TITUS
Lamprecht, Alexander (Strassburger Bearbeitung)
Part No. 89
Previous part

Chapter: 257  
Alexander erhält an der Paradiesmauer den Wiegestein


Verse: 6597       Sint erfûr er gnûch
Verse: 6598    beide velt unde brûch

Verse: 6599    unde lant unde walt.
Verse: 6600    ouh erfûr sint der helt balt

Verse: 6601    ze staten unde burgen
Verse: 6602    mit froweden und mit sorgen.

Verse: 6603    sint môster entwîchen
Verse: 6604    den armen und den rîchen.

Verse: 6605    des wart sîn gewalt
Verse: 6606    vil verre gezalt

Verse: 6607    in allin ertrîche
Verse: 6608    ubir manigen kuninc rîche,

Verse: 6609    di in alle êreten
Verse: 6610    und sînen lob mêreten

Verse: 6611    und ime zins sanden
Verse: 6612    alle von irn landen.

Verse: 6613    des ne dûhte ime allis niht genûc.
Verse: 6614    sîn hôhmût in dar zû trûc,

Verse: 6615    daz er sih hîz wîsen
Verse: 6616    gegen den paradîse.

Verse: 6617    daz wolder bedwingen
Verse: 6618    und zins ouh dannen bringen

Verse: 6619    von den engelischen chôren.
Verse: 6620    hî muget ir tumpheit hôren,

Verse: 6621    wî er des begunde.
Verse: 6622    an der selben stunde

Verse: 6623    frâgeter sîne holden,
Verse: 6624    waz si ime râten wolden,

Verse: 6625    wî er dar zô solde comen,
Verse: 6626    daz er daz mohte gefromen,

Verse: 6627    daz er mit here quâme dare,
Verse: 6628    dâ er di engelische scare

Verse: 6629    mohte bedwingen
Verse: 6630    und ime undertânich bringen

Verse: 6631       Dô sprâchen sîne fursten,
Verse: 6632    di iz getûn torsten,

Verse: 6633    wande si wîs wâren:
Verse: 6634    si rieten ime offinbâre,

Verse: 6635    daz er sih vil rehte
Verse: 6636    hî umbe bedêhte

Verse: 6637    und mit gnâden lebete
Verse: 6638    und wider gote niht ne strebete,

Verse: 6639    sô têter wîslîche.
Verse: 6640    dô sprâchen al gelîche

Verse: 6641    di tumben jungelinge
Verse: 6642    zô disem tegedinge:

Verse: 6643    'kuninc Alexander,
Verse: 6644    wir râten dir ein ander.

Verse: 6645    du salt gedenken, helt balt,
Verse: 6646    dise lûte di sîn alt

Verse: 6647    und unlustich unde laz,
Verse: 6648    di dir haben gerâten daz,

Verse: 6649    daz du hî blîbis.
Verse: 6650    si vorhten des lîbis.

Verse: 6651    heiz dih, hêre, wîsen
Verse: 6652    zô den paradîse.

Verse: 6653    daz saltu bedwingen
Verse: 6654    mit dînen jungelingen.

Verse: 6655    dar sole wir dir helfen zô
Verse: 6656    beide spâte unde frû.

Verse: 6657    jo hâstu dînes willen
Verse: 6658    offenlîche und stille

Verse: 6659    irworben ein vil michil teil.
Verse: 6660    wir lâzenz, hêre, ane daz heil

Verse: 6661    und îlen dar hine varen
Verse: 6662    mit einer hêrlîchen scaren,

Verse: 6663    wande wir haben ein michil here.
Verse: 6664    wir suln mit schilde und mit spere

Verse: 6665    dînen willen irwerben
Verse: 6666    oder genendiclîchen sterben.'

Verse: 6667       Alexandro dûhte in sînen mût
Verse: 6668    der tumber lûte rât gût.

Verse: 6669    daz was ein michil tumpheit.
Verse: 6670    des quam in manich arbeit.

Verse: 6671    der tobende wûterîch
Verse: 6672    der was der hellen gelîch,

Verse: 6673    di daz abgrunde
Verse: 6674    begenit mit irn munde

Verse: 6675    und den himel zô der erden,
Verse: 6676    und ir doh niht ne mac werden,

Verse: 6677    daz si imer werde vol;
Verse: 6678    si is daz ungesatlîche hol,

Verse: 6679    daz weder nû noh nie ne sprah:
Verse: 6680    diz ist, des ih niht ne mach.

