TITUS
Lamprecht, Alexander (Strassburger Bearbeitung)
Part No. 86
Previous part

Chapter: 184  
Alexander und Candacis


Verse: 5511       In der gegenôte
Verse: 5512    stunt ein burg gûte.

Verse: 5513    Meroves hîz di burch rîch
Verse: 5514    unde was vil hêrlîch.

Verse: 5515    si was al umbevangen
Verse: 5516    mit eime velse, der was langer.

Verse: 5517    di lûte von deme lande
Verse: 5518    wâren tûre wîgande

Verse: 5519    und lebeten hêrlîche
Verse: 5520    und wâren al gelîche

Verse: 5521    einer frowen undertân,
Verse: 5522    di hîz Gandacia.

Verse: 5523    si was ein kuninginne
Verse: 5524    und lebete mit sinne.

Verse: 5525    zwêne sune hete si.
Verse: 5526    dô hîz ih dâ bî

Verse: 5527    ûf slân mîn gezelt
Verse: 5528    an ein harte scône velt.

Verse: 5529    dô enbôt ih der frowen
Verse: 5530    mîn dienist mit allen trûwen,

Verse: 5531    und santir zô den mâle
Verse: 5532    ein bilide wol gemâlet

Verse: 5533    nâh Amon mînen gote.
Verse: 5534    dô brâhte mir wider ir bote

Verse: 5535    vil hêrlîche gâben
Verse: 5536    unde hiez mir frâgen,

Verse: 5537    ob ih wêre alsein andir man
Verse: 5538    und mir wêre undertân

Verse: 5539    di werlt alle biz al dâ.
Verse: 5540    dô hîz ir sagen jâ.

Verse: 5541       Von der gâben wil ih û sagen,
Verse: 5542    di siu mir hîz vore tragen:

Verse: 5543    hundrit guldîne gote;
Verse: 5544    ouh brâhte mir ir bote

Verse: 5545    andirhalp hundrit môre,
Verse: 5546    di hâten lange ôren

Verse: 5547    und wâren alle kinder.
Verse: 5548    mînen gesinde

Verse: 5549    gab ih si an ir hûte.
Verse: 5550    ouh sante mir di gûte

Verse: 5551    drîzic gûte goltfaz,
Verse: 5552    nûnzich elfande unde baz.

Verse: 5553    si sante mir pantêre
Verse: 5554    seszich unde mêre

Verse: 5555    und hundrit liebarte,
Verse: 5556    di dâ loufint harte.

Verse: 5557    ouh sante mir di kuningîn
Verse: 5558    funf hundrit fugelîn

Verse: 5559    sitige unde spingen,
Verse: 5560    di sprechent unde singen;

Verse: 5561    und hundrit balkin vein.
Verse: 5562    nie ne wart holz nehein

Verse: 5563    sô gût noh sô tûre.
Verse: 5564    iz ne mac in den fûre

Verse: 5565    neheine wîs verbrinnen.
Verse: 5566    ouh brâhte durh minne

Verse: 5567    der selben kuninginnen bote
Verse: 5568    Amone mînen gote

Verse: 5569    eine crône wol gezieret
Verse: 5570    unde harte wol gewieret

Verse: 5571    mit edelen gesteine
Verse: 5572    grôz unde cleine,

Verse: 5573    alsiz di frowe wolde.
Verse: 5574    zehen ketenen von golde

Verse: 5575    wâren dar ane gehangen.
Verse: 5576    dâ mite was bevangen

Verse: 5577    di crône hêrlîche.
Verse: 5578    di kuninginne rîche

Verse: 5579    sante mir ouh ein tier,
Verse: 5580    daz was edele unde hêr,

Verse: 5581    daz den carbunkel treget
Verse: 5582    und daz sih vor di magit leget.

Verse: 5583    Monosceros ist iz genant.
Verse: 5584    der ist luzzil in diz lant.

Verse: 5585    dar zô ne frumet nehein jaget:
Verse: 5586    man sol iz vâhen mit einer magit.

Verse: 5587    sîn gehurne daz ist freisam,
Verse: 5588    dâ ne mac niwit vor bestân.

Verse: 5589    und dô di gâbe was brâht,
Verse: 5590    dô was di frowe des bedâht,

Verse: 5591    daz si zô mir sante einen man,
Verse: 5592    der was alsô getân,

Verse: 5593    daz er konde mâlen.
Verse: 5594    der mâlede zô dem mâle

Verse: 5595    an einer tabelen mînen lîb.
Verse: 5596    niht nist sô listic, sô daz wîb

Verse: 5597    unde ouh ir kint.
Verse: 5598    des quam ih in grôz angist sint.

Verse: 5599       Candaulus der frowen alder sun
Verse: 5600    dâhte, was er mohte tûn.

Verse: 5601    er nam sîne wîse man.
Verse: 5602    dô er rehte vernam,

Verse: 5603    daz ih dare comen was,
Verse: 5604    dô volgeter mir an ein gras

Verse: 5605    und sûhte mih an daz velt.
Verse: 5606    dô lach ih under mîn gezelt.

Verse: 5607    dô er bî mînen here quam
Verse: 5608    unde mîne wartman

Verse: 5609    sîm worden geware,
Verse: 5610    dô hûben si sih dare

Verse: 5611    und viengen den helt junc
Verse: 5612    unde brâhten in zestunt,

Verse: 5613    dâr Tholomeus lach.
Verse: 5614    der frâgetin unde sprah,

Verse: 5615    waz sîn gewerb wêre.
Verse: 5616    dô sprah der junchêre:

Verse: 5617    'Candacis is mîn mûter.
Verse: 5618    vernim durh dîne gûte

Verse: 5619    mîn herzeleit, daz ih dir clagen.
Verse: 5620    ih wolde dîne helfe haben.

