TITUS
Lamprecht, Alexander (Strassburger Bearbeitung)
Part No. 90
Previous part

Chapter: 258  
Alexander wird der Wiegestein ausgelegt


Verse: 7011       Di hêren karten dô wider
Verse: 7012    unde fûren daz wazzer nider.

Verse: 7013    dô si quâmen an daz lant,
Verse: 7014    ûz gingen si zehant

Verse: 7015    und rûmeten dâr schiere.
Verse: 7016    si mûsten mit den tieren

Verse: 7017    unde mit den wurmen
Verse: 7018    in den wege sturmen

Verse: 7019    doh quâmen si ubir lanc
Verse: 7020    wider heim ze Kriechlant.

Verse: 7021    dô was dâr manich Kriech
Verse: 7022    alsô cranc und alse siech,

Verse: 7023    alser wêre verslagen.
Verse: 7024    den môste man ze bette tragen.

Verse: 7025    daz genozzen si der herevart,
Verse: 7026    daz ir ie gedâht wart,

Verse: 7027    daz rou si dô ze spâte.
Verse: 7028    dô hîz der kuninc drâte

Verse: 7029    wîte sagen mêre,
Verse: 7030    ob dihein man wêre,

Verse: 7031    der ime mohte bescheinen
Verse: 7032    di craft von dem steine,

Verse: 7033    den wolder wol lônen;
Verse: 7034    daz swôr er bî der crônen.

Verse: 7035    vil manige dare quâmen,
Verse: 7036    dô si daz vernâmen.

Verse: 7037    di sageten, daz si wisten
Verse: 7038    di natûre und di liste

Verse: 7039    von edelen gesteine
Verse: 7040    grôz unde cleine.

Verse: 7041    itislîche jâhen,
Verse: 7042    dô si in gesâhen,

Verse: 7043    iz wêre ein edele jâchant.
Verse: 7044    ein ander sagete zehant,

Verse: 7045    iz wêre ein karbunkel.
Verse: 7046    der naht ne wêre nie sô tunkel,

Verse: 7047    er ne lûhte alsein sterre
Verse: 7048    nâh unde verre.

Verse: 7049    der dritte sprah alsus:
Verse: 7050    'iz ist ein topatius;'

Verse: 7051    der vierde: 'ein berillus;'
Verse: 7052    der funfte: 'ein ônichînus;'

Verse: 7053    der seste: 'ein ametiste',
Verse: 7054    er kante wol sîne liste.

Verse: 7055    der sibende sprah: 'ih bin gewis,
Verse: 7056    iz sî ein rehter jaspis.'

Verse: 7057    der ahte Sprah: 'er is sô schîr,
Verse: 7058    iz ist ein edele saphîr;'

Verse: 7059    der nûnde: 'ein crisolîtus;'
Verse: 7060    der zehende: 'ein crisoprassus;'

Verse: 7061    der eilifte: 'ein bdellius;'
Verse: 7062    der zwelifte: 'ein sardonius.'

Verse: 7063    sus sprâchen si besunder
Verse: 7064    manicfalden wunder.

Verse: 7065    doh ne wiste ir neheiner
Verse: 7066    di craft von dem steine

Verse: 7067    noh sîn geslehte.
Verse: 7068    si tâten unrehte,

Verse: 7069    daz si solden liegen.
Verse: 7070    si wânden betrîgen

Verse: 7071    den kuninc listiclîche.
Verse: 7072    dô sagete man wêrlîche

Verse: 7073    dem hêren Alexanderen
Verse: 7074    von einen anderen,

Verse: 7075    der wêre ein jude vil alt,
Verse: 7076    sîn wîsheit wâre manicfalt,

Verse: 7077    und wonete in sînen lande.
Verse: 7078    zehant er nâh den sande.

Verse: 7079    dô der alte daz vernam,
Verse: 7080    dô hiez er, daz man ime gewan

Verse: 7081    lûte, di in solden tragen.
Verse: 7082    er was sô comen zô sînen tagen,

Verse: 7083    daz er niet ne mohte gân.
Verse: 7084    daz hattim daz alder getân.

Verse: 7085       Dô trûch man den alden
Verse: 7086    ze hobe vile balde.

Verse: 7087    dô in der kuninc gesach,
Verse: 7088    dô grûzter in unde sprach:

Verse: 7089    'mir is gesaget, daz du sîs
Verse: 7090    in vil manigen dingen wîs

Verse: 7091    und kunnes manige grôze list,
Verse: 7092    und daz du der wîsisten bist

Verse: 7093    under dînen genôzen ein.
Verse: 7094    nû bescowe rehte disen stein

Verse: 7095    unde zeige mir rehte
Verse: 7096    sînen art und sîn geslehte

Verse: 7097    unde sîne natûre.
Verse: 7098    man saget mir, er sî tûre.'