Verse: 6681    alsô tete Alexander,
Verse: 6682    di fromete manich wunder.

Verse: 6683    der quam durh sîne giricheit
Verse: 6684    in vil michil arbeit.

Verse: 6685    er ne wolde niwit sûmen,
Verse: 6686    er begundiz dâr rûmen

Verse: 6687    unde fûr dannen
Verse: 6688    mit allen sînen mannen

Verse: 6689    ubir berg unde tal
Verse: 6690    unde manigen stîch smal,

Verse: 6691    dâ er mûste sturmen
Verse: 6692    mit freislîchen wurmen

Verse: 6693    unde mit den tieren.
Verse: 6694    dô hoffeter, daz er schiere

Verse: 6695    quâme ûz der nôt.
Verse: 6696    iedoh vorhter den tôt,

Verse: 6697    swî stolzmûte sô er was.
Verse: 6698    daz er dâ genas,

Verse: 6699    daz was gotis wunder.
Verse: 6700    dô gerou besunder

Verse: 6701    allen, di dâ wâren,
Verse: 6702    stille und offinbâre

Verse: 6703    di tumplîche herevart,
Verse: 6704    wande si liden manigen sturm hart

Verse: 6705    von starken gewidere.
Verse: 6706    daz treib si dicke widere

Verse: 6707    in ir ungewalt.
Verse: 6708    des verzwîbelte der helt balt

Verse: 6709    der mûtlîche Alexander
Verse: 6710    und vil manich ander,

Verse: 6711    manich jungelinc gemeit.
Verse: 6712    di vart di was vil leit

Verse: 6713    Alexandro zô dem mâle,
Verse: 6714    swî erz dô verhâle

Verse: 6715    durh werltlîche scande;
Verse: 6716    wârer dô ze lande,

Verse: 6717    er ne quême niemer mêr dar.
Verse: 6718    daz sult ir wizzen vor wâr,

Verse: 6719    wande si liden ungemach
Verse: 6720    beide naht unde tach

Verse: 6721    von dunre und von blicke.
Verse: 6722    er manete sîne dicke,

Verse: 6723    daz si balde fûren.
Verse: 6724    er hîz si starke rûren,

Verse: 6725    biz si dar quâmen,
Verse: 6726    dâ si volc vernâmen

Verse: 6727    unde gemach funden.
Verse: 6728    dar nâh in curzen stunden

Verse: 6729    quâmen si an eine flûme
Verse: 6730    grôz und gerûme,

Verse: 6731    di was Eufrates genant.
Verse: 6732    di lûte, di er dâr vant,

Verse: 6733    beide cleine unde grôz,
Verse: 6734    di sagetin ime, daz iz flôz

Verse: 6735    ûz dem paradîse.
Verse: 6736    dô hîz er mit spîsen

Verse: 6737    sîne schif bereiten.
Verse: 6738    er ne wolde niwit beiten.

Verse: 6739    daz der wunderlîche man
Verse: 6740    hîz, daz wart schiere getân.

Verse: 6741       Dô si ze schiffe quâmen,
Verse: 6742    ir rûder si nâmen

Verse: 6743    und swaz si haben solden,
Verse: 6744    wande si varen wolden

Verse: 6745    in di starke flûme.
Verse: 6746    dô mohten si vile kûme

Verse: 6747    wider dem strâme iht gevarn.
Verse: 6748    dô leit dâ maniger mûter barn

Verse: 6749    angist unde pîne grôz,
Verse: 6750    wande daz wazzer starke flôz.

Verse: 6751    ouh mûweten daz gesinde
Verse: 6752    di freislîchen winde

Verse: 6753    und donre unde blicke.
Verse: 6754    ouh nôte si dicke

Verse: 6755    regen hagel unde snê.
Verse: 6756    in wart dicke vil wê

Verse: 6757    von unrehten gewidere.
Verse: 6758    daz treib si sêre widere.