Verse: 5621    ih hân verloren mîn wîb,
Verse: 5622    di mir lieb was sô der lîb.

Verse: 5623    daz is mir ze unheile comen.
Verse: 5624    di frowe di hât mir genomen

Verse: 5625    ein kuninc, der is vermezzen
Verse: 5626    und ist hie bî gesezzen.

Verse: 5627    durh trôst bin ih comen zô dir,
Verse: 5628    und mahtu des gehelfen mir,

Verse: 5629    daz ih si wider gewinnen,
Verse: 5630    des lônih dir mit minnen.'

Verse: 5631       Dô Tholomeus mîn man
Verse: 5632    des hêren clage vernam,

Verse: 5633    dô sweich er vil stille
Verse: 5634    und ginc mit gûten willen

Verse: 5635    rehte under mîn gezelt,
Verse: 5636    dâ ih lach an daz velt,

Verse: 5637    und sagete mir, wî iz was comen
Verse: 5638    unde waz er hête vernomen.

Verse: 5639    dô rihtih mih ûf scône
Verse: 5640    und gab ime mîne crône

Verse: 5641    unde hiez in sân
Verse: 5642    wider in sîn gezelt gân

Verse: 5643    und mit sinne handelen sîn dinc.
Verse: 5644    ih sprah: 'dirre jungelinc

Verse: 5645    ne mah dîn niht irkennen;
Verse: 5646    Alexander saltu dih nennen

Verse: 5647    und jehe des neheine wîs,
Verse: 5648    daz du Tholomeus sîs,

Verse: 5649    und heiz mih dir gewinnen.
Verse: 5650    Antigonus saltu mih nennen

Verse: 5651    und gebût mir alse dînen man,
Verse: 5652    daz schiere werde widertân

Verse: 5653    daz dir hêre hât geclagit.
Verse: 5654    alse wir haben hie gesaget,

Verse: 5655    daz tû wir mit sinne;
Verse: 5656    und heiz mir ime gewinnen

Verse: 5657    schîre widere sîn wîb,
Verse: 5658    alsô lieb sô mir sî der lîb.'

Verse: 5659       Di hêren beide tâten,
Verse: 5660    des si wâren berâten.

Verse: 5661    Tholomeus di crône entfienc.
Verse: 5662    zô sînen gezelde er gienc

Verse: 5663    in allen den gebêre,
Verse: 5664    alser Alexander wêre.

Verse: 5665    nâh Alexandere er sante,
Verse: 5666    Antigonus er in nante.

Verse: 5667    dô sprah er zô Candaulo:
Verse: 5668    'gehabe dih wol und wis frô,

Verse: 5669    dîn bete wirt geleistet.
Verse: 5670    du hâs wol vereischet,

Verse: 5671    daz ih Alexander bin genant.
Verse: 5672    Macedonia is mîn lant,

Verse: 5673    dannen bin ih here comen.
Verse: 5674    daz mahtu haben wol vernomen

Verse: 5675    Persen ist mir undertân,
Verse: 5676    Parthis unde Indiân

Verse: 5677    di stênt an mîner gewalt.
Verse: 5678    ih wil mit dir, helt balt,

Verse: 5679    hinnen senden disen man,
Verse: 5680    der dir wol gehelfen kan.

Verse: 5681    ih gebe ime heris alsô vile,
Verse: 5682    alse er is selbe nemen wile.

Verse: 5683    er ist Antigonus genant.
Verse: 5684    den fûre in daz selbe lant,

Verse: 5685    dâ dîn wîb is inne.
Verse: 5686    er veret mit grôzen sinne.

Verse: 5687    er gwinnet dir widere dîn wîb
Verse: 5688    oder er verlieset den lîb.'

Verse: 5689       Dô wânede Candaulus,
Verse: 5690    daz mîn man Tholomeus

Verse: 5691    Alexander wêre.
Verse: 5692    des frowete sih der mêre.

Verse: 5693    dô gwan der helt gût
Verse: 5694    einen frôlîchen mût,

Verse: 5695    daz er sulhe helfe gewan.
Verse: 5696    dô gereite sih manic man

Verse: 5697    von mînen gesinde.
Verse: 5698    dô vôre wir mit dem kinde.

Verse: 5699    dô sagete ih vil stille
Verse: 5700    mînen lûten mînen willen,

Verse: 5701    di mih wol irkanten:
Verse: 5702    daz si alle nanten

Verse: 5703    mih Antigonus,
Verse: 5704    dô iz geahtit was alsus,

Verse: 5705    daz verwandelet was mîn name.
Verse: 5706    selbe fûrte ih mînen vanen.

Verse: 5707    mîn volch ih bereitte.
Verse: 5708    Candaulus uns leitte

Verse: 5709    ze Bala vor di veste.
Verse: 5710    sô getâner geste

Verse: 5711    wâren si vil ungewone,
Verse: 5712    alsin dô wâren comen.

Verse: 5713    ir state slozzen si zô.
Verse: 5714    ze râte gingen dô

Verse: 5715    di helede vermezzen,
Verse: 5716    di dâ wâren besezzen,

Verse: 5717    und sprâchen al besunder,
Verse: 5718    si nême michil wunder,

Verse: 5719    waz daz here wolde
Verse: 5720    oder waz iz dâre solde.

Verse: 5721       Der kuninc der was ûz gevaren
Verse: 5722    mit einer creftigen scharen

Verse: 5723    ûf einen sînen genôz.
Verse: 5724    dô wart der angist vil grôz,

Verse: 5725    di in der stat wâren,
Verse: 5726    daz sagih û zwâren.