Verse: 7099    der jude nam in in di hant.
Verse: 7100    schiere heter erkant

Verse: 7101    sîn natûre unde sînen art.
Verse: 7102    er sprah: 'nû nist noh nie ne wart

Verse: 7103    nehein sîn gelîche
Verse: 7104    in allen ertrîche.

Verse: 7105    er is tûre unde gût.
Verse: 7106    er gibit harte stolzen mût

Verse: 7107    und den alden di jugint.
Verse: 7108    er hât vil manige tugint,

Verse: 7109    des sal man mir getrouwen.
Verse: 7110    ouh muget irz wol scowen,

Verse: 7111    wande alsirz selbe habet gesehen,
Verse: 7112    sô mûzit ir mir jehen

Verse: 7113    der rehten wârheite.'
Verse: 7114    dô hîz er ime bereiten

Verse: 7115    eine wâge mit sinne
Verse: 7116    einehalb dar inne

Verse: 7117    legeter den tûren stein,
Verse: 7118    manigen guldînen zein

Verse: 7119    in di andren scale.
Verse: 7120    der stein zucte si ze tale,

Verse: 7121    swî swâr sô si wâren;
Verse: 7122    daz sagih û zewâren.

Verse: 7123    dô hiez er, daz man solde
Verse: 7124    mêr legen zô dem golde,

Verse: 7125    durh daz man irfunde,
Verse: 7126    waz der stein kunde.

Verse: 7127    dô sîn gebot was irfolt,
Verse: 7128    dô swebete obene daz golt.

Verse: 7129    der stein swebite under.
Verse: 7130    daz was ein michil wunder.

Verse: 7131    diz ist doh daz ir merken solt:
Verse: 7132    swaz man legete ûf daz golt,

Verse: 7133    daz swebete alliz obene.
Verse: 7134    diu scale zouh ie nidene

Verse: 7135    mit dem tûren steine.
Verse: 7136    er was zemâzen cleine

Verse: 7137    alse eines menschen ouge.
Verse: 7138    dô hiez der jude tougen

Verse: 7139    mit dem golde rûmen
Verse: 7140    und legete eine plûmen

Verse: 7141    und erde ein cleine
Verse: 7142    wider deme steine,

Verse: 7143    dâ daz golt ê lac.
Verse: 7144    dâ der kuninc zô sach,

Verse: 7145    der wîse Alexander
Verse: 7146    und manic man ander,

Verse: 7147    dâr zouh an der stunde
Verse: 7148    di vedere ze grunde

Verse: 7149    und di erde, di dâ bî lach.
Verse: 7150    ir iegelîcher dô jah

Verse: 7151    mannelîch besunder,
Verse: 7152    diz wêre ein michel wunder.

Verse: 7153       Dô sprah der judische man:
Verse: 7154    'wollent irz rehte verstân,

Verse: 7155    sô hîz got machen
Verse: 7156    sus wunderlîche sachen

Verse: 7157    dem kuninge ze lêren:
Verse: 7158    er irhûb sih grôzer êren.

Verse: 7159    ouh sît ir algemeine
Verse: 7160    gemanet mit dem steine,

Verse: 7161    daz ir ûh nihtis ne verhebet
Verse: 7162    al di wîle di ir lebet.

Verse: 7163    bewaret ûh von der giricheit,
Verse: 7164    wande si machet manige herzeleit.

Verse: 7165    wande swer sô giric wille wesen,
Verse: 7166    wî mach der imer genesen?

Verse: 7167    der lebet mit sorgen
Verse: 7168    den âbunt und den morgen,

Verse: 7169    wî er des beginne,
Verse: 7170    daz er imer gwinne

Verse: 7171    alliz, daz ime zô veret,
Verse: 7172    daz verslindet er und verzeret

Verse: 7173    und ne wirt doh niemer vol.
Verse: 7174    er is daz hellische hol,

Verse: 7175    daz noh nie ne wart sat
Verse: 7176    noh niemer werden ne mac;

Verse: 7177    alser gar verslindet,
Verse: 7178    swaz in zô gewendet.

