TITUS
Lamprecht, Alexander (Strassburger Bearbeitung)
Part No. 77
Previous part

Chapter: 211a  
Alexander stößt auf süßes Wasser


Verse: 4960       Dô hûb sih mîn heriscraft,
Verse: 4961    wandiz rehte was bedâht,

Verse: 4962    ûf bî daz wazzer,
Verse: 4963    daz ê was bitter,

Verse: 4964    daz wart dô sûze unde gût.
Verse: 4965    des wart gefrowet unse mût.

Verse: 4966    dô slûge wir unse gezelt
Verse: 4967    bî dem wâge an daz velt

Verse: 4968    unde mahten michel fûr.
Verse: 4969    di rûwe wart uns dâ vil sûr,

Verse: 4970    wande ûz dem walde quam gegân
Verse: 4971    manih tier freisam

Verse: 4972    und freislîch gewurme.
Verse: 4973    mit den begunde wir stormen

Verse: 4974    vil nâh alle di naht,
Verse: 4975    der durst hete si dare brâht.

Verse: 4976    des wazzers wânden si sih laben.
Verse: 4977    scorpiones tâten uns grôzen scaden.

Verse: 4978    si wâren breit unde lanc
Verse: 4979    unde heten freislîchen ganc,

Verse: 4980    beide wîz unde rôt;
Verse: 4981    si tâten uns michele nôt,

Verse: 4982    si irbizzen uns manigen man.
Verse: 4983    dô quâmen lewen gegân,

Verse: 4984    di wâren grôz unde starc.
Verse: 4985    mêrre vorhte nie ne wart

Verse: 4986    under neheineme here.
Verse: 4987    den lewen môste wir uns were.

Verse: 4988    dar nâh quam zô zuns gegân
Verse: 4989    manic eber freisam,

Verse: 4990    grôzere dan di lewen.
Verse: 4991    mit den zanden si hiwen

Verse: 4992    alliz, daz vor in was.
Verse: 4993    daz unsir ie dehein genas,

Verse: 4994    des habe got danc.
Verse: 4995    di zande wâren in lanc

Verse: 4996    einer clâfter oder mê.
Verse: 4997    di tâten uns vil wê.

Verse: 4998    dô quâmen elefande
Verse: 4999    manige gegangen

Verse: 5000    trinken zô dem wâge.
Verse: 5001    wir liden ungenâde.

Verse: 5002    ouh sûhten uns slangen
Verse: 5003    ummâzen lange

Verse: 5004    mit ûf gerihter brust.
Verse: 5005    wir liden michil unlust.

Verse: 5006    dô quâmen lûte gegân
Verse: 5007    alse tûbele getân.

Verse: 5008    si wâren alse affen
Verse: 5009    under den ougen gescaffen.

Verse: 5010    si heten sehs hande,
Verse: 5011    lanc wâren in di zande.

Verse: 5012    harte mûweten si mîn here;
Verse: 5013    den lûten môste wir uns were

Verse: 5014    mit speren joh mit scozzen.
Verse: 5014a    di sturben ungenozzen.

Verse: 5015       Unse nôt di was manicfalt.
Verse: 5016    dô brante wir den selben walt.

Verse: 5017    daz was durh daz getân,
Verse: 5018    daz wir fride môsten hân

Verse: 5019    vor den freislîchen tieren.
Verse: 5020    dar nâh vil schiere

Verse: 5021    sah ih daz grûwelîchiste tier,
Verse: 5022    daz sint oder êr

Verse: 5023    ieman mohte gescowen,
Verse: 5024    daz sah ih mit mînen ougen.

Verse: 5025    freisamer tier niemer ne wirt.
Verse: 5026    iz was gezwîget alsein hirz:

Verse: 5027    iz hete drî stangen
Verse: 5028    grôze unde lange.

Verse: 5029    ne wêre ih der mînen trôst,
Verse: 5030    iz hête des lîbis irlôst

Verse: 5031    ein michil teil von mînem here.
Verse: 5032    sehs und drîzic wâren dere,

Verse: 5033    di iz mit den hornen irslûh.
Verse: 5034    iz was freislîch genûch.

Verse: 5035    ouh sagih û zwâren,
Verse: 5036    daz ir funfzic wâren,

Verse: 5037    di iz irtrat mit den vûzen,
Verse: 5038    nû wirz û sagen mûzen.

Verse: 5039       Dar nâh in der nâhesten naht,
Verse: 5040    des hân ih ouh mir bedâht,

Verse: 5041    alse wirz dâ vernâmen,
Verse: 5042    fôchse dar ouh quâmen

Verse: 5043    grôze ûzir mâzen.
Verse: 5044    di lîchamen si âzen.

Verse: 5045    daz ne mohte wir niwit irwere,
Verse: 5046    ih unde al mîn here.

Verse: 5047    in dem velde, dâ wir lâgen,
Verse: 5048    fliegen wir sâgen

Verse: 5049    alse tûben unde lederswalen.
Verse: 5050    daz ne beviel uns niwit wale.

Verse: 5051    si heten menschen zane.
Verse: 5052    si âzen uns allizane

Verse: 5053    nasen unde ôren.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.