TITUS
Lamprecht, Alexander (Strassburger Bearbeitung)
Part No. 82
Previous part

Chapter: 222  
Alexander fängt einen Wilden mit einer Jungfrau


Verse: 5359       Dô gesah ih und mîne man
Verse: 5360    eine scône burch vor uns stân.

Verse: 5361    di was gemachit mit sinne.
Verse: 5362    ih wêre gerne dar inne.

Verse: 5363    dô ne mohtis niwit sîn.
Verse: 5364    ih und daz here mîn

Verse: 5365    wir sâhen einen grôzen man,
Verse: 5366    der was freislîchen getân,

Verse: 5367    der quam dar ûz gegangen.
Verse: 5368    sîne hût was ime bevangen

Verse: 5369    al mit swînis bursten.
Verse: 5370    mih noh mîne fursten

Verse: 5371    ne wolder nîwit forhten.
Verse: 5372    ime dûhte, daz er ne dorfte.

Verse: 5373    er wânde, daz in nieman
Verse: 5374    mit wîge torste bestân.

Verse: 5375    daz liez er wol schînen.
Verse: 5376    dô gebôt ih den mînen,

Verse: 5377    daz si den man viengen.
Verse: 5378    dô si zô zin giengen,

Verse: 5379    er ne vorhte noh ne flô,
Verse: 5380    âne sorge stunt er dô.

Verse: 5381    dô hiez ih eine magit gân
Verse: 5382    schiere unde vor in stân.

Verse: 5383    ih wolde scowen dar an,
Verse: 5384    ob wêre dihein man,

Verse: 5385    dem di wîbis minne
Verse: 5386    nit ne brêhte ûzem sinne.

Verse: 5387    dô di magit zô zime ginc,
Verse: 5388    under sîne arme er si gevienc

Verse: 5389    und îlete vile balde
Verse: 5390    mit ir zô dem walde.

Verse: 5391    des wurde wir vil unfrô.
Verse: 5392    zô den rossen quâme wir dô.

Verse: 5393    uns wart vil harte gâh.
Verse: 5394    vaste îlete wir ime nâh.

Verse: 5395    dô wir den man bequâmen
Verse: 5396    und ime di maget nâmen,

Verse: 5397    dô gwan er eine stimme,
Verse: 5398    di was harte grimme,

Verse: 5399    grôz unde freislîch,
Verse: 5400    eines lewen stimme gelîch.

Verse: 5401    uns quam von ime michil nôt,
Verse: 5402    wander vorhte den tôt.

Verse: 5403    dô ime mîn here zô ginc,
Verse: 5404    dô gebôt ih, daz man in vinc

Verse: 5405    unde brâhtin gebunden
Verse: 5406    vor mih an den stunden.

Verse: 5407    ih hiez in brinnen in ein fûr.
Verse: 5408    ime wart sîn leben vil sûr;

Verse: 5409    unlange er lebete,
Verse: 5410    swî sêre er widerstrebete.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.