TITUS
Lamprecht, Alexander (Strassburger Bearbeitung)
Part No. 72
Previous part

Chapter: 172  
Alexander übernimmt die Herrschaft in Indien


Verse: 4688       Dô Poren here gesach,
Verse: 4689    daz ir hêre tôt lach,

Verse: 4690    si ne verzageten niwit umbe daz,
Verse: 4691    si fâhten alle deste baz,

Verse: 4692    wande dô begunden strîten
Verse: 4693    di here von beiden sîten,

Verse: 4694    unde gemischete sih ze samene
Verse: 4695    mit grimme di menige.

Verse: 4696    dô hûb sich êrist der wîch.
Verse: 4697    dâ verlôs manic man den lîb.

Verse: 4698    di grûnen wisen worden rôt.
Verse: 4699    der môre lach dâ vile tôt,

Verse: 4700    sô tetiz ouh der Kriechen.
Verse: 4701    ze gîsele si dâ liezen

Verse: 4702    manigen ellenden gast.
Verse: 4703    nehein helm ne was sô vast,

Verse: 4704    Alexander ne slûge der durh.
Verse: 4705    dâ wart gevollit manic furh

Verse: 4706    mit dem blûte al rôt.
Verse: 4707    dâ was di grimmiste nôt,

Verse: 4708    di dâr ie dehein man
Verse: 4709    in folcwîge vernam.

Verse: 4710    getunget wart di heide.
Verse: 4711    dâ vielen di veige,

Verse: 4712    unz man ûf si mohte gân.
Verse: 4713    dâ wart vil leide getân

Verse: 4714    manigen stolzen manne,
Verse: 4715    di niemer mê quam danne.

Verse: 4716    di hêren von India
Verse: 4717    di holeten grôzen scaden dâ,

Verse: 4718    wande Alexander
Verse: 4719    frumete sulh wunder,

Verse: 4720    daz is alle di mac jâmer haben,
Verse: 4721    di iz imer gehôren sagen.

Verse: 4722    daz lût von Mauritanie
Verse: 4723    daz habite sih zesamene

Verse: 4724    und gulden ein herte widergelt.
Verse: 4725    dâ flôz daz blût ubir velt.

Verse: 4726    di scare si durhbrâchen,
Verse: 4727    irn hêren si dâ râchen,

Verse: 4728    und di Kriechen slûgen si wider.
Verse: 4729    dâ viel manic tôt nider.

Verse: 4730    dâ viel man ubir man.
Verse: 4731    Alexander doh den sige nam

Verse: 4732    ubir di grimmigen diet.
Verse: 4733    si ne gereten neheines friden niet,

Verse: 4734    unz Alexander gelobete,
Verse: 4735    daz nieman in ne scadete

Verse: 4736    ane wîben unde an kinden,
Verse: 4737    dô entfiengen si daz gedinge

Verse: 4738    und wurden alle undertân
Verse: 4739    deme hêren von Macedonian.

Verse: 4740       Alexander in dô urlob gab,
Verse: 4741    daz si fûren an di walstat

Verse: 4742    unde bewareten mit êren
Verse: 4743    Porum irn hêren.

Verse: 4744    bereite wâren si dar zû.
Verse: 4745    sciere hûben si sih dô,

Verse: 4746    dâ si irn hêren funden.
Verse: 4747    in den selben stunden

Verse: 4748    bestatten si hêrlîchen
Verse: 4749    Porum den rîchen

Verse: 4750    unde andre ire holden,
Verse: 4751    di si begraben wolden,

Verse: 4752    mit êren si di grûben.
Verse: 4753    si folten manige grûben

Verse: 4754    mit frûnden unde mit mâgen,
Verse: 4755    di dâ irslagen lâgen.

Verse: 4756    daz sagih û zewâren.
Verse: 4757    di dâ gewunt wâren,

Verse: 4758    di fûrten si heim in ire lant.
Verse: 4759    ouh bleib dâ manic wîgant

Verse: 4760    biz daz sîne wunden
Verse: 4761    heilen begunden.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.