TITUS
Lamprecht, Alexander (Strassburger Bearbeitung)
Part No. 88
Previous part

Chapter: 186  
Alexander und die Amazonen


Verse: 6457    ouh schiet ih mit minnen
Verse: 6458    von der kuninginnen.

Verse: 6459    di kustih an irn munt
Verse: 6460    und hiez si blîben gesunt,

Verse: 6461    und quam zô mînen mannen.
Verse: 6462    dâ wart ih wol entfangen.

Verse: 6463    vil wol si mîn phlâgen,
Verse: 6464    wande si mih gerne sâgen.

Verse: 6465    dannen fûre wir dô
Verse: 6466    durh berge, di wâren hô,

Verse: 6467    unde slûgen unse gezelt
Verse: 6468    ûf an ein breit felt,

Verse: 6469    und hiez briebe scrîben
Verse: 6470    zô den urlûges wîben,

Verse: 6471    di sîn Amazones genant,
Verse: 6472    Amazonia hîz ir lant.

Verse: 6473    ih enbôt ir kuninginnen
Verse: 6474    mîne holde minne

Verse: 6475    in mînen brieve
Verse: 6476    und harte vil ze liebe,

Verse: 6477    und hiez, daz si mir sande
Verse: 6478    den zins von irn lande.

Verse: 6479       Dô mîn bote dar quam
Verse: 6480    und si von ime den brieb genam

Verse: 6481    und si rehte gelas,
Verse: 6482    daz dar in gescriben was,

Verse: 6483    dô antwortime mit sinne
Verse: 6484    der frowen kuninginne:

Verse: 6485    'waz wil der mêre wîgant
Verse: 6486    here in unser magede lant

Verse: 6487    mit alsô creftegen here?
Verse: 6488    beginne wir ime di rîche weren

Verse: 6489    unde irslehet er uns dan alle Samen,
Verse: 6490    des mah er imer sih gescamen,

Verse: 6491    wander hât is lutzil êre.
Verse: 6492    ouh sage ih dir mêre

Verse: 6493    man wenttiz ime ze scanden
Verse: 6494    hie unde in allen landen,

Verse: 6495    dat er mit sînen knehten
Verse: 6496    wider magede wolde vehten.

Verse: 6497    gibit uns abir got daz heil,
Verse: 6498    daz wir daz bezzere teil

Verse: 6499    gewinnen inne den strît,
Verse: 6500    des sal er denken enzît,

Verse: 6501    unde wirt er danne sigelôs,
Verse: 6502    sô ist er imer êrenlôs

Verse: 6503    under sînen genôzen
Verse: 6504    cleinen unde grôzen.

Verse: 6505    wil er fridelîche
Verse: 6506    comen in unse rîche,

Verse: 6507    wir dienen ime mit êren.
Verse: 6508    diz sage dîneme hêren.'

Verse: 6509    mit sus getânen urbote
Verse: 6510    quam wider zô mir mîn bote.

Verse: 6511       Ingagen mir dô sande
Verse: 6512    di frowe von dem lande

Verse: 6513    magide driu tûsant.
Verse: 6514    di trûgen phellîn gwant.

Verse: 6515    daz was ein hêrlîch scare.
Verse: 6516    vor mir quâmen si gare

Verse: 6517    vil gezogenlîche
Verse: 6518    und nigen mir algelîche

Verse: 6519    mit magedelîchen sinnen.
Verse: 6520    dô entfienc ih si mit minnen.

Verse: 6521    dô sprah der frowen eine,
Verse: 6522    di was ein magit reine:

Verse: 6523    'heil sî dir, kuninc hêr,
Verse: 6524    beide nû und imer mêr.

Verse: 6525    dir entbûtit unse frowe
Verse: 6526    âne valsc mit rehter trûwe

Verse: 6527    ir dienist unde alliz lieb.
Verse: 6528    si hât gesant dir einen brieb

Verse: 6529    unde hêrlîche lînwât,
Verse: 6530    phellil unde cindât.'

Verse: 6531    dô danketih der frowen
Verse: 6532    der minnen und der trûwen

Verse: 6533    und der grôzen liebe.
Verse: 6534    dô greif ih zô den briebe.

Verse: 6535    selbe ih dar inne las,
Verse: 6536    daz dar an gescriben was,

Verse: 6537    wî sih di frowen trageten
Verse: 6538    und sih bewaret habeten

Verse: 6539    vor andre wîgande,
Verse: 6540    di bî irn lande

Verse: 6541    wâren gesezzen
Verse: 6542    rîche und vermezzen:

Verse: 6543    'swî gwaldich si wâren,
Verse: 6544    si bewarten wol zwâren,

Verse: 6545    daz si ie roub oder brant
Verse: 6546    gestiften in unse lant,

Verse: 6547    sint daz Cyrus irstarb,
Verse: 6548    der ouh mit urlôge warb;

Verse: 6549    der quam zeinen stunden
Verse: 6550    mit grôzer samenunge

Verse: 6551    gevaren in unse marke
Verse: 6552    und urlougete uns starke.

Verse: 6553    des verlôs er den lîb.
Verse: 6554    den slûg ein urlôgis wîb

Verse: 6555    geheizen Cassandra.
Verse: 6556    di was in unsem lande dâ

Verse: 6557    kuningîn und frowe.
Verse: 6558    daz sage wir dir in trûwen.'

Verse: 6559       Dô ih den brief dô gelas,
Verse: 6560    alser mir gescriben was,

Verse: 6561    und ih ouh hete gehôrt
Verse: 6562    dirre scônen juncfrowen wort,

Verse: 6563    dô trôstih di magetîn.
Verse: 6564    ih sprah: 'ir sult gwis sîn,

Verse: 6565    wandirz wol sult irvaren,
Verse: 6566    daz ih here bin gevarn,

Verse: 6567    daz ne sal û, frowen, comen
Verse: 6568    ze neheinen unfromen.

Verse: 6569    ih tetiz durh di sculde,
Verse: 6570    daz ih irvaren wolde

Verse: 6571    di manicfalden wunder,
Verse: 6572    di mir dicke besunder

Verse: 6573    von û wâren gesagit.
Verse: 6574    sage dîner frowe, maget,

Verse: 6575    daz si mit gnâden sî
Verse: 6576    und von allen sorgen frî.

Verse: 6577    ih bin ir stêtige frûnt.
Verse: 6578    sage ir, daz si sî gesunt.'

Verse: 6579    di frowen kuster an irn munt.
Verse: 6580    dô hûben si sih an der stunt

Verse: 6581    und fûren heim ze lande.
Verse: 6582    mîne wîgande

Verse: 6583    di wurden inniclîchen frô.
Verse: 6584    dannen fûre wir dô.

Verse: 6585    sint irfûr ih manich lant.
Verse: 6586    manic wundir ih irvant,

Verse: 6587    daz ih sah und vernam.
Verse: 6588    vil dicke mir ouh missequam.

Verse: 6589       Hie endet sih der brieb,
Verse: 6590    dar ane leit unde liep

Verse: 6591    Alexander screib,
Verse: 6592    di er in fremeden landen leit,

Verse: 6593    und den er heim sande
Verse: 6594    sîner mûter ze lande

Verse: 6595    der frowen Olympiadi
Verse: 6596    und sînen meistre Aristotili.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.