TITUS
Lamprecht, Alexander (Strassburger Bearbeitung)
Part No. 81
Previous part

Chapter: 248  
Alexander und die Blumenmädchen


Verse: 5157       Dô wir fûren bî den mere,
Verse: 5158    dô reit ih ûzer dem here

Verse: 5159    mit drîn dûsint mannen.
Verse: 5160    dô hûbe wir unsih dannen

Verse: 5161    und wolden wundir besehen.
Verse: 5162    dô sâhe wir verre dannen stên

Verse: 5163    einen hêrlîchen walt.
Verse: 5164    daz wunder daz was manicfalt,

Verse: 5165    daz wir dâ vernâmen.
Verse: 5166    dô wir dâ bî quâmen,

Verse: 5167    dô hôrte wir dar inne
Verse: 5168    manige scône stimme,

Verse: 5169    lîren unde harfen clanc
Verse: 5170    und den sûzesten sanc,

Verse: 5171    der von menschen ie wart gedâht,
Verse: 5172    wêrer allir zesamene brâht,

Verse: 5173    der ne kunde sih dar zô niet gegaten.
Verse: 5174    vil harte wunniclîch der scate

Verse: 5175    under den boumen dâr was.
Verse: 5176    dâ entsprungen blûmen unde gras

Verse: 5177    und wurze maniger kunne.
Verse: 5178    ih wene ie walt gewunne

Verse: 5179    alsô manige zîrheit.
Verse: 5180    er was lanc unde breit.

Verse: 5181    der selbe walt der lach,
Verse: 5182    alsih û der von sagen mach,

Verse: 5183    an einer scônen ouwen.
Verse: 5184    dâr môste wir scowen

Verse: 5185    manigen edelen brunnen,
Verse: 5186    der ûz den walde quam gerunnen

Verse: 5187    lûtir unde vil kalt.
Verse: 5188    ih und mîne helede balt

Verse: 5189    heten dâ wundiris gemach,
Verse: 5190    daz uns ze liebe dâ gescah.

Verse: 5191    daz ne wil ih sô niwit verdagen,
Verse: 5192    ih ne wil iz û flîzlîche sagen.

Verse: 5193       Der edele walt frône
Verse: 5194    was wunderlîchen scône.

Verse: 5195    des nâme wir allis goume.
Verse: 5196    hô wâren di boume.

Verse: 5197    di zelgen dicke unde breit.
Verse: 5198    nâh der rehten wârheit,

Verse: 5199    daz was ein michil wunne.
Verse: 5200    dâ ne mohte di sunne

Verse: 5201    an di erde niht geschîne.
Verse: 5202    ih unde di mîne

Verse: 5203    wir liezen unse ros stân
Verse: 5204    und giengen in den walt sân

Verse: 5205    durh den wunniclîchen sanc.
Verse: 5206    di wîle dûhte uns harte lanc,

Verse: 5207    biz wir dare quâmen,
Verse: 5208    dâr wir vernâmen,

Verse: 5209    waz wunderis dâ mohte sîn.
Verse: 5210    vil manich scône magetîn

Verse: 5211    wir al dâ funden,
Verse: 5212    di dâ in den stunden

Verse: 5213    spilten ûf den grûnen clê.
Verse: 5214    hundirt tûsint unde mê

Verse: 5215    di spileten unde sprungen;
Verse: 5216    hei wî scône si sungen,

Verse: 5217    daz beide cleine unde grôz
Verse: 5218    durh den sûzlîchen dôz,

Verse: 5219    den wir hôrten in den walt,
Verse: 5220    ih und mîne helede balt

Verse: 5221    vergâzen unse herzeleit
Verse: 5222    und der grôzen arbeit

Verse: 5223    und alliz daz ungemah
Verse: 5224    und swaz uns leides ie gescach.

Verse: 5225    uns allen dô bedûhte,
Verse: 5226    alsiz wol mohte,

Verse: 5227    daz wir genûc habeten,
Verse: 5228    di wîle daz wir lebeten,

Verse: 5229    frowede unde rîcheit.
Verse: 5230    dâ vergaz ih angist unde leit

Verse: 5231    unde mîn gesinde,
Verse: 5232    unde swaz uns von kinde

Verse: 5233    ie leides gescach
Verse: 5234    biz an den selben tach.

Verse: 5235    mir dûhte an der stunt,
Verse: 5236    ih ne wurde niemer ungesunt, '

Verse: 5237    ob ih dâr imer mûste wesen,
Verse: 5238    sô wâre ih garwe genesen

Verse: 5239    von aller angistlîcher nôt
Verse: 5240    und ne forhte niwit den tôt.

Verse: 5241       Woldir nû rehte verstân,
Verse: 5242    wî iz umbe di frowen quam,

Verse: 5243    wannen si bequâmen
Verse: 5244    oder wilich ende si nâmen,

Verse: 5245    des mach û wol besunder
Verse: 5246    nemen michil wunder.

Verse: 5247    swanne der winter abe ginc
Verse: 5248    und der sumer ane ginc,

Verse: 5249    und iz begunde grûnen,
Verse: 5250    und di edelen blûmen

Verse: 5251    in den walt begunden ûf gân,
Verse: 5252    dô wâren si vil wol getân:

Verse: 5253    lieht was ir glîze;
Verse: 5254    ir rôte unde ir wîze

Verse: 5255    vil verre von in schein.
Verse: 5256    blûmen ne wart nie nehein,

Verse: 5257    di scôner wesen mohte.
Verse: 5258    si wâren, alsuns bedûhte,

Verse: 5259    rehte sinewel als ein bal
Verse: 5260    und vaste beslozzen ubir al.