Verse: 6759    si liden michil arbeit.
Verse: 6760    si mohten ir manheit

Verse: 6761    niwit vile dâ geniezen.
Verse: 6762    dô sâhen si diezen

Verse: 6763    dar in obiz unde loub,
Verse: 6764    daz vil sûzlîchen rouch.

Verse: 6765    daz loub was breit unde lanc.
Verse: 6766    di dâ woneten in daz lant,

Verse: 6767    dahten ir hûs dâ mite.
Verse: 6768    des was dâre lantsite.

Verse: 6769    des obizzis si wol genozzen.
Verse: 6770    ouh quam dâ mite geflozzin

Verse: 6771    manic scône blûme
Verse: 6772    gele unde grûne.

Verse: 6773    der viengen di hêren vile
Verse: 6774    und heten si zô einen spile.

Verse: 6775       Dô di helede gemeit
Verse: 6776    irliden michil arbeit,

Verse: 6777    di mit dem wâge strebeten,
Verse: 6778    dô rou in, daz si lebeten.

Verse: 6779    dô Alexander daz gesach,
Verse: 6780    dô trôster si unde sprach:

Verse: 6781    'gehabet û wol, helede gût,
Verse: 6782    unde habet manlîchen mût.

Verse: 6783    daz ist di rehte wârheit,
Verse: 6784    wir haben michil arbeit:

Verse: 6785    nû gehabit lange
Verse: 6786    dar ûz an dem lande

Verse: 6787    und ouh in disen wâge
Verse: 6788    vil michil ungenâde

Verse: 6789    irliden lanc stucke.
Verse: 6790    geschê uns daz gelucke,

Verse: 6791    daz wir mit siheiner wîs
Verse: 6792    bedwungen daz paradîs

Verse: 6793    und di dâ wonent inne,
Verse: 6794    sô solde wir mit sinne

Verse: 6795    und ouh mit grôzen êren
Verse: 6796    heim ze lande kêren

Verse: 6797    und leben frôlîche.
Verse: 6798    ih gelobe û trûwelîche,

Verse: 6799    mir werde wol oder wê,
Verse: 6800    daz ih sint niemer mê

Verse: 6801    ne wille mit here
Verse: 6802    noh mit schilde noh mit spere

Verse: 6803    neheine burg mêr gewinnen
Verse: 6804    noh urlûges beginnen.

Verse: 6805    sint lâz ihz alliz an daz heil.'
Verse: 6806    er nam behalben dô ein teil

Verse: 6807    sîner heimlîchen holden,
Verse: 6808    mit den er sprehen wolde.

Verse: 6809    den sageter vil stille
Verse: 6810    allen sînen willen.

Verse: 6811    zehant si dâr swôren,
Verse: 6812    daz si mit im vollenfûren,

Verse: 6813    iz gie ze scaden oder ze fromen,
Verse: 6814    swîz joh darumbe mohte comen;

Verse: 6815    si wolden mit ime blîben
Verse: 6816    ze tôde und ze lîbe.

Verse: 6817       Dô fûren si mit sorgen
Verse: 6818    den âbunt und den morgen

Verse: 6819    und irliden manige grôze nôt.
Verse: 6820    vil dicke sâgen si den tôt

Verse: 6821    vor irn ougen gereit.
Verse: 6822    manic recke gemeit

Verse: 6823    lebete dâ mit pînen.
Verse: 6824    Alexander hiez dô sînen,

Verse: 6825    daz si balde fûren
Verse: 6826    unde er lide rûren.

Verse: 6827    dô wart dâ manic wârer helit
Verse: 6828    genôtet und gequelet,

Verse: 6829    wande si rûeten unde schielden,
Verse: 6830    daz si den lîb behielden.

Verse: 6831    swanne ze grôz was ir nôt
Verse: 6832    und si wânden wesen tôt,

Verse: 6833    sô wurfen si ûz ir anker.
Verse: 6834    mit manigen gedanken

Verse: 6835    wâren si dicke bevân,
Verse: 6836    waz si mohten ane gân.

Verse: 6837    alse si dan gerûweten,
Verse: 6838    dar nâh si sih mûweten

Verse: 6839    und fûren aber ûf baz.
Verse: 6840    vor wâr sagen ih û daz,

Verse: 6841    sô si ie langer fûren,
Verse: 6842    sô si mûder wâren.

