der ander sprach.
Verse: 7632    wes in der ander zuo verjach,

Verse: 7633    des vernam er niht umb ein hâr;
Verse: 7634    hiesch er kalc, man bôt im waʒʒer dar.

Verse: 7635    dâ mit sie got von dannen treip.
Verse: 7636    vürbaʒ er ungebiuwen bleip.

Verse: 7637    in dem dritten man gemâlet sach,
Verse: 7638    wie her Jeremîas sprach

Verse: 7639    ze den ungetriuwen Juden,
Verse: 7640    den verfluochten helleruden:

Verse: 7641    'ir habt gesündet wider got,
Verse: 7642    dar umbe müeʒt ir lîden nôt.

Verse: 7643    er wil iuch mit guote und mit leben
Verse: 7644    in Nabuchodonosors hende geben.

Verse: 7645    er sol die sünde rechen
Verse: 7646    und iuwern schaden zechen;

Verse: 7647    dar umbe ist daʒ mîn rât,
Verse: 7648    gebt im Jhêrusalêm die stat:

Verse: 7649    welt ir vor dem künge genesen,
Verse: 7650    ir sult ze sîme gebote wesen.'

Verse: 7651    Sedechîe was daʒ ungemach,
Verse: 7652    daʒ er in triuwen in verjach,

Verse: 7653    den Juden eʒ ouch kunde versmâhen,
Verse: 7654    Jeremîam hieʒen sie vâhen

Verse: 7655    und werfen in ein swacheʒ hor.
Verse: 7656    daʒ rach an in Nabuchodonosor.

Verse: 7657    an eime strîte eʒ sô ergienc,
Verse: 7658    Nabuchodonosor Sedechîam vienc:

Verse: 7659    daʒ gemælde der vierde rinc beslôʒ,
Verse: 7660    der ouch spæher kost genôʒ.

Verse: 7661    Nabuchodonosor swuor der Juden tôt.
Verse: 7662    einem hêrren er gebôt

Verse: 7663    der hieʒ Nâbuzardas
Verse: 7664    (sîner köche fürst er was),

Verse: 7665    daʒ er Jhêrusalêm bræche nider
Verse: 7666    und im bræhte hin wider

Verse: 7667    gevangen ze Babilôniâ
Verse: 7668    waʒ er volkes funde dâ.

Verse: 7669    nâch sînem willen daʒ geschach.
Verse: 7670    Nabuchodonosor man ungeduldic sach.

Verse: 7671    nû hân ich vernomen daʒ,
Verse: 7672    wie er aldâ ze gerihte saʒ,

Verse: 7673    wie zorn sîn herze ruorte:
Verse: 7674    vIl der edeln man vür in fuorte,

Verse: 7675    die hieʒ er vor im vellen tôt,
Verse: 7676    ouch muosten lîden die selben nôt

Verse: 7677    des künges Sedechîas kint.
Verse: 7678    in selben hieʒ er machen blint,

Verse: 7679    in einen kerker man in warf,
Verse: 7680    so dar inne muost er pîne scharf

Verse: 7681    unz an sîn ende lîden.
Verse: 7682    der mæler wolde vermîden

Verse: 7683    etslîche smælîche geschiht,
Verse: 7684    der vant man in dem ringe niht,

Verse: 7685    die ir doch hât gehœret vor:
Verse: 7686    wie der rîche Nabuchodonosor

Verse: 7687    was ein rindes bilde.
Verse: 7688    ninder ûf dem schilde

Verse: 7689    man aldâ gemâlet sach
Verse: 7690    waʒ im nâch tôde sît geschach.

Verse: 7691    einen sun der fürste lieʒ
Verse: 7692    Êvilmôradac der hieʒ.

Verse: 7693    dô der vater was begraben
Verse: 7694    und er daʒ rîche solde haben,

Verse: 7695    dô gedâht daʒ ungetriuwe kint
Verse: 7696    daʒ der vater gewesen was ein rint,

Verse: 7697    und wie got durch Dâniêlis bet
Verse: 7698    an im genædiclîche tet,

Verse: 7699    der in brâht ze menschen sider.
Verse: 7700    er vorhte daʒ der vater wider

Verse: 7701    von tôde ze lîbe kæme
Verse: 7702    und im ein hêrschaft næme.

Verse: 7703    Joachim ein sîn fürste im riet,
Verse: 7704    der in von sînen triuwen schiet.

Verse: 7705    dô der vater begraben lac,
Verse: 7706    in hieʒ nemen Êvilmôradac

Verse: 7707    und daʒ man ze stücken snite
Verse: 7708    sîn âs den gîren teilte mite.

Verse: 7709    Êvilmôrodac drî süne lieʒ,
Verse: 7710    Lâbazar der eine hieʒ

Verse: 7711    und der ander Nâbuzar,
Verse: 7712    sîn dirter sun hieʒ Balthasar.

