TITUS
Lamprecht, Alexander (Strassburger Bearbeitung)
Part No. 71
Previous part

Chapter: 171  
Alexander im Zweikampf mit Porus


Verse: 4610       Dô Alexander gesach,
Verse: 4611    daz dâ sô vil tôt lach

Verse: 4612    sîner wîgande:
Verse: 4613    alsô getâner scande

Verse: 4614    was er ê vil ungewone-
Verse: 4615    vil schiere was er dô comen,

Verse: 4616    dâ er Porum gesach.
Verse: 4617    vermezzenlîche er zô ime sprah:

Verse: 4618    'des habe wir, kuninc, laster,
Verse: 4619    daz unser zweier geste

Verse: 4620    sô lange samt vehten,
Verse: 4621    unz di gûten knehte

Verse: 4622    beidenthalp werdent irslagen:
Verse: 4623    sô ne muge wirz niemer mêr verclagen

Verse: 4624    noh niemer mêr verwinden
Verse: 4625    under unsen ingesinden.

Verse: 4626    nû lâze wir di here stân
Verse: 4627    und in beidenthalben fride hân

Verse: 4628    und swer den zebreche,
Verse: 4629    daz manz an ime reche.

Verse: 4630    nû nem du kuninc wider mich
Verse: 4631    und ih ein einwîch wider dich:

Verse: 4632    swer daz heil gewinne
Verse: 4633    und mit gnâden comet hinne,

Verse: 4634    dem werden des anderen man
Verse: 4635    mit ir dieniste undirtân.'

Verse: 4636       Porus der rîche
Verse: 4637    der globete frôlîche,

Verse: 4638    daz Alexander dâr sprah.
Verse: 4639    ime was zô dem camphe gâch.

Verse: 4640    er was vil langer
Verse: 4641    dan der kuninc Alexander,

Verse: 4642    zweier clâftere unde mêr.
Verse: 4643    Porus was stark unde hêr.

Verse: 4644    des getrôster sih
Verse: 4645    unde gelobete daz einwîch.

Verse: 4646    daz wart ime sint ze leide.
Verse: 4647    di kuninge kûme beide

Verse: 4648    des kamphis irbeiten,
Verse: 4649    dar zô si sih bereiten.

Verse: 4650    dô si solden strîten,
Verse: 4651    dô stunden in beiden sîten

Verse: 4652    di here, alse dâ gelobit was.
Verse: 4653    di hêren zucten di sahs,

Verse: 4654    zesamene si dô sprungen.
Verse: 4655    woh wî di swert clungen

Verse: 4656    an der fursten handen,
Verse: 4657    dâ sih di wîgande

Verse: 4658    hiwen alse di wilde swîn.
Verse: 4659    dâ was nît under in.

Verse: 4660    michil wart der stahilscal.
Verse: 4661    daz fûr blickete ubir al,

Verse: 4662    dâ si des schildes rande
Verse: 4663    zehiwen vor di hande.

Verse: 4664    si giengen alle wîle
Verse: 4665    wider ein ander ze bîle.

Verse: 4666    wol nutzeten di ecken
Verse: 4667    di tûrlîche recken

Verse: 4668    ir geweder wider den anderen.
Verse: 4669    dô dûhte Alexanderen,

Verse: 4670    daz er daz bezzer habete.
Verse: 4671    Poren lût des irzagete

Verse: 4672    und ouh von unheile
Verse: 4673    vercrîsten algemeine.

Verse: 4674    under des Porus dare sach,
Verse: 4675    unde Alexander gab ime einen slah

Verse: 4676    und tetime an den stunden
Verse: 4677    eine sô grôze wunden,

Verse: 4678    daz der michele man
Verse: 4679    zô der erde gevallen quam

Verse: 4680    swî gerne er wider wolde streben,
Verse: 4681    er ne mohte langer niwit leben.

Verse: 4682    er lach dâr zehant tôt.
Verse: 4683    daz môse wesen durh di nôt,

Verse: 4684    wandime Alexander
Verse: 4685    selbe mit sînen handen

Verse: 4686    daz houbit von dem bûche slûch.
Verse: 4687    dô heter des camphes genûch.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.