Verse: 6843       Dô di vile tumbe
Verse: 6844    lange gevôren umbe

Verse: 6845    in dem wâge erre,
Verse: 6846    dô quâmen si sô verre,

Verse: 6847    daz die jene gesâgen,
Verse: 6848    di der schiffe phlâgen,

Verse: 6849    verjen unde stûren,
Verse: 6850    eine hêrlîche mûren,

Verse: 6851    di was lanc unde breit.
Verse: 6852    des worden di hêren gemeit

Verse: 6853    samelîche vil unfrô,
Verse: 6854    wande di mâre was vil hô,

Verse: 6855    gebûwit vil reine
Verse: 6856    von edelen gesteine.

Verse: 6857    lange si dô fûren
Verse: 6858    bî der hôhen mûren

Verse: 6859    und ne mohten nehein ende
Verse: 6860    an der steinwende

Verse: 6861    nêren gevinden.
Verse: 6862    doh quam daz ingesinde

Verse: 6863    ubir lanc zeiner ture.
Verse: 6864    dâ riefen si lange fure.

Verse: 6865    dô begunden si bôzen,
Verse: 6866    slân unde stôzen

Verse: 6867    mit grôzem unsinne.
Verse: 6868    di sêlen dar inne

Verse: 6869    und di engelische scare,
Verse: 6870    di ne nâmen des neheine ware.

Verse: 6871    iedoh quam ein alt man
Verse: 6872    zô der ture gegân.

Verse: 6873    der frâgete si, waz si wolden.
Verse: 6874    si sageten, daz si solden

Verse: 6875    lâzen ir singen
Verse: 6876    unde zins bringen

Verse: 6877    irem hêren Alexandro.
Verse: 6878    der man frâgete si dô,

Verse: 6879    wer Alexander wêre.
Verse: 6880    dô sageten si ime ze mêre,

Verse: 6881    iz wêre der Alexander,
Verse: 6882    dem nehein man ander

Verse: 6883    an allen ertrîche
Verse: 6884    lebete gelîche.

Verse: 6885    er wêre rîche unde gût
Verse: 6886    und hête manlîchen mût,

Verse: 6887    kûne unde êrhaft,
Verse: 6888    getrûwe unde wârhaft;

Verse: 6889    und hête michelen gewalt:
Verse: 6890    ime wâre velt unde walt

Verse: 6891    unde lant unde mere
Verse: 6892    und maniges rîchen kuningis here

Verse: 6893    al biz dar undertân.
Verse: 6894    dô antworte der alde man

Verse: 6895    und sprah: 'ir mûzit beiten,
Verse: 6896    biz daz ih ûh bereiten.

Verse: 6897    ih wil an disen stunden
Verse: 6898    mînen gesellen kunden

Verse: 6899    uheris hêren willen.'
Verse: 6900    dô ginc er dane stille

Verse: 6901    und merrete niwit lange
Verse: 6902    und quam wider gegangen.

Verse: 6903    er sprach: 'nû merket wol
Verse: 6904    di wort, di ih û sagen sol.

Verse: 6905    ir sult sagen alsô
Verse: 6906    dem hêren Alexandro:

Verse: 6907    wî langer alsus wil leben
Verse: 6908    und nâch ungenâden streben.

Verse: 6909    er was ubile bedâht,
Verse: 6910    daz er mit sîner heriscraft

Verse: 6911    heim sûhte di gotis kint,
Verse: 6912    di enbinnen diser mûren sint.

Verse: 6913    ouh sult ir ime sagen,
Verse: 6914    er muhte gerne mê gedagen

Verse: 6915    von sulher unmâze
Verse: 6916    und varen sîne strâze.

Verse: 6917    wil her den lîb behalden,
Verse: 6918    sô vare hine balde;

Verse: 6919    und ob er wille genesen,
Verse: 6920    sô sal er ôtmûte wesen.

Verse: 6921    er weiz daz wol âne wân,
Verse: 6922    er hât vil ubelis getân.

Verse: 6923    wider got ist er sculdih,
Verse: 6924    und got is vil geduldich.

Verse: 6925    claget er ime sîne sculde,
Verse: 6926    got gibet ime sîne hulde.

Verse: 6927    wil er sih niht bekêre,
Verse: 6928    sîn scade wirt deste mêre.