Verse: 7179    nû sehet, waz is iz dan?
Verse: 7180    niwit andirs wan ein cranc man;

Verse: 7181    der glîchet dem steine,
Verse: 7182    der in der wâgen eine

Verse: 7183    sih selben nider druckete
Verse: 7184    und daz golt ûf zuckete.

Verse: 7185    ir wâret unwîse,
Verse: 7186    daz ir daz paradîse

Verse: 7187    wândet irvehten.
Verse: 7188    doh wolde ûh unse trehten

Verse: 7189    lâzen besunder
Verse: 7190    scowen sîne wunder.

Verse: 7191    doh ne muget ir niemer daz bewaren,
Verse: 7192    ir ne mûzet hine varen

Verse: 7193    und mûzet verterben
Verse: 7194    und wîslîche sterben.

Verse: 7195    sô mûzet ir werden
Verse: 7196    geminget zô der erden.

Verse: 7197    sus soldir hine rûmen.
Verse: 7198    sô glîchet ir der plûmen,

Verse: 7199    di nider mit der erden ginc,
Verse: 7200    dâr si in der wâgen hinc

Verse: 7201    unde ûf zuckete den stein.
Verse: 7202    nû nist uher nehein,

Verse: 7203    er ne habe gehôret rehte
Verse: 7204    des steines geslehte,

Verse: 7205    sîne lîhte und sîne swâre
Verse: 7206    beide vil offinbâre.

Verse: 7207       Nû merket, waz ih û kunden:
Verse: 7208    ir sult von uheren sunden

Verse: 7209    ûh schiere bekêren
Verse: 7210    unde sult êren

Verse: 7211    in allen uheren herzen got
Verse: 7212    unde leistet gerne sîn gebot.

Verse: 7213    ir sult in minnen
Verse: 7214    mit allen uheren sinnen,

Verse: 7215    der ûh gewerden hiez
Verse: 7216    unde ûh biz here lîz

Verse: 7217    von sînen gnâden leben
Verse: 7218    und der ûh allen hât gegeben

Verse: 7219    sin unde wîstum,
Verse: 7220    êre unde rîchtûm

Verse: 7221    unde lûte unde lant.
Verse: 7222    nû stêt an uheris hêren hant,

Verse: 7223    der hie gagenwortich is,
Verse: 7224    des sît ir alle gwis,

Verse: 7225    manich kunincrîche.
Verse: 7226    nû merkit al glîche,

Verse: 7227    swaz er hât oder kan.
Verse: 7228    sô nist er niwit wene ein man,

Verse: 7229    sô mûz er verterben
Verse: 7230    und ze jungist sterben:

Verse: 7231    er mach imer niwit leben.
Verse: 7232    waz hilfit ime sîn lange streben?

Verse: 7233    ze lest mûz er doh werden
Verse: 7234    gemischet zô der erden.

Verse: 7235    diz merke ouh, Alexander,
Verse: 7236    noh mêr dan ein ander,

Verse: 7237    unde lidige von freisen
Verse: 7238    wituwen unde weisen,

Verse: 7239    und kêre dîn gemûte
Verse: 7240    an allirslahte gûte,

Verse: 7241    sô dir begrîfe der tôt,
Verse: 7242    daz dih lidige von der nôt

Verse: 7243    got von himelrîche
Verse: 7244    und dih in sîn rîche

Verse: 7245    mit sînen holden bestate,
Verse: 7246    und sîner gnâde dih gesate.'

Verse: 7247       Dô dise wîslîche wort
Verse: 7248    der kuninc hete gehôrt,

Verse: 7249    dô teter hêrlîchen
Verse: 7250    und gab grôzlîchen

Verse: 7251    dem alden und mit sinnen,
Verse: 7252    und santin mit minnen

Verse: 7253    mit êren âne scande
Verse: 7254    wider heim ze lande,

Verse: 7255    und dâhte an sîne lêre
Verse: 7256    sint vorder mêre,

Verse: 7257    di wîle er hete den lîb,
Verse: 7258    und êrete man unde wîb

Verse: 7259    baz dan er dar vore tete,
Verse: 7260    und wandelte sîne site

Verse: 7261    unde sîn gemûte
Verse: 7262    in allirslahte gûte

Verse: 7263    und plach gûter mâzen.
Verse: 7264    ouh begunder lâzen

Verse: 7265    urlôge und giricheit
Verse: 7266    und was mit zuhten gemeit,

Verse: 7267    unde berihte sîn rîche
Verse: 7268    vil hêrlîche

Verse: 7269    niwit langer wene zwelif jâr.
Verse: 7270    daz sult ir wizzen vor wâr.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.