Verse: 5261    si wâren wunderlîchen grôz.
Verse: 5262    alse sih di blûme obene entslôz,

Verse: 5263    daz merket an uheren sinne,
Verse: 5264    sô wâren dar inne

Verse: 5265    megede rehte vollencomen.
Verse: 5266    ih sagû, alsitz hân vernomen.

Verse: 5267    si giengen unde lebeten,
Verse: 5268    menschen sin si habeten,

Verse: 5269    unde redeten unde bâten
Verse: 5270    rehte alse si hâten

Verse: 5271    aldir umbe zwelif jâr.
Verse: 5272    si wâren gescaffen, daz is wâr,

Verse: 5273    scône an ir lîbe.
Verse: 5274    ih ne sach nie von wîbe

Verse: 5275    scôner antluzze mê,
Verse: 5276    noh ougen alsô wol stê.

Verse: 5277    ir hande unde ir arme
Verse: 5278    wâren blanc alseinen harme

Verse: 5279    unde fûze unde bein.
Verse: 5280    undir in ne was nehein,

Verse: 5281    si ne phlêge scôner hubischeit.
Verse: 5282    si wâren mit zuhten wol gemeit

Verse: 5283    unde lacheten unde wâren frô
Verse: 5284    unde sungen alsô,

Verse: 5285    daz ê noh sint nehein man
Verse: 5286    sô sûze stimme ne vernam.

Verse: 5287       Mugint irs getrûwen,
Verse: 5288    sô solden dise frowen

Verse: 5289    alliz an den scate wesen,
Verse: 5290    sîne mohten andirs nit genesen.

Verse: 5291    swilhe di sunne beschein,
Verse: 5292    der ne bleib ze lîbe nie nehein.

Verse: 5293    daz wunder daz was manicfalt:
Verse: 5294    dô wart irschellet der walt

Verse: 5295    von der sûzer stimme,
Verse: 5296    di dâ sungen inne,

Verse: 5297    di fugele und di magetîn,
Verse: 5298    wî mohtiz wunniclîcher sîn

Verse: 5299    frô unde spâte.
Verse: 5300    al ir lîbis gewête

Verse: 5301    was ane si gewassen
Verse: 5302    ane hûte und ane vasse.

Verse: 5303    in was getân di varwe
Verse: 5304    nâh den blûmen garwe

Verse: 5305    rôt und ouh wîz sô der snê.
Verse: 5306    dô wir si zuns sâgen. gê,

Verse: 5307    zô zin spilete uns der lîb.
Verse: 5308    sus lussame wîb

Verse: 5309    sint der werlt unkunt.
Verse: 5310    nâh mînen here santih zestunt.

Verse: 5311    dô si ze mir quâmen
Verse: 5312    unde ouh vernâmen

Verse: 5313    di hêrlîchen stimme,
Verse: 5314    dâ vôren si mit sinne

Verse: 5315    unde slûgen ir gezelt
Verse: 5316    in den walt, niht an daz felt.

Verse: 5317    dô lâge wir dâr mit scalle
Verse: 5318    und froweten unsih alle

Verse: 5319    der seltsênen brûte.
Verse: 5320    ih und mîne lûte

Verse: 5321    wir wolten dâr blîven.
Verse: 5322    unde nâmen si ze wîben

Verse: 5323    und hatten mêr wunnen
Verse: 5324    dan wir ie gewunnen,

Verse: 5325    sint daz wir worden geborn.
Verse: 5326    owê daz wir sô schiere verlorn

Verse: 5327    daz michele gemach.
Verse: 5328    diz wunder ih alliz sah

Verse: 5329    selbe mit mînen ougen.
Verse: 5330    des mugent ir gelouben.

Verse: 5331    diz werte, alsih û sage,
Verse: 5332    drî mânede unde zwelif tage,

Verse: 5333    daz ih und mîne helede balt
Verse: 5334    wâren in dem grûnen walt

Verse: 5335    und bî der scônen owen
Verse: 5336    mit den lieben frowen

Verse: 5337    und wunne mit in habeten
Verse: 5338    und mit froweden lebeten.

Verse: 5339    vil jâmerlîche uns dô gescach,
Verse: 5340    daz ih verclagen nit ne mach.

Verse: 5341    dô di zît vollenginc,
Verse: 5342    unse frowede di zeginc:

Verse: 5343    di blûmen gare verturben
Verse: 5344    und di scônen frowen sturben.

Verse: 5345    di boume ir loub liezen
Verse: 5346    und di brunnen ir fliezen

Verse: 5347    unde di fugele ir singen.
Verse: 5348    dô begunde dwingen

Verse: 5349    unfrowede mîn herze
Verse: 5350    mit manicfalder smerze.

Verse: 5351    freislîch was mîn ungemah,
Verse: 5352    daz ih alle tage sah

Verse: 5353    an den scônen frowen.
Verse: 5354    owê wî si mih rûwen,

Verse: 5355    dô ih si sah sterben
Verse: 5356    und di blûmen verterben,

Verse: 5357    dô schiet ih trûrich dannen
Verse: 5358    mit allen mînen mannen.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.