Verse: 5727    dô si in allen sîten
Verse: 5728    daz here gesâhen rîten

Verse: 5729    ubir di marke,
Verse: 5730    dô forhten si starke,

Verse: 5731    daz Porus dannoch lebete
Verse: 5732    unde dar zô strebete

Verse: 5733    mit sînes heres craften.
Verse: 5734    in ir mût si dâhten,

Verse: 5735    daz er si stôren solde
Verse: 5736    unde er lôsen wolde

Verse: 5737    di frowe, wande er was ir mâch,
Verse: 5738    dar ih was gevarn nâh.

Verse: 5739       Nû vernemet rehte, waz ih û sage.
Verse: 5740    dar nâh ubir drî tage

Verse: 5741    Candaulus mih bat,
Verse: 5742    daz wir riten vor di stat,

Verse: 5743    dâ di frowe was inne.
Verse: 5744    daz tâte wir mit sinne.

Verse: 5745    dô wir dar quâmen
Verse: 5746    undiz jene vernâmen,

Verse: 5747    di in der stat wâren,
Verse: 5748    si gingen offinbâre

Verse: 5749    an ir zinnen stân
Verse: 5750    unde frâgeten uns sân

Verse: 5751    von ir brustwere
Verse: 5752    umbe daz uncundige here,

Verse: 5753    wannen daz comen wêre.
Verse: 5754    ouh frâgeten si mêre,

Verse: 5755    waz si uns hêten getân
Verse: 5756    unde ob wir si bestân

Verse: 5757    mit urlûge solden.
Verse: 5758    wir sageten, daz wir wolden

Verse: 5759    ir stat gare zebrechen
Verse: 5760    unde an in rechen

Verse: 5761    beide an ir êre und an ir lîb,
Verse: 5762    daz si Candaulis wîb

Verse: 5763    dar in hêten gevân
Verse: 5764    und dar zô sîne liebe man;

Verse: 5765    daz ne wurde schiere widertân,
Verse: 5766    sô môstens imer scaden hân.

Verse: 5767       Dô di burgêre
Verse: 5768    vernâmen diz mêre

Verse: 5769    und alsiz in di burg quam,
Verse: 5770    michil angist si des nam.

Verse: 5771    ûf brâchen si daz palas,
Verse: 5772    dâ di juncfrowe inne was,

Verse: 5773    zô uns santen si nider
Verse: 5774    und gâben uns di frowe wider.

Verse: 5775    dô lieze wir ir stat stân
Verse: 5776    unde fûren dannen sân

Verse: 5777    mit hêren Candaulo.
Verse: 5778    dem was sîn herze vil frô.

Verse: 5779    der sprah offinbâre,
Verse: 5780    daz ih des gwis wâre,

Verse: 5781    woldih mit ime heim comen,
Verse: 5782    ih gwunnis michelen fromen

Verse: 5783    von im und von sîner mûter.
Verse: 5784    er weste si in den gûten,

Verse: 5785    si solde mir mîner arbeit
Verse: 5786    mit liebe lônen âne leit.

Verse: 5787       Dô enbôt ih Tholemeo,
Verse: 5788    daz ih mit Candaulo

Verse: 5789    wolde heim ze lande,
Verse: 5790    durh daz ih irkande

Verse: 5791    unde mit listen irfunde,
Verse: 5792    wî iz dâ ze lande stunde,

Verse: 5793    und ouh daz ih irsêge,
Verse: 5794    wilher site man dâ phlêge.

Verse: 5795    dô wir dannen solden rîten,
Verse: 5796    des weges in beiden sîten

Verse: 5797    di hôisten berge ih gesach,
Verse: 5798    mit wârheit ih daz sagen mach,

Verse: 5799    dar ie dehein man
Verse: 5800    in diser werlt zô quam,

Verse: 5801    und di hie an der erden
Verse: 5802    ie mohten gewerden.

Verse: 5803    dô frâgetih mit listen
Verse: 5804    di lûte, diz wol wisten,

Verse: 5805    waz ûf den bergen wâre.
Verse: 5806    di sageten uffenbâre,

Verse: 5807    dar ûf wâren besunder
Verse: 5808    manicfalde wunder:

Verse: 5809    tier di wâren eislîch,
Verse: 5810    und wurme vil freislîch.

Verse: 5811    ih sah dâ lange boume,
Verse: 5812    des nam ih allis goume:

Verse: 5813    daz obiz, daz dar ûf wôchs,
Verse: 5814    daz waz sô ummâzlîchen grôz,

Verse: 5815    daz ihs nit ne tar sagen.
Verse: 5816    ir mohtis uheren spot haben,

Verse: 5817    wandiz dûhte û ungeloublîch.
Verse: 5818    wintrûbelen di sach ih,

Verse: 5819    von den mach ih û sagen,
Verse: 5820    di ne mohte ein man niht getragen.

Verse: 5821    ouh sah ih dâ nuzze
Verse: 5822    grôz und niwit lutzil,

Verse: 5823    grôzer si wâren
Verse: 5824    danne phedemen zwâren,

Verse: 5825    ouh sach ih dâ trachen
Verse: 5826    und andre manige sachen

Verse: 5827    und manige grôze slange
Verse: 5828    grôze unde lange.

Verse: 5829    ûf den boumen sâzen affen
Verse: 5830    und wilde merekatzin

Verse: 5831    und freislîch gefugele,
Verse: 5832    daz hete dâ sîn gesidele.

Verse: 5833       Vernemet noch mêr, waz ih û sage
Verse: 5834    dô wir gefûren funf tage,

Verse: 5835    dô sâge wir vor uns stân
Verse: 5836    ein burch, di was wol getân

Verse: 5837    dar ûf stunt ein palas,
Verse: 5838    dâ Candacis inne was,

Verse: 5839    di phlac grôzer gûte.
Verse: 5840    di was Candaulis mûter.

