TITUS
Lamprecht, Alexander (Strassburger Bearbeitung)
Part No. 87
Previous part

Chapter: 185  
Alexander in der Götterhöhle


Verse: 6395       Dô leite mih mit sinne
Verse: 6396    di rîche kuninginne

Verse: 6397    heimlîche in ire behalt,
Verse: 6398    in eine cruft, di was alt.

Verse: 6399    gerne ginc ih mit ir.
Verse: 6400    dô sagete si mir,

Verse: 6401    wî dâ gote sâzen
Verse: 6402    zô irn tische und âzen.

Verse: 6403    dô ih dô dar în quam,
Verse: 6404    di wârheit ih dâ vernam:

Verse: 6405    dâ vant ih gote manige,
Verse: 6406    di sâzen dâ ze samene.

Verse: 6407    al ne mugit is nit gelouben,
Verse: 6408    in lûhten di ougen

Verse: 6409    alse brinninde liehtfaz.
Verse: 6410    harte irforhtih mih daz.

Verse: 6411    ein der gote der grûzte mih.
Verse: 6412    der sprah: 'ganc here unde sih.

Verse: 6413    wiltu bescowen wunder,
Verse: 6414    sô ganc her vorder under.'

Verse: 6415    dô ih dar under in quam,
Verse: 6416    grôz wunder ih dâr vernam.

Verse: 6417    ein genibele was dâ vil grôz.
Verse: 6418    vil starke mih des verdrôz.

Verse: 6419    ouh lûhten dâ sterren
Verse: 6420    nâh unde verre.

Verse: 6421    dâ sach ih einen grôzen man,
Verse: 6422    der was alse ein got getân.

Verse: 6423    sîn gesidele was hêrlîch.
Verse: 6424    der redete vile wider mih.

Verse: 6425       Der got alsus ze mir sprach:
Verse: 6426    'dô ih dih allerletzist sah

Verse: 6427    ze Libien, des nist niht lanc.
Verse: 6428    nû habe michelen danc,

Verse: 6429    daz du ze mir bist comen.'
Verse: 6430    ih sprah: 'des nâmih gerne fromen,

Verse: 6431    ob tu mir sagen woldes,
Verse: 6432    wî lange ih leben solde.

Verse: 6433    wiste ih wêrlîche daz,
Verse: 6434    mir wêre lange deste baz

Verse: 6435    beide naht unde tach;
Verse: 6436    sô sturbih ouh âne ungemach.'

Verse: 6437       Dô antworte mir der got
Verse: 6438    und sprah: 'ih sage dir âne spot,

Verse: 6439    daz nehein erdische man
Verse: 6440    sînen tôt wizzen ne kan,

Verse: 6441    wandiz ne wêre ime niwit gût,
Verse: 6442    er ne wurde niemer wol gemût.

Verse: 6443    iz ne quême ime niwit rehte,
Verse: 6444    swanner dar ane dêhte.

Verse: 6445    ime ne wêre niwit deste baz,
Verse: 6446    wane alser sturbe al den tach;

Verse: 6447    wene ih sage dir ein dinc.
Verse: 6448    daz saltu wizzen jungelinc:

Verse: 6449    eine stat hâstu gebûwet,
Verse: 6450    di hâstu wol vernûwet,

Verse: 6451    di heizet Alexandria:
Verse: 6452    man sol dih noh begraben dâ.'

Verse: 6453    niwit mêr ne sprah er mir zû.
Verse: 6454    wider ûz gienc ih dô

Verse: 6455    zô den junchêren.
Verse: 6456    di liezen mih mit êren.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.