Verse: 6929    wes wênet Alexander?
Verse: 6930    ein man ist als ein ander

Verse: 6931    beide fleisc unde bein.
Verse: 6932    sehet, bringet ime disen stein.

Verse: 6933    er is vile tûre.
Verse: 6934    stark is sîn natûre.

Verse: 6935    iz wizzen lutzil lûte,
Verse: 6936    waz der stein bedûte.

Verse: 6937    den gebet ime an sîne hant
Verse: 6938    und heizet ime diz lant

Verse: 6939    vil harte schiere rûmen,
Verse: 6940    er ne sol niwit sûmen.

Verse: 6941    unde saget ime dâ mite,
Verse: 6942    daz er wandele sîne site.

Verse: 6943    swanne ime wirt bescheinet,
Verse: 6944    waz der stein meinet,

Verse: 6945    sô mûz er sih gemâzen:
Verse: 6946    des ne mac er niht gelâzen.'

Verse: 6947    sân nâh disen worten
Verse: 6948    gienc jener von der porten,

Verse: 6949    und di boten karten dô
Verse: 6950    wider ze Alexandro

Verse: 6951    unde gâben ime den stein.
Verse: 6952    ouh worden si des in ein,

Verse: 6953    daz si ime sageten,
Verse: 6954    waz si vernomen habeten

Verse: 6955    unde wî iz in was comen.
Verse: 6956    dô er daz hete vernomen,

Verse: 6957    dô ginc er ze râte,
Verse: 6958    waz er dar umbe tâte.

Verse: 6959       Dô rieten di wîsen,
Verse: 6960    di in solden wîsen,

Verse: 6961    daz er sih bereite
Verse: 6962    und niht langer dâ ne beite

Verse: 6963    und begundiz dâr rûmen
Verse: 6964    und fûre in di flûmen

Verse: 6965    wider heim ze lande.
Verse: 6966    dô sprâchen di wîgande,

Verse: 6967    di stolzen jungelinge:
Verse: 6968    'ir ne hât zô disen dingen

Verse: 6969    uns nit wol gerâten.
Verse: 6970    di ûh daz sprechen tâten,

Verse: 6971    di wâren ubile bedâht,
Verse: 6972    alse siz ouh hânt fure brâht.

Verse: 6973    unse hêre Alexander
Verse: 6974    der sol tûn ein ander,

Verse: 6975    er sol heizen stûren
Verse: 6976    sîn volc zû der mûren.

Verse: 6977    wir sîn gûte knehte,
Verse: 6978    wir suln si ane vehten.

Verse: 6979    di mûre sule wir brechen.
Verse: 6980    unse hêre der sol rechen

Verse: 6981    dar an sînen anden.
Verse: 6982    iz wirt in ze scanden,

Verse: 6983    daz si in heim hiezen varn.
Verse: 6984    der ne geniset nehein barn,

Verse: 6985    der dâ wonent innen,
Verse: 6986    mûze wirs beginnen.'

Verse: 6987       Dô sprah der listige man:
Verse: 6988    'wollet irs mînen rât hân,

Verse: 6989    sô râtih uns daz beste.
Verse: 6990    wir sulen dise veste

Verse: 6991    mit allen êren lâzen
Verse: 6992    und varen unse strâze;

Verse: 6993    wande si ist sô vast,
Verse: 6994    daz si ne vorhtent niht ein bast

Verse: 6995    uns noh alle di nû leben,
Verse: 6996    al wolden si dar zô streben;

Verse: 6997    wande di dar inne sint,
Verse: 6998    daz sint di wâren gotis kint.

Verse: 6999    di beschirmet selbe got,
Verse: 7000    wande si leisten sîn gebot.

Verse: 7001    dar umbe hât er in gegeben
Verse: 7002    daz unzeganclîche leben.

Verse: 7003    ih ne wil iz niwit langer helen,
Verse: 7004    wir suln uns alle bevelen

Verse: 7005    den sêlen und der engele scharen,
Verse: 7006    daz si uns rûchen bewarn,

Verse: 7007    daz wir sundir mûwicheit
Verse: 7008    und ân allirslahte herzeleit

Verse: 7009    und sunder werltscande
Verse: 7010    comen heim ze lande.'




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.