Verse: 5841    dô si hete vernomen,
Verse: 5842    daz ir sun was wider comen

Verse: 5843    und sîn wîb brâhte,
Verse: 5844    vil liebe si sih gedâhte:

Verse: 5845    ingagen uns si dô ginc,
Verse: 5846    mit grôzen êren si uns entphinc.

Verse: 5847    ûf ir houbit si trûc
Verse: 5848    eine crône von golde sô gût,

Verse: 5849    daz nie nihein man
Verse: 5850    neheine bezzere gewan.

Verse: 5851    si selbe was harte lussam,
Verse: 5852    von rehten prîse wol getân:

Verse: 5853    si ne was ze kurz noh ze lanc.
Verse: 5854    mir was in mînen gedanc

Verse: 5855    alsô wol ze mûte,
Verse: 5856    alsih mîne mûter

Verse: 5857    gesêhe vor andren wîben;
Verse: 5858    alsô wol was mînem libe.

Verse: 5859       Die edele kuninginne
Verse: 5860    frâgete dô mit sinne

Verse: 5861    umbe den man irn sune,
Verse: 5862    di mit ime was comen,

Verse: 5863    wande si gerne vernême,
Verse: 5864    von wilhen lande er quême

Verse: 5865    und waz sîn gewerb wêre.
Verse: 5866    Candaulus der mêre

Verse: 5867    antworte sîner mûter sus:
Verse: 5868    'der hêre heizet Antigonus

Verse: 5869    und is geborn von Kriechlant;
Verse: 5870    den hete mit mir gesant

Verse: 5871    der rîche Alexander
Verse: 5872    here zô unsen lande.

Verse: 5873    zô dînem hûs nie ne quam
Verse: 5874    sô rehte biderbe ein man.

Verse: 5875    von rehte mûzih in loben,
Verse: 5876    wander is harte wol gezogen

Verse: 5877    und hât einen kûschen lîb.
Verse: 5878    er gwan mir widere mîn wîb.

Verse: 5879    diz habe in dînen sinnen
Verse: 5880    und dankis ime mit minnen

Verse: 5881    unde mit gûten,
Verse: 5882    Candacis trût mûter.'

Verse: 5883       Dô entfienc mih mit minnen
Verse: 5884    di edele kuninginne

Verse: 5885    und kuste mich an mînen munt
Verse: 5886    unde leite mih zestunt

Verse: 5887    in ein scône palas,
Verse: 5888    daz von ônichîno geleget was.

Verse: 5889    di sûlen wâren reine
Verse: 5890    von edelem gesteine.

Verse: 5891    daz dach daz was guldîn.
Verse: 5892    manic wunder stunt dar in.

Verse: 5893    di spanbette wâren,
Verse: 5894    daz sagih û zwâren,

Verse: 5895    von gelûterten golde,
Verse: 5896    alsiz di frowe wolde.

Verse: 5897    dar ûffe lâgen bettewât
Verse: 5898    von rôtem golde wol genât.

Verse: 5899    di tabele, dâ si zô saz,
Verse: 5900    sô si geswêslîchen az,

Verse: 5901    di was von elfenbeine,
Verse: 5902    gezîret mit gesteine.

Verse: 5903    di benche wâren rôt golt.
Verse: 5904    noh mêr ir vernemen sult:

Verse: 5905    der palas was hêre
Verse: 5906    gezîrt mit manigen êren.

Verse: 5907    obene di swibogen
Verse: 5908    wâren mit golde ubirzogen.

Verse: 5909    di manicfalden wunder,
Verse: 5910    di obene unde under

Verse: 5911    dar ane stunden irgraben,
Verse: 5912    di ne mah û nieman gesagen.

Verse: 5913    ein wâch ouh dar under flôz,
Verse: 5914    der was mâzlîchen grôz,

Verse: 5915    orpimento gelîch,
Verse: 5916    nâh dem golde verweter sih.

Verse: 5917    dâ was michil wunne:
Verse: 5918    swenne sô di sunne

Verse: 5919    obene an den palas schein,
Verse: 5920    sô schein daz golt al ein

Verse: 5921    und der wâch der under.
Verse: 5922    daz dûhte mir grôz wunder,

Verse: 5923    dô ihz rehte besach.
Verse: 5924    vor wâr ih daz sagen mach,

Verse: 5925    dâ was lûtes ein michil maht.
Verse: 5926    dô machete eine wirtscaft

Verse: 5927    di rîche kuninginne
Verse: 5928    mit grôzeme sinne

Verse: 5929    iren lieben kinden
Verse: 5930    und iren ingesinden.

Verse: 5931    zêrist unde ze leste
Verse: 5932    hîz si ire geste

Verse: 5933    vil harte flîzlîchen plegen
Verse: 5934    und hîz uns genûc geben

Verse: 5935    allis des wir wolden
Verse: 5936    unde des wir haben solden

Verse: 5937    beide ih und mîne man.
Verse: 5938    siu selbe unsir ware nam.

Verse: 5939       Der edelen kuninginnen sal,
Verse: 5940    der was, alsih û sagen sal,

Verse: 5941    daz si ze mûse inne ginc,
Verse: 5942    sô si liebe geste entfienc,

Verse: 5943    hêrlîch unde reine,
Verse: 5944    gezîret mit gesteine.

Verse: 5945    nidene unde ouh obene
Verse: 5946    was er wol ze lobene.

