TITUS
Lamprecht, Alexander (Strassburger Bearbeitung)
Part No. 78
Previous part

Chapter: 256  
Alexander vertreibt Riesen mit Geschrei


Verse: 5054    hie mugit ir wunder hôren.

Verse: 5055    di ros mûweten si dar zû.
Verse: 5056    dannen hûbe wir uns dô

Verse: 5057    an ein velt, heizet Accia.
Verse: 5058    unse gezelt slûge wir dâ

Verse: 5059    und rûweten an dem velde
Verse: 5060    under unsen gezelde.

Verse: 5061    froweden dâr mîn here plach.
Verse: 5062    wir nâmen sulich gemach,

Verse: 5063    sô wir dâr vonden.
Verse: 5064    dar nâh in curzen stunden

Verse: 5065    vôre wir mit gewalt
Verse: 5066    in einen harte scônen walt.

Verse: 5067    dâ stunden hôe boume.
Verse: 5068    des nâme wir allis goume.

Verse: 5069    ûf den boumen wôhs alliz daz,
Verse: 5070    daz daz lantlût az,

Verse: 5071    dâ si sih mite nereten,
Verse: 5072    di uns daz lant wereten,

Verse: 5073    di wâren ummâzlîchen grôz.
Verse: 5074    owî wî starke uns der verdrôz,

Verse: 5075    wandiz wâren gigande
Verse: 5076    und trûgen an ir hande

Verse: 5077    stahelîne stangen
Verse: 5078    und quâmen uns zô gegangen

Verse: 5079    vil unfridelîche.
Verse: 5080    ih gedâhte wîslîche

Verse: 5081    unde begunden râten,
Verse: 5082    waz wir dar wider tâten.

Verse: 5083    wir wochzeten alle insamen,
Verse: 5084    wande si nie mêr ne vernâmen

Verse: 5085    neheines menschen stimme:
Verse: 5086    sô fluhen si vil grimme

Verse: 5087    verre in einen grôzen walt.
Verse: 5088    al dâ wurden si gezalt

Verse: 5089    an sehs hundrit.
Verse: 5090    dô wurden ir gesundrit

Verse: 5091    von den andren fier und drîzic,
Verse: 5092    di verlorn dâ den lîb.

Verse: 5093    daz ne wil ih niemer geclagen.
Verse: 5094    ouh wart der mîner dâ verslagen

Verse: 5095    rehte vier und zwênzic.
Verse: 5096    drî tage bleib ih

Verse: 5097    aldâ mit mînen mannen.
Verse: 5098    dô hûb ih mih dannen.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.