Verse: 7713       An dem fünften ringe man kôs
Verse: 7714    wie Balthasar sîn leben verlôs,

Verse: 7715    wie daʒ dar zuo was komen
Verse: 7716    als ir dâ vor habt vernomen

Verse: 7717    umb sünde, der in niht bevilt.
Verse: 7718    der sehste rinc daʒ behielt,

Verse: 7719    dar in mit kost was erdâht
Verse: 7720    wie Crêsus mit Cyrô vaht

Verse: 7721    und wie Crêsus den sic verlôs,
Verse: 7722    dâ von er grôʒe smâcheit kôs.

Verse: 7723    Cyrus wolt in haben verbrant:
Verse: 7724    daʒ ein güsse widerwant,

Verse: 7725    die kam an den stunden,
Verse: 7726    dô man in het ûf gebunden.

Verse: 7727    daʒ volc die vluot dannen treip,
Verse: 7728    dâ von er bî lîbe bleip.

Verse: 7729    alsô entran er dem rôst.
Verse: 7730    er jach in heten die gote erlôst.

Verse: 7731    sîner tohter saget er daʒ,
Verse: 7732    die im ander rede maʒ,

Verse: 7733    er solde sîn güften lâʒen
Verse: 7734    und sich rüemens mâʒen,

Verse: 7735    unz daʒ er besæhe
Verse: 7736    wes im daʒ ende verjæhe.

Verse: 7737    dar nâch über mangen tac
Verse: 7738    Crêsus slâfende lac.

Verse: 7739    in eime troume sach er
Verse: 7740    wie sîn got Jupiter

Verse: 7741    im sîn houbt twüege
Verse: 7742    und in den lüften trüege,

Verse: 7743    und wie Phêbus der got
Verse: 7744    sich ze sînen füeʒen bôt

Verse: 7745    und im die truckente beide
Verse: 7746    mit wîʒ lînîn cleide.

Verse: 7747    den troum der tohter er sagte.
Verse: 7748    der wîsen er niht behagte.

Verse: 7749    sie sprach 'vater, ich sage dir
Verse: 7750    vür wâr, du solt gelouben mir,

Verse: 7751    mîn sin dir daʒ bescheinet
Verse: 7752    waʒ der troum meinet.

Verse: 7753    Cyrus sol dich vâhen,
Verse: 7754    dar nâch heiʒet er dich hâhen

Verse: 7755    Jupiter bediutet daʒ
Verse: 7756    du wirdes von dem regen naʒ,

Verse: 7757    der dîn houbt begiuʒet:
Verse: 7758    ûf die füeʒe er dir ouch fliuʒet,

Verse: 7759    Phêbus mit sunnen truckent dich.
Verse: 7760    alsô dîn leben endet sich.'

Verse: 7761    in dem lesten ringe ûf dem schilde
Verse: 7762    sach man wie der milde

Verse: 7763    Cyrus mit einer frouwen streit,
Verse: 7764    Tamiris, die im fuoget leit.

Verse: 7765    in Amâzôn sie frouwe was,
Verse: 7766    als ich an dem buoche las.

Verse: 7767    an dem strîte sie in vienc,
Verse: 7768    an dem sie grôʒen mort begienc.

Verse: 7769    den fürsten sie enthoupten hieʒ,
Verse: 7770    den tugent und wirde nie verlieʒ

Verse: 7771    bî sîner zîte jâren.
Verse: 7772       tôt, wie du kanst vâren

Verse: 7773    der die prîs mit wirde tragen,
Verse: 7774    die kanstu von der werlde jagen.

Verse: 7775    werlt, du biutest swachen lôn,
Verse: 7776    sît daʒ die frowe von Amâzôn

Verse: 7777    den sic dem werden ab ervaht:
Verse: 7778    der vil fürsten dar zuo brâht,

Verse: 7779    daʒ sie im ze dienste muosten sîn,
Verse: 7780    dem hie ein krankeʒ fröuwelîn

Verse: 7781    und ein unstrîtlich wîp
Verse: 7782    nam lant liute und den lîp.

Verse: 7783       Die werlt unstæte triutet.
Verse: 7784    waʒ man ir dienstes biutet,

Verse: 7785    die sint alle gar verlorn.
Verse: 7786    sie hât den menschen schier verkorn,

Verse: 7787    an dem sie gâhes ist verzagt:
Verse: 7788    wenn er gelît, erst schiere verclagt.

Verse: 7789    waʒ hilfet edle, waʒ hilfet guot?
Verse: 7790    werde fürsten, habt den muot

Verse: 7791    daʒ ir durch den welt vertragen,
Verse: 7792    der iu sô kan genâde sagen,

Verse: 7793    die iu bringet süeʒen lôn
Verse: 7794    und setzet iuch dâ der engel dôn

Verse: 7795    vor im suoʒe erclingen kan.
Verse: 7796    daʒ uns daʒ nimmer müeʒe vergân,

Verse: 7797    dem sul wir des getriuwen,
Verse: 7798    der himel und erde hât erbiuwen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.