Verse: 5947    dâ di frowe ze tabelen saz,
Verse: 5948    alse si tranc unde az,

Verse: 5949    dâ hinc ein tûre umbehanc,
Verse: 5950    der was breit unde, lanc,

Verse: 5951    von edelen golde durhslagen.
Verse: 5952    mit sîdin wâren dar în getragen

Verse: 5953    vogele unde tiere
Verse: 5954    mit manicfalder ziere

Verse: 5955    unde mit manigerslahte varwe.
Verse: 5956    daz merketih alliz garwe.

Verse: 5957    man mohte dar an scowen
Verse: 5958    rîter unde frowen

Verse: 5959    obene unde nidene
Verse: 5960    mit wunderlîchen bilide.

Verse: 5961    zô den enden und an den orten
Verse: 5962    wâren tûre borten

Verse: 5963    und elfenbeinîne crapfen,
Verse: 5964    di hangeten an den ricken.

Verse: 5965    alse man zouh den umbehanc,
Verse: 5966    manic goltschelle dar an irclanc.

Verse: 5967    der umbehanc was hêrlîch.
Verse: 5968    ime ne wart nie nehein gelîch.

Verse: 5969    den meisterde Candacis.
Verse: 5970    wande si was listich unde wîs,

Verse: 5971    di rîche kuninginne
Verse: 5972    mit iren tiefen sinne.

Verse: 5973       Ouh sah ih dâ ze stunden,
Verse: 5974    daz vor ir tabele stunden

Verse: 5975    zwei edele kerzestallen
Verse: 5976    von lûteren cristallen.

Verse: 5977    dâ was gesazt inne
Verse: 5978    manic scône gimme.

Verse: 5979    obene stunden ouh dar an,
Verse: 5980    daz scowete dâ manic man,

Verse: 5981    zwêne lîhte carbuncel:
Verse: 5982    di naht ne was nie sô tunkel,

Verse: 5983    si lûhten sô die sterren
Verse: 5984    nâh unde verre

Verse: 5985    und sô daz man in den sal
Verse: 5986    wol gesach ubir al

Verse: 5987    in allen enden,
Verse: 5988    alse dâ vackelen brenten.

Verse: 5989    sus hêrlîche
Verse: 5990    was di frowe rîche

Verse: 5991    allezît berâten.
Verse: 5992    in ir kemenâte

Verse: 5993    was gnâde unde heil.
Verse: 5994    dâ ne gebrast nehein teil,

Verse: 5995    des dâ wesen solde
Verse: 5996    und des man haben wolde.

Verse: 5997       Ih wil û sagen mêre
Verse: 5998    von der kuninginnen hêre,

Verse: 5999    wî ir spil was getân,
Verse: 6000    sô si ze mûse solde gân:

Verse: 6001    mitten in ir palas
Verse: 6002    ein scône tier geworht was,

Verse: 6003    daz was alliz golt rôt,
Verse: 6004    alse siz selbe gebôt.

Verse: 6005    daz tier was vil hêrlîch
Verse: 6006    eineme hirze gelîch.

Verse: 6007    an sîn houbit vorne
Verse: 6008    hattiz dûsint horne.

Verse: 6009    ûf allir horne gelîch
Verse: 6010    stunt ein fugil hêrlîch.

Verse: 6011    ûf dem tiere saz ein man
Verse: 6012    scône unde wol getân,

Verse: 6013    der fûrte zwêne hunde
Verse: 6014    unde ein horn ze sînen munde.

Verse: 6015    nidene an dem gewelbe
Verse: 6016    lâgen viere und zwênzich blâsebelge.

Verse: 6017    zaller belge gelîch
Verse: 6018    gingen zwelif man creftich.

Verse: 6019    sô si di belge drungen,
Verse: 6020    di fugele scône sungen

Verse: 6021    an deme tiere vorn,
Verse: 6022    sô blies ouh der man sîn horn,

Verse: 6023    sô galpeden ouh di hunde.
Verse: 6024    ouh lûtte an der stunden

Verse: 6025    daz hêrlîche tier
Verse: 6026    mit der stimmen alsein pantier,

Verse: 6027    dem gêt under stunde
Verse: 6028    ein âdem ûz dem munde

Verse: 6029    sûzer den wîrouch.
Verse: 6030    der frowen dienist werte ouh

Verse: 6031    von prîme biz ze nône.
Verse: 6032    sô di frowe scône

Verse: 6033    Candacis ze mûse ginc,
Verse: 6034    sô stunden dâr an einen rinc

Verse: 6035    tûsint jungelinge
Verse: 6036    von irn ingesinde,

Verse: 6037    di plâgen hubischeite vile
Verse: 6038    mit allir slahte seitspile,

Verse: 6039    unde funf hundrit junchêren,
Verse: 6040    di mit allen êren

Verse: 6041    des hobis wol plâgen
Verse: 6042    unde wazzer gâben

Verse: 6043    und di dâ ware nâmen
Verse: 6044    der geste, di dâ quâmen.

Verse: 6045    ouh mohte man dâ scowen
Verse: 6046    funf hundrit juncfrowen

Verse: 6047    wol gewassen unde smal
Verse: 6048    und rîterlîch ubir al,

Verse: 6049    scône under den ougen,
Verse: 6050    mit guldînen bougen.

Verse: 6051    di trûgen an ir lîb
Verse: 6052    manigen scônen samît

Verse: 6053    beide grûne unde rôt,
Verse: 6054    alsiz di frowe gebôt.

Verse: 6055    alse di harfen clungen,
Verse: 6056    di juncfrowen sungen

Verse: 6057    und tanzeten unde trâten.
Verse: 6058    hei wî wol daz taten,

Verse: 6059    dô sis begunden,
Verse: 6060    wande siz wol kunden.

Verse: 6061    und alse di frowe lussam
Verse: 6062    ubir hob solde gân,

Verse: 6063    vor si gingen getwerge
Verse: 6064    zô der herberge,

Verse: 6065    di wâren alle wol gezogen.
Verse: 6066    daz merket vor ungelogen,

Verse: 6067    di trûgen phelline wât,
Verse: 6068    di was mit golde wol genât.

Verse: 6069    si trûgen grâ unde bunt.
Verse: 6070    mir ne wart nie mê kunt

Verse: 6071    nehein frowe sô lussam
Verse: 6072    unde alse rehte wol getân.

Verse: 6073    si was vor allen wîben
Verse: 6074    an frumicheit und an ir lîbe

Verse: 6075    vor allen frowen ûz irkorn.
Verse: 6076    si ginc in allen bevorn,

Verse: 6077    di in den gezîten
Verse: 6078    in der werlt wâren wîten.

Verse: 6079       Des nêhisten morgenis frû
Verse: 6080    di frowe leitte mich dô

Verse: 6081    in eine andre kemenâten.
Verse: 6082    di di geworht hâten,

Verse: 6083    di wâren listige man.
Verse: 6084    dâ stunden rôte steine an,

Verse: 6085    di lûhten sô di sterren
Verse: 6086    nâh unde verre.

Verse: 6087    des nahtes was dar inne tah
Verse: 6088    und von lîhte michil gemach.

Verse: 6089       Dô leitte mih di kuningîn
Verse: 6090    di dritte kemenâten in.

Verse: 6091    di was vil hêrsam.
Verse: 6092    mit uns ne ginc nieman,

Verse: 6093    wan wir einigen zwei.
Verse: 6094    von edelen holze aspindei

Verse: 6095    was daz gewerke.
Verse: 6096    daz solt ir rehte merken.

Verse: 6097    daz holz daz is tûre,
Verse: 6098    iz ne mah in den fûre

Verse: 6099    neheine wîs verbrinnen.
Verse: 6100    dô leitte si mih dannen

Verse: 6101    in eine kemenâten hô,
Verse: 6102    di was gemachit alsô

Verse: 6103    von starken balken veinen
Verse: 6104    grôzen und niwit cleinen,

Verse: 6105    di meisterde di frowe.
Verse: 6106    man mohte dar ane scowen

Verse: 6107    manige list besunder.
Verse: 6108    dâ wâren gesazt under

Verse: 6109    starkir radere viere.
Verse: 6110    starker elfentiere

Verse: 6111    sehs unde drîzich,
Verse: 6112    daz was vil hêrlîch,

Verse: 6113    zugen di kemenâten.
Verse: 6114    diz hatte al berâten

Verse: 6115    di wîse kuninginne.
Verse: 6116    ih dâhte in mînen sinne,

Verse: 6117    dô ih diz alliz besach,
Verse: 6118    dô hûb ih an unde sprah:

Verse: 6119    wolde got der gûte,
Verse: 6120    hêtih und mîn mûter

Verse: 6121    dise kemenâten
Verse: 6122    alsus wol berâten

Verse: 6123    mit disen elfanden
Verse: 6124    heim ze Kriechlande!'

Verse: 6125    ze hant dô ih alsus gesprach,
Verse: 6126    di kuningîn mih ane sah

Verse: 6127    und sprah: 'Alexander,
Verse: 6128    daz wêre ein michil wunder,

Verse: 6129    hêtistu alsus lîhte
Verse: 6130    mir nû mîn gestifte

Verse: 6131    mit dînen worten benomen,
Verse: 6132    und wâriz ze Kriechen comen

Verse: 6133    mit sus samfter arbeit,
Verse: 6134    wênistu, iz ne wêre mir leit?'

Verse: 6135       Vile harte ih underquam,
Verse: 6136    dô ih der frowen wort vernam

Verse: 6137    und ih gehôrte mînen namen;
Verse: 6138    dô begundih forhten unde scamen.

Verse: 6139    sih verwandelôte garwe
Verse: 6140    mîn sin und mîn varwe.

Verse: 6141    dô sprah si 'Alexander,
Verse: 6142    nemet dih des wunder,

Verse: 6143    daz ih dih hie nenne?
Verse: 6144    vil wol ih dih irkenne,

Verse: 6145    daz saltu noh bescowen.'
Verse: 6146    dô leitte mih di frowe

Verse: 6147    in eine kemenâte,
Verse: 6148    dâ si behalden hâte

Verse: 6149    ein bilide nâh mir getân,
Verse: 6150    dan abe ih û gesagit hân.

Verse: 6151       Vil leide ih mir gedâhte,
Verse: 6152    dô di frowe brâhte

Verse: 6153    daz bilide ze lîhte
Verse: 6154    unde ze mînen anesihte

Verse: 6155    daz hatte in irn handen.
Verse: 6156    si sprah: 'Alexander,

Verse: 6157    nû du dîn bilide hâst gesehen,
Verse: 6158    nû mûstu mir von rehte jehen,

Verse: 6159    daz ih dih wol irkenne,
Verse: 6160    wandih dih rehte nenne.

Verse: 6161    ih weiz wol, wer du bist.
Verse: 6162    dih ne hilfit neheine dîne list,

Verse: 6163    di du canst, helit balt,
Verse: 6164    du ne stês an mîner gewalt.

Verse: 6165    waz hilfit dir nû dîn craft
Verse: 6166    unde daz du sigehaft

Verse: 6167    ubir manic lant wêre.
Verse: 6168    Persiam di mêre

Verse: 6169    hâstu zestôret
Verse: 6170    und Indiam zefûret,

Verse: 6171    Partos ubirwunden.
Verse: 6172    nû hât dih bedwungen

Verse: 6173    âne fehten ein wîb.
Verse: 6174    waz hilfit dir nû manic strît,

Verse: 6175    den du lange hâs getân.
Verse: 6176    nû mahtu rehte wol verstân,

Verse: 6177    daz nû nieman ne lebet,
Verse: 6178    swenner sih ze hô verhebet,

Verse: 6179    swî ime di sâlden volgen,
Verse: 6180    werdent si ime verbolgen,

Verse: 6181    si ne kêre zornlîche wider
Verse: 6182    und wirfit den rîchen der nider

Verse: 6183    alsô schiere sô den armen.
Verse: 6184    des mûz ih dih warnen.

Verse: 6185    ouh hâstuz selbe wol gesehen,
Verse: 6186    wiltu der wârheite jehen.'

Verse: 6187       Mîn zorn mih dar zô dwanc
Verse: 6188    daz ih mih karte zô der want

Verse: 6189    von der kuninginnen.
Verse: 6190    dô wart si wol innen

Verse: 6191    mîner ungebêre
Verse: 6192    und frâgete, waz mir wêre.

Verse: 6193    ih sprah, mir wêre vil zorn,
Verse: 6194    daz ih hette verlorn

Verse: 6195    beide witze unde sin.
Verse: 6196    'daz ih nû sus vertôret bin,

Verse: 6197    daz ist mir vil unwert.
Verse: 6198    ih hête gerne mîn swert,

Verse: 6199    ih wolde dih ze tôte slân.
Verse: 6200    sê, wî torstistu mih vân!

Verse: 6201    sol ih abir hin comen
Verse: 6202    unde wirt iz danne vernomen

Verse: 6203    dâ heim ze mînen lande,
Verse: 6204    dô habih is imer scande,

Verse: 6205    daz mih bedwungen hât ein wîb.
Verse: 6206    war zô sol mir nû der lîb,

Verse: 6207    er is mir ummêre.'
Verse: 6208    sô sprah di frowe hêre:

Verse: 6209    'ne zurne nûwit helt gût
Verse: 6210    und habe manlîchen mût,

Verse: 6211    ih bin an dir inne
Verse: 6212    worden grôzer sinne

Verse: 6213    unde grôzer wîsheit.
Verse: 6214    ne lâ dir niwit wesen leit,

Verse: 6215    daz ih dih alsus hân irvarn.
Verse: 6216    dir ne scadet neheiner mûter barn.

Verse: 6217    du ne salt den frowen
Verse: 6218    neheine wîs drowen

Verse: 6219    noh slân noh schelden.
Verse: 6220    ih ne wil dih niwit melden.

Verse: 6221    gehabe dih wol und wis frô.
Verse: 6222    du hâs Candaulo

Verse: 6223    wider gewunnen sîn wîb.
Verse: 6224    daz behaldet dir den lîb.

Verse: 6225    irkanten dih di lûte,
Verse: 6226    dih ne irnerte hûte

Verse: 6227    von den tôte nehein man.
Verse: 6228    wande dir ist vil gram

Verse: 6229    Caracter mîn junger sun,
Verse: 6230    wande du irslûge Porum,

Verse: 6231    den vater sînis wîbis.
Verse: 6232    du ne darf dînes lîbes

Verse: 6233    rehte neheine sorge haben.
Verse: 6234    dir ne mach nieman hie gescaden.'

Verse: 6235       Dô leitte siu mih vore baz,
Verse: 6236    dâ ir slâfgadem was.

Verse: 6237    dar inne hienc ein umbehanc,
Verse: 6238    der was breit unde lanc.

Verse: 6239    dô sih der umbehanc entlouch,
Verse: 6240    dô quam dar ûz der beste rouch,

Verse: 6241    den ie dichein man
Verse: 6242    umbe ein bette vernam.

Verse: 6243    ir bette stunt hêrlîche.
Verse: 6244    di kuninginne rîche

Verse: 6245    bescheinte mi ir willen.
Verse: 6246    dô minnetih si stille.

Verse: 6247    si sprah, dô ih si gwan
Verse: 6248    ze wîbe, ih wêre ir man,

Verse: 6249    daz ih mîn trûren lieze stân,
Verse: 6250    mir ne wurde argis niwit getân.

Verse: 6251    dô bat mih di frowe gût,
Verse: 6252    daz ih getrôste iren mût

Verse: 6253    unde schiere wider quême
Verse: 6254    unde ih ir benême

Verse: 6255    den freislîchen smerzen,
Verse: 6256    den si an ir herzen

Verse: 6257    durh mih lîden solde.
Verse: 6258    dô sprah ih, daz ih wolde

Verse: 6259    vil schiere zô ir komen wider.
Verse: 6260    dô gienge wir nider,

Verse: 6261    dâ ir sune wâren.
Verse: 6262    dâ sprah si offinbâre

Verse: 6263    zô den junchêren:
Verse: 6264    'mit wî getânen êren

Verse: 6265    wir disen wîgande
Verse: 6266    gelônen âne scande

Verse: 6267    dem boten des kuninges.
Verse: 6268    wêre hie iht sulehis,

Verse: 6269    des er nemen wolde,
Verse: 6270    vil gerne manz ime solde

Verse: 6271    geben unde in lâzen
Verse: 6272    varen sîne strâze.'

Verse: 6273       Des antworte der jungelinc
Verse: 6274    Karacter, der frowen junger kint:

Verse: 6275    'ih wil ime eine gâbe geben,
Verse: 6276    di ime hûte gêt an daz leben,

Verse: 6277    mit mînem swerte einen slach,
Verse: 6278    den er verwinnen nit ne mach,

Verse: 6279    Alexandro ze leide,
Verse: 6280    wander slûch mînen eidem.

Verse: 6281    des bin ih imer unfrô.'
Verse: 6282    sus antwortime dô

Verse: 6283    Candaulus unde sprah:
Verse: 6284    'swer ime hie tût diheinen slach,

Verse: 6285    mir ne breste daz swert,
Verse: 6286    er wirt eines grôzeren gewert

Verse: 6287    von mînes selbis handen,
Verse: 6288    wander rach mînen anden

Verse: 6289    und gwan mir widere mîn wîb.
Verse: 6290    ih wil ime hûte sînen lib

Verse: 6291    gesunt al hie behalden,
Verse: 6292    sol is gelucke walden.'

Verse: 6293       Karacter zô sînem brûder sprach:
Verse: 6294    'mir is vil harte ungemah,

Verse: 6295    daz du den wilt vor stân,
Verse: 6296    des hêre mir hât getân

Verse: 6297    harte vil ze leide:
Verse: 6298    er slûch mir mînen eidem.

Verse: 6299    dar umbe wil ih hûte geben
Verse: 6300    mîn lîb umbe sînen leben

Verse: 6301    oder kiesen mit ime den tôt,
Verse: 6302    wandih stunt in grôzer nôt

Verse: 6303    vor sînen hêren Alexandren.
Verse: 6304    daz wirt ime nû ze scanden.'

Verse: 6305       Dô wart mir vil leide.
Verse: 6306    di junchêren beide

Verse: 6307    griffen zô den schilden.
Verse: 6308    dô sprach di frowe milde

Verse: 6309    Candacis di kuninginne
Verse: 6310    mit michelen sinne

Verse: 6311    zô mir verholenlîche:
Verse: 6312    'Alexander, helt rîche,

Verse: 6313    du salt durh den willen mîn
Verse: 6314    hûte lâzen werden schîn,

Verse: 6315    ob du bist alsô wîs,
Verse: 6316    alse man saget, daz du sîs.

Verse: 6317    sô scheit mit listen disen strît.'
Verse: 6318    in der selber zît

Verse: 6319    sprah ih zô den junchêren:
Verse: 6320    'des hêttir lutzil êre,

Verse: 6321    slûgit ir einen ellenden man.
Verse: 6322    ouh wêriz ubile getân.

Verse: 6323    iz ne was nie reht,
Verse: 6324    daz siheinime kneht

Verse: 6325    oder siheineme bote
Verse: 6326    dihein hêre missebote.

Verse: 6327    iz ne wêre des wert,
Verse: 6328    daz ieman sîn swert

Verse: 6329    ubir mih hie irzoge.
Verse: 6330    ih bin mînis hêren herzoge.

Verse: 6331    er hiez mih fûren sînen vanen.
Verse: 6332    hêtih û gedienet wol dar ane,

Verse: 6333    des wêre mir nû nôt,
Verse: 6334    ih lige noh ungerne tôt.

Verse: 6335    lâzent mir den leben hân,
Verse: 6336    daz ist û bezzer getân.

Verse: 6337    sô wil ih û sweren daz,
Verse: 6338    daz irs getrûwet deste baz,

Verse: 6339    ih bringe û Alexanderen
Verse: 6340    und mit ime niemanne anderen

Verse: 6341    vil schiere an uhere gwalt
Verse: 6342    und lâzt ir dan den helt balt

Verse: 6343    genesen, sô tût ir wole.
Verse: 6344    den tôt ih noh ungerne dole.'

Verse: 6345       Dô sprah di frowe rîche
Verse: 6346    zô irn kinden lieblîche:

Verse: 6347    'ir ne sulit niwit scaden
Verse: 6348    mînen gaste, den ih haben.

Verse: 6349    er ist ein unscoldich man.
Verse: 6350    û hât leide getân

Verse: 6351    sîn hêre Alexander,
Verse: 6352    der veret hie in dem lande.

Verse: 6353    sendet disen hêren
Verse: 6354    wider mit uheren êren.

Verse: 6355    woldet ir an einen gaste
Verse: 6356    tûn uher laster,

Verse: 6357    des wurde after lande
Verse: 6358    gebreitet uher scande.'

Verse: 6359    sus behîlt ih den lîb.
Verse: 6360    daz vil listige wîb

Verse: 6361    ne sagite niemanne daz,
Verse: 6362    daz ih Alexander was.

Verse: 6363       Nâh dise sûze wort
Verse: 6364    wart garwe zestôrt

Verse: 6365    unsir allir vîentscaft
Verse: 6366    und wart ein stête frûntscaft

Verse: 6367    zô mir von den hêren
Verse: 6368    und gâben mir mit êren

Verse: 6369    hêrlîche gâbe,
Verse: 6370    golt âne wâge

Verse: 6371    unde einen halsperg gût.
Verse: 6372    des wart gefrowet mîn mût,

Verse: 6373    wander was maniger marke wert.
Verse: 6374    den ne mohte spere noh swert

Verse: 6375    durhsnîden noh durhstechen
Verse: 6376    noh nieren durhbrechen,

Verse: 6377    noh der wâfene nichein,
Verse: 6378    daz di sunne ie beschein.

Verse: 6379    si gâben mir noh dan
Verse: 6380    eine gâbe vil hêrsam,

Verse: 6381    di was mir wol ze danke:
Verse: 6382    einen sô gûten mantel,

Verse: 6383    daz nie nehein man
Verse: 6384    neheinen bezzeren gwan.

Verse: 6385    ouh gab mir ze minnen
Verse: 6386    di liebe kuninginne

Verse: 6387    eine gûte crône.
Verse: 6388    di was vile scône,

Verse: 6389    von einem adamante hart,
Verse: 6390    mit allen flîze gewart.

Verse: 6391    si sprah, si wêre mir reht,
Verse: 6392    wandih wêre ein gût kneht

Verse: 6393    lîbis unde gûtes
Verse: 6394    und eines harten